1-2. (a) Nama reti dosa, lalu baka ni kitai ulih ngelepaska diri ari dosa? (Peda mega “Penerang Jaku.”) (b) Nama deka dikerandauka kitai dalam artikel tu enggau artikel ke bukai dalam majalah Menara Jaga tu? (Peda mega “Nuju ngagai Bala Pemacha” ba majalah tu.)

 KATI nuan deka nemu pemesai pengerindu Jehovah ke nuan? Nuan ulih tetemuka saut iya lebuh nuan belajarka utai ti udah digaga Iya kena nyelamatka nuan ari dosa enggau pemati. Dosa a nya munsuh ti amat jai, lalu nuan enda ulih ngalahka iya enggau pengering diri empu. Kitai bedosa tiap hari, lalu kitai mati ketegal dosa. (Rom. 5:12) Tang bisi berita manah! Enggau tulung ari Jehovah, kitai ulih ngalahka dosa enggau pemati.

² Pengelama kira-kira 6,000 taun, Jehovah udah nulung mensia nyadi kaban Iya, taja pan kitai bedosa. Nama kebuah? Laban Iya rinduka kitai. Jehovah udah rinduka mensia kenyau ari maya Iya ngaga kitai. Ketegal nya, Jehovah udah ngereja mayuh utai kena nulung kitai lebuh kitai bedosa. Petara nemu kitai deka mati laban dosa. Tang Iya enggai kitai mati. Iya deka kitai idup belama iya. (Rom. 6:23) Tu meh utai ti dikedekaka Jehovah ke nuan. Nyadi, dalam artikel tu, kitai deka berandauka tiga iti tanya: (1) Nama harapan ke diberi Jehovah ngagai semua mensia ti bedosa? (2) Nama utai ti digaga bala mensia ti enda sempurna ba jeman Bup Kudus ngambika ulih ngelantangka ati Jehovah? (3) Nama digaga Jesus kena nyelamatka mensia ari dosa enggau pemati?

 NAMA HARAPAN KE DIBERI JEHOVAH NGAGAI SEMUA MENSIA TI BEDOSA?

3. Nama utai ke ngasuh Adam seduai Awa bedosa?

³ Lebuh Jehovah ngaga lelaki enggau indu ti keterubah, Iya dekaka seduai iya gaga ati. Iya meri seduai iya endur diau ti manah, tikah, sereta tanggung pengawa ti ngagitka ati. Jehovah ngasuh seduai iya ngemenuhka dunya tu enggau peturun seduai iya, sereta ngaga dunya tu nyadi Paradais baka taman Eden. Jehovah semina meri seduai iya siti aja pesan. Lalu Iya mega nangkan seduai iya, enti seduai iya sengaja enggai ngasika pesan nya, seduai iya deka mati. Kitai nemu utai ke nyadi. Siku melikat ti jai, ke enda rinduka Petara tauka mensia, nguji ngasuh Adam seduai Awa enda ngasika Petara. Lalu, Adam enggau Awa pan nitihka utai ti dipadah Sitan, melikat ti jai nya. Ari ke ngasi sereta arapka Apai seduai iya ti bepengerindu, seduai iya ngereja dosa. Lalu, baka ke ditemu kitai, utai ti dipadah Jehovah amat nyadi. Kenyau ari maya nya, Adam seduai Awa merinsa sepemanjai pengidup seduai iya. Seduai iya nyadi tuai lalu mati.—P-kal. 1:​28, 29; 2:​8, 9, 16-18; 3:​1-6, 17-19, 24; 5:5.

