• “Aku ngasaika baka laki aku bekali-kali ngereja pengawa butang.”

• “Aku berasai malu, nadai guna, sereta ngasaika diri enda chukup manah ke laki aku.”

• “Aku enda ulih madah ngagai sapa-sapa pasal utai tu. Merinsa amat asai ati aku.”

• “Aku balat merinsa lalu nadai orang nulung aku. Aku ngasaika baka Jehovah enda ibuhka aku.”

Utai ti disebut ba atas nunjukka pemalat pemerinsa ke ditapi siku bini lebuh laki iya meda pornografi. Bini nya engka ngasaika diri enda ulih pechayaka laki iya agi, kelebih agi enti laki iya udah belalai ngereja pengawa tu pengelama bebulan-bulan tauka betaun-taun. Siku bini madahka: “Aku ngasaika baka aku langsung enda nemu nama-nama utai pasal laki aku. Kati bisi utai bukai ti dipelalaika iya ari aku?”

Artikel tu dituju ngagai bini ke bisi laki ke meda pornografi. a Artikel tu deka berandauka prinsip Bup Kudus ke ulih ngelantangka ati bini, nulung iya yakin Jehovah rindu sereta deka nulung iya, lalu nulung iya bulih pengelantang ba ati sereta mengkang semak enggau Jehovah. b

Taja pan nuan enda ulih ngawal tiap iti utai ke dikereja laki nuan, tang bisi sekeda utai ke ulih dikereja nuan ngambika bulih pengelantang ba ati. Peratika sekeda utai tu.

Anang nyalahka diri empu. Siku bini engka ngumbai diri bisi ngereja penyalah ke ngasuh laki iya deka meda pornografi. Alice c ngasaika diri enda chukup manah ke laki iya. Iya berunding, ‘Nama kebuah laki aku deka agi meda indu bukai ari aku?’ Sekeda bala bini nyalahka diri empu. Sida ngumbai reaksi sida udah ngasuh situasi nya nyadi balat agi. Danielle madahka: “Aku berasai balat pedis ati enggau ringat laban laki aku terus meda pornografi. Aku berasai besalah laban aku ngumbai asai ati aku ke ngasuh situasi nya nyadi balat agi.”

Enti nuan bisi ngasaika nya, kingatka meh, Jehovah enda nyalahka nuan ketegal ulah laki nuan. James 1:14 madahka: “Tiap iku orang diuji lebuh pengingin iya empu ngumpan iya sereta narit ati  iya.” (Rom. 14:12; Plp. 2:12) Jehovah enda nyalahka nuan. Tang, Iya ngumbai penetap ati nuan ngagai Iya amat berega.—2 Ban. 16:9.

Siku bini engka ngasaika laki iya meda pornografi laban iya enda chukup manah ke laki iya. Tang tu enda amat. Bala pakar ba pekara tu nerangka, pornografi ngasuh sesiku orang bisi pengingin seks ke enda ulih dipuaska sapa-sapa.

Anang kelalu irau. Catherine madahka: “Aku enda ulih badu berunding pasal ulah laki aku ke meda pornografi.” Frances madahka: “Tiap kali aku enda nemu dini alai penunga laki aku, aku berasai balat irau. Sepemanjai hari aku berasai baka nya.” Bala bini ke bukai madahka, sida berasai malu lebuh begulai enggau bala menyadi Kristian ke engka nemu pasal penanggul laki sida. Ke bukai mega madahka, sida berasai kediri laban sida ngumbai nadai orang faham pasal situasi sida.

Asai ati ke baka tu endang biasa. Tang enti nuan kelalu berundingka utai tu, nuan deka berasai irau agi. Nyadi, uji meh betumpu ba kaul nuan enggau Jehovah laban nya deka nulung nuan tan napi penanggul nya.—Mas. 62:2; Eps. 6:10.

Nama ulih nulung nuan? Bacha lalu belematika cherita Bup Kudus pasal bala indu ke tusah ati. Jehovah ngelantangka ati sida lebuh sida besampi ngagai Iya. Taja pan Jehovah enda muai penanggul sida, tang Iya meri sida pengelantang. Ambika chunto, ati Hanah “balat amat tusah” ketegal situasi iya. Taja pia, ‘Hanah majak besampi ngagai Jehovah.’ Taja pan iya enda nemu nama deka nyadi pengudah nya, tang iya bulih pengelantang.—1 Sam. 1:10, 12, 18; 2 Kor. 1:3, 4.

Nuan mega ulih minta tulung ari bala tuai gempuru. Sida ulih nyadi baka “dunju ti alai orang ngenduhka diri ari ribut, enggau endur alai belalai ari kabut.” (Isa. 32:2) Sida engka ulih meri cadangan pasal ni bagi menyadi indu ke ulih nulung nuan. Nuan ulih bejaku enggau menyadi indu nya secara peribadi, lalu iya ulih ngelantangka ati nuan.—J-lam. 17:17.

Ulih nuan nulung laki nuan muai tebiat meda pornografi? Engka. Bup Kudus madahka, “dua iku manah agi ari siku” lebuh mutarka penanggul, tauka lebuh belaban enggau munsuh ti kering. (P-jar. 4:9-12) Bala pakar madahka, lebuh laki bini bekerejasama, kesuah iya kaling pengidup ke gian meda pornografi ulih muai tebiat iya, lalu kaling iya ulih belajar pechayaka iya baru.

