1. Baka ni asai ati kitai pasal pengarap kitai?

PENGARAP ukai utai ti ulih dikembuan semua orang. (2 Tes. 3:2) Tang Jehovah meri pengarap ngagai semua orang ke nyembah Iya. (Rom. 12:3; Gal. 5:22, NW) Kitai amat beterima kasih laban Jehovah meri kitai pengarap!

2, 3. (a) Nama asil iya enti kitai ngembuan pengarap? (b) Nama tanya ke deka dikerandauka kitai diatu?

² Jehovah meri Anak ti dikesayauka Iya, ngambika dosa semua orang ke arapka Jesus ulih diampun. Tu ulih nulung orang nyadi kawan Jehovah sereta idup belama iya. (Jhn. 6:44, 65; Rom. 6:23) Naka meh pemanah Jehovah ngagai kitai! Taja pan kitai orang ti bedosa sereta patut mati, Jehovah nemu, kitai ulih ngereja utai ti manah. (Mas. 103:10) Iya udah nulung kitai belajarka berita manah pasal Jesus enggau genselan iya. Enti kitai arapka Jesus sereta nitihka iya, kitai ulih nganti pengidup ti meruan belama iya!—Bacha 1 John 4:9, 10.

 ³ Tang nama agi ulih dipelajarka kitai pasal pengarap? Enti kitai semina nemu utai ke udah dikereja Petara ke kitai sereta utai ke deka dikereja Iya jemah ila, kati tu reti iya kitai ngembuan pengarap? Aram kitai beratika utai bukai ke enda tau enda dikereja kitai.

4. Enti kitai ngembuan pengarap, baka ni tu ulih ngubah kitai?

⁴ Enti kitai arapka Jehovah enggau Jesus, kitai ukai semina nemu utai ke udah dikereja seduai iya tauka utai ke deka dikereja seduai iya ke kitai. Kitai mega ingin deka idup nitihka chara ti udah diajar seduai iya. Lalu kitai keran deka nulung orang bukai ngelala seduai iya. Rasul Paul madahka: ‘Enti kita ngaku ngena mulut kita Jesus nya Tuan, lalu dalam ati kita arapka Petara udah ngangkatka iya ari mati, kita deka diselamatka. Laban kita arap ngena ati kita, lalu digaga lurus, lalu kita ngaku ngena mulut kita, lalu diselamatka.’—Rom. 10:9, 10; 2 Kor. 4:13.

5. Nama kebuah pengarap nya beguna, lalu nama patut dikereja kitai ngambika ngembuan pengarap ti tegap? Beri siti chunto.

⁵ Endang amat, ngambika ulih idup meruan belama iya ba dunya baru Petara, kitai enda tau enda ngembuan pengarap sereta terus negapka pengarap kitai. Pengarap nya baka utai tumbuh. Kitai patut terus manjah iya ngambika mengkang idup sereta terus mansang besai. Tang enti iya enda chukup ai, iya deka layu lalu mati. Pia mega, kitai patut nentuka pengarap kitai mengkang “tegap” sereta terus “mansang.”—Tit. 2:2; 2 Tes. 1:3; Luk. 22:32; Heb. 3:12.

6. Nama dua iti chara dikena ngambarka pengarap ba Hebrew 11:1?

⁶ Ba Hebrew 11:1, Bup Kudus nerangka reti pengarap. (Bacha.) (1) Reti pengarap nya “arapka utai ti disadang.” “Utai ti disadang” kitai nyengkaum semaya Petara pasal jemah ila. Ngambika chunto, kitai pechaya penyai deka nadai agi, lalu kitai deka bisi dunya ti baru. (2) Reti pengarap nya “arapka,” tauka pechayaka “utai ti enda dipeda.” Kitai nemu Petara Jehovah, Jesus Kristus, bala melikat, sereta Perintah Petara endang amat bisi di serega, taja pan kitai enda ulih meda sida. (Heb. 11:3) Baka ni kitai ulih nunjukka diri amat arapka semaya Petara sereta ba utai ke enda ulih dipeda kitai? Kitai ulih nunjukka nya ari chara pengidup kitai, ari utai ti disebut sereta ari utai ti dikereja kitai.

