1, 2. (a) Baka ni ubah ngenyit ba pengidup ulih ngachau kitai? (Peda gambar ba pun artikel.) (b) Nitihka Masmur 131, nama ulih nulung kitai ngembuan pengelantang ba ati?

PENGUDAH Lloyd enggau Alexandra gawa ba Betel lebih ari 25 taun, seduai iya dianjung ngerintis baru. Terubah iya, seduai iya tusah ati. Ku Lloyd madah: “Aku ngasaika Betel enggau pengawa ke dikereja aku dia engkeman agi ba aku. Aku gaga ati enggau ubah ke digaga, tang beminggu lalu bebulan udah nya, aku suah ngasaika enggai nerima ubah nya.” Bisi maya nya Lloyd berasai gaga enggau ubah nya, lalu bisi maya nya enda.

² Pengidup endang semampai berubah enggau enda disadang, lalu nya ulih ngasuh kitai balat irau sereta berasai ditekan. (J-lam. 12:25) Lebuh tusah nerima tauka nelebaka diri enggau ubah ba pengidup, nama ulih digaga kitai ngambika enda kelalu irau? (Bacha Masmur 131:1-3.) Aram  kitai beratika baka ni sekeda nembiak Jehovah, kelia enggau ke diatu, ulih ngembuan pengelantang ba ati indah lebuh pengidup sida ngenyit berubah.

3. Baka ni pengidup Josep ngenyit berubah?

³ Ambika chunto, pikirka pasal Josep. Iya anak ti balat dikerinduka Jakop. Tu ngasuh bala menyadi iya papas ke iya. Lebuh Josep beumur 17 taun, sida nyual iya nyadi ulun. (P-kal. 37:2-4, 23-28) Kira-kira 13 taun, iya merinsa di menua Ejip. Keterubah iya nyadi ulun lalu udah nya iya dijil. Josep jauh ari apai ti dikesayauka iya. Penusah ke ditapi engka ngasuh iya putus pengarap enggau pedis ati, tang iya enda nejuka nya. Nama nulung iya?

4. (a) Nama digaga Josep lebuh iya dalam rumah jil? (b) Baka ni Jehovah nyaut sampi Josep?

⁴ Lebuh benung merinsa dalam rumah jil, Josep tentu bisi beratika baka ni Jehovah nulung iya. (P-kal. 39:21; Mas. 105:17-19) Iya tentu mega berunding pasal genera dalam mimpi iya lebuh iya agi biak suba lalu pechaya Jehovah bisi enggau iya. (P-kal. 37:5-11) Iya engka selalu besampi sereta madah ngagai Jehovah pasal semua utai ke bisi dalam ati iya. (Mas. 145:18) Lalu Jehovah nyaut sampi Josep enggau ngasuh Josep pechaya Iya deka “enggau iya” enda ngira nama utai ke nyadi.—SKR. 7:9, 10. * (Peda nota kaki.)

5. Baka ni ‘pemaik Petara’ ulih meransang kitai keran agi gawa ke Jehovah?

⁵ Taja pan balat tusah, kitai ulih ngembuan ‘pemaik Petara’ ke nyaga “runding” lalu nulung kitai enda kelalu irau. (Bacha Pilipi 4:6, 7.) Lebuh kitai irau sereta berasai ditekan, ‘pemaik Petara’ ulih ngeringka kitai ngambika terus gawa ke Jehovah lalu enda ngalahka diri. Aram kitai beratika sekeda chunto ari bala menyadi Kristian kitai kemayaharitu ke napi penanggul.

6, 7. Baka ni sampi kitai ulih nulung kitai ngembuan pengelantang ba ati baru? Padahka siti chunto.

⁶ Lebuh Ryan enggau Juliette ninga berita pasal pengawa seduai iya ke nyadi pengerintis spesial sementara diketuka, seduai iya berasai lemi. Ryan madahka: “Kami terus besampika utai tu ngagai Jehovah. Kami nemu kami bisi peluang ti manah mandangka diri bepanggai ba Iya. Mayuh ari sida ba eklisia kami agi baru dalam pemendar, nya alai kami besampi ngambika Jehovah ulih nulung kami nyadi teladan ti badas ba pengarap.”

⁷ Baka ni Jehovah nyaut sampi seduai iya? Ryan madahka: “Sepengudah besampi, pengirau enggau asai ati ti enda manah pan nadai agi. Pemaik Petara nyaga ati enggau runding kami. Kami nemu kami agi ulih terus dikena Jehovah enti kami ngetanka runding ti betul.”

8-10. (a) Baka ni roh kudus Petara ulih nulung lebuh kitai irau? (b) Baka ni Jehovah ulih nulung lebuh kitai beberatka pengawa ke Iya?

