ARTIKEL DIPELAJAR 34
Belajar ari Jaku Benabi dalam Bup Kudus
“Semina sida ke bepenemu-dalam aja deka mereti.”—DAN. 12:10.
LAGU 98 Bup Kudus—Bepun ari Petara
DALAM ARTIKEL TU a
1. Nama ulih nulung kitai rindu agi belajarka jaku benabi dalam Bup Kudus?
SIKU menyadi lelaki ke biak ti benama Ben madahka: “Aku rindu belajarka jaku benabi dalam Bup Kudus.” Kati nuan ngembuan asai ati ti sama? Tauka kati nuan ngasaika jaku benabi dalam Bup Kudus nya kelalu tusah deka dimereti sereta boring? Lebuh nuan nemu kebuah Jehovah nentuka jaku benabi bisi ditulis dalam Jaku Iya, nuan engka deka berengkah rinduka jaku benabi nya.
2. Nama deka dikerandauka kitai dalam artikel tu?
2 Dalam artikel tu, kitai deka berandauka kebuah kitai patut belajarka jaku benabi dalam Bup Kudus, sereta nama utai ke ulih nulung kitai belajarka jaku benabi nya. Udah nya, kitai deka beratika dua iti jaku benabi dalam bup Daniel, lalu kitai deka meda baka ni kitai tau bulih penguntung lebuh kitai meretika dua iti jaku benabi nya.
NAMA KEBUAH BELAJARKA JAKU BENABI DALAM BUP KUDUS?
3. Nama patut digaga kitai enti kitai deka meretika jaku benabi dalam Bup Kudus?
3 Kitai patut minta tulung enti kitai deka meretika jaku benabi dalam Bup Kudus. Peratika chunto tu. Gambarka nuan benung ngelawa siti endur ke enda biasa ba nuan. Tang kaban ke enggau nuan kin, nemu endur nya enggau manah. Iya nemu dini alai nuan sereta penunga tiap iti jalai ba endur nya. Nuan tentu gaga ati laban kaban nuan deka enggau nuan kin! Baka nya mega, Jehovah baka kaban nya tadi, ti ulih nulung kitai. Iya amat nemu utai ti deka nyadi jemah ila. Nyadi, kena meretika jaku benabi dalam Bup Kudus, kitai mesti enggau baruh ati minta tulung ari Jehovah.—Dan. 2:28; 2 Pet. 1:19, 20.
Belajarka jaku benabi dalam Bup Kudus ulih nulung kitai besedia ke utai ti deka nyadi jemah ila (Peda genteran 4)
4. Nama kebuah Jehovah nentuka jaku benabi ditulis dalam Bup Kudus? (Jeremiah 29:11) (Peda mega gambar.)
4 Baka apai indai ti dekaka bala anak sida bisi pengidup ti manah, Jehovah mega deka bala anak Iya ngembuan pengidup ti manah jemah ila. (Bacha Jeremiah 29:11.) Tang enda baka bala apai indai ba dunya tu, Jehovah ulih madahka kitai utai ti deka nyadi jemah ila, lalu Iya seruran betul. Jehovah nentuka jaku benabi ditulis dalam Bup Kudus ngambika kitai ulih nemu pekara ti penting sebedau utai nya nyadi. (Isa. 46:10) Jaku benabi dalam Bup Kudus nya pemeri ti manah ari Apai kitai ti di serega. Tang nama kebuah nuan ulih andal utai ti dipadah Bup Kudus amat deka nyadi?
5. Nama ulih dipelajarka bala nembiak ari pengalaman Max?
5 Ba sekula, bala nembiak kitai suah dikelingi orang ke kurang bebasaka Bup Kudus. Bisi mega langsung enda bebasaka Bup Kudus. Kekadang, sekeda utai ke dipadah tauka dikereja sida ulih ngasuh nembiak ke Saksi berasai kakang ati enggau utai ti dipechaya iya. Peratika pengalaman siku menyadi lelaki ke benama Max. Ku iya: “Maya aku agi nembiak, aku berengkah kakang ati sekalika apai indai aku ngajar aku pengarap ti bendar tauka enda. Aku mega kakang ati enti Bup Kudus amat datai ari Petara.” Nama digaga apai indai iya? Ku iya: “Apai indai aku mengkang tenang, taja pan aku nemu seduai iya irau.” Apai indai Max nyaut tanya iya nengah Bup Kudus. Max mega bisi ngereja sekeda utai. Ku iya: “Aku belajarka jaku benabi dalam Bup Kudus kediri empu. Aku mega berandauka utai ti dipelajarka aku enggau bala nembiak ke bukai dalam raban gempuru aku.” Nama asil iya? Ku Max: “Pengudah nya, aku yakin Bup Kudus endang datai ari Petara!”
6. Nama patut digaga nuan enti sema nuan kakang ati, lalu nama kebuah?
6 Baka Max, enti nuan berengkah kakang ati sekalika Bup Kudus nya ngundan pemendar tauka enda, nuan enda ibuh berasai malu. Tang nuan patut ngereja sekeda utai pasal asai ati nuan ti kakang nya. Asai ati ti kakang nya baka karat. Enti karat nya enda dibuai, iya ulih belubah-lubah ngerusak utai ti berega. Kena muai asai ati ti kakang ke ulih ngerusak pengarap nuan, nuan patut nanya diri empu, ‘Kati aku pechayaka utai ti dipadah Bup Kudus pasal jemah ila?’ Enti nuan kakang ati, nuan patut belajarka jaku benabi dalam Bup Kudus ke udah dikeamatka. Peratika chara nuan ulih ngereja nya.
CHARA BELAJARKA JAKU BENABI DALAM BUP KUDUS
Ngambika ulih ngembuan pengarap ngagai Jehovah baka Daniel, kitai mesti baruh ati, mansik enggau silik, sereta ngembuan motif ti betul lebuh belajarka jaku benabi dalam Bup Kudus (Peda genteran 7)
7. Nama udah nulung Daniel belajarka jaku benabi? (Daniel 12:10) (Peda mega gambar.)
7 Daniel netapka siti teladan ti manah pasal chara belajarka jaku benabi. Daniel belajarka jaku benabi enggau motif ti betul. Iya deka nemu pasal pemendar. Daniel mega baruh ati. Iya nemu Jehovah deka nulung iya meretika jaku benabi enti iya mengkang semak enggau Jehovah sereta ngasika Iya. (Dan. 2:27, 28; bacha Daniel 12:10.) Daniel nunjukka diri baruh ati lebuh iya bepanggai ba tulung ke diberi Jehovah. (Dan. 2:18) Daniel mega belajarka jaku benabi enggau silik. Iya mansik ayat Bup Kudus ke bisi maya jeman iya. (Jer. 25:11, 12; Dan. 9:2) Baka ni nuan ulih neladan Daniel?
8. Nama kebuah sekeda orang enggai pechayaka jaku benabi dalam Bup Kudus udah dikeamatka, tang nama patut digaga kitai?
8 Peresa motif nuan. Kati nuan belajarka jaku benabi dalam Bup Kudus laban nuan keran deka nemu pemendar? Enti pia, Jehovah deka nulung nuan. (Jhn. 4:23, 24; 14:16, 17) Taja pia, sekeda orang belajarka Bup Kudus ketegal kebuah ke bukai. Sekeda orang belajar laban sida nguji deka nunjukka Bup Kudus nya ukai ari Petara. Sida ngumbai, enti Bup Kudus ukai datai ari Petara, sida ulih nentuka kediri empu pasal utai ti betul enggau utai ti salah. Taja pia, kitai patut bisi motif ti betul lebuh belajar. Nambahka nya, bisi siti sifat ti penting ke patut dikembuan kitai kena meretika jaku benabi dalam Bup Kudus.
9. Nama sifat ti patut dikembuan kitai kena meretika jaku benabi dalam Bup Kudus? Terangka.
9 Baruh ati. Jehovah besemaya deka nulung orang ti baruh ati. (Jas. 4:6) Nyadi, kitai patut besampi minta tulung ari Iya kena meretika jaku benabi dalam Bup Kudus. Enti kitai baruh ati, kitai mega deka nerima tulung ari ulun ke tetap ati. Jehovah ngena sida meri kitai pemakai rohani ba maya ti patut. (Luk. 12:42) Jehovah nya Petara ti teratur. Nya alai, endang masuk akal enti Iya semina ngena ulun ke tetap ati kena nulung kitai meretika pemendar ke bisi dalam Jaku Iya.—1 Kor. 14:33; Eps. 4:4-6.
