1. Nama ulih digaga Jehovah kena ngemujurka tuju Iya?

JEHOVAH ulih nyadi sebarang utai ti dikedekaka Iya kena ngemujurka tuju Iya. Ambika chunto, Iya Pengajar, Apai ti meri pengelantang, enggau Penginjil. Nya meh sekeda ari pengawa ke dikereja Iya. (Isa. 48:17; 2 Kor. 7:6; Gal. 3:8) Taja pia, Jehovah suah ngena mensia ngereja tuju Iya. (Mat. 24:14; 28:19, 20; 2 Kor. 1:3, 4) Iya mega ulih meri kitai penemu-dalam enggau pengering ngambika ulih ngereja peneka Iya. Semua tu nerangka chara Jehovah ulih ngasuh kitai nyadi sebarang utai ti dikedekaka Iya kena ngemujurka tuju Iya.

2. (a) Nama kebuah kadang-kadang kitai kakang sekalika Jehovah agi ngena kitai? (b) Nama deka dipejuraika kitai ba artikel tu?

² Semua kitai deka Jehovah ngena kitai ngereja peneka Iya. Tang sekeda ari kitai engka kakang sekalika Jehovah agi ngena sida. Nama kebuah? Laban sida ngasaika diri enda ulih ngereja mayuh agi baka ti dikedekaka sida ketegal udah tuai, utai ke nyadi ba pengidup, tauka ngasaika diri enda landik. Tang, bisi sekeda nya engka ngasaika diri udah ngereja mayuh pengawa ke Jehovah lalu enda ibuh ngereja mayuh agi. Ba artikel tu, kitai deka bejuraika chara Jehovah ulih nyikap kitai ngemujurka tuju Iya. Udah nya kitai deka mansik cherita Bup Kudus pasal Jehovah ke ngasuh bala nembiak Iya deka sereta ulih ngereja peneka Iya. Ke penudi, kitai deka berandauka  chara kitai ulih ngawakka diri dikena Jehovah.

3. Baka ke dipadah dalam Pilipi 2:13, baka ni Jehovah ngasuh kitai deka ngereja peneka Iya?

³ Bacha Pilipi 2:13. * Jehovah ulih ngasuh kitai deka ngereja pengawa ke Iya. Baka ni Iya ngereja nya? Ambika chunto, kitai engka nemu orang ba eklisia kitai begunaka tulung tauka pengawa bukai ke patut dikereja. Tauka bala tuai gempuru macha surat ari pampang opis ke madahka bisi begunaka tulung ngereja pengawa teokratik ba endur bukai. Kitai engka nanya diri empu, ‘Nama ulih dikereja aku kena nulung?’ Tauka kitai engka diberi sekeda pengawa ti tusah lalu kitai enda nemu sekalika ulih ngereja nya enggau manah tauka enda. Tauka pengudah macha sekeda ayat dalam Bup Kudus kitai engka nanya diri empu, ‘Baka ni aku ulih ngena ayat Bup Kudus tu nulung orang?’ Jehovah enda ngansak kitai ngereja siti-siti utai. Tang lebuh Jehovah meda kitai deka ngereja siti-siti pengawa ke Iya, Iya tentu deka nulung kitai ngereja nya.

4. Baka ni Jehovah ngasuh kitai ulih ngereja peneka Iya?

⁴ Jehovah mega ngasuh kitai ulih ngereja peneka Iya. (Isa. 40:29) Iya ulih meri kitai roh kudus kena ngemansangka pengelandik ke dikembuan kitai. (P-sut. 35:30-35) Jehovah ulih ngena gerempung Iya ngajar kitai ngereja pengawa. Enti nuan enda nemu baka ni ngereja siti-siti pengawa, nuan patut minta tulung. Pia mega, besampi ngagai Jehovah ngambika Iya ulih meri kitai “kuasa ti besai” kena ngereja peneka Iya. (2 Kor. 4:7; Luk. 11:13) Bup Kudus ngundan mayuh chunto pasal baka ni Jehovah udah ngasuh bala nembiak Iya deka sereta ulih ngereja pengawa ke diberi Iya. Seraya kitai beratika sekeda chunto tu, pikirka chara Jehovah ulih ngena nuan, baka Iya ke udah ngena bala nembiak Iya menya.

