1. Nitihka Hebrew 12:1, nama utai ke patut digaga kitai ngambika ulih nembuka lumba kitai ke nuju ngagai pengidup?

 BUP KUDUS nyemaka pengidup orang Kristian baka siti lumba. Sida ke mujur nembuka lumba nya deka nerima pengidup ti meruan belama iya. (2 Tim. 4:7, 8) Nya alai, kitai terus belanda laban kitai amat semak enggau pengujung lumba nya. Rasul Paul udah mujur nembuka lumba iya. Iya bisi madahka utai ke deka nulung kitai nembuka lumba nya. Iya ngasuh kitai “muai semua utai ke nating kitai . . . belanda enggau ati ti tan ba lumba ke udah ditetapka ke kitai.”—Bacha Hebrew 12:1.

 2. Nama reti iya “muai semua utai ke nating kitai”?

² Lebuh Paul madah kitai mesti “muai semua utai ke nating kitai,” kati reti iya, orang Kristian enda ibuh mai nama-nama utai? Enda. Tang utai ku Paul nya, kitai patut muai sebarang utai ke nating kitai. Utai ke baka tu ulih ngasuh kitai belanda enggau lubah tauka ngasuh kitai lelak ba lumba nya. Ngambika ulih tan ba lumba nya, kitai patut nemu enggau jampat sekalika kitai bisi mai utai ke nating kitai. Lalu enti bisi, kitai deka muai iya enggau lengkas. Taja pia, ba maya ti sama, kitai enggai muai ma ke patut dibai kitai. Enti kitai badu mai ma nya, kitai deka dibuai ari lumba nya. (2 Tim. 2:5) Nama ma ke patut dibai kitai?

 3. (a) Nitihka Galatia 6:5, nama utai ke patut dibai kitai? (b) Nama utai ke deka dipejuraika kitai dalam artikel tu, lalu nama kebuah?

³ Bacha Galatia 6:5 enggau nota kaki. Paul madah: “Tiap iku orang patut mai ma diri empu.” Nama reti “ma” ke disebut Paul ditu? Reti iya, tanggung pengawa tiap iku kitai ke nyadi nembiak Petara. Orang bukai enda ulih bejalaika tanggung pengawa tu ke kitai. Dalam artikel tu, kitai deka bejuraika nama  utai ke disengkaum ba “ma diri empu,” lalu baka ni kitai ulih mai iya. Pia mega, kitai deka belajar pasal sekeda utai ke nating kitai diatu, lalu belajar baka ni kitai ulih muai utai nya. Lebuh kitai mai ma diri empu lalu muai utai ke nating kitai, nya deka nulung kitai nembuka lumba ke nuju ngagai pengidup.

 4. Nama kebuah ngamatka semaya kitai ke deka nyembah Jehovah belama iya enda tusah? (Peda mega gambar.)

⁴ Semaya ke deka nyembah Jehovah belama iya. Lebuh kitai nyerahka diri ngagai Jehovah, kitai udah besemaya deka nyembah Iya sereta ngereja peneka Iya. Kitai patut ngamatka semaya nya. Taja pan nya tanggung pengawa ti berat, tang nya enda kelalu tusah ba kitai. Tu ketegal, Jehovah udah ngaga kitai ngambika ngereja peneka Iya. (Pem. 4:11) Iya ngaga kitai ngambika bisi pengingin deka ngelala sereta nyembah Iya. Lalu Iya ngaga kitai ngambika kitai sama baka Iya. Asil iya, kitai ulih majak semak ngagai Iya, lalu gaga ati ngereja peneka Iya. (Mas. 40:8) Nambahka nya, lebuh kitai ngereja peneka Petara sereta nitihka Anak Iya, kitai deka “bulih pengering baru.”—Mat. 11:28-30.

 5. Nama ulih nulung nuan ngamatka semaya nuan? (1 John 5:3)

 ⁵ Nama ulih nulung nuan mai ma nya? Bisi dua iti utai ke ulih nulung nuan. Kesatu, terus ngenalamka pengerindu nuan ke Jehovah. Nuan ulih berunding enggau dalam pasal utai ke udah digaga Jehovah ke nuan, sereta berekat ke deka diberi Iya ngagai nuan. Lebuh pengerindu nuan ke Petara majak dalam, nuan deka senang agi ngasika Iya. (Bacha 1 John 5:3.) Kedua, tunda meh teladan Jesus. Iya mujur ngereja peneka Petara laban iya besampi minta tulung ari Jehovah. Pia mega, iya terus berunding pasal berekat ke deka diterima iya. (Heb. 5:7; 12:2) Baka Jesus, kitai mega ulih besampi minta pengering ari Jehovah. Kitai mega ulih terus berunding pasal pengidup ti meruan belama iya. Enti pengerindu nuan ke Jehovah majak dalam, lalu nuan neladan Anak Iya, nuan tentu ulih ngamatka semaya nuan ngagai Jehovah.