4. Nama kebuah Jehovah begedika dosa, lalu nama digaga Iya kena nulung kitai ngelaban dosa? (Rome 8:​20, 21)

⁴ Jehovah nepuka cherita tu dalam Bup Kudus ngambika kitai ulih meretika siti utai ti penting, iya nya kebuah Iya amat begedika dosa. Dosa nyeraraka kitai ari Apai kitai, lalu ngujungka kitai mati. (Isa. 59:2) Sitan begedika Jehovah enggau mensia. Nya kebuah iya nguji ngasuh Adam seduai Awa bedosa, lalu iya terus ngereja utai ti sama ngagai kitai kemayaharitu. Lebuh Adam enggau Awa bedosa, Sitan engka ngumbai diri udah mujur ngerusakka tuju Jehovah ke mensia. Tang iya enda meretika pemesai pengerindu Jehovah ke mensia. Petara enda kala ngubah tuju Iya ke peturun Adam seduai Awa. Iya rinduka semua mensia. Nyadi, Iya tekala nya nyediaka harapan ke semua kitai. (Bacha Rome 8:​20, 21.) Jehovah nemu sekeda ari peturun Adam seduai Awa deka milih rindu sereta ngasika Iya. Nyadi, Jehovah nyediaka jalai ngambika sida ulih datai semak ngagai Iya sereta diselamatka ari dosa enggau pemati. Nama digaga Jehovah ngambika semua utai tu ulih nyadi?

5. Nama harapan ke diberi Jehovah ngagai mensia sepengudah Adam seduai Awa bedosa? (Pemungkal 3:15)

⁵ Bacha Pemungkal 3:15. Nengah jaku benabi tu Jehovah meri mensia ti bedosa harapan lebuh Iya madahka utai ti deka nyadi ngagai Sitan. Petara madahka, siku “peturun” deka nyelamatka mensia. Peturun tu deka ngerusakka Sitan, lalu mutarka semua penanggul ke digaga Sitan ba taman Eden. (1 Jhn. 3:8) Tang sebedau utai tu nyadi, Sitan deka mantuk tumbit peturun nya, tauka ngasuh iya mati. Tu tentu deka balat ngemediska ati Jehovah. Tang Jehovah sanggup ngenatka pemedis nya sereta ngemendarka peturun nya merinsa ngambika ulih nyelamatka mensia ari dosa enggau pemati.

BAKA NI MENSIA TI ENDA SEMPURNA BA JEMAN BUP KUDUS NGELANTANGKA ATI JEHOVAH?

6. Nama digaga Abel, Noah, enggau orang ke tetap ati ke bukai ngambika ulih datai semak ngagai Jehovah?

⁶ Belubah-lubah Jehovah nunjukka enggau terang agi baka ni mensia ulih datai semak ngagai Iya. Abel, anak kedua Adam seduai Awa, mensia ti keterubah ke arapka Jehovah pengudah pengawa angkat ngelaban nyadi ba taman Eden. Ketegal Abel rinduka Jehovah sereta deka ngelantangka ati enggau datai semak ngagai Iya, Abel meri pemeri ngagai Jehovah. Abel nya siku pengibun  bedus. Nyadi, iya ngambi sekeda ari anak bedus iya lalu nyerahka sida nyadika korban ngagai Jehovah. Nama asai ati Jehovah pasal nya? Jehovah “lantang ati enggau Abel sereta pemeri iya.” (P-kal. 4:4) Jehovah mega lantang ati enggau pemeri ari orang ke rindu sereta arapka Iya, baka Noah. (P-kal. 8:​20, 21) Lebuh Jehovah nerima pemeri ke baka nya, tu nunjukka mensia ti enda sempurna mega ulih ngelantangka ati Iya sereta datai semak ngagai Iya. b

7. Nama ulih dipelajarka kitai ari utai ti sanggup digaga Abraham?

⁷ Abraham bisi pengarap ti amat tegap ngagai Jehovah. Jehovah ngasuh Abraham ngereja siti utai ti amat tusah, iya nya nyerahka anak iya Isak nyadika pemeri. Utai tu tentu amat ngenusahka ati Abraham. Tang iya ngasika Jehovah. Lebuh Abraham nyauka munuh anak lelaki iya, Petara nagang iya ari ngereja nya. Teladan tu ngajar siti utai ti amat penting ngagai semua orang ke arap, iya nya Jehovah sanggup nyerahka Anak ti dikesayauka Iya nyadika genselan tebus. Tu nunjukka Iya amat rinduka mensia.—P-kal. 22:​1-18.