7. Baka ni chunto Noah ulih nulung kitai nemu reti ngembuan pengarap? (Peda gambar ba pun artikel.)

⁷ Nama ulih dipelajarka kitai ari Noah pasal pengarap? Rasul Paul madahka, ‘lebuh iya [Noah] diberi Petara jaku tangkan pasal utai ti deka nyadi, ngasi lalu ngaga sebuah bandung kena iya ngidupka sida sebilik.’ (Heb. 11:7) Ketegal Noah arapka utai ke dipadah Jehovah, iya ngaga bandung ti amat besai nya. Orang ke diau semak iya engka nanyaka kebuah iya ngaga bandung nya. Kitai ulih pechaya, Noah enda diau diri. Bup Kudus madahka, Noah nya “ke ngajar pasal pengelurus.” (2 Pet. 2:5) Iya nangkan orang pasal Petara ke deka ngena ai bah ngemunaska orang jai. Iya engka madah ngagai sida utai ke udah dipadah Jehovah ngagai iya:  “Aku deka ngeluska semua mensia. . . laban dunya tu penuh laban pengawa sida ke jai.” Lalu “Aku deka ngasuh ai bah ngampuhka dunya kena ngerusak semua utai ti idup. Semua utai di dunya tu deka mati magang.” Udah nya Noah madahka utai ti patut dikereja sida ngambika ulih selamat. Jehovah udah ngasuh Noah: “Nuan, . . . enda tau enda tama ngagai bandung nya.”—P-kal. 6:13, 17, 18.

8. Nama dipadah James pasal pengarap?

⁸ James mega nulis pasal pengarap. Iya engka nulis nya enda lama pengudah rasul Paul nulis surat ngagai orang Hebrew. James nulis: “Pandangka ngagai aku pengarap nuan ti nadai pengawa, lalu aku deka mandangka ngagai nuan pengarap aku ngena pengawa ti dikereja aku.” (Jas. 2:18) James nerangka, ngambika ngembuan pengarap, kitai ukai semina pechaya aja tang patut bisi pengawa. Bala antu pechaya Jehovah endang amat bisi, tang sida enda arapka Iya. Sida balat ngelaban Iya. (Jas. 2:19, 20) Tang enti orang ngembuan pengarap, iya deka ngerinduka ati Petara enggau ngereja utai ti manah. Nya meh utai ti dikereja Abraham. James nulis: “Kati aki kitai Abraham enda dikumbai lurus ketegal pengawa ti dikereja iya, lebuh iya nyerahka anak iya, Isak, ba alta? Nya alai, pengarap diayanka ulih pengawa, lalu pengarap nyadi chukup menyana ulih pengawa.” James udah nya nerangka, pengarap ke nadai pengawa nya enda beguna. Iya madahka: “Baka tubuh ti mati enti iya nadai roh, baka nya mega pengarap; iya mati enti iya nadai pengawa.”—Jas. 2:21-23, 26.

9, 10. Nama reti arapka Anak?

⁹ Lebih ari 30 taun udah nya, John nulis Bup Injil iya sereta tiga iti surat. Baka penulis Bup Kudus ke bukai, John nemu reti utai ti dikumbai pengarap. Ba utai ke ditulis John, iya mayuh kali ngena leka jaku Gerika ti kekadang disalin ngagai “arapka tauka ngembuan pengarap,” dalam jaku English.

¹⁰ Ngambika chunto, John nerangka: ‘Barang sapa arapka Anak, bulih pengidup ti meruan belama iya. Barang sapa enda ngasika Anak, nadai bulih pengidup, tang deka natka pengeringat Petara.’ (Jhn. 3:36) Ngambika ulih arapka Anak, kitai enda tau enda ngasika Jesus. Iya ke amat, ari utai ke ditulis John, kitai beratika Jesus suah madahka, kitai enda tau enda arapka iya enggau Apai iya ngambika tau bulih pengidup ti meruan belama iya.—Jhn. 3:16; 6:29, 40; 11:25, 26; 14:1, 12.

11. Baka ni kitai ulih nunjukka diri beterima kasih ngagai Jehovah ketegal nemu pemendar?

¹¹ Jehovah ngena roh kudus Iya nulung kitai nemu pemendar pasal Iya enggau Anak Iya sereta nulung kitai arapka seduai iya. (Bacha Luke 10:21.) Baka ni kitai ulih nunjukka diri beterima kasih ngagai Jehovah ke semua utai ke udah dikereja Iya? Kitai anang ngetu beterima kasih ngagai Jehovah laban ngawakka kitai bisi kaul enggau Iya nengah Jesus,  “ke ngemunka lalu ngaga pengarap kitai nyadi pemadu badas.” (Heb. 12:2) Lalu kitai patut terus negapka pengarap kitai enggau seruran besampi ngagai Jehovah sereta belajarka Jaku Iya.—Eps. 6:18; 1 Pet. 2:2.

12. Enti kitai ngembuan pengarap, nama deka dikereja kitai?

¹² Kitai patut terus nunjukka diri arapka semaya Jehovah nengah pengawa kitai. Ngambika chunto, kitai terus nusui pasal Perintah Petara ngagai orang sereta nulung sida nyadi murid Jesus. Kitai mega terus ngereja “pengawa ti badas ngagai semua orang, kelebih agi ngagai orang ke sama pengarap enggau” kitai. (Gal. 6:10) Lalu kitai bebendar “ngelengkaka pengidup ti lama, enggau semua pengawa iya” laban kitai enggaika sebarang utai ngerusakka kaul kitai enggau Jehovah.—Kol. 3:5, 8-10.

13. Baka ni “arapka Petara” nya beguna, lalu nama kebuah?

¹³ Bup Kudus madahka: ‘Nadai orang ulih ngerinduka ati Petara enti iya enda arapka Petara, laban barang sapa datai ngagai Petara enda tau enda arapka Petara endang amat bisi, lalu arapka Iya deka ngupah orang ke ngiga Iya.’ (Heb. 11:6) Bup Kudus mega nunjukka “arapka Petara” nya utai ti keterubah ke patut dikemisi orang Kristian ti bendar. Nya sebagi ari “pun pelajar” kitai. (Heb. 6:1) Kelimpah ari pengarap, kitai mega begunaka kualiti bukai ngambika kitai bisi kaul enggau Jehovah sereta ngetanka kaul nya.—Bacha 2 Peter 1:5-7; Jud. 20, 21.

14, 15. Nama kebuah ngembuan pengerindu beguna agi ari ngembuan pengarap?

¹⁴ Penulis Bup Kudus suah agi bejaku pasal pengarap enti dibanding enggau kualiti ke bukai. Kati tu reti iya pengarap nya kualiti ti pemandu beguna ke patut dikembuan kitai?

¹⁵ Paul mandingka pengarap enggau pengerindu. Ku iya nulis: “Enti aku bisi pengarap kena nginsitka bukit, tang nadai pengerindu, aku nadai guna.” (1 Kor. 13:2) Jesus madahka “pesan ti pemadu besai dalam Adat” nya rinduka Petara. (Mat. 22:35-40) Pengerindu nulung kitai ngembuan mayuh kualiti bukai kena ngelantangka  ati Petara. Ngambika chunto, Bup Kudus madahka, pengerindu “arapka semua utai.” Nya alai, pengerindu deka nulung kitai pechaya tauka arapka semua utai ke dipadah Petara ngagai kitai dalam Bup Kudus.—1 Kor. 13:4, 7.

16, 17. Nama dipadah Bup Kudus pasal pengarap enggau pengerindu? Ni bagi kualiti ti pemadu besai, lalu nama kebuah?

¹⁶ Pengarap enggau pengerindu nya dua iti kualiti ti sama beguna, lalu bala penulis Bup Kudus suah ngena dua iti kualiti tu begulai. Paul meransang bala menyadi Kristian iya “ngerasukka pengarap enggau pengerindu nyadika terabai dada.” (1 Tes. 5:8) Peter nulis pasal Jesus: ‘Taja pen kita nadai udah meda iya, kita rinduka iya. Lalu taja pen kita nadai meda iya diatu, kita arapka iya.’ (1 Pet. 1:8) James nanya bala menyadi Kristian ke diiri ngena roh kudus: ‘Kati Petara nadai udah milih orang ke seranta di dunya tu nyadi orang ke kaya dalam pengarap, sereta bempu Perintah ti udah disemaya Iya ke orang ke rinduka Iya?’ (Jas. 2:5) John nulis pesan Petara, iya nya kitai patut “arapka nama Anak Iya Jesus Kristus, lalu rinduka pangan diri.”—1 Jhn. 3:23.

¹⁷ Tang Paul mega nulis: “Diatu utai tiga bengkah tu agi mengkang: pengarap, pengadang, enggau pengerindu. Tang utai ti pemadu besai nya pengerindu.” (1 Kor. 13:13) Jemah ila, kitai enda ibuh agi arapka semaya Petara pasal dunya baru Iya, laban semaya nya udah dikeamatka. Kitai deka bulih pengidup ti ngelantangka ati baka ke dipadah Bup Kudus. Tang kitai patut seruran rinduka Petara sereta orang bukai. Iya ke amat, pengerindu kitai ke sida deka majak nambah belama iya.

18, 19. Nama asil iya ketegal nembiak Petara kemaya hari tu ngembuan pengarap, lalu sapa ke patut nerima puji ketegal utai tu?

¹⁸ Nembiak Jehovah kemaya hari tu arapka Perintah Petara sereta nyukung iya. Lalu sida rinduka pangan diri. Tu ketegal sida ngawakka roh kudus Petara ngiring pengidup sida. (Gal. 5:22, 23) Nama asil iya? Lebih lapan juta iku bala menyadi Kristian di serata dunya ngembuan pemaik sereta penyerakup ba gempuru sida. Endang amat, pengarap enggau pengerindu nya kualiti ti amat beguna.

¹⁹ Penyerakup tu semina ulih nyadi ketegal tulung ari Petara kitai. Iya patut nerima puji ketegal utai tu. (Isa. 55:13) Kitai amat beterima kasih laban Iya udah nulung kitai “diselamatka . . . ketegal pengarap.” (Eps. 2:8) Jehovah deka terus nulung mayuh agi orang arapka Iya. Udah nya, serata dunya deka penuh enggau orang ti sempurna, lurus, sereta lantang ati ke deka muji Jehovah belama iya!