 6. Nama kebuah kitai patut bejalaika tanggung pengawa ba ruang bilik? (Peda mega gambar.)

⁶ Tanggung pengawa ba ruang bilik. Ba lumba ke nuju ngagai pengidup, kitai mesti rinduka Jehovah enggau Jesus lebih agi ari kitai rinduka ruang bilik kitai. (Mat. 10:37) Tang, kati tu reti iya kitai enda ibuh bejalaika tanggung pengawa ba ruang bilik? Enda. Ngambika ulih ngelantangka ati Petara enggau Kristus, kitai patut bejalaika tanggung pengawa kitai ba ruang bilik. (1 Tim. 5:4, 8) Enti kitai ngereja nya, kitai deka gaga agi ati. Jehovah nemu, ruang bilik deka gaga agi ati lebuh laki bini ngintu pangan diri enggau pengerindu sereta basa, lebuh apai indai ngayanka pengerindu sereta ngelatih anak sida, sereta lebuh bala anak ngasika apai indai.—Eps. 5:33; 6:1, 4.

 7. Nama ulih nulung nuan bejalaika tanggung pengawa nuan ba ruang bilik?

⁷ Nama ulih nulung nuan mai ma nya? Enda ngira nuan siku laki, bini, tauka anak, bepanggai meh ba jaku lalau dalam Bup Kudus. Seliah ari nitihka asai ati nuan. Anang nunda utai ke biasa digaga orang ke ngelingi nuan, tauka semina nitihka utai ke dipadah bala pakar. (J-lam. 24:3, 4) Kena meh litaricha kitai ti bepelasarka Bup Kudus. Litaricha nya ngundan mayuh chara kitai ulih nitihka prinsip Bup Kudus. Ambika chunto, laman web jw.org bisi penerang ke bekaul enggau penanggul ke ditapi laki bini, apai indai, sereta bala nembiak kemayaharitu. b Bebendar meh nitihka jaku lalau Bup Kudus taja pan diri sebilik ke bukai enda ngereja nya. Enti nuan nitihka jaku lalau Bup Kudus, tu deka mai penguntung ngagai ruang bilik nuan. Pia mega, nuan deka ngasaika berekat Jehovah.—1 Pet. 3:1, 2.

 8. Nama ulih nyadi ketegal pemutus ke digaga kitai?

⁸ Betanggungjawapka pemutus ke digaga kitai. Semua kitai ulih bibas ngaga pemutus kediri empu. Nya siti pemeri ari Jehovah. Iya deka kitai ngasaika pengaga ati lebuh kitai ngaga pemutus ti manah. Tang enti kitai ngaga pemutus ti enda manah, Jehovah deka nejuka kitai ngasaika kesan ari pemutus nya. (Gal. 6:7, 8) Enda ngira enti kitai udah ngaga pemutus ti salah, nyebut utai enggau enda berunding, tauka ngereja utai ti salah, kitai patut betanggungjawapka utai nya. Ati kitai engka berasai besalah ketegal utai ke udah digaga kitai. Enti kitai nemu kitai patut betanggungjawapka pemutus ke udah digaga, nya deka meransang kitai ngaku penyalah diri, ngaga ubah, sereta nyeliah ari ngereja penyalah ti sama. Enti kitai ngereja utai nya, kitai deka terus belanda ba lumba ke nuju ngagai pengidup.

 9. Nama ulih digaga nuan enti nuan udah ngaga pemutus ti enda manah? (Peda mega gambar.)

 ⁹ Nama ulih nulung nuan mai ma nya? Nama ulih digaga nuan enti nuan udah ngaga pemutus ti enda manah? Kingatka, nuan enda ulih ngubah utai ke udah nyadi. Nya alai, anang nguji ngetanka diri empu tauka nyalahka orang bukai ketegal pemutus ke digaga nuan. Nya semina masau jam enggau pengering nuan aja. Tang nuan patut ngaku penyalah ke udah dikereja nuan, lalu enggau naka ulih ngereja utai ke ulih digaga nuan diatu. Enti nuan berasai besalah laban udah ngaga penyalah, besampi meh ngagai Jehovah, ngaku penyalah nuan, lalu minta Iya ngampunka nuan. (Mas. 25:11; 51:3, 4) Enti nuan bisi ngemediska ati orang, minta meh pengampun ari sida. Nuan mega ulih minta tulung ari bala tuai gempuru. (Jas. 5:14, 15) Belajar ari penyalah ke udah digaga nuan, lalu enggau bebendar nyeliah ari ngereja penyalah nya baru. Lebuh nuan ngereja nya, nuan ulih yakin Jehovah deka kasihka nuan, lalu meri bantu ke diguna nuan.—Mas. 103:8-13.

10. Nama kebuah pengingin ke deka ngereja lebih agi ari ke ulih kitai tau nating kitai? (Galatia 6:4)

¹⁰ Pengingin ke deka ngereja lebih agi ari ke ulih kitai. Kitai ulih nating diri empu enti kitai mandingka diri empu enggau orang bukai. (Bacha Galatia 6:4.) Enti kitai suah mandingka diri enggau orang bukai, tu ulih ngujungka kitai kepapaska sida lalu deka bepekit enggau sida. (Gal. 5:26) Enti kitai nguji ngereja utai ke dikereja orang bukai taja pan kitai enda ulih ngereja nya, kitai engka ngemediska diri empu. Pia mega, perundingka tu: Bup Kudus madahka, kitai ulih tusah ati laban patut nganti sesiti utai! (J-lam. 13:12) Nya alai, kitai tentu balat agi tusah ati enti kitai patut nganti utai ke enda ulih dijapai kitai. Nya deka ngasuh kitai lelak nyentukka kitai belanda enggau lubah ba lumba kitai.—J-lam. 24:10.

11. Nama ulih nulung nuan nyeliah ari pengingin ke deka ngereja lebih agi ari ke ulih nuan?

¹¹ Nama ulih nulung nuan muai utai ke nating nya? Anang ngarapka diri ulih ngereja utai ke ngelui ari utai ke ulih dikereja nuan. Jehovah mega enda minta utai nya ari nuan. Iya enda ngarapka nuan meri utai ke enda ulih diberi nuan. (2 Kor. 8:12) Andal meh, Jehovah enda mandingka utai ke ulih dikereja nuan enggau utai ke ulih dikereja orang bukai. (Mat. 25:20-23) Iya beterima kasih laban nuan gawa enggau pengabis ati ke Iya. Lalu, Iya mega beterima kasihka penetap ati nuan enggau pengeliat ati nuan. Nuan mega patut ngayanka pemaruh ati. Nama kebuah? Laban nuan engka enda ulih ngereja semua utai ke deka dikereja nuan diatu ketegal umur, pengerai, tauka situasi nuan. Baka Barsilai, nuan mega patut sanggup nulak sekeda pengawa enti umur tauka pengerai nuan ngasuh nuan tusah deka ngereja pengawa nya. (2 Sam. 19:35, 36) Baka Moses, terima meh tulung. Lalu enti ulih, magi meh tanggung pengawa nya enggau orang bukai. (P-sut. 18:21, 22) Enti nuan baruh ati, nuan enda ngarapka diri ulih ngereja lebih agi ari ke ulih dikereja nuan. Enggau nya, nuan enda lelak lalu ulih terus belanda ba lumba ke nuju ngagai pengidup.

12. Kati kitai patut betanggungjawapka pemutus ti enda manah ke digaga orang bukai? Terangka.

¹² Kitai ngumbai diri betanggungjawapka pemutus ti enda manah ke digaga orang bukai. Kitai enda ulih ngaga pemutus ke orang bukai. Kitai mega enda ulih seruran ngelindung sida ari kesan ke datai ari pemutus ti enda manah ke digaga sida. Ambika chunto, siku anak engka ngaga pemutus enggai agi nyembah Jehovah. Pemutus nya ulih ngasuh apai indai balat tusah ati. Taja pia, apai indai ke nyalahka diri  empu ketegal pemutus ke digaga anak sida nya, baka ke benung mai ma ti berat ke nating sida. Jehovah enggai bala apai indai mai ma ti berat nya.—Rom. 14:12.

13. Nama ulih digaga apai indai enti anak sida ngaga pemutus ti enda manah?

¹³ Nama ulih nulung nuan muai utai ke nating nya? Nuan patut sedar, Jehovah udah meri tiap iku kitai hak bibas milih. Iya nejuka tiap iku orang ngaga pemutus kediri empu. Pemutus tu mega nyengkaum sekalika deka nyembah Iya tauka enda. Jehovah nemu nuan ukai apai indai ti sempurna. Iya semina dekaka nuan ngereja utai enggau naka ulih nuan. Pemutus ke digaga anak nuan nya tanggungjawap iya, ukai nuan. (J-lam. 20:11) Taja pia, nuan engka agi berundingka penyalah ke udah digaga nuan. Enti pia, padahka asai ati nuan ngagai Jehovah, lalu minta ampun ari Iya. Iya nemu nuan enda ulih ngubah utai ke udah nyadi. Lalu Iya enda ngarapka nuan ngelindung anak nuan ari kesan ke datai ari pemutus iya. Kingatka meh, enti anak nuan berusaha pulai baru ngagai Jehovah, Iya tentu deka gaga ati lalu nerima anak nuan pulai baru.—Luk. 15:18-20.

14. Nama kebuah kitai patut muai asai ati ti seruran berasai besalah?

¹⁴ Seruran berasai besalah. Endang amat, kitai berasai besalah lebuh kitai bedosa. Tang, Jehovah enggai kitai terus berasai besalah. Tu siti ma ti berat ke patut dibuai kitai. Baka ni kitai nemu enti kitai bisi asai ati ti seruran berasai besalah? Enti kitai udah ngaku dosa kitai, nesal ati, lalu bebendar nyeliahka diri ari ngereja dosa nya baru, kitai ulih andal Jehovah udah ngampunka kitai. (SKR. 3:19) Pengudah kitai ngereja semua utai nya, Jehovah enggai kitai terus berasai besalah. Iya nemu, enti kitai terus berasai besalah, nya deka ngemediska kitai. (Mas. 31:10) Enti kitai balat tusah ati, kitai engka enggai agi belanda ba lumba ke nuju ngagai pengidup.—2 Kor. 2:7.

15. Nama ulih nulung nuan mutarka asai ati ti seruran berasai besalah? (1 John 3:19, 20) (Peda mega gambar.)

¹⁵ Nama ulih nulung nuan muai utai ke nating nya? Nama ulih digaga nuan enti nuan  terus berasai besalah? Betumpu meh ba pengampun ke diberi Petara. (Mas. 130:4) Lebuh Jehovah ngampunka sida ke amat nesal ati, Iya besemaya: “Aku enda agi ingatka penyalah sida.” (Jer. 31:34) Reti iya, pengudah Jehovah ngampunka nuan, Iya enda agi berundingka dosa nya. Nuan engka napi sekeda penanggul ketegal penyalah ti udah dikereja nuan. Tang anang ngumbai tu reti iya Jehovah enda ngampunka nuan. Nuan mega engka lenyau sekeda tanggung pengawa ba raban gempuru ketegal penyalah nuan suba, tang anang meh terus ngukum diri empu. Jehovah enda terus berunding pasal dosa ke udah digaga nuan. Nyadi, nuan mega enda patut ngereja nya.—Bacha 1 John 3:19, 20.

16. Sebagai pelumba, nama utai ke patut ditemu kitai?

¹⁶ Ba lumba kitai ke nuju ngagai pengidup, kitai mesti ‘belanda ngambika kitai bulih prais nya.’ (1 Kor. 9:24) Kitai ulih ngereja nya enti kitai nemu bida entara ma ke patut dibai kitai enggau utai ti nating ke patut dibuai kitai. Dalam artikel tu, kitai udah berandauka sekeda chunto utai ke patut dibai kitai sereta utai ke patut dibuai kitai. Tang bisi mega utai bukai kelimpah ari utai ke dipadah dalam artikel tu. Jesus madah, ati kitai ulih “kelalu balat ditekan ketegal kelalu bendar makai enggau ngirup sereta irauka pengidup.” (Luk. 21:34) Ayat Bup Kudus dalam genteran tu enggau ayat Bup Kudus ke bukai ulih nulung nuan nemu ubah ke engka patut digaga seraya nuan belanda ba lumba ke nuju ngagai pengidup.

17. Nama kebuah kitai yakin kitai deka bulih prais ba lumba ke nuju ngagai pengidup?

¹⁷ Kitai yakin kitai deka bulih prais ba lumba ke nuju ngagai pengidup laban Jehovah deka meri pengering ke diguna kitai. (Isa. 40:29-31) Nya alai, anang meh lembau belanda! Teladan meh rasul Paul ke bebendar belanda ngambika bulih prais ke diengkah ba mua iya. (Plp. 3:13, 14) Nadai orang ulih belanda ngarika nuan. Tang enggau tulung ari Jehovah, nuan ulih mujur. Jehovah ulih nulung nuan mai ma nuan, lalu muai utai ke nating nuan. (Mas. 68:19) Enggau tulung ari Jehovah, nuan ulih belanda enggau liat ati lalu bulih prais nya!