8. Nama ulih dipelajarka kitai ari atur pemeri jelu ke bisi dalam Adat? (Adat Lewi 4:​27-29; 17:11)

⁸ Lebuh Jehovah meri Adat ngagai orang Israel, Iya ngasuh sida meri pemeri jelu ngambika dosa sida ulih diampun. (Bacha Adat Lewi 4:​27-29; 17:11.) Semua pemeri tu nunjukka Jehovah deka nyediaka siti pemeri ti besai agi, ke deka nyelamatka mensia ari dosa enggau pengabis iya. Petara ngasuh bala nabi Iya nulis pasal peturun ti disemaya tu ke deka merinsa lalu mati. Identiti peturun tu belubah-lubah ditemu sebagai siku Anak Petara ti spesial. Anak Iya deka nyadi baka siku bedus ti diberi nyadika korban. (Isa. 53:​1-12) Gambarka utai ke patut digaga Jehovah, iya nya ngaga atur ngambika Anak ti dikesayauka Iya nyadi tebus kena nyelamatka mensia ari dosa enggau pemati. Utai ti dikereja Jehovah amat ngagaka ati, lalu Iya ngereja tu ke nuan mega.

NAMA DIGAGA JESUS KENA NYELAMATKA MENSIA?

9. Nama utai ti dipadah John Pemaptisa pasal Jesus? (Hebrew 9:22; 10:​1-4, 12)

⁹ Ba taun 29 M., lebuh John Pemaptisa meda Jesus ari Nasaret, iya lalu madah: “Peda, Anak Bedus Petara ke muai dosa dunya!” (Jhn. 1:29) Jaku tu nunjukka Jesus nya meh peturun ti spesial ke disemayaka Jehovah. Jesus deka nyerahka nyawa iya nyadika genselan tebus. Au, peturun ari Jehovah udah datai kena nyelamatka mensia ari dosa.—Bacha Hebrew 9:22; 10:​1-4, 12.

10. Baka ni Jesus nunjukka iya datai “ketegal orang ke bedosa”?

¹⁰ Jesus keran deka nulung orang ke berasai tusah ati ketegal dosa sida. Iya mai sida nyadi bala murid iya. Iya nemu kebuah ti bendar mensia merinsa, iya nya ketegal dosa. Nyadi, iya bebendar deka nulung orang ke merinsa ketegal dosa ke digaga sida. Iya ngena siti sempama lalu nerangka: “Orang ke gerai enda begunaka lutur, tang semina orang ke sakit begunaka lutur.” Ku iya agi: “Aku datai ukai ketegal orang ke lurus, tang ketegal orang ke bedosa.” (Mat. 9:​12, 13) Lalu nya meh utai ke digaga Jesus. Jesus bejaku enggau nelap sereta ngampunka dosa siku indu ke masu kaki iya ngena ai mata iya. (Luk. 7:​37-50) Jesus ngajar siku indu Samaria pemendar ti penting, taja pan iya nemu indu nya bisi pengidup ti enda bemoral. (Jhn. 4:​7, 17-19, 25, 26) Ketegal dosa, semua mensia mati. Tang Petara  udah meri Jesus kuasa kena ngangkatka bala lelaki, indu, sereta anak idup baru.—Mat. 11:5.

11. Nama kebuah orang ke bedosa rindu begulai enggau Jesus?

¹¹ Kitai ulih faham kebuah orang ke ngereja utai ti enda manah rindu begulai enggau Jesus. Iya meretika asai ati sida sereta siru ngagai sida. Sida enda takut bejaku enggau Jesus. (Luk. 15:​1, 2) Jesus muji sida laban sida udah arapka iya lalu iya mega ngayanka pemanah ati ngagai sida. (Luk. 19:​1-10) Jesus ngayanka pengasih sama baka Apai iya. (Jhn. 14:9) Ari chara Jesus bejaku sereta ngintu orang bukai, kitai belajar Jehovah Petara ti pengasih sereta rinduka orang ti bedosa lalu Iya deka nulung sida. Jesus nulung orang ke bedosa ngambika bisi pengingin ngubah pengidup sida lalu nitihka iya.—Luk. 5:​27, 28.

