1. Nama ulih nyadi pengudah sesiku orang ngereja dosa ti besai?

 BA ARTIKEL ke sebedau tu, kitai udah belajar pasal utai ke diasuh Paul kereja raban gempuru ba Korint pengudah siku menyadi lelaki ngereja dosa ti besai. Ketegal lelaki nya enda nesal ati, iya patut dikeluarka ari raban gempuru. Taja pia, baka ke dipadah ba ayat tema artikel tu, Petara ulih nulung orang nesal ati. (Rom. 2:4) Nyadi, baka ni Petara ngena bala tuai gempuru nulung orang ke udah ngereja dosa ti besai nesal ati?

2-3. Nama patut digaga kitai enti kitai nemu siku menyadi udah ngereja dosa ti besai, lalu nama kebuah?

² Bala tuai gempuru semina ulih nulung orang ke ngereja dosa ti besai enti sida nemu pasal utai ke udah digaga iya. Nyadi, enti kitai nemu sesiku orang udah ngereja dosa ti besai, ke ulih ngujungka iya dikeluarka ari raban gempuru, nama patut digaga kitai? Terubah iya, kitai meransang menyadi nya minta tulung ari bala tuai gempuru.—Isa. 1:18; SKR. 20:28; 1 Pet. 5:2.

³ Tang baka ni enti iya enggai betemu enggau bala tuai gempuru? Enti pia, kitai patut madah ngagai bala tuai gempuru pasal utai ke udah nyadi ngambika menyadi nya bulih tulung ke diguna iya. Lebuh kitai ngereja nya, tu nunjukka kitai rinduka menyadi nya laban kitai nemu bala tuai gempuru ulih nulung iya. Enti menyadi nya terus ngereja utai ti salah, nya deka majak ngerusakka kaul iya enggau Jehovah. Lalu enti orang ba luar raban gempuru nemu pasal utai ke udah digaga iya, sida engka nyebut utai ti enda manah pasal Jehovah enggau bala nembiak Iya. Nya alai, kitai enggau berani betemu enggau bala tuai gempuru laban  kitai rinduka Jehovah sereta menyadi ke ngereja penyalah nya.—Mas. 27:14.

CHARA BALA TUAI GEMPURU NULUNG ORANG KE NGEREJA DOSA TI BESAI

 4. Nama juluk ati bala tuai gempuru lebuh sida betemu enggau orang ke udah ngereja dosa ti besai?

⁴ Lebuh siku menyadi ngereja dosa ti besai, raban tuai gempuru deka milih tiga iku tuai gempuru kena numbuhka siti komiti. a Komiti nya deka betemu enggau menyadi ke udah ngereja penyalah. Tiga iku tuai gempuru tu ngayanka pemaruh ati sereta nemu tatak diri. Sida sedar, taja pan sida nguji deka nulung menyadi nya, tang sida enda ulih mejal iya ngaga ubah. (U-dat. 30:19) Sida nemu, ukai semua orang deka nesal ati baka Raja David. (2 Sam. 12:13) Sekeda engka milih enggai ningaka jaku lalau ari Jehovah. (P-kal. 4:​6-8) Taja pia, juluk ati bala tuai gempuru, iya nya nulung orang ke udah ngereja penyalah nya nesal ati. Nyadi, nama utai ti patut dikingatka bala tuai gempuru lebuh sida betemu enggau orang ke ngereja dosa ti besai nya?

 5. Nama sifat ke patut dikembuan tuai gempuru lebuh betemu enggau orang ke ngereja penyalah? (2 Timoti 2:​24-26) (Peda mega gambar.)

⁵ Tuai gempuru ngumbai orang ke ngereja penyalah nya baka bedus ti lenyau, tang agi berega ba Jehovah. (Luk. 15:​4, 6) Nya alai, lebuh sida betemu enggau menyadi nya, sida enda bejaku kasar enggau iya tauka ngintu iya enggau enda manah. Sida mega enda betemu enggau menyadi nya semina ketegal deka bejalaika tanggung pengawa sida. Tang sida deka ngayanka sifat-sifat baka ke dipadah ba 2 Timoti 2:​24-26. (Bacha.) Sida mengkang nelap sereta manah ati laban sida deka nulung iya ngubah runding iya.

 6. Baka ni bala tuai gempuru nyediaka ati sida sebedau betemu enggau orang ke ngereja penyalah? (Rome 2:4)

⁶ Bala tuai gempuru nyediaka ati sida. Sida ingat jaku Paul: “Petara nya nelap laban nguji deka nulung kita nesal ati.” (Bacha Rome 2:4.) Nyadi, sida nguji neladan chara Jehovah ke ngintu orang ke bedosa enggau manah. Bala tuai gempuru sedar, sida nya pengibun bedus lalu sida patut nitihka iring Kristus. Sida mega enggau bebendar neladan chara Kristus nyaga raban gempuru. (Isa. 11:​3, 4; Mat. 18:​18-20) Sebedau sida betemu enggau menyadi ke ngereja penyalah nya, bala tuai gempuru besampi ngagai Jehovah ngambika sida ulih nulung menyadi nya nesal ati. Sida deka mansik Bup Kudus sereta litaricha kitai. Sida mega minta Jehovah nulung sida meretika menyadi nya sereta situasi iya. Sida mega deka berundingka utai ke ditemu sida pasal menyadi nya. Ambika chunto, nama utai ke ngasuh iya ngembuan runding sereta ulah ke ngasuh iya ngereja dosa nya?—J-lam. 20:5.

7-8. Baka ni bala tuai gempuru neladan penyabar Jehovah lebuh sida betemu enggau menyadi ke ngereja penyalah?

 ⁷ Bala tuai gempuru neladan penyabar Jehovah. Sida ingat chara Jehovah nguji nulung orang ke ngereja penyalah maya jeman kelia. Ambika chunto, Jehovah sabar enggau Kain. Jehovah madah ngagai Kain utai ke deka nyadi enti iya enda berubah. Tang, Iya mega madah ngagai Kain berekat ke deka diasaika iya enti iya ngasi. (P-kal. 4:​6, 7) Jehovah nganjung Nabi Natan meri jaku lalau ngagai David. Natan ngena siti sempama kena nulung David nesal ati. (2 Sam. 12:​1-7) Lalu Jehovah “majak ngirumka” bala nabi Iya ngagai orang Israel tiap kali sida enda ngasika Iya. (Jer. 7:​24, 25) Au, Jehovah enda nganti bala nembiak Iya nesal ati dulu sebedau Iya nulung sida. Tang, Iya meransang sida nesal ati indah lebuh sida agi benung ngereja penyalah nya.

⁸ Bala tuai gempuru neladan Jehovah lebuh sida nguji nulung menyadi ke ngereja dosa ti besai. Baka ke dipadah ba 2 Timoti 4:​2, sida enggau “amat sabar” nulung menyadi nya. Nyadi, tuai gempuru patut seruran tenang sereta sabar ngambika ulih nulung menyadi nya bisi pengingin deka ngereja utai ti betul. Enti tuai gempuru nyadi ringat tauka geram, menyadi nya engka enggai mendingka jaku lalau tauka enggai nesal ati.

9-10. Baka ni tuai gempuru ulih nulung menyadi nya berundingka kebuah ke ngujungka iya ngereja dosa ti besai nya?

⁹ Tuai gempuru nguji nemu kebuah ke ngujungka menyadi nya ngereja dosa ti besai. Tuai gempuru ulih berundingka sekeda tanya tu: Nama kebuah kaul iya enggau Jehovah majak lemi? Kati iya badu agi ngereja pengawa belajarka Bup Kudus kediri empu tauka nginjil? Kati iya kurang agi besampi ngagai Jehovah? Kati iya nejuka pengingin ti salah nguasa iya? Sapa ke enggau iya begulai? Nama pemerindang ke dipilih iya? Baka ni pemutus tu mai kesan ngagai runding sereta asai ati iya? Kati iya nemu asai ati Jehovah pasal utai ke udah dikereja iya?

¹⁰ Bala tuai gempuru ulih nanya menyadi nya sekeda tanya kena nulung iya berunding pasal utai ti ngasuh kaul iya enggau Jehovah nyadi lemi sereta ngujungka iya bedosa. Sida ngereja tu enggau chara ti nelap. Sida mega nyeliah ari nanya tanya ke bisi bekaul enggau hal peribadi menyadi nya, ke enda ibuh ditemu sida. (J-lam. 20:5) Kelimpah ari nya, baka Natan ke ngena sempama nulung David, bala tuai gempuru mega engka ulih ngena sempama nulung menyadi nya berunding pasal ulah iya sereta kebuah ulah nya salah. Engka maya menyadi nya terubah kali betemu enggau bala tuai gempuru, iya berengkah tusah ati pasal utai ke udah digaga iya. Iya mega engka nesal ati maya nya.

11. Baka ni Jesus nguji nulung orang ke ngereja dosa ti besai nesal ati?

¹¹ Bala tuai gempuru enggau naka ulih neladan Jesus. Jesus ngena siti tanya ti manah kena nulung Saul ari Tarsus berunding: “Saul, Saul, nama kebuah nuan merinsaka aku?” Jesus ngena tanya tu nulung Saul sedar utai ke digaga Saul nya salah. (SKR. 9:​3-6) Lalu, lebuh Jesus bejaku pasal Jesebel, b Jesus madahka: “Aku meri iya masa ngambika nesal ati.”—Pem. 2:​20, 21.

12-13. Baka ni bala tuai gempuru meri menyadi ke ngereja penyalah nya masa ngambika nesal ati? (Peda mega gambar.)

¹² Baka Jesus, bala tuai gempuru enda beguai ngumbai menyadi nya enggai nesal ati. Sekeda menyadi engka nesal ati lebuh tuai gempuru keterubah kali betemu enggau sida, tang ke bukai engka begunaka mayuh agi awak. Nyadi, bala tuai gempuru engka patut betemu  enggau menyadi ke ngereja penyalah nya lebih ari sekali. Engka pengudah menyadi nya keterubah kali betemu enggau bala tuai gempuru, iya berengkah berunding enggau dalam pasal utai ti dipadah ngagai iya. Iya engka ngayanka pemaruh ati lalu minta Jehovah ngampunka dosa Iya. (Mas. 32:5; 38:18) Nyadi, lebuh iya betemu baru enggau bala tuai gempuru, iya engka ngayanka sifat ti bebida.

¹³ Kena nulung menyadi ke ngereja penyalah nya nesal ati, bala tuai gempuru ngayanka penyinu enggau pemanah ati. Sida besampi ngagai Jehovah ngambika merekat usaha sida, lalu ngarapka menyadi nya sedarka penyalah iya lalu nesal ati.—2 Tim. 2:​25, 26.

14. Sapa ke patut dipuji lebuh menyadi ke ngereja penyalah nesal ati, lalu nama kebuah?

¹⁴ Lebuh menyadi ke ngereja penyalah nesal ati, kitai amat gaga ati. (Luk. 15:​7, 10) Taja pan bala tuai gempuru bebendar nulung ngemetulka menyadi nya, tang sapa ke patut nerima puji? Kingatka utai ke ditulis Paul pasal orang ke ngereja penyalah: “Engka Petara deka ngawakka sida nesal ati.” (2 Tim. 2:25) Nyadi, Jehovah ke patut dipuji laban Iya ke nulung menyadi nya ngubah runding enggau ulah iya. Paul madahka sekeda utai ti manah ke deka nyadi pengudah sesiku orang nesal ati. Orang nya deka nemu pemendar enggau betul agi, sedarka penyalah iya, lalu ulih ngelepaska diri ari panjuk Sitan.—2 Tim. 2:26.

15. Baka ni bala tuai gempuru ulih terus nulung menyadi ke nesal ati nya?

¹⁵ Lebuh sesiku orang nesal ati, bala tuai gempuru deka ngabas iya ari masa ke masa kena nulung iya tegap ba pengarap. Sida mega deka nulung iya ngelaban penguji ari Sitan sereta ngereja utai ti betul. (Heb. 12:​12, 13) Endang amat, bala tuai gempuru enda madah ngagai semua orang pasal penyalah ke digaga menyadi nya. Taja pia, bala menyadi ba raban gempuru patut nemu pasal sekeda utai. Nama utai nya?

‘RARA BA MUA ORANG MAYUH’

16. Nitihka 1 Timoti 5:​20, sapa “orang mayuh” ke dipadah Paul nya?

¹⁶ Bacha 1 Timoti 5:20. Paul madah ngagai Timoti, ke mega siku tuai gempuru, ngambika  ngerara “orang ke majak ngereja dosa . . . ba mua orang mayuh.” Kati reti ku Paul nya, menyadi ke ngereja penyalah nya patut dirara ba mua semua bala menyadi ba raban gempuru? Enda semesti iya. Tang iya merujuk ngagai sida ke engka udah nemu pasal penyalah nya. Tu engka nyengkaum sida ke bisi meda penyalah nya, tauka sida ke nemu pasal penyalah nya ari menyadi ke ngereja penyalah nya. Bala tuai gempuru semina deka madah ngagai sida tu pasal menyadi nya udah dirara.

17. Enti mayuh ari menyadi ba raban gempuru udah nemu pasal penyalah ke digaga siku menyadi, tauka penyalah nya engka deka ditemu dudi hari, nama jaku gerah ke deka digaga, lalu nama kebuah?

¹⁷ Kekadang, mayuh ari menyadi ba raban gempuru udah nemu pasal penyalah ke digaga sesiku orang, tauka sida deka nemu pasal penyalah nya dudi hari. Nyadi, “orang mayuh” tu deka nyengkaum bala menyadi ba raban gempuru. Siku tuai gempuru deka meri siti jaku gerah ke madahka menyadi ke ngereja penyalah nya udah dirara. Nama kebuah jaku gerah nya diberi? Paul meri saut iya: “Kena nangkan orang bukai” ari ngereja dosa ti besai.

18. Enti menyadi ke di baruh umur 18 taun ngereja dosa ti besai, nama deka digaga bala tuai gempuru? (Peda mega gambar.)

¹⁸ Enti siku menyadi ke udah dibaptisa, ke di baruh umur 18 taun, ngereja dosa ti besai, nama deka digaga bala tuai gempuru? Raban tuai gempuru deka ngatur dua iku tuai gempuru betemu enggau menyadi ke biak nya sereta apai indai iya ke Saksi. c Tuai gempuru deka nanya apai indai pasal utai ke udah digaga sida kena nulung anak sida ngaga ubah sereta nesal ati. Enti anak nya mendingka  jaku lalau apai indai iya sereta ngaga ubah ba runding sereta ulah iya, dua iku tuai gempuru nya engka mutuska nejuka pekara nya naka nya aja. Tuai gempuru sedar, Jehovah udah meri apai indai tanggungjawap ngemetulka bala anak sida enggau chara ti bepengerindu. (U-dat. 6:​6, 7; J-lam. 6:20; 22:6; Eps. 6:​2-4) Ari masa ke masa, tuai gempuru deka berandau enggau apai indai kena nentuka anak sida bulih tulung ke diguna iya. Tang, baka ni enti menyadi ke biak nya enggai berubah? Enti pia, siti komiti tuai gempuru deka betemu enggau iya sereta apai indai iya ke Saksi.

“JEHOVAH BISI PENGASIH SERETA PENYAYAU TI BESAI”

19. Baka ni bala tuai gempuru ulih neladan Jehovah lebuh betemu enggau menyadi ke ngereja dosa ti besai?

¹⁹ Jehovah dekaka bala tuai gempuru nyaga raban gempuru ari sida ke enggai ngasika pesan Iya. (1 Kor. 5:7) Tang sida mega enggau naka ulih nulung menyadi ke ngereja dosa ti besai nya nesal ati. Kena ngereja nya, bala tuai gempuru mengkang ngembuan runding ti positif lalu ngarapka menyadi nya deka ngaga ubah. Nama kebuah? Laban sida deka neladan Jehovah, ke “bisi pengasih sereta penyayau ti besai.” (Jas. 5:11) Rasul John mega ngintu bala menyadi iya enggau bepengerindu. Iya nulis: “Bala anak, aku nulis pasal semua tu ngagai kita ngambika kita enda ngereja dosa. Tang, enti siku ari bala kita ke ngereja dosa, kitai bisi siku penulung ke lurus, iya nya Jesus Kristus, ke bisi enggau Apai.”—1 Jhn. 2:1.

20. Nama deka dipelajarka kitai ba artikel ke nangkanka tu?

²⁰ Tang sayau amat, kekadang menyadi ke ngereja dosa ti besai enggai nesal ati. Enti utai tu nyadi, iya patut dikeluarka ari raban gempuru. Enti pia, nama deka digaga bala tuai gempuru? Kitai deka berandauka utai tu ba artikel ke nangkanka tu.