1-3. (a) Nama patut dikemeratka kitai? (b) Nama penanggul ke ditapi orang ke belajarka bansa jaku ke baru, lalu nama tanya ke deka disaut kitai? (Peda gambar ba pun artikel.)

KEMAYA hari tu, mayuh Saksi-Saksi Jehovah kisuk nulung ngamatka jaku ke ngasuh nginjil “ngagai semua bansa, raban bansa, jaku enggau menua.” (Pem. 14:6) Kati nuan nya entara orang ke benung belajarka bansa jaku menua bukai? Sekeda nyadi pengerintis seberai tasik tauka nginjil ba endur ke begunaka mayuh penginjil ba menua bukai. Bisi sekeda udah berengkah enggau gempuru bansa jaku menua bukai ba menua diri.

² Semua nembiak Petara patut ngemeratka kaul diri sereta kaul sida sebilik enggau Iya. (Mat. 5:3) Taja pia, kekadang kitai engka kelalu kisuk nyentukka kitai tusah deka bisi awak belajarka Bup Kudus kediri empu enggau dalam agi. Tang sida ke enggau gempuru bansa jaku menua bukai bisi penanggul bukai.

³ Orang ke enggau gempuru bansa jaku menua bukai patut belajarka bansa jaku ke baru. Tang sida mega patut  nentuka sida enggau tetap belajar pasal penemu ti dalam ari Petara. (1 Kor. 2:10) Baka ni sida ulih ngereja nya enti sida enda entu meretika utai ke disebut ba gempuru? Lalu nama kebuah apai indai ke Kristian ke enggau gempuru bansa jaku menua bukai patut nentuka pemendar masuk ba ati bala anak sida?

4. Nama utai ke ulih ngachau kaul kitai enggau Jehovah? Beri siti chunto.

⁴ Enti kitai enda ulih meretika ajar Bup Kudus dalam bansa jaku menua bukai, tu ulih ngachau kaul kitai enggau Jehovah. Lebuh Nehemiah pulai baru ke Jerusalem, iya beratika sekeda bala anak ke dia enda ulih bejaku ngena jaku Hebrew. (Bacha Nehemiah 13:23, 24.) Ketegal bala anak mit tu enda ulih meretika Jaku Petara, kaul sida enggau Jehovah enda rapat.—Neh. 8:2, 8.

5, 6. Nama udah diperatika sekeda apai indai ke enggau gempuru bansa jaku menua bukai, lalu nama penanggul iya?

⁵ Sekeda apai indai ke Kristian ke enggau gempuru bansa jaku menua bukai beratika kaul bala anak sida enggau Jehovah udah lemi. Laban bala anak sida enda entu meretika utai ke disebut ba gempuru, nya alai sida enda ulih diperansang ngereja utai ke patut. Ku Pedro ke mai ruang bilik iya pindah ari Amerika Selatan ke Australia, madahka, “Lebuh berandauka pekara rohani, tu patut ngaul ati.” ^[1] (Peda nota penutup.)—Luk. 24:32.

⁶ Lebuh kitai macha dalam bansa jaku menua bukai, asai ati kitai engka enda sama baka kitai ke macha dalam bansa jaku kitai empu. Pia mega, laban kitai tusah deka berandau ngena bansa jaku menua bukai, tu ulih ngachau runding sereta sembah kitai ngagai Jehovah. Nya alai, seraya kitai deka terus enggau gempuru bansa jaku menua bukai, kitai mega patut nyaga kaul kitai enggau Jehovah.—Mat. 4:4.

7. Baka ni orang Babilon nguji ngansak Daniel nerima chara pengidup sereta jalai pengarap sida?

⁷ Lebuh Daniel enggau bala kawan iya dibuai ngagai menua Babilon, orang Babilon nguji ngansak sida nerima chara pengidup sereta jalai pengarap orang Babilon. Baka ni? Orang Babilon ngajar sida “jaku orang Babilon” lalu meri sida nama orang Babilon. (Dan. 1:3-7) Nama baru Daniel, iya nya Bel, nama petara ke suah disembah orang Babilon. Nya alai, Raja Nebukadnesar deka Daniel pechaya, petara Babilon nya bekuasa agi ari Jehovah, Petara ke disembah Daniel.—Dan. 4:8.

8. Baka ni Daniel ngetanka kaul iya enggau Jehovah?

⁸ Di menua Babilon, Daniel diberi pemakai raja ti nyamai. Tang iya “mutuska runding” deka ngasika adat Petara. (Dan. 1:8) Laban iya mengkang belajarka “Bup Kudus” dalam jaku Hebrew, iya ulih ngetanka kaul iya enggau Jehovah sekumbang iya diau di menua bukai. (Dan. 9:2) Amat, kira-kira 70 taun pengudah iya datai di menua Babilon, iya agi dikelala orang ngena nama Hebrew, Daniel.—Dan. 5:13.

9. Nama runding ti dikembuan penulis bup Masmur 119 pasal Jaku Petara?

⁹ Penulis bup Masmur 119 patut tan natka  diri lebuh bala raban ari istana ngelaban iya. Tang iya bulih pengering ari Jaku Petara, lalu tu nulung iya bebida ari orang bukai. (Mas. 119:23, 61) Iya ngawakka Jaku Petara masuk ba ati iya.—Bacha Masmur 119:11, 46.

10, 11. (a) Nama tuju kitai lebuh belajarka Bup Kudus? (b) Nama patut digaga kitai kena ngulihka juluk ati kitai? Beri siti chunto.

¹⁰ Taja pan kitai engka balat kisuk enggau tanggung pengawa ba gempuru sereta ba kereja, semua kitai patut magi awak kena belajarka Bup Kudus kediri empu sereta ba diri sebilik. (Eps. 5:15, 16) Tuju kitai ukai deka macha mayuh lambar ba Bup Kudus sereta litaricha tauka nyediaka komen kena begempuru. Tuju kitai iya nya ngawakka Jaku Petara ngiring kitai sereta negapka pengarap kitai.

¹¹ Kena ngulihka juluk ati kitai, kitai patut nemu berunding. Lebuh kitai belajar, kitai ukai semina berundingka utai ti diguna orang bukai tang mega enggi kitai empu. (Plp. 1:9, 10) Kitai patut nemu, lebuh kitai nyediaka utai ke dikena nginjil, ke dikena begempuru, tauka nyediaka cheramah, kitai engka enda ngereja utai ke dibacha kitai nya ba diri empu. Ngambika chunto, taja pan tukang masak patut nyepi pemakai ke dipanduk iya sebedau ngenahka pemakai nya ngagai orang, iya enda ulih idup ngena pemakai ke disepi iya nya. Enti iya deka mengkang gerai, iya enda tau enda enggau tetap nyediaka pemakai ke meri pengerai ke iya empu. Pia mega, enti kitai deka negapka kaul kitai enggau Jehovah, kitai patut belajarka Bup Kudus enggau tetap. Enti kitai mansik utai ke dipelajar enggau dalam, tu ulih nulung kitai.

12, 13. Nama kebuah mayuh orang ngasaika nya beguna belajarka Bup Kudus ngena jaku asal diri empu?

¹² Mayuh orang ke enggau gempuru bansa jaku menua bukai ngasaika nya beguna belajarka Bup Kudus enggau tetap “ngena jaku” sida empu. (SKR. 2:8) Indah bala pengerintis seberai tasik nemu, ngambika ulih mengkang gawa ke Jehovah ba menua bukai, sida enda ulih bepanggai ba utai ke didinga sida ba gempuru aja.

¹³ Alain, ke udah belajarka jaku Persia kira-kira lapan taun ngaku: “Lebuh aku nyediaka utai ke dikena begempuru dalam jaku Persia, aku semina beratika jaku nya aja. Laban runding aku semina deka nemu reti leka jaku ke dibacha, nya alai pemakai rohani ke dipelajarka aku enda entu ulih masuk ba ati aku. Nya kebuah aku enggau tetap magi awak belajarka Bup Kudus sereta litaricha ke bukai ngena jaku asal diri empu.”

14. Nama patut ditentuka apai indai, lalu nama kebuah?

¹⁴ Apai indai ke Kristian patut nentuka pemendar masuk ba runding sereta ati bala anak sida. Peratika Serge enggau bini iya, Muriel, ke udah enggau gempuru bansa jaku menua bukai lebih ari tiga taun. Seduai iya beratika anak lelaki seduai iya ke beumur 17 taun enda rindu nginjil tauka begempuru. Ku Muriel madahka: “Iya enda rindu nginjil ngena bansa jaku menua bukai, tang sebedau tu iya rindu nginjil ngena jaku Perancis, jaku asal iya empu.” Ku Serge madahka: “Lebuh kami duai nemu tu ulih nekul pemansang rohani anak kami duai, kami duai mutuska deka pindah baru ngagai gempuru ke lama.”

15. (a) Nama ulih nulung apai indai mutuska sekalika sida patut pindah ngagai siti-siti gempuru? (b) Nama pesan ba Ulang Adat 6:5-7 ke diberi ngagai apai indai?

¹⁵ Nama ulih nulung apai indai mutuska sekalika deka pindah baru ngagai siti-siti gempuru ke ngena bansa jaku ke ditemu bala anak sida? Kesatu, sida patut mutuska sekalika sida ulih magi awak sereta bisi pengeran deka ngajar bala anak sida rinduka Jehovah, sereta mega ngajar bala anak sida bansa jaku menua bukai ba maya ti sama. Kedua, sida engka beratika bala anak sida enggai nginjil, enggai begempuru tauka enggai gawa ke Jehovah ba endur ke ngena bansa jaku menua bukai. Enti bisi kebuah ke baka tu, apai indai  tau berunding deka pindah baru ngagai gempuru ke ngena bansa jaku ke ditemu bala anak sida. Udah nya, enti bala anak udah negapka kaul enggau Jehovah, apai indai tau berunding deka pulai baru ngagai gempuru ngena bansa jaku menua bukai.—Bacha Ulang Adat 6:5-7.

16, 17. Nama udah nulung sekeda apai indai ngajar bala anak sida pasal Jehovah?

¹⁶ Apai indai ke bukai udah tetemuka chara ngajar bala anak sida pasal Jehovah ngena jaku asal sida empu taja pan sida begempuru enggau gempuru tauka raban ke ngena bansa jaku menua bukai. Charles, seiku apai ke bisi tiga iku anak indu ke beumur entara 9 ngagai 13 taun. Sida begempuru enggau raban ke ngena bansa jaku Lingala. Iya madahka: “Kami duai ngaga pemutus deka belajarka Bup Kudus sereta belajarka Bup Kudus ba diri sebilik enggau bala anak ngena jaku asal kami empu. Tang kami mega belatih meri komen kena begempuru, belatih nginjil, tauka meri jaku tabi, sereta main game dalam jaku Lingala ngambika bala anak kami duai rindu belajarka bansa jaku tu.”

¹⁷ Kevin, seiku apai ke bisi dua iku anak indu ke beumur lima enggau lapan taun. Iya bebendar ngajar seduai iya pemendar laban seduai iya bedau entu meretika utai ti disebut lebuh begempuru ngena bansa jaku menua bukai. Iya madahka: “Aku enggau bini aku belajarka  Bup Kudus enggau dua iku anak indu kami ngena jaku Perancis, iya nya jaku asal seduai iya. Kami mega netapka juluk ati deka enggau begempuru ngena jaku Perancis sebulan sekali, sereta enggau gempuru besai pelilih menua ke bisi ngena jaku asal kami lebuh kami raun ngagai endur bukai.”

18. Baka ni Rome 15:1, 2 ulih nulung nuan ngaga pemutus ti manah lebuh deka nulung bala anak nuan?

¹⁸ Tiap iti ruang bilik patut berundingka utai ti pemadu manah ke bala anak sereta kaul bala anak enggau Jehovah. (Gal. 6:5) Muriel madahka, taja pan iya enggau laki iya deka terus enggau gempuru bansa jaku menua bukai, tang seduai iya deka ninggalka gempuru nya ngambika ulih nulung anak lelaki seduai iya neguhka pengerindu ngagai Jehovah. (Bacha Rome 15:1, 2.) Diatu Serge nemu, iya enggau bini iya udah ngaga pemutus ti betul. Ku iya madahka: “Sekumbang kami udah pindah baru ngagai gempuru ke ngena jaku Perancis, anak lelaki kami duai mansang ba rohani lalu dibaptisa. Diatu iya nyadi pengerintis biasa. Iya indah berunding deka pulai baru ngagai raban gempuru bansa jaku menua bukai!”

19, 20. Baka ni kitai ulih nunjukka diri rinduka Jaku Petara?

¹⁹ Jehovah rinduka semua orang. Iya udah nyediaka Bup Kudus dalam beratus bengkah bansa jaku ngambika “semua mensia” tau bulih penemu ti betul pasal pemendar. (1 Tim. 2:4) Iya nemu, kaul kitai enggau Iya deka ditegapka enti kitai macha Bup Kudus dalam bansa jaku ke ditemu kitai.

²⁰ Semua kitai patut bebendar ngetanka kaul ti tegap enggau Jehovah. Kitai ulih ngereja tu enti kitai belajarka Bup Kudus enggau tetap ngena bansa jaku ke dimeretika kitai. Kitai mega ulih nulung ruang bilik kitai ngetanka kaul ti rapat enggau Jehovah, lalu kitai ulih nunjukka diri amat rinduka Jaku Petara.—Mas. 119:11.