12. Nama utai ti diajar Jesus pasal pemati iya?

¹² Jesus nemu iya deka nyerahka nyawa iya nyadika tebus. Lebih ari sekali, iya madah ngagai bala murid iya, iya deka diserahka ngagai bala munsuh sereta dibunuh ba tiang perinsa. (Mat. 17:22; 20:​18, 19) Iya nemu, genselan tebus iya deka muai dosa dunya, baka ke dipadah John enggau bala nabi ke bukai. Jesus mega madah, pengudah iya mati, iya deka “mai semua macham orang” ngagai iya. (Jhn. 12:32) Sida ke arapka Jesus sereta ngasika pesan iya ulih ngelantangka ati Jehovah. Enti sida ngereja nya, sida deka “dilepaska ari dosa.” (Rom. 6:​14, 18, 22; Jhn. 8:32) Nyadi, Jesus amat berani sereta sanggup mati  enggau chara ti amat pedis ngambika ulih nyelamatka kitai.—Jhn. 10:​17, 18.

13. Baka ni Jesus mati, lalu nama ulih dipelajarka kitai pasal Jehovah ari pemati Jesus? (Peda mega gambar.)

¹³ Siku kaban rapat Jesus nyerahka iya ngagai bala munsuh. Pengudah iya ditangkap, bala munsuh iya ngeleseka iya sereta nuduh iya ngereja utai ti enda dikereja iya. Jesus diberi ukum mati lalu diperinsa. Lalu pengujung iya, bala soldadu mantang Jesus ba tiang perinsa kena munuh iya. Jesus enggau setia tan ngenatka semua pemedis enggau pemerinsa nya. Taja pia, Jehovah lebih agi merinsa ari Jesus lebuh Iya meda Anak Iya balat diperinsa. Jehovah bisi kuasa nagang Anak Iya ari diperinsa, tang Iya enda ngereja nya. Enti Jehovah amat sayauka Jesus, nama kebuah Iya ngemendarka Jesus merinsa lalu mati? Laban Iya sayauka kitai. Jesus madah: “Petara balat rinduka dunya tu, nya alai Iya meri Anak tunggal Iya, ngambika genap iku orang ke arapka Anak Iya enda dipunaska tang bulih pengidup ti meruan belama iya.”—Jhn. 3:16.

14. Nama ulih dipelajarka nuan ari genselan tebus Jesus?

¹⁴ Genselan tebus Jesus nya bukti ti pemadu besai ke nunjukka pemesai pengerindu Jehovah ngagai bala peturun Adam seduai Awa. Tu nunjukka Jehovah amat sayauka nuan. Iya meri Anak ti dikesayauka Iya nyadika tebus sereta ngenatka pemedis ti balat ngambika ulih nyelamatka nuan ari dosa enggau pemati. (1 Jhn. 4:​9, 10) Iya deka nulung tiap iku kitai nyembah Iya taja pan kitai agi bedosa diatu. Lalu, Iya deka muai semua dosa belama iya jemah ila.

15. Nama patut digaga kitai ngambika bulih penguntung ari pemeri Petara, iya nya genselan tebus Jesus?

¹⁵ Petara udah meri kitai siti pemeri, iya nya genselan tebus Anak tunggal Iya. Ketegal nya, dosa kitai ulih diampunka. Tang ngambika bulih ampun ari Petara, bisi utai ti patut dikereja kitai. Nama utai nya? John Pemaptisa madah: “Kita patut nesal ati laban Perintah serega nyau semak.” (Mat. 3:​1, 2) Lalu enda lama udah nya, Jesus mega nyebut utai ti nyauka sama enggau John. (Mat. 4:17) Nya alai, kitai mesti nesal ati ke dosa kitai enti kitai deka datai semak ngagai Jehovah sereta dosa kitai diampun. Tang nama reti nesal ati, lalu baka ni tu nulung kitai ngelantangka ati Jehovah taja pan kitai bedosa? Artikel ti nangkanka tu deka nyaut tanya tu.