5. Nama ulih dipelajarka kitai ari chara sereta maya Jehovah ngena Moses ngelepaska orang Israel ari menua Ejip?

⁵ Jehovah ngena Moses ngelepaska orang Israel ari menua Ejip. Tang kemaya Jehovah ngena iya? Jehovah enda ngena Moses maya iya ngumbai diri udah besedia pengudah iya “diajar semua penemu-dalam orang Ejip.” (SKR. 7:22-25) Tang, Jehovah ngena Moses pengudah Iya nulung Moses nyadi orang ke baruh ati. (SKR. 7:30, 34-36) Jehovah meri Moses pemerani bejaku enggau raja Ejip. (P-sut. 9:13-19) Nama ulih dipelajarka kitai ari chara sereta maya Jehovah ngena Moses? Jehovah ngena orang ke nguji neladan pemanah Iya sereta bepanggai ba Iya kena ngulihka pengering.​—Plp. 4:13.

6. Nama dipelajarka kitai ari chara Jehovah ke ngena Barsilai nulung raja David?

⁶ Beratus taun udah nya, Jehovah ngena Barsilai nulung raja David enggau bala iya ke “lapar, aus, sereta lelak” lebuh sida ngerarika diri ari Absalom, anak David. Barsilai ke udah tuai enggau sida ke bukai berambunka nyawa diri nulung David enggau bala iya. Barsilai enda ngumbai Jehovah badu ngena iya ketegal iya udah tuai. Tang iya enggau gerah jari ngena utai ke dikemisi iya nulung nembiak Jehovah. (2 Sam. 17:27-29) Nama dipelajarka kitai? Enda ngira ni penuai umur kitai, Jehovah agi ulih ngena kitai nyediaka utai ti diguna nembiak Iya, sekalika nya  ba menua kitai empu tauka ba menua bukai. (J-lam. 3:27, 28; 19:17) Kitai empu engka enda ulih datai nulung sida, tang kitai engka ulih nulung bala menyadi kitai ba serata dunya nengah pemeri ke diberi kitai.​—2 Kor. 8:14, 15; 9:11.

7. Baka ni Jehovah ngena Simeon? Nama kebuah nemu pasal tu meransang kitai?

⁷ Simeon seiku lelaki tuai ke taluk ba Jerusalem. Jehovah besemaya, Simeon deka meda Messiah sebedau iya madamka seput. Semaya nya tentu udah meransang Simeon laban iya udah betaun-taun nganti penatai Messiah. Jehovah merekatka iya ketegal taluk sereta liat ati. Bisi sekali, ‘nitihka iring roh kudus’ Simeon datai mansang ngagai Rumah Sembiang. Lebuh dia, iya meda Jesus ke agi mit, lalu Jehovah ngena iya madahka anak mit nya deka nyadi Kristus. (Luk. 2:25-35) Taja pan Simeon enda sempat meda Jesus bejalaika pengawa nginjil, iya tentu beterima kasih laban Jehovah udah ngena iya. Lalu iya deka bulih mayuh agi berekat jemah ila. Iya deka meda baka ni perintah Jesus merekatka semua ruang bilik ba dunya baru. (P-kal. 22:18) Kitai mega tentu beterima kasih ke sebarang peluang ti diberi Jehovah lebuh gawa ke Iya.