10. Nama ulih dipelajarka nuan ari pengalaman Esther?
10 Belajar enggau silik. Berengkah belajarka siti jaku benabi ke dikerinduka nuan. Tu meh utai ke dikereja siku menyadi indu ke benama Esther. Iya deka nemu mayuh agi pasal jaku benabi ke madah pasal penatai Messiah. Ku iya: “Lebuh aku beumur 15 taun, aku berengkah ngiga bukti ke nunjukka jaku benabi nya amat ditulis sebedau jeman Jesus.” Utai ti dibacha iya pasal Gulung Surat Tasik Mati ngasuh iya yakin agi. Iya madahka: “Sekeda ari gulung surat nya ditulis sebedau jeman Kristus. Nyadi, jaku benabi ke bisi dia tentu datai ari Petara.” Esther ngaku: “Aku patut macha sekeda penerang beberapa kali ngambika ulih faham utai ke dibacha.” Tang Esther gaga ati laban iya ngaga usaha nya. Pengudah belajar enggau silik pasal sekeda jaku benabi dalam Bup Kudus, ku Esther madahka: “Aku amat yakin utai ti dipadah Bup Kudus endang amat!”
11. Nama penguntung iya lebuh kitai empu yakin jaku dalam Bup Kudus nya endang amat?
11 Lebuh kitai meda chara sekeda jaku benabi dalam Bup Kudus udah dikeamatka, kitai deka arap agi ngagai Jehovah lalu pechayaka sebarang iring ke diterima kitai ari Iya. Pia mega, jaku benabi dalam Bup Kudus madahka pasal harapan kitai ke jemah ila. Nya alai, lebuh kitai belajarka jaku benabi, kitai deka mengkang positif taja pan kitai benung napi penanggul. Aram kitai beratika dua iti jaku benabi ke ditulis Daniel, ke benung dikeamatka diatu. Enti kitai meretika dua iti jaku benabi nya, kitai ulih ngaga pemutus ti manah.
NAMA KEBUAH NUAN PATUT NEMU PASAL KAKI BESI KE BECHAMPUR ENGGAU TANAH LIAT?
12. Nama utai ke digambarka kaki besi ke “bechampur enggau tanah liat”? (Daniel 2:41-43)
12 Bacha Daniel 2:41-43. Daniel bisi nerangka reti siti mimpi Raja Nebukadnesar. Dalam mimpi nya, Raja Nebukadnesar meda siti patung ti besai. Kaki patung nya digaga ari besi ke “bechampur enggau tanah liat.” Lebuh kitai mandingka jaku benabi tu enggau jaku benabi ke bukai dalam bup Daniel enggau bup Pemandang, kitai nemu kaki nya ngambarka Amerika Serikat enggau Britain ke bekerejasama. Dua iti menua tu perintah ti pemadu bekuasa kemayaharitu. Bekaul enggau kuasa dunya tu, Daniel madahka “perintah nya kering, tang bisi mega pengelemi.” Nama kebuah sida bisi pengelemi? Laban bala rayat, ke digambarka baka tanah liat, ngelemika kuasa perintah nya. Nya alai, perintah ke patut kering baka besi nya enda ulih ngena kuasa sida enggau pengabis iya. b
13. Nama sekeda pemendar ti penting ke dipelajarka kitai ari jaku benabi tu?
13 Kitai belajar sekeda pemendar ti penting ari patung ke diterangka Daniel, kelebih agi ari kaki patung nya. Keterubah, Kuasa Dunya Anglo-Amerika udah nunjukka diri amat bekuasa. Ambika chunto, Amerika Serikat enggau Britain nya entara menua ke menang ba Perang Dunya I enggau Perang Dunya II. Taja pia, kuasa dunya tu udah nyadi lemi. Iya deka terus nyadi lemi laban bala rayat iya belaban enggau pangan diri sereta ngelaban perintah. Kedua, Kuasa Dunya Anglo-Amerika nya kuasa dunya ti penudi ke deka merintah sebedau Perintah Petara ngerusak semua perintah mensia. Taja pan menua bukai kekadang nguji ngelaban Kuasa Dunya Anglo-Amerika, tang sida enda ulih nganti iya. Kitai nemu utai tu laban “batu” ke ngambarka Perintah Petara deka ngerusak kaki nya, iya nya begian patung ke ngambarka Kuasa Dunya Anglo-Amerika.—Dan. 2:34, 35, 44, 45.