⁸ Roh kudus Petara ulih ngasuh kitai berasai lantang, lalu mega ulih mai kitai ngagai ayat Bup Kudus ke deka nulung  kitai meretika utai ti pemadu beguna ba pengidup. (Bacha John 14:26, 27.) Peratika utai ke nyadi ba Philip enggau Mary, sepasang laki bini ke udah gawa ba Betel kira-kira 25 taun. Dalam kandang empat bulan, kedua-dua indai seduai iya enggau seiku agi kaban belayan sida mati, lalu seduai iya patut ngintu apai Mary ke sakit gila.

⁹ Philip madahka: “Aku ngumbai diri ulih mutarka penanggul ke ditapi, tang bisi utai ke enda kena serenih. Aku bisi macha Kolosi 1:11 ba majalah Menara Jaga ke dikena belajar. Aku amat betan, tang ukai enggau pengabis iya. Aku patut ‘tan natka semua pemerinsa enggau ati ti liat enggau ati ti gaga.’ Ayat tu ngingatka aku, pengaga aku ukai bepanggai ba utai ke berubah ba pengidup aku, tang bepanggai ba asil ti dibai roh kudus Petara ba pengidup aku.”

¹⁰ Laban Philip enggau Mary mengkang beberatka pengawa ke Jehovah, Iya merekatka seduai iya dalam mayuh chara. Enda lama pengudah seduai iya ninggalka Betel, seduai iya bulih beberapa iku pemelajar Bup Kudus ke ngaga pemansang lalu deka belajar lebih ari sekali dalam seminggu. Mary madahka: “Utai tu mai pengaga ba ati. Tu baka chara Jehovah madah ngagai kami, semua utai deka ok magang.”

11, 12. (a) Nama digaga Josep ngambika Jehovah bisi peluang merekatka iya? (b) Baka ni Jehovah meri upah ngagai Josep?

¹¹ Lebuh pengidup ngenyit berubah, kitai balat irau lalu semina berunding pasal penanggul aja. Tu engka utai ke ditapi Josep. Tang, iya milih utai ke ulih dikereja iya lebuh napi penanggul. Sama baka iya ke bebendar gawa ke Potipar, iya mega bebendar ngereja sebarang pengawa ke diberi kepala orang ke nyaga rumah jil.—P-kal. 39:21-23.

¹² Nyadi sekali, Josep diasuh ngintu dua iku orang jil ke kala gawa ba istana raja menua Ejip. Joseph manah enggau seduai iya, lalu seduai iya nadai penanggul madah ngagai Josep pasal utai ti ngirauka ati sereta pasal mimpi nyelai ke ngachau runding seduai iya malam sebedau nya. (P-kal. 40:5-8) Josep enda nyangka randau nya ulih mai asil ti manah. Dua taun udah nya, iya dilepaska ari rumah jil lalu nyadi pemerintah ti bekuasa di menua Ejip. Josep nyadi lumur dua raja menua Ejip!—P-kal. 41:1, 14-16, 39-41.

13. Nama ulih digaga kitai ngambika diberekat Jehovah enda ngira nama penanggul ke ditapi kitai?

 ¹³ Baka Josep, kitai engka napi penanggul ke tusah deka diputarka. Tang enti kitai sabar lalu ngereja utai ke ulih kitai, Jehovah deka merekatka kitai. (Mas. 37:5) Indah lebuh kitai berasai irau sereta beba runding, kitai enda “kelalu tusah,” tauka putus pengarap. (2 Kor. 4:8) Jehovah deka enggau kitai, kelebih agi enti kitai mengkang beberatka pengawa nginjil.

14-16. Baka ni Philip ke penginjil mengkang beberatka pengawa nginjil taja pan pengidup iya berubah?

¹⁴ Philip ke penginjil nya teladan ti pemadu manah bekaul enggau mengkang beberatka pengawa nginjil taja pan bisi ubah ba pengidup iya. Bisi sekali, iya gaga ati bejalaika pengawa baru ke Petara di Jerusalem. (SKR. 6:1-6) Udah nya semua utai berubah. Pengudah Stepen dibunuh, orang Kristian balat diperinsa, lalu sida ngerarika diri ari Jerusalem. Ketegal Philip deka mengkang kisuk gawa ke Jehovah, iya mupuk ngagai nengeri Samaria. Orang ke diau dia mega patut ninga berita manah.—Mat. 10:5; SKR. 8:1, 5.

¹⁵ Philip sanggup ngagai sebarang endur ke diasuh roh kudus Petara. Nya alai Jehovah ngena iya nginjil ba endur alai orang ke bedau agi ninga berita manah. Mayuh orang Judah ngemaruhka sereta jai enggau orang Samaria. Tang Philip enda bepilih mata, lalu iya keran bekunsi berita manah enggau sida. Lalu orang Samaria “bela keran” mendingka iya!—SKR. 8:6-8.