 Endang amat, tu bepanggai ba kaling pengidup nuan. Kati iya bebendar sereta keran deka muai tebiat meda pornografi? Kati iya udah bebendar besampi minta pengering ari Jehovah, sereta minta tulung ari bala tuai gempuru? (2 Kor. 4:7; Jas. 5:14, 15) Kati iya bisi chara kena nulung iya nyeliahka diri ari meda pornografi? Ambika chunto, kati iya bisi netapka tatak lebuh iya ngena perengka elektronik? Kati iya nyeliahka situasi ke ulih ngujungka iya meda pornografi? (J-lam. 27:12) Kati iya sanggup nerima tulung ari nuan sereta beterus-terang enggau nuan? Enti pia, nuan engka ulih nulung iya.

Nama chara iya? Peratika siti chunto tu. Felicia jadi enggau Ethan. Ethan bisi tebiat meda pornografi lebuh iya agi biak. Lebuh Ethan bisi pengingin deka meda pornografi, iya enda tusah bejaku enggau Felicia pasal penanggul nya. Ethan madahka: “Aku ulih beterus-terang enggau bini aku. Iya nulung aku nyeliahka situasi ke ulih nyadi penguji, lalu iya seruran nanya enti aku ok tauka enda. Iya mega nulung aku netapka tatak lebuh ngena Internet.” Amat, Felicia pedis ati enggau tebiat Ethan. Tang ku iya madah: “Taja pan aku ringat enggau pedis ati, tang tu enda ulih nulung iya muai tebiat ti jai nya. Pengudah kami duai berandau pasal penanggul iya, iya setuju deka bekerejasama enggau aku muai pemedis ba ati aku.”

Lebuh laki bini ulih berandau pasal penanggul nya, tu ukai aja nulung laki nya nyeliahka diri ari meda pornografi, tang mega deka nulung bini iya pechayaka iya baru. Lebuh laki beterus-terang enggau bini iya pasal pengelemi diri, dini alai iya, enggau nama pengawa iya, tu deka ngasuh bini senang agi pechayaka iya laban iya enda ngelalaika utai ari bini iya.

Kati nuan pechaya nuan ulih nulung laki nuan enggau chara ti sama? Enti pia, seduai engka ulih begulai macha lalu berandauka artikel tu. Tuju laki nuan iya nya, deka badu meda pornografi lalu meri nuan kebuah pechayaka iya. Ari ke ringat laban nuan deka berandauka pasal penanggul tu, laki nuan patut nguji faham pasal asai ati nuan bekaul enggau penanggul tu. Tuju nuan iya nya, nulung iya muai tebiat nya, lalu meri iya peluang ngambika iya ulih nunjukka diri ulih dikearapka nuan baru. Seduai patut nemu nama utai ke ngasuh orang deka meda pornografi sereta baka ni penanggul nya ulih diputarka. d

Enti nuan irau randau seduai deka ngujungka  laya, seduai ulih minta siku tuai gempuru enggau seduai lebuh berandauka penanggul tu. Kingatka meh, taja pan kaling pengidup nuan udah muai tebiat nya, tang nuan engka agi begunaka mayuh awak sebedau nuan ulih pechayaka iya baru. Nya alai, anang putus asa. Peratika pemansang ba kaul seduai taja pan pemansang nya mit aja. Andal meh nyau kelama enti seduai sabar, tikah seduai deka nyadi tegap baru.—P-jar. 7:8; 1 Kor. 13:4.

Enti laki nuan meda pornografi baru pengudah iya nyeliahka tebiat nya ba sesiti timpuh, kati tu reti nya iya enda nesal ati, tauka iya sigi enda ulih muai tebiat nya? Enda semesti iya. Enti iya gian meda pornografi, iya engka begunaka mayuh usaha kena nyeliahka tebiat tu seumur idup iya. Indah pengudah betaun-taun nyeliahka tebiat nya, iya engka berengkah meda pornografi baru. Kena nyeliahka tebiat tu ari nyadi baru, iya patut terit agi lebuh ngena perengka elektronik, sereta nyeliahka situasi ke ulih nyadi penguji. Chara tu patut diteruska, indah pengudah iya mujur mutarka penanggul nya. (J-lam. 28:14; Mat. 5:29; 1 Kor. 10:12) Iya patut “ngubah chara iya berunding nyadi baru” sereta “begedika penyai.” Tu nyengkaum pornografi sereta pengawa kamah ke bukai baka ngeluchu. (Eps. 4:23; Mas. 97:10; Rom. 12:9) Kati iya sanggup ngereja semua utai tu? Enti ya, nyau kelama iya engka ulih muai tebiat tu. e

Tang baka ni enti kaling pengidup nuan enggai mutarka tebiat nya? Nuan engka berasai kecewa, ringat, enggau dikhianati. Tang buai meh pengirau nuan ngagai Jehovah. Tu deka nulung nuan bulih pengelantang ba ati enggau runding. (1 Pet. 5:7) Terus negapka kaul nuan enggau Jehovah nengah pengawa belajarka Bup Kudus, besampi, sereta belemati. Seraya nuan ngereja nya, andal meh, Iya mega deka datai semak ngagai nuan. Baka ke dipadah ba Masmur 34:18, ‘Jehovah diau semak orang ke tusah ati’ ngambika sida bulih pengaga ati baru. Terus meh nyembah Jehovah enggau tetap ati. Minta bantu ari bala tuai gempuru. Lalu anang badu ngarapka laki nuan deka ngaga ubah jemah ila.—Rom. 2:4; 2 Pet. 3:9.