Sempekat nya mega ngujungka siti gerempung ti baru ke dikumbai Liga Bangsa-Bangsa ditumbuhka. Tuju Liga nya “ngemansangka kerejasama entarabansa sereta nyapai pemaik enggau pengelikun entarabansa.” Mayuh gerempung gerija nyukung Liga nya. Majlis Persekutuan Gereja-Gereja Kristus ba Amerika muji Liga nya enggau ngumbai iya “gerempung politik ti ngarika Perintah Petara ba dunya.” Majlis nya mandangka diri nyukung Liga nya enggau nganjung bala pengari ngagai Aum Pemaik Paris. Seiku ari pengari nya madahka aum nya “mai jeman baru dalam sejarah dunya.”

Jeman ti baru amat berengkah ba taun 1919, tang iya ukai nyadi ketegal bala pengari ke enggau aum pemaik nya. Maya nya, pengawa nginjil kitai berengkah lebuh Jehovah meri nembiak Iya pengering ngambika ulih nginjil enggau mayuh agi ari ke udah. Tang sebedau tu nyadi, bisi utai ke besai patut diubah Nembiak Bup Kudus.

Pengawa milih sida ke nyadi pengarah ke Watch Tower Bible and Tract Society ditetapka kena Hari Enam, 4 Januari 1919. Maya nya, Joseph F. Rutherford, ke ngiring nembiak Jehovah, benung dijil enggau tujuh iku sida ke bukai ba Atlanta, Georgia, Amerika Serikat taja pan sida nadai ngereja penyalah. Ketegal tu, bala menyadi lelaki patut mutuska sekalika bala pengarah ke benung dijil nya agi dipilih megai pengawa nya tauka patut diganti.

Menyadi Rutherford irau pasal gerempung nya. Iya nemu sekeda bala menyadi deka orang bukai dipilih nyadi presiden gerempung nya. Ketegal tu, iya nulis surat ngagai sida ke enggau pengawa milih bala pengarah lalu minta Evander J. Coward nyadi presiden. Iya madahka Menyadi Coward nya orang ke “nelap,” “pintar,” sereta “taluk ngagai Tuan.” Taja pia, mayuh bala menyadi dekaka pengawa milih presiden ti baru ditangguh enam bulan. Bala luyar ke ngarika bala menyadi ke dijil nya mega besetuju. Lebuh sida benung berandauka utai ke patut digaga, sekeda bala menyadi nyau ringat.

 Richard H. Barber ngenang pasal Menyadi Sexton ke nguji mutarka pekara nya ba aum sida. Menyadi Sexton madah: “Aku ukai orang ke landik pasal utai ti diguna ba undang-undang, tang aku nemu penaluk beguna. Nya alai, endang manah enti kitai milih Menyadi Rutherford nyadi presiden baru kena ngayanka penaluk ngagai Petara.”—Mas. 18:25.

A.H. Macmillan ke sama dijil udah nya ngenang pasal utai ke nyadi ba hari siti, pengudah pengawa milih sida ke nyadi pengarah. Menyadi Rutherford ngetuk dinding bilik sil Macmillan lalu nyuaka siti surat. Ari surat nya, bala menyadi madahka pemutus ari pengawa milih ngagai Menyadi Rutherford. Macmillan lalu tekala nya nemu reti pesan ba surat nya. Pesan nya madahka, semua pengarah (Menyadi Rutherford, Wise, Van Amburgh, Barber, Anderson, Bully, enggau Spill) agi dipilih nyadi pengarah. Joseph Rutherford agi nyadi presiden lalu William Van Amburgh agi nyadi sekretari-tukang wang.

Lebuh sida lapan agi dijil, Nembiak Bup Kudus minta orang mayuh nyain petisyen ngambika sida dilepaska ari jil. Sida ke berani tu ngumpul lebih ari 700,000 iti sain. Kena Hari Tiga, 26 Mac 1919, sebedau petisyen nya dianjung, Menyadi Rutherford enggau sida tujuh iku ke bukai dilepaska.

Lebuh ke bejaku ngagai bala menyadi ke nyambut pemulai iya, Menyadi Rutherford madah: “Aku pechaya utai ke ditapi kitai tu kena nyikap kitai napi maya ti tusah agi. . . . Tuju pengawa kitai ukai semina deka ngelepaska bala menyadi kitai ari dijil. Keberat agi iya nya, meri mulia ngagai nama Jehovah, lalu orang ke udah ngereja nya deka bulih berekat ti badas.”

Utai ke nyadi lebuh bala menyadi kitai dipechara nunjukka Jehovah bisi enggau sida. Kena 14 Mei 1919, kot alai ngapil kes tu madahka: “Bala defendan ba kes tu dipechara enggau chara ti enda lurus, nya alai pemutus ke digaga kot dikinsil.” Tu pekara ti manah. Nama kebuah? Bala menyadi ke dijil nya udah dituduh ngereja penyalah ti besai. Enti sema penyalah sida semina diampun tauka ukum ke diletak ba sida dikurangka, kes sida deka mengkang bisi ba rikut penyalah. Tang ketegal ukum ke diletak ba sida dikinsil lalu nadai agi dawa ari orang pasal sida, rikut penyalah sida dipadam. Ketegal tu, Menyadi Rutherford * agi ulih ngena undang-undang ngetanka hak nembiak Jehovah ba Kot Besai di Amerika Serikat. Tu utai ke suah dikereja iya pengudah dilepaska ari dijil.

Ku Menyadi Macmillan ngenang: “Kitai enggai diau jenuh aja, nadai ngereja nama-nama utai  seraya nganti Tuan mai kitai ke serega. Kitai nemu kitai patut ngereja utai kena nentuka utai ti dikedekaka iya.”

Tang bala menyadi ke bejalaika pengawa nyelak enda ulih neruska pengawa ke udah dikereja sida betaun-taun. Nama kebuah? Laban lebuh sida dijil, semua plat ke dikena nyelak litaricha udah dirusak. Tu ngasaka ati sida, lalu sekeda bala menyadi ngumbai pengawa nginjil udah ngetu.

Kati orang agi rindu enggau pesan ke ditusui Nembiak Bup Kudus? Kena nyaut tanya tu, Menyadi Rutherford deka meri siti cheramah. Mensia mayuh deka dikangauka datai. Ku Menyadi Macmillan madah: “Enti orang nadai datai, reti nya nadai agi pengawa nginjil.”

Kena Hari Minggu, 4 Mei 1919, taja pan balat sakit, Menyadi Rutherford meri cheramah ke betajuk “Pengadang ke Mensia ti Merinsa” ba Los Angeles, California. Kira-kira 3,500 iku orang datai lalu beratus iku ke bukai enda ulih tama laban endur nya udah penuh. Hari siti, bisi 1,500 iku orang datai. Bala menyadi bulih saut ngagai utai ke deka ditemu sida, iya nya, orang agi rindu ninga pesan ke ditusui sida!

Pengawa ke digaga bala menyadi udah nya bisi kaul enggau pengawa nginjil ke digaga Saksi-Saksi Jehovah nyentuk ngagai seharitu.

Majalah The Watch Tower kena 1 Ogos 1919, madahka ba pun bulan September bisi siti konvensyen deka diatur ba Cedar Point, Ohio. Seiku Nembiak Bup Kudus ke biak ari Missouri ke benama Clarence B. Beaty ngenang: “Semua orang keran deka kia.” Lebih ari 6,000 iku bala menyadi datai ngagai gempuru nya. Penyampau tu lebih ari dijangka. Siti agi utai ke ngagitka ati  maya nya, lebih ari 200 iku orang dibaptisa ba Danau Erie, semak palan konvensyen.

Kena 5 September 1919, hari kelima konvensyen, lebuh meri cheramah ke betajuk “Jaku ke Dituju Ngagai Bala ke Sama Enggau Bekereja,” Menyadi Rutherford madah pasal majalah baru ke betajuk The Golden Age. * Majalah nya deka “ngundan penemu Bup Kudus ti pemadu baru ke bekaul enggau utai ke benung nyadi.”

Semua Nembiak Bup Kudus diperansang nginjil enggau berani ngena majalah baru tu. Pengawa nginjil ngena majalah nya bisi diterangka ba siti surat. Surat nya mega madahka: “Awakka tiap iku orang ke udah dibaptisa nemu, gawa ke Jehovah nya endang sigi peluang ti besai. Nya alai, kena meh peluang nya ari diatu lalu enggau naka ulih nginjil ngagai orang di serata dunya.” Asil iya chukup manah! Datai ba bulan Disember, bala penginjil Perintah Petara ke ransing udah minta lebih ari 50,000 iti majalah baru nya.

Ba ujung taun 1919, nembiak Jehovah diatur baru sereta dikeringka. Nambahka nya, beberapa iti utai ke dipadah Bup Kudus bekaul enggau hari ti penudi udah dikeamatka. Penguji enggau pengawa “nuchi” nembiak Petara ke dipadah ba Malaki 3:1-4, pan udah tembu. Nembiak Jehovah udah dilepaska ari nyadi orang tangkap ‘Babilon ti Besai,’ lalu Jesus udah milih “ulun ke tetap ati sereta bepenemu-dalam” kena ngiring nembiak Jehovah ba dunya. * (Pem. 18:2, 4; Mat. 24:45) Diatu Nembiak Bup Kudus sedia ngereja pengawa ke udah diasuh Jehovah kereja sida.