8. Baka ni Jehovah ngena kitai baka Iya ke ngena Barnabas?

⁸ Ba abad keterubah Masihi, seiku lelaki ke gerah jari benama Josep ngawakka diri dikena Jehovah. (SKR. 4:36, 37) Engka ketegal Josep landik ngelantangka ati orang, bala rasul ngumbai iya Barnabas, ke mai reti “Anak Peransang.” Ambika chunto, pengudah Saul nyadi orang Kristian, mayuh bala menyadi takut deka semak enggau iya laban iya kala merinsaka bala menyadi Kristian. Tang Barnabas nulung sereta ngelantangka ati Saul. Saul tentu beterima kasihka utai tu. (SKR. 9:21, 26-28) Enda lama udah nya, bala tuai ba Jerusalem deka meri peransang ngagai bala menyadi ke diau jauh ba Antiok, Siria. Sapa dianjung sida? Barnabas! Nya pemutus ti manah! Ari Bup Kudus, kitai nemu Barnabas ‘meransang semua sida meruan tetap ati ngagai Tuan enggau pengabis ati sida.’ (SKR. 11:22-24) Pia mega kemayaharitu, Jehovah ulih ngena kitai ngelantangka ati bala menyadi Kristian kitai. Ambika chunto, iya engka ngena kitai ngelantangka ati sida ke udah mati orang ti dikesayau. Tauka iya engka meransang kitai ngusung tauka betalipaun ngagai sida ke sakit tauka tusah ati ngambika ulih ngelantangka ati sida. Kati nuan deka ngawakka diri dikena Jehovah, baka ke digaga Barnabas?​—1 Tes. 5:14.

9. Nama dipelajarka kitai ari chara Jehovah nulung Vasily nyadi tuai gempuru ti landik?

⁹ Jehovah nulung seiku menyadi lelaki ke benama Vasily nyadi tuai gempuru ti landik. Lebuh iya nyadi tuai gempuru maya beumur 26 taun, iya irau sereta ngumbai diri nadai chukup peneleba kena nulung bala menyadi, kelebih agi sida ke benung napi penanggul. Tang, iya bulih latih ari bala tuai ti bepeneleba sereta ari Sekula Bup Kudus ke Menyadi ke Dipilih. Vasily bebendar ngaga pemansang. Ambika chunto, iya nulis sekeda juluk ati mit ke ulih dijapai iya. Lebuh iya udah nyapai tiap iti juluk ati nya, iya belubah-lubah mutarka asai ati iya ti irau. Iya nyau andal agi ke diri empu. Ku iya madah: “Utai ti ngasuh aku irau suba diatu nyau ngagaka ati aku. Lebuh Jehovah nulung aku tetemuka ayat ti engkeman kena nulung bala menyadi Kristian ba eklisia, tu ngasuh ati aku berasai puas.” Bala menyadi ke lelaki, enti kita neladan Vasily lalu ngawakka diri dikena Jehovah, Iya ulih  meri kita pengelandik kena bejalaika tanggung pengawa ke berat agi ba eklisia.

10. Nama digaga Abigail? Nama dipelajar nuan ari teladan iya?

¹⁰ David enggau bala iya ngerarika diri ari digagai Raja Saul, lalu sida begunaka tulung. David ngasuh sekeda ari bala iya minta mimit pemakai ari seiku orang Israel ti kaya ke benama Nabal. Sida ngasaika diri nadai salah minta pemakai laban sida nulung nyaga jelu tupi Nabal ba menua puang. Tang Nabal ke berundingka diri empu enggai meri sida pemakai. David lalu pedis ati sereta deka munuh Nabal enggau semua bala lelaki ke bisi ba rumah iya. (1 Sam. 25:3-13, 22) Tang Abigail, bini Nabal nya seiku indu ke bajik sereta tajam runding. Enggau berani, iya nyungkurka diri semak kaki David lalu minta David enda munuh Nabal enggau semua bala lelaki ba rumah iya ngambika enda berutang darah. Iya enggau nelap ngasuh David andalka Jehovah ulih nulung. Jaku Abigail ti siru sereta ulah iya ti bebasa negu ati David. Nya kebuah David nyau nemu Jehovah ke udah nganjung Abigail. (1 Sam. 25:23-28, 32-34) Abigail udah ngemansangka pemanah baka pemaruh ati, pemerani sereta tajam runding ke ngasuh iya ulih dikena Jehovah. Pia mega, bala menyadi Kristian indu ke tajam runding sereta nemu meri jaku lalau enggau chara ti manah ulih dikena Jehovah negapka diri sebilik sereta orang bukai ba gempuru.​—J-lam. 24:3; Tit. 2:3-5.

11. Nama digaga anak indu Salum? Sapa neladan sida kemayaharitu?

¹¹ Beratus taun udah nya, bala anak indu Salum nya entara orang ke dikena Jehovah ngaga dinding kuta Jerusalem. (Neh. 2:20; 3:12) Taja pan Salum nya orang ke megai setengah pelilih menua Jerusalem, bala anak indu iya deka ngereja utai ti mar sereta tau ngasuh bebadi. (Neh. 4:15-18) Sida enda baka bala tuai ari Tekoa ke “enggai ngereja ungkup ti udah diasuh kereja sida.” (Neh. 3:5) Uji gambarka pengaga ati bala anak Salum lebuh pengawa nya tembu magang pengudah 52 hari! (Neh. 6:15) Kemayaharitu, bala menyadi indu gaga ati nulung ba pengawa nirika sereta nyeruri bengunan ke diserahka ngagai Jehovah. Nya alai, pengelandik, pengeransing enggau penaluk sida beguna kena ngemujurka pengawa tu.

12. Baka ni Jehovah ulih ngena kitai baka Iya ke udah ngena Tabita?

¹² Jehovah meransang Tabita “ngereja utai ti manah, sereta nulung orang ke seranta,” kelebih agi ngagai sida ke balu. (SKR. 9:36) Ketegal iya balat gerah jari sereta nelap, mayuh orang tusah ati lebuh iya udah nadai. Tang sida gaga ati lebuh rasul Peter ngangkatka iya idup baru. (SKR. 9:39-41) Nama dipelajarka kitai ari Tabita? Enda ngira tuai tauka biak, lelaki tauka indu, semua kitai ulih ngereja utai ti beguna kena nulung bala menyadi kitai.​—Heb. 13:16.

13. Baka ni Jehovah ngena seiku menyadi indu ti pemalu ke benama Ruth? Nama dipadah iya pasal Jehovah?

¹³ Seiku menyadi indu ti pemalu ke benama Ruth deka nyadi pengerintis seberai tasik. Lebuh iya agi biak, enggau ati ti ransing iya berumban nyadung surat mit ngagai orang ari rumah ke rumah. Ku iya madah, “Aku rindu ngereja pengawa tu.” Tang iya ngasaika diri tusah deka berandau enggau orang pasal Perintah Petara lebuh nginjil. Taja pan Ruth pemalu, iya nyadi pengerintis biasa lebuh beumur 18 taun. Ba taun 1946, iya enggau Sekula Gilead lalu udah nya gawa ke Jehovah  ba Hawaii enggau Jepun. Jehovah ngena iya ba pengawa nginjil ba menua nya. Pengudah nyauka 80 taun ba pengawa nginjil, ku Ruth madah: “Jehovah endang seruran ngeringka aku. Iya udah nulung aku nyadi berani. Aku amat pechaya Jehovah ulih ngena tiap iku orang ke andalka Iya.”

14. Nitihka Kolosi 1:29, nama patut digaga kitai enti deka dikena Jehovah?

¹⁴ Kenyau ari kelia, Jehovah udah ngena nembiak Iya dalam mayuh chara. Baka ni Iya deka ngena nuan? Nya bepanggai ba sekalika nuan deka bebendar gawa tauka enda. (Bacha Kolosi 1:29.) Enti nuan ngawakka diri dikena Jehovah, Iya ulih ngasuh nuan nyadi penginjil ti ransