1-2. (a) Nama asai ati Jehovah pasal sida ke ngereja dosa ti besai lalu enggai nesal ati? (b) Jehovah ngarapka sida ke ngereja penyalah ngaga nama?

 JEHOVAH enda nerima semua macham ulah. Iya begedika ulah ti bedosa. (Mas. 5:​4-6) Jehovah dekaka kitai ngasika pesan Iya dalam Bup Kudus. Taja pia Jehovah nemu, ketegal kitai enda sempurna, kitai enda ulih ngasika Iya enggau sempurna. (Mas. 130:​3, 4) Tang ba maya ti sama, Iya enda rinduka sida ke enda bebasaka Iya sereta “ngambi ulih ari pemanah ati Iya ti besai, lalu enda malu ngereja utai ti jai.” (Jud. 4) Au, Bup Kudus madahka “orang ke enda bebasaka Petara” deka dipunaska ba Armagedon.—2 Pet. 3:7; Pem. 16:16.

² Taja pia, Jehovah enggai sapa-sapa dipunaska. Dalam majalah tu, kitai udah belajar, Bup Kudus enggau terang madahka, Jehovah “deka semua orang nesal ati.” (2 Pet. 3:9) Baka Jehovah, bala tuai gempuru sabar lebuh nulung menyadi Kristian ke ngereja penyalah nesal ati sereta datai semak ngagai Jehovah baru. Taja pia, bisi maya iya, menyadi nya enggai nesal ati. (Isa. 6:9) Taja pan bala tuai gempuru enda ngetu nulung iya, tang iya majak ngereja utai ti salah. Enti utai tu nyadi, nama patut digaga bala tuai gempuru?

“KELUARKA MEH ORANG KE JAI NYA”

 3. (a) Nitihka Bup Kudus, nama utai ke deka nyadi ngagai sida ke enggai nesal ati? (b) Lebuh sesiku orang enggai nesal ati, nama kebuah kitai ulih madah, iya empu milih deka dikeluarka ari raban gempuru?

³ Lebuh orang ke ngereja penyalah nya enggai nesal ati, bala tuai gempuru mesti nitihka iring ke dipadah ba 1 Korint 5:13:  “Keluarka meh orang ke jai nya ari bala kita.” Orang ke ngereja dosa ti besai nya nemu enti iya enda nesal ati, iya deka dikeluarka ari raban gempuru. Nyadi, enti iya enggai nesal ati, nya baka ke iya empu milih deka dikeluarka ari raban gempuru. Iya deka ngetau utai ke ditanam iya empu. (Gal. 6:7) Nama kebuah kitai munyi nya? Laban orang ke ngereja penyalah nya enggai berubah taja pan bala tuai gempuru udah mayuh kali nguji deka nulung iya. (2 Raj. 17:​12-15) Ulah iya nunjukka iya enggai ngasika standard Jehovah.—U-dat. 30:​19, 20.

 4. Nama kebuah siti jaku gerah diberi lebuh orang enggai nesal ati dikeluarka ari raban gempuru?

⁴ Lebuh orang ke enggai nesal ati dikeluarka ari raban gempuru, siti jaku gerah deka diberi ngagai raban gempuru ke madahka orang nya ukai agi siku ari Saksi-Saksi Jehovah. Tuju jaku gerah nya ukai kena ngemaluka orang ke ngereja penyalah nya. Tang jaku gerah nya diberi ngambika bala menyadi ulih nitihka pesan Bup Kudus ke madahka: “Badu agi begulai enggau orang” nya. Bup Kudus mega madahka: “Indah makai enggau [iya] deh, anang.” (1 Kor. 5:​9-11) Endang bisi kebuah ti manah pesan nya diberi. Ku Rasul Paul madah: “Mimit aja ragi ulih ngasuh tekang tepung kembai.” (1 Kor. 5:6) Enti sesiku orang ke enggai nesal ati enda dikeluarka ari raban gempuru, bala menyadi ke bukai engka ngumbai sida pan enda ibuh ngasika pesan Jehovah.—J-lam. 13:20; 1 Kor. 15:33.