14. Lebuh kitai meretika jaku benabi pasal kaki besi ke bechampur enggau tanah liat, baka ni tu ulih nulung kitai ulih ngaga pemutus ti manah?
14 Kati nuan yakin, jaku benabi Daniel pasal kaki besi ke bechampur enggau tanah liat nya amat? Enti nuan yakin, nuan tentu deka ngaga ubah ba pengidup. Nuan enda ngiga pengaya tauka bebendar deka ngulihka mayuh reta laban nuan nemu dunya ti jai tu deka dirusak enda lama da agi. (Luk. 12:16-21; 1 Jhn. 2:15-17) Lebuh nuan faham pasal jaku benabi tu, nuan mega deka sedar pengawa nginjil sereta ngajar nya amat penting. (Mat. 6:33; 28:18-20) Pengudah belajarka jaku benabi tu, tanya diri empu, ‘Kati pemutus ke digaga aku nunjukka aku amat yakin Perintah Petara deka ngerusak semua perintah mensia enda lama da agi?’
NAMA KEBUAH NUAN PATUT NEMU PASAL “RAJA UTARA” ENGGAU “RAJA SELATAN”?
15. Sapa “raja utara” enggau “raja selatan” kemayaharitu? (Daniel 11:40)
15 Bacha Daniel 11:40 ari nota kaki. c Bup Daniel bagi 11 bejaku pasal dua iku raja, tauka dua iti perintah, ke belaban enggau pangan diri. Lebuh kitai mandingka jaku benabi tu enggau jaku benabi ke bukai dalam Bup Kudus, kitai nemu kemayaharitu “raja utara” nya Rusia enggau menua bukai ti nyukung iya, lalu “raja selatan” nya Kuasa Dunya Anglo-Amerika. d
Kitai ulih negapka pengarap kitai sereta nyeliahka diri ari berasai kelalu irau enti kitai sedar, sakal ke datai ari “raja utara” enggau “raja selatan” nya ngamatka jaku benabi dalam Bup Kudus (Peda genteran 16-18)
16. Nama cabaran ke ditapi bala nembiak Petara ke idup di baruh perintah “raja utara”?
16 Nembiak Petara ti idup di baruh perintah “raja utara” benung diperinsa raja tu. Sekeda bala Saksi dipalu sereta dijil ketegal pengarap sida. Tang bala menyadi kitai enda takut. Perinsa ke datai ari “raja utara” udah negapka pengarap sida ngagai Jehovah enggau Jaku Iya. Nama kebuah? Laban bala menyadi kitai nemu, perinsa ke ditapi bala nembiak Petara ngamatka jaku benabi dalam bup Daniel. e (Dan. 11:41) Lebuh kitai nemu utai tu, nya ulih nulung kitai negapka harapan kitai, lalu nulung kitai mengkang tetap ati ngagai Jehovah.
17. Nama cabaran ke udah ditapi bala nembiak Petara ke idup di baruh perintah “raja selatan”?
17 Suba, “raja selatan” mega kala merinsa bala nembiak Jehovah. Ambika chunto, maya Perang Dunya I enggau Perang Dunya II, mayuh bala menyadi dijil, lalu sekeda bala anak ke Saksi dibuai ari sekula laban sida mengkang neutral. Dalam beberapa taun ti udah, penetap ati bala nembiak Jehovah ke diau di baruh perintah “raja selatan” diuji nengah chara bukai. Ambika chunto, maya bisi kimpin ngundi, orang Kristian engka diuji ngambika nyukung sesiti parti politik tauka sesiku chalun politik. Taja pan iya enda ngundi, tang iya engka ngasaika sesiti parti politik manah agi ari parti ke bukai. Ngambika ulih mengkang neutral, kitai mesti bejimat enggau utai ti dikereja kitai, utai ti diperundingka kitai, sereta utai ti diasaika kitai!—Jhn. 15:18, 19; 18:36.
18. Nama reaksi ke patut dikembuan kitai lebuh kitai meda “raja utara” belaban enggau “raja selatan”? (Peda mega gambar.)
18 Sida ke enda arapka jaku benabi dalam Bup Kudus engka berasai amat irau lebuh sida meda “raja selatan” belaban enggau “raja utara.” (Dan. 11:40, NWT) Kedua-dua iku raja tu bisi senyata enggau bom ti amat bekuasa, ke ulih ngemunaska semua utai ti idup ba dunya. Tang kitai nemu, Jehovah tentu enda nejuka utai nya nyadi. (Isa. 45:18) Nyadi, ari ke berasai irau pasal utai ti deka nyadi jemah ila, pengarap kitai patut ditegapka agi lebuh meda penanggul ke nyadi entara “raja utara” enggau “raja selatan.” Tu nunjukka pengujung sistem dunya tu udah semak.
TERUS BERATIKA JAKU BENABI DALAM BUP KUDUS
19. Nama utai ti patut ditemu kitai bekaul enggau jaku benabi dalam Bup Kudus?
19 Kitai enda nemu baka ni sekeda jaku benabi dalam Bup Kudus deka dikeamatka. Indah nabi Daniel mega enda meretika semua utai ti ditulis iya. (Dan. 12:8, 9) Taja pan kitai enda nemu enggau nyemetak baka ni sesiti jaku benabi deka dikeamatka, tang tu ukai reti iya jaku benabi nya bula. Lalu baka ke udah digaga Jehovah kelia, kitai ulih yakin Iya deka nulung kitai meretika utai ti patut ditemu kitai ba maya ti ngena.—Amo. 3:7.
20. Nama jaku benabi ti ngagitka ati dalam Bup Kudus ti deka dikeamatka enda lama da agi, lalu nama utai ti patut terus dikereja kitai?
20 Bala perintah ba dunya tu deka madahka: “Diatu, kitai bisi pengelantang enggau pengelikun!” (1 Tes. 5:3) Udah nya, bala perintah ba dunya tu deka nyerang sereta ngerusak pengarap pelesu. (Pem. 17:16, 17) Pengudah nya, sida deka nyerang bala nembiak Petara. (Esk. 38:18, 19) Semua tu deka mai ngagai perang Armagedon, iya nya perang ti penudi. (Pem. 16:14, 16) Kitai ulih yakin, semua utai tu deka nyadi enda lama da agi. Tang nyentuk ngagai maya nya, aram meh kitai terus ngayanka diri beterima kasih ngagai Apai kitai ti di serega. Baka ni kitai ulih ngereja nya? Belajarka jaku benabi dalam Bup Kudus, lalu nulung orang bukai ngereja utai ti sama.
LAGU 95 Penampak Majak Terang-Seterang
a Enda ngira pemesai penusah ke nyadi ba dunya kemayaharitu, semua kitai ulih yakin, pengidup kitai deka nyadi manah agi jemah ila. Kitai bulih pengandal nya lebuh belajarka jaku benabi dalam Bup Kudus. Artikel tu deka berandauka sekeda kebuah kitai patut belajarka jaku benabi dalam Bup Kudus. Kitai mega deka beratika dua iti jaku benabi ke ditulis Daniel, sereta baka ni kitai empu tau bulih penguntung lebuh kitai meretika jaku benabi nya.
b Peda artikel “Yehuwa Menyingkapkan Apa yang ‘Segera Harus Berlaku,’” gent. 7-9, ba majalah Menara Jaga, 15 Jun 2012, dalam jaku Melayu.
c Daniel 11:40, NWT: “Ba pengujung dunya, iya enggau raja selatan deka belaban enggau pangan diri. Baka ribut, raja utara deka nyerang iya ngena kerita perang, kuda, enggau mayuh kapal. Iya deka tama ngagai mayuh menua lalu nganyutka sida baka ai bah.”
