1, 2. (a) Nama penanggul ke ditapi orang ke datai ari menua bukai kemaya hari tu? (Peda gambar ba pun artikel.) (b) Nama jaku tangkan ke diberi rasul Paul, lalu nama tanya ke deka dikerandauka kitai?

LEBIH ari 30 taun ti udah, Osei, ke bedau nyadi Saksi-Saksi Jehovah, ninggalka rumah iya di menua Ghana lalu diau di menua bukai. ^[1] (Peda nota penutup.) Ku iya madahka: “Udah nya aku nemu, mayuh orang enda ibuhka aku. Gaya hari ba menua nya mega ngasuh aku tekenyit. Lebuh aku ninggalka padang bilun lalu ngasaika penyelap keterubah iya, aku nyabak.” Ketegal Osei tusah belajarka bansa jaku menua nya, iya begunaka lebih ari setaun ngiga kereja ke manah. Lalu ketegal iya jauh ari menua diri, iya enda betah diri sebilik sereta berasai sunyi.

² Perundingka baka ni nuan deka orang nulung nuan enti nuan napi utai ti sama. Nuan tentu berasai gaga ati enti disambut orang ke rinduka nuan enggau manah ba Palan Gempuru enda ngira ari ni menua tauka chura kulit nuan. Endang amat, Bup Kudus ngasuh orang Kristian ke bendar “anang enda ngelaluka” orang ke datai ari menua bukai. (Heb. 13:2)  Nya alai, aram kitai berandauka tanya ke baka tu: Baka ni asai ati Jehovah pasal orang ke datai ari menua bukai? Kati kitai patut ngubah asai ati kitai ngagai orang ke datai ari menua bukai? Lalu baka ni kitai ulih nulung orang ke datai ari menua bukai ngambika sida berasai diterima ba gempuru kitai?

3, 4. Nitihka Pemansut 23:9, baka ni Petara dekaka orang Israel begulai enggau orang ke datai ari menua bukai, lalu nama kebuah?

³ Pengudah Jehovah ngelepaska nembiak Iya ari nyadi ulun di menua Ejip, Iya meri sida adat ke ngajar sida mandangka pemanah ati ngagai orang ari menua bukai ke nitihka sida. (P-sut. 12:38, 49; 22:21) Ketegal pengidup enda seruran senang ba orang ke datai ari menua bukai, nya alai Jehovah enggau pengerindu ngintu sida. Ngambika chunto, sida ulih ngetau utai ke ditinggalka orang ke ngetau.—Lew. 19:9, 10.

⁴ Jehovah ukai semina ngasuh orang Israel bebasaka orang ke datai ari menua bukai, tang Iya mega dekaka sida ingatka baka ni asai nyadi orang ke datai ari menua bukai. (Bacha Pemansut 23:9.) Indah sebedau orang Israel nyadi ulun di menua Ejip, orang Ejip enda rinduka sida laban chara pengidup sida enda sebaka. (P-kal. 43:32; 46:34; P-sut. 1:11-14) Pengidup orang Israel tusah lebuh sida nyadi orang ke datai ari menua bukai. Jehovah dekaka sida ingatka utai nya sereta dekaka sida manah enggau orang ke datai ari menua bukai ke bisi diau begulai enggau sida.—Lew. 19:33, 34.

5. Nama ulih nulung kitai ngayanka pemanah ati ngagai orang ari menua bukai baka ke digaga Jehovah?

⁵ Jehovah enda berubah. Nya alai, lebuh orang ari menua bukai datai ngagai gempuru kitai, kitai anang enda ingat, Jehovah agi ngayanka pamanah ati ngagai sida. (U-dat. 10:17-19; Mal. 3:5, 6) Perundingka pasal penanggul ke ditapi orang ke datai ari menua bukai. Ngambika chunto, sida enda nemu bansa jaku ke baru tauka enda dikeibuhka orang. Aram kitai enggau naka ulih nulung sida sereta manah enggau sida.—1 Pet. 3:8.

6, 7. Nama nunjukka orang Kristian bansa Judah kurun keterubah belajar mutarka ulah ke enda manah?

⁶ Orang Kristian kurun keterubah belajar mutarka ulah enda manah ke bisi ba orang Judah. Kena Pentakos taun 33, orang Kristian bansa Judah ke diau ba Jerusalem ngayanka pemanah ati sereta ibuhka orang baru ke datai ari menua ti bebida. (SKR. 2:5, 44-47) Tu nunjukka orang Kristian bansa Judah nemu reti ngayanka pemanah ati ngagai orang ke datai ari menua bukai.

⁷ Taja pia, maya nya bisi utai nyadi. Orang Judah ke bejaku ngena jaku Gerika mutap laban bala indu balu sida enda dikeibuhka.  (SKR. 6:1) Kena mutarka penanggul tu, bala rasul milih lalu nganjung tujuh iku lelaki kena nentuka semua orang diintu enggau manah. Bala rasul milih orang lelaki ke bisi nama Gerika, engka sida dekaka bala indu balu nya berasai nyamai agi ati.—SKR. 6:2-6.