 5. Nama runding ke patut dikembuan kitai pasal menyadi ke udah dikeluarka ari raban gempuru, lalu nama kebuah?

⁵ Nyadi, nama runding ke patut dikembuan kitai pasal menyadi ke udah dikeluarka ari raban gempuru? Taja pan kitai enda begulai enggau iya, tang kitai patut ingat, tu ukai mai reti iya nadai agi harapan. Tang iya semina baka siku bedus ti lenyau, lalu bedus ti lenyau agi ulih pulai baru ngagai raban bedus iya. Kingatka, menyadi nya udah nyerahka pengidup iya ngagai Jehovah. Tang sayau amat, chara pengidup iya ke diatu enda ngelantangka ati Jehovah, lalu nya tau ngujungka iya lenyau peluang idup belama iya. (Esk. 18:31) Taja pia, seagi-agi bisi awak endur Jehovah ngayanka pengasih, iya agi bisi harapan pulai baru. Nya alai, baka ni bala tuai gempuru ulih nulung menyadi ke udah dikeluarka ari raban gempuru?

BAKA NI BALA TUAI GEMPURU NULUNG SIDA KE UDAH DIKELUARKA ARI RABAN GEMPURU?

 6. Nama deka digaga bala tuai gempuru kena nulung sida ke udah dikeluarka ari raban gempuru?

⁶ Lebuh sesiku orang dikeluarka ari raban gempuru, kati bala tuai gempuru badu agi nulung iya pulai baru ngagai Jehovah? Tentu enda! Lebuh bala tuai gempuru madah ngagai menyadi nya, iya deka dikeluarka ari raban gempuru, sida mega deka madah ngagai iya utai ti mesti dikereja iya ngambika ulih pulai baru ngagai raban gempuru. Tang bala tuai gempuru mega deka ngereja utai ti lebih agi. Kesuah iya, sida deka madah, sida deka betemu enggau iya pengudah beberapa bulan kena meda sekalika iya udah ngubah runding iya tauka enda. Pengudah beberapa bulan enti iya setuju deka betemu enggau bala tuai gempuru, bala tuai gempuru deka meransang iya nesal ati lalu pulai baru. Indah enti iya bedau nesal ati maya nya, bala tuai gempuru agi deka betemu enggau iya dudi hari lalu meransang iya nesal ati.

 7. Lebuh siku menyadi dikeluarka ari raban gempuru, baka ni bala tuai gempuru ulih neladan penyiru Jehovah? (Jeremiah 3:12)

⁷ Bala tuai gempuru neladan Jehovah ke ngayanka penyiru ngagai sida ke udah dikeluarka ari raban gempuru. Ambika chunto, ba jeman kelia, Jehovah enda nganti  bala nembiak Iya, iya nya orang Israel, nesal ati sebedau Iya nguji nulung sida. Tang Iya nganjung bala nabi ngagai sida indah sebedau sida nesal ati. Baka ke dipadah ba artikel kedua dalam majalah tu, Jehovah ngasuh Hosea ngampunka bini iya lalu nerima iya baru taja pan bini iya benung ngereja dosa ti besai. Nengah chara tu, Jehovah ngajar bala nembiak Iya, Iya Petara ti amat siru. (Hos. 3:1; Mal. 3:7) Baka Jehovah, bala tuai gempuru amat deka orang ke ngereja dosa ti besai nesal ati lalu pulai baru ngagai raban gempuru. Lalu bala tuai gempuru mega enda ngasuh orang nya tusah deka ngereja nya.—Bacha Jeremiah 3:12.

 8. Baka ni sempama Jesus pasal anak ke lenyau nulung kitai faham agi asai ati Jehovah pasal sida ke udah dikeluarka ari raban gempuru? (Luke 15:7)

⁸ Kingatka baru reaksi apai dalam sempama pasal anak ke lenyau nya. Lebuh apai nya meda anak iya, apai nya ‘belanda ngagai anak iya, merap iya, lalu nyium iya.’ (Luk. 15:20) Peratika meh, apai nya enda nganti anak iya minta ampun. Tang apai nya ke belanda ngagai anak iya laban iya rinduka anak iya. Tu meh asai ati Jehovah pasal sida ke udah ninggalka Iya. Lalu bala tuai gempuru bebendar neladan Jehovah. Bala tuai gempuru dekaka sida ke udah ninggalka Jehovah pulai baru ngagai Iya. (Luk. 15:​22-24, 32) Lebuh orang ke ngereja penyalah pulai baru, Jehovah, Jesus, bala melikat, sereta semua bala menyadi amat gaga ati!—Bacha Luke 15:7.

 9. Jehovah dekaka sida ke ngereja dosa ti besai ngereja nama?

⁹ Ke diatu kitai udah belajar, Jehovah enda ngemendarka sida ke enggai nesal ati mengkang ba raban gempuru. Taja pia, Iya agi deka nulung sida. Iya dekaka sida nesal ati lalu pulai baru. Peratika meh utai ke dipadah Hosea 14:4 pasal asai ati Jehovah lebuh bala nembiak Iya nesal ati: “Aku deka mai bala nembiak Aku pulai baru ngagai Aku. Aku deka rinduka sida enggau pengabis ati Aku. Aku enda agi ringat ngagai sida.” Lebuh bala tuai gempuru nemu asai ati Jehovah, sida deka ngiga sebarang tanda ke nunjukka orang nya udah berengkah nesal ati. Lalu ayat tu ulih nulung sida ke udah ninggalka Jehovah andal Jehovah rinduka sida lalu deka sida pulai baru ngagai Iya.

10-11. Baka ni bala tuai gempuru nguji nulung sida ke udah betaun-taun dikeluarka ari raban gempuru?

¹⁰ Baka ni bala tuai gempuru nguji nulung sida ke udah betaun-taun dikeluarka ari raban gempuru? Sida ke udah dikeluarka tu engka udah badu ngereja pengawa ke ngasuh sida dikeluarka ari raban gempuru. Bisi mega engka enda ingat nama kebuah sida dikeluarka ari raban gempuru. Enda ngira ni pengelama sesiku orang udah dikeluarka ari raban gempuru, bala tuai gempuru deka nguji ngiga sereta ngabas sida. Maya bala tuai gempuru ngabas sida, bala tuai gempuru deka besampi enggau sida lalu meransang sida pulai baru ngagai raban gempuru. Endang amat, enti sesiku orang udah lama enda datai begempuru, iya tentu amat lemi secara rohani. Nyadi, enti iya madah iya deka pulai baru ngagai raban gempuru, bala tuai gempuru deka ngatur siku menyadi belajarka Bup Kudus enggau iya, taja pan iya bedau agi diterima pulai baru. Enda ngira nama situasi iya, bala tuai gempuru meh ke deka ngatur pengawa belajarka Bup Kudus nya.

¹¹ Bala tuai gempuru bebendar deka neladan penyiru ke diayanka Jehovah ngagai orang. Nyadi, bala tuai gempuru deka ngiga sida ke udah ninggalka Jehovah, lalu meransang sida pulai baru ngagai Jehovah. Lebuh orang ke ngereja dosa ti besai nya nunjukka diri nesal ati sereta udah badu ngereja utai ti salah, bala  tuai gempuru enda patut betangguh nerima iya pulai baru ngagai raban gempuru.—2 Kor. 2:​6-8.

12. (a) Nama situasi alai bala tuai gempuru patut bejimat agi sebedau nerima sesiku orang pulai baru ngagai raban gempuru? (b) Nama kebuah kitai enda patut ngumbai sida ke ngereja sekeda jenis dosa ti besai enda ulih nerima pengasih ari Jehovah? (Peda mega nota kaki.)

¹² Ba sekeda situasi, bala tuai gempuru mesti bejimat agi sebedau nerima sesiku orang pulai baru ngagai raban gempuru. Ambika chunto, orang nya engka kala ngemediska anak mit ari segi fisikal, emosi, enggau seksual. Iya engka orang ke udah limpang ari pengarap sereta ngelaban Petara, tauka kala ngaga pelan ti jai kena ngujungka tikah iya. Enti ba situasi ke baka tu, bala tuai gempuru patut nentuka iya amat-amat udah nesal  ati. (Mal. 2:14; 2 Tim. 3:6) Bala tuai gempuru mesti nyaga bala menyadi ba raban gempuru. Taja pia, ba maya ti sama, kitai patut sedar Jehovah deka nerima sapa-sapa pulai baru asal ga orang nya udah amat-amat nesal ati sereta badu ngereja penyalah nya. Nyadi, taja pan bala tuai gempuru patut nentuka orang ke kala ngereja penyalah ti besai ngagai orang bukai nya amat-amat udah nesal ati, tang bala tuai gempuru enda patut ngumbai sida tu enda ulih nerima pengasih ari Jehovah. a—1 Pet. 2:10.

NAMA ULIH DIGAGA BALA MENYADI BA RABAN GEMPURU?

13. Nama bida entara chara kitai ngintu sida ke udah dirara bala tuai gempuru enggau sida ke udah dikeluarka ari raban gempuru?

¹³ Baka ke udah dikerandauka ba artikel ke sebedau tu, kekadang jaku gerah digaga pasal sesiku menyadi udah dirara. Ba situasi ke baka tu, kitai ulih terus begulai enggau iya laban kitai nemu iya udah nesal ati lalu badu agi ngereja penyalah nya. (1 Tim. 5:20) Iya agi sebagi ari raban gempuru, lalu begunaka peransang ari bala menyadi ngambika ulih terus ngereja utai ti betul. (Heb. 10:​24, 25) Taja pia, situasi tu bebida enggau menyadi ke udah dikeluarka ari raban gempuru. Kitai “badu agi begulai” enggau iya, indah enda makai enggau iya.—1 Kor. 5:11.

14. Nama pemutus ke ulih digaga bala menyadi bekaul enggau menyadi ke udah dikeluarka ari raban gempuru? (Peda mega gambar.)

¹⁴ Kati iring ke dipadah ba 1 Korint 5:11 mai reti, kitai enda ulih mai menyadi ke udah dikeluarka ari raban gempuru datai ngagai gempuru, tauka meri iya jaku tabi enti iya datai ngagai gempuru? Enda semesti iya. Endang amat, kitai enda begulai enggau iya. Tang enti iya kaban belayan kitai tauka kaban rapat kitai sebedau iya dikeluarka ari raban gempuru, kitai engka ulih mai iya datai ngagai gempuru. Enti iya datai ngagai gempuru, baka ni kitai patut ngelayan iya? Suba, kitai langsung enda meri jaku tabi ngagai sida ke dikeluarka ari raban gempuru. Tiap iku menyadi patut ngena penemu ati iya ti dilatih Bup Kudus kena ngaga pemutus ke bekaul enggau semua pekara  tu. Sekeda engka ngasaika sida ulih meri jaku tabi tauka ngelaluka menyadi nya ba gempuru. Taja pia, kitai enda berandau lama enggau iya tauka begulai ngereja utai bukai enggau iya.

15. Nama jenis orang ke bedosa ke dipadah 2 John 9-11? (Peda mega kutak “ Kati John enggau Paul Berandau pasal Dosa ti Sama?”)

¹⁵ Bup Kudus madahka, kitai enda patut meri jaku tabi ngagai sekeda orang ke ngereja dosa ti besai. Enti kitai meri jaku tabi ngagai orang ke baka nya, kitai deka “nyukung pengawa iya ti jai.” (Bacha 2 John 9-11.) Konteks ayat 2 John 9-11 nunjukka, orang ke bedosa nya merujuk ngagai orang ke udah limpang sereta ngelaban Petara, tauka orang ke meransang orang bukai ngereja utai ti salah. (Pem. 2:20) Nya alai, enti orang nya benung ngereja penyalah tu, bala tuai gempuru enda ngabas iya. Taja pia, orang nya agi ulih nesal ati. Tang nyentuk ngagai maya nya, kitai enda meri iya jaku tabi tauka mai iya datai ngagai gempuru.

NELADAN PENGASIH ENGGAU PENYIRU JEHOVAH

16-17. (a) Jehovah deka orang ke bedosa ngereja nama? (Esekiel 18:32) (b) Baka ni bala tuai gempuru ulih gawa begulai enggau Jehovah?

¹⁶ Nama udah dipelajarka kitai dalam majalah tu? Jehovah enggai sapa-sapa pan dipunaska. (Bacha Esekiel 18:32.) Iya dekaka sida ke bedosa bebaik baru enggau Iya. (2 Kor. 5:20) Nya kebuah, Jehovah seruran meransang sida ke udah ninggalka Iya nesal ati lalu pulai baru ngagai Iya. Bala tuai gempuru bekerejasama enggau Jehovah kena nulung sida ke udah ngereja dosa ti besai nesal ati.—Rom. 2:4; 1 Kor. 3:9.

¹⁷ Gambarka pengaga ati sida ke ba serega lebuh orang ke bedosa nesal ati. Apai kitai, Jehovah, amat gaga ati tiap kali siku ari bedus Iya ti lenyau pulai baru ngagai raban gempuru. Lebuh kitai belematika penyiru, pengasih, enggau pemanah ati Jehovah, pengerindu kitai ke Jehovah deka nyadi majak dalam.—Luk. 1:78.