1. Nama utai ti dikedekaka Jehovah ke semua orang?

 JEHOVAH ngelakka kitai ngaga pemutus kediri empu. Lalu ninting hari kitai ngaga pemutus. Pemutus ti pemadu penting ke ulih digaga kitai, iya nya nyerahka diri ngagai Jehovah sereta nyadi sebagi ari ruang bilik Iya. Jehovah dekaka semua orang ngaga pemutus nya. Nama kebuah? Laban Iya rinduka mensia sereta dekaka kitai gaga ati. Iya dekaka kitai ngembuan kaul ti manah enggau Iya sereta idup belama iya.—U-dat. 30:​19, 20; Gal. 6:​7, 8.

2. Jehovah dekaka sida ke bedau nesal ati ngereja nama? (1 John 2:1)

² Taja pia, Jehovah enda ngansak sapa-sapa nyembah Iya. Iya ngelakka tiap iku orang ngaga pemutus kediri empu. Nama patut digaga bala tuai gempuru enti menyadi ke udah dibaptisa ngereja dosa ti besai? Enti iya enda nesal ati, iya mesti dikeluarka ari raban gempuru. a (1 Kor. 5:13) Tang, taja pan orang nya udah dikeluarka ari raban gempuru, Jehovah amat deka orang nya nesal ati sereta pulai baru ngagai Iya. Kebendar iya, siti kebuah ti penting Jehovah nyediaka tebus, iya nya ngambika Iya ulih ngampunka sida ke nesal ati ke dosa sida. (Bacha 1 John 2:1.) Jehovah nya Petara ti bepengerindu,  lalu Iya meransang sida ke ngereja dosa ti besai nesal ati.—Sek. 1:3; Rom. 2:4; Jas. 4:8.

3. Nama deka dikerandauka kitai dalam artikel tu?

³ Jehovah dekaka kitai ngembuan runding Iya pasal dosa ti besai sereta sida ke ngereja nya. Artikel tu deka berandauka chara kitai ulih ngereja nya. Dalam artikel tu, kitai deka belajarka utai ti dipadah Paul ngagai raban gempuru ba Korint lebuh siku menyadi lelaki ngereja dosa ti besai. Udah nya, kitai deka beratika utai ti diasuh Paul kereja raban gempuru lebuh lelaki nya nesal ati. Lalu, kitai deka belajarka asai ati Jehovah pasal sida ke ngereja dosa ti besai.

NAMA DIGAGA BALA MENYADI BA ABAD KETERUBAH LEBUH SIKU MENYADI LELAKI NGEREJA DOSA TI BESAI?

4. Nama nyadi ba raban gempuru di Korint? (1 Korint 5:​1, 2)

⁴ Bacha 1 Korint 5:​1, 2. Ba pejalai nginjil Paul ti ketiga, iya ninga siti utai ti enda manah ke benung nyadi ba raban gempuru ti baru ditumbuhka ba Korint. Siku menyadi lelaki ba raban gempuru nya ngereja ulah seks ti kamah enggau indai tiri iya. Indah sida ke enda nyembah Petara pan nemu utai tu salah! Tang bala menyadi ngumbai nadai salah enti menyadi lelaki nya mengkang ba raban gempuru. Sekeda ari sida engka ngumbai sida benung neladan pengasih Jehovah ngagai mensia ti enda sempurna. Tang Jehovah enda nerima sebarang pengawa ti salah ke dikereja bala nembiak Iya. Ketegal ulah lelaki nya ti enda nemu malu, sekeda orang ke enda nyembah Jehovah tentu tekenyit sereta nyebut utai ti enda manah pasal nembiak Jehovah. Lalu, enti iya mengkang ba raban gempuru, bala menyadi ke bukai engka berengkah nunda ulah iya. Nyadi, Paul ngasuh raban gempuru nya ngereja nama?

5. Paul ngasuh raban gempuru ba Korint ngereja nama, lalu nama reti utai ku iya? (1 Korint 5:13) (Peda mega gambar.)

⁵ Bacha 1 Korint 5:13. Nengah kuasa kudus, Jehovah ngasuh Paul nulis siti surat ngagai raban gempuru nya lalu nerangka, lelaki ke enda nesal ati nya patut dikeluarka ari raban gempuru. Nama patut digaga bala menyadi Kristian ke tetap ati? Paul ngasuh sida “badu agi begulai” enggau iya. Nama reti tu? Paul nerangka, pesan tu mega nyengkaum “enda makai begulai” enggau lelaki nya. (1 Kor. 5:11) Lebuh kitai makai begulai enggau sesiku orang, kesuah iya kitai deka berandau enggau sida. Nyadi, Paul enggau terang nunjukka bala menyadi enda patut ngena awak begulai enggau lelaki nya. Tu deka  nyaga raban gempuru ari ulah iya ti enda manah. (1 Kor. 5:​5-7) Pia mega, tu engka nulung lelaki nya sedar, iya udah ngemediska ati Jehovah, lalu iya engka berasai malu sereta nesal ati.

6. Nama utai ti dikereja bala menyadi pengudah sida nerima surat Paul, lalu nama utai ti dikereja lelaki ke ngereja dosa ti besai nya?

⁶ Pengudah nganjung surat ngagai bala menyadi ba Korint, Paul tentu berunding nama reaksi bala menyadi ba raban gempuru nya. Enda lama udah nya, Titus madah ngagai Paul siti berita manah. Raban gempuru nya nitihka iring Paul lalu muai lelaki nya ari raban gempuru sida. (2 Kor. 7:​6, 7) Pia mega, enda lama pengudah nya, lelaki nya nesal ati! Iya ngubah ulah iya, sereta berengkah nitihka standard Jehovah ti lurus. (2 Kor. 7:​8-11) Nyadi, nama diasuh Paul kereja raban gempuru nya pengudah nya?

 BAKA NI RABAN GEMPURU PATUT NGINTU ORANG KE NGEREJA DOSA TI BESAI KE NESAL ATI?

7. Nama utai ke digaga lelaki nya pengudah iya dikeluarka ari raban gempuru? (2 Korint 2:​5-8)

⁷ Bacha 2 Korint 2:​5-8. Paul madahka: “Ukum ke diberi mayuh ari bala kita ngagai orang nya udah chukup.” Reti utai ku Paul nya, ketegal orang ke ngereja dosa ti besai nya udah dikeluarka ari raban gempuru, tu nulung iya sedar, iya patut nesal ati. Lalu ketegal iya udah nesal ati, bala menyadi enda ibuh terus meri iya disiplin.—Heb. 12:11.

8. Nama agi utai bukai ke diasuh Paul kereja bala menyadi?

⁸ Pengudah nya, Paul madah ngagai bala menyadi: “Ampunka meh iya enggau pengabis ati sereta lantangka ati” menyadi ke ngereja dosa ti besai nya, lalu “ngasuh iya pechaya kita sayauka iya.” Ketegal lelaki nya udah nesal ati, Paul ngasuh bala tuai gempuru ngemendarka lelaki nya pulai baru ngagai raban gempuru. Paul meransang bala menyadi nunjukka diri udah ngampun sereta sayauka iya. Sida ulih ngereja tu nengah jaku enggau ulah sida. Enti sida ngereja nya, menyadi lelaki nya ulih ngasaika bala menyadi gaga ati laban iya udah pulai baru ngagai raban gempuru.

9. Nama kebuah sekeda orang engka tusah deka ngampun menyadi lelaki ke udah nesal ati nya?

⁹ Sekeda ari bala menyadi ba raban gempuru engka tusah deka nerima menyadi lelaki ke udah nesal ati nya. Nama kebuah kitai ngumbai baka nya? Sekeda menyadi engka agi ringat enggau menyadi lelaki nya laban iya udah ngasuh penanggul nyadi ba raban gempuru. Ke bukai engka agi berasai pedis ati laban iya udah ngemediska ati sida. Bisi mega engka berasai enda adil laban orang ke ngereja dosa ti besai ulih diterima pulai baru ngagai raban gempuru. Sida ngembuan asai ati nya laban sida udah bebendar ngasika pesan Jehovah. (Banding Luke 15:​28-30.) Taja pia, nama kebuah nya penting bala menyadi ba raban gempuru ngayanka pengerindu ngagai menyadi ke udah nesal ati nya?

10-11. Nama ulih nyadi enti bala tuai gempuru enggai ngampunka menyadi ke udah nesal ati nya?

¹⁰ Nama asai ati lelaki nya enti bala tuai gempuru enda ngemendarka iya pulai baru ngagai raban gempuru taja pan iya udah nesal ati? Tauka, nama asai ati iya enti bala menyadi enda ngayanka pengerindu ngagai iya taja pan iya udah pulai baru ngagai raban gempuru? Paul madahka, menyadi lelaki nya ulih putus pengarap ketegal “kelalu tusah ati.” Iya engka ngasaika diri enda ulih nyembah Jehovah agi. Iya engka indah ngumbai Jehovah enggai ngampunka iya, lalu nadai kebuah iya deka ngaga ubah.

¹¹ Nama utai bukai ke ulih nyadi enti bala menyadi enggai ngampunka menyadi lelaki ke udah nesal ati nya? Sida ulih lenyau kaul sida enggau Jehovah. Nama kebuah? Laban sida enda neladan Jehovah, ke ngampunka orang ti bedosa ke udah nesal ati. Tang sida nunda sifat Sitan ke jai sereta enggai ngayanka pengasih. Ketegal nya, Sitan ulih ngena sida nagang menyadi lelaki nya pulai baru ngagai Jehovah.—2 Kor. 2:​10, 11; Eps. 4:27.

12. Baka ni bala menyadi ulih neladan Jehovah?

¹² Nyadi, baka ni bala menyadi ba Korint ulih neladan Jehovah, ukai Sitan? Baka Jehovah, sida ulih ngampunka orang ke nesal ati. Peratika utai ke dipadah sekeda penulis Bup Kudus pasal Jehovah. David madahka, Jehovah ‘endang manah sereta ngampun.’ (Mas. 86:5) Mikah nulis: ‘Nadai petara bukai ti sebaka enggau Nuan, O Jehovah. Nuan ngampun dosa bala nembiak Nuan.’ (Mik. 7:18) Lalu Isaiah madahka: ‘Awakka orang ke jai,  ninggalka jalai pengidup sida lalu ngubah chara sida berunding. Awakka sida nguingka diri ngagai Jehovah Petara kitai. Iya endang kasih, lalu jampat ngampun.’—Isa. 55:7.

13. Nama kebuah bala tuai gempuru enda patut betangguh ari nerima menyadi lelaki nya pulai baru ngagai raban gempuru? (Peda kutak “ Kemaya Lelaki ba Korint nya Diterima Pulai Baru?”)

¹³ Ngambika ulih neladan Jehovah, bala menyadi ba Korint patut ngampunka menyadi lelaki nya, lalu nunjukka diri sayauka iya. Paul madahka, enti sida ngampun menyadi lelaki ke nesal ati nya, sida deka nunjukka diri “ngasi.” (2 Kor. 2:9) Taja pan lelaki nya baru udah dikeluarka ari raban gempuru pengelama beberapa bulan, tang iya udah nesal ati. Nyadi, bala tuai gempuru enda patut betangguh ari nerima iya pulai baru ngagai raban gempuru.

NELADAN SIFAT JEHOVAH TI KASIH SERETA ADIL

14-15. Nama ulih dipelajarka kitai ari utai ti nyadi ba Korint? (2 Peter 3:9) (Peda mega gambar.)

¹⁴ Cherita pasal utai ti nyadi ba Korint ditulis dalam Bup Kudus “kena ngajar kitai.” (Rom. 15:4) Ari cherita nya kitai belajar, Jehovah enda nejuka sapa-sapa ke ngereja dosa ti besai sereta ke enggai nesal ati mengkang ba raban gempuru. Sekeda orang engka berunding, ketegal Jehovah nya pengasih, Iya deka nejuka orang ke enda nesal ati mengkang ba raban gempuru. Tang tu ukai chara Jehovah ngayanka pengasih. Taja pan Jehovah nya  Petara ti pengasih, tang tu ukai reti iya, Iya nerima sebarang macham ulah. Standard Iya pasal utai ti betul enggau utai ti salah enda kala berubah. (Jud. 4) Enti Jehovah nejuka orang ke bedosa sereta enda nesal ati mengkang ba raban gempuru, tu belaban enggau chara Jehovah ngayanka pengasih laban tu deka ngemediska bala menyadi bukai ba raban gempuru.—J-lam. 13:20; 1 Kor. 15:33.

¹⁵ Taja pia, kitai nemu Jehovah enggai sapa-sapa dipunaska. Enti ulih, Iya deka nyelamatka semua orang. Iya ngayanka pengasih ngagai sida ke nesal ati sereta deka nyadi kaban Iya baru. (Esk. 33:11; bacha 2 Peter 3:9.) Nyadi, lebuh lelaki ba Korint nya nesal ati sereta badu agi ngereja utai ti salah, Jehovah ngena Paul ngasuh bala menyadi ngampunka lelaki nya sereta nerima iya pulai baru ngagai raban gempuru.

16. Nama asai ati nuan pasal Jehovah pengudah nemu baka ni lelaki ba Korint nya diintu?

¹⁶ Utai ti nyadi ba raban gempuru di Korint nunjukka Jehovah nya Petara ti bepengerindu, lurus, sereta adil. (Mas. 33:5) Tu tentu meransang kitai deka agi muji Jehovah. Ketegal semua kitai bedosa, kitai begunaka ampun ari Jehovah. Nya kebuah kitai amat beterima kasih laban Jehovah nya Petara ti pengasih. Kitai mega beterima kasih ngagai Jehovah laban Iya udah nyediaka tebus ngambika ulih ngampunka dosa kitai. Lebuh kitai nemu Jehovah amat rinduka kitai sereta dekaka kitai gaga ati belama iya, tu amat ngelantangka ati kitai!

17. Nama deka dipelajarka kitai ba dua iti artikel ke nangkanka tu?

¹⁷ Enti sesiku orang ngereja dosa ti besai kemayaharitu, baka ni bala tuai gempuru ulih neladan pengerindu Jehovah lalu nulung orang nya nesal ati? Nama reaksi ke patut dikembuan bala menyadi ba raban gempuru enti bala tuai gempuru mutuska deka muai sesiku orang ari raban gempuru tauka nerima orang nya pulai baru ngagai raban gempuru? Dua iti artikel ke nangkanka tu deka nyaut tanya nya.