8, 9. (a) Nama tanya ke ulih nulung kitai nemu sekalika kitai bisi ulah ke enda manah tauka temegahka bansa diri? (b) Nama utai ke enda tau enda dibuai kitai? (1 Pet. 1:22)

⁸ Sekalika kitai nemu tauka enda, chara pengidup balat ngachau semua kitai. (Rom. 12:2) Pia mega, kitai engka ninga orang ke diau semak enggau kitai, orang ke sama kereja, tauka orang ke sama sekula nyebut utai ke enda manah pasal gaya pengidup, bansa, tauka chura kulit. Ni pemalat utai tu ngachau runding kitai? Tauka baka ni gaya kitai enti orang ngeleseka menua kitai tauka sekeda ari chara pengidup kitai?

⁹ Bisi sekali, rasul Peter jai ulah enggau orang ke ukai bansa Judah. Tang iya belubah-lubah belajar muai asai ati ti enda manah nya. (SKR. 10:28, 34, 35; Gal. 2:11-14) Pia mega, enti kitai beratika diri bisi jai ulah tauka temegahka bansa diri, kitai patut bebendar muai iya. (Bacha 1 Peter 1:22.) Nama ulih nulung kitai ngereja nya? Kingatka, semua kitai enda sempurna enda ngira ari ni penatai kitai, lalu nadai seiku ari kitai patut diselamatka. (Rom. 3:9, 10, 21-24) Nya alai, kitai nadai kebuah ngasaika diri manah agi ari orang bukai! (1 Kor. 4:7) Kitai patut ngasaika utai ti sama baka Paul. Iya madahka ngagai bala menyadi Kristian iya, sida “ukai temuai agi, ukai orang kampar agi” tang ‘raban ruang bilik Petara.’ (Eps. 2:19) Semua kitai patut bebendar muai semua ulah ke enda rinduka bansa bukai ngambika kitai ulih nyadi mensia ti baru.—Kol. 3:10, 11.

10, 11. Baka ni Boas neladan runding Jehovah pasal orang ke datai ari menua bukai?

¹⁰ Boas, seiku lelaki ke tetap ati, neladan runding Jehovah pasal orang ke datai ari menua bukai. Baka ni? Lebuh Boas meresa umai iya maya musin ngetau, iya tepedaka Rut, seiku indu ari menua Moap ke bebendar gawa ngumpul barli ke labuh ba tanah. Nitihka Adat Moses, Rut bisi hak ngetau. Tang lebuh Boas ninga pasal Rut ke udah minta pemendar ngetau ba umai iya, iya balat alit ati. Iya ngemendarka Rut ngumpul barli nyengkaum ba endur ke alai ngengkahka berekas tangkai barli.—Bacha Rut 2:5-7, 15, 16.

¹¹ Utai ke nyadi udah nya enggau terang nunjukka Boas ibuhka Rut sereta penusah ke ditapi Rut nyadi orang ke datai ari menua bukai. Iya ngasuh Rut mengkang bekereja enggau sida ke indu ngambika iya enda dikachau sida ke lelaki ke gawa ba umai. Iya mega nentuka Rut bulih chukup pemakai enggau ai, sama baka bala pekereja iya empu. Boas ngayanka basa ngagai Rut ke datai ari menua bukai ti napi penusah tu sereta meransang iya.—Rut 2:8-10, 13, 14.

12. Nama asil iya enti kitai nunjukka pemanah ati ngagai orang ke datai ari menua bukai?

¹² Boas ngayanka pemanah ati ngagai Rut ukai aja ketegal Rut bisi pengerindu ti taluk ngagai entua indu iya, Naomi, tang mega ketegal Rut udah berengkah nyembah Jehovah sereta ngiga pengelikun ba Jehovah. Lebuh Boas manah enggau  Rut, ke bendar iya neladan pengerindu Jehovah ti taluk. (Rut 2:12, 20; J-lam. 19:17) Pia mega kemaya hari tu, enti kitai manah ati, kitai ulih nulung “semua mensia” belajarka pemendar sereta nulung sida nemu Jehovah balat rinduka sida.—1 Tim. 2:3, 4.

13, 14. (a) Nama kebuah kitai patut ngelaluka orang ke datai ari menua bukai ba Palan Gempuru? (b) Nama ulih nulung nuan berasai senang bejaku enggau orang ke bisi chara pengidup ke enda sebaka?

¹³ Kitai ulih ngayanka pemanah ati ngagai orang ke datai ari menua bukai enti kitai ngelaluka sida enggau gaga ati ba Palan Gempuru. Sida ke baru pindah ngagai siti-siti menua engka kekadang malu sereta deka agi kediri aja. Ketegal chara pengidup tauka status sida ba orang mayuh, sida engka ngasaika diri baruh ari bansa bukai tauka menua bukai. Nya alai, kitai patut dulu nanya sida, ngayanka pemanah ati sereta deka nemu pasal sida. Enti aplikasi JW Language bisi dalam bansa jaku nuan, tu ulih nulung nuan belajarka chara nanyaka berita dalam bansa jaku sida.—Bacha Pilipi 2:3, 4.