¹⁶ Udah nya, roh kudus Petara ngasuh Philip nginjil ngagai menua Asotus enggau Siseria, ke bisi mayuh bansa bukai. (SKR. 8:39, 40) Pengidup Philip berubah baru. Iya ngentapka diri lalu bisi ruang bilik. Enda ngira baka ni pengidup iya berubah, iya mengkang kisuk ba pengawa nginjil, lalu Jehovah terus merekatka iya enggau sida sebilik.—SKR. 21:8, 9.

17, 18. Lebuh bisi ubah ba pengidup, baka ni ulah ti mengkang beberatka pengawa nginjil ulih nulung kitai?

 ¹⁷ Mayuh bala menyadi Kristian ke gawa penuh jam madahka, beberatka pengawa nginjil nulung sida mengkang gaga ati sereta positif indah lebuh pengidup sida berubah. Ambika chunto, lebuh sepasang laki bini ari Afrika Selatan ke benama Osborne enggau Polite ninggalka Betel, seduai iya ngumbai nya senang deka ngiga kereja part-time sereta endur alai diau. Tang Osborne madahka: “Kami enda jampat bulih kereja baka ke dikarapka kami.” Polite madahka: “Tiga bulan kami nadai bulih kereja, lalu nadai duit simpan. Amat tusah.”

¹⁸ Nama nulung Osborne enggau Polite napi penanggul ke balat nekan tu? Ku Osborne madahka: “Begulai nginjil enggau bala menyadi Kristian mayuh nulung kami nyaga runding ngambika mengkang positif sereta enda limpang.” Seduai iya mutuska deka mengkang kisuk ba pengawa nginjil, ari ke diau ba rumah berundingka pengirau ke ditapi. Tu mai pengaga ati ke seduai iya! Lalu ku Osborne nambah: “Kami naka ulih ngiga kereja, lalu pengujung iya kami pan bulih.”

19-21. (a) Nama deka nulung kitai ngetanka pengelantang ba ati? (b) Nama penguntung iya lebuh kitai ulih nelebaka diri enggau ubah ti enda disadang?

¹⁹ Baka ke udah ditemu kitai, enti kitai ngereja utai ke ulih kitai lalu enggau pengabis ati arapka Jehovah, kitai ulih ngetanka pengelantang ba ati enda ngira nama utai ke nyadi. (Bacha Mikah 7:7.) Nyau kelama, kitai nemu chara kitai nelebaka diri enggau ubah ba pengidup nya ke bendar iya negapka kaul kitai enggau Jehovah. Polite madahka dianjung ngerintis baru pengudah gawa ba Betel ngajar iya reti bepanggai ba Jehovah indah lebuh pengidup enda senang. Ku Polite madahka: “Kaul aku enggau Iya rapat agi.”

 ²⁰ Mary, ke udah disebut ba pun tadi, agi ngintu apai iya ke udah tuai sereta ngerintis. Ku iya madahka: “Aku nyau nemu lebuh ati aku irau, aku patut berunding, besampi, lalu nagang diri ari irau. Pekara ti pemadu besai dipelajarka aku nya engka minta bantu ari Jehovah, lalu nya endang beguna bendar ke dudi hari ila.”

²¹ Lloyd enggau Alexandra madahka ubah ba pengidup nguji pengarap seduai iya enggau chara ti enda disadang. Tang seduai iya ulih beratika baka ni penguji nya udah nulung seduai iya. Diatu pengarap seduai iya chukup tegap lalu ulih ngelantangka seduai iya lebuh napi penanggul, lalu ngasaika diri nyadi orang ke manah agi.

22. Enti kitai enggau naka ulih nelebaka diri enggau ubah ba pengidup, nama utai ti ulih dipechaya kitai?

²² Ba dunya kemayaharitu, pengidup kitai ulih ngenyit berubah. Kitai engka diberi Jehovah pengawa bukai, napi penanggul ba pengerai, tauka patut ngintu diri sebilik ngena jalai bukai. Taja pia, pechaya meh, Jehovah ibuhka nuan lalu deka nulung nuan ba maya ti ngena. (Heb. 4:16; 1 Pet. 5:6, 7) Lalu ke diatu, gaga meh utai ke ulih nuan taja pan bisi penanggul. Besampi ngagai Jehovah, lalu belajar bepanggai ba Iya enggau pengabis ati. Enggau tu, enda ngira nama ubah ke ditapi nuan ba pengidup, nuan seruran deka bisi pengelantang ba ati ke datai ari Jehovah.