¹⁴ Nuan engka ngasaika diri tusah deka bejaku enggau orang ke bisi chara pengidup ke enda sebaka. Kena napi penanggul tu, nuan ulih madah ngagai iya siti-siti utai pasal nuan empu. Udah nya baru nuan nemu, nuan bisi mayuh utai ke sama enggau iya. Kingatka, tiap iti chara pengidup bisi pemanah tauka pengurang iya empu.

15. Nama ulih nulung kitai meretika orang ke benung nelebaka diri enggau menua baru?

¹⁵ Kena nulung orang bukai berasai diterima ba gempuru, tanya diri empu, ‘Enti aku ba menua bukai, baka ni aku deka orang ngelaluka aku?’ (Mat. 7:12) Sabar  meh enggau orang ke benung nelebaka diri enggau menua baru. Terubah iya, kitai engka enda entu meretika chara sida berunding tauka nerima siti-siti utai. Tang ari ke ngarapka sida berunding sereta ngereja utai baka orang ke sama chara pengidup enggau kitai, nama kebuah enda nerima sapa sida ke bendar?—Bacha Rome 15:7.

16, 17. (a) Nama ulih digaga kitai ngambika berasai semak agi ngagai orang ke bisi chara pengidup ti enda sebaka? (b) Baka ni kitai ulih nulung orang ke pindah ngagai menua kitai ba gempuru kitai?

¹⁶ Enti kitai magi jam belajar pasal menua tauka chara pengidup orang ke datai ari menua bukai, kitai deka senang agi ngelala sida. Lebuh kitai belajarka Bup Kudus ba diri sebilik, kitai ulih mansik chara pengidup orang ke pindah ngagai menua kitai ke enggau kitai begempuru tauka ba kandang endur kitai nginjil. Siti agi chara kitai ulih semak agi ngagai sida, iya nya enggau mai sida makai ba rumah kitai. Jehovah udah “muka pintu pengarap ngagai orang bansa bukai,” nya alai kitai patut neladan Iya sereta ngelaluka bala menyadi Kristian kitai ke datai ari menua bukai ke rumah kitai.—SKR. 14:27; Gal. 6:10; Jop 31:32.

¹⁷ Lebuh kitai ngena jam begulai enggau siti ruang bilik ke udah pindah ngagai menua kitai, tu deka nulung kitai meretika sereta gaga ati enggau pengawa ke digaga sida kena nelebaka diri enggau chara pengidup kitai. Kitai ulih nemu,  sida begunaka tulung ngambika ulih belajarka bansa jaku kitai. Kitai mega ulih nguluka sida ngagai gerempung ke ulih nulung sida ngiga rumah tauka kereja ti manah. Tulung ke baka tu beguna amat ba bala menyadi Kristian kitai.—J-lam. 3:27.

18. Chunto sapa ke ngayanka basa sereta terima kasih ke ulih diteladan orang ke pindah ngagai siti-siti menua kemaya hari tu?

¹⁸ Endang amat, orang ke pindah ngagai siti-siti menua patut enggau naka ulih nelebaka diri enggau chara pengidup ba menua baru. Rut netapka teladan ti manah ba pekara tu. Kesatu, iya ngayanka diri bebasaka adat ba menua baru enggau minta pemendar ngetau. (Rut 2:7) Iya enda ngumbai utai tu enda beguna tauka ngasaika orang bukai berutang ba iya. Kedua, iya jampat beterima kasih ngagai orang ketegal ngayanka pemanah ati ngagai iya. (Rut 2:13) Lebuh orang ke pindah ngagai siti-siti menua ngayanka ulah ti sama baka Rut, bala menyadi Kristian sida sereta orang bukai ke diau ba endur nya deka agi bebasaka sida.

19. Nama utai ke ulih ngasuh orang ke datai ari menua bukai berasai diterima?

¹⁹ Kitai balat gaga ati laban Jehovah udah ngayanka pemanah ati sereta ngawakka semua orang ningaka berita manah. Lebuh ba menua diri, sekeda orang engka enda ulih belajarka Bup Kudus tauka begempuru enggau nembiak Jehovah. Tang diatu sida bisi peluang begempuru enggau kitai, nya alai kitai patut nulung sida ngambika sida enda ngasaika diri baka orang ke datai ari menua bukai. Kitai engka nadai mayuh duit tauka enda ulih meri mayuh tulung ngagai sida. Tang enti kitai manah enggau sida, kitai neladan Jehovah ti rinduka sida. Kitai ‘nunda teladan Petara.’ Nya alai, aram meh kitai enggau naka ulih ngelaluka orang ke datai ari menua bukai ke bisi enggau kitai!—Eps. 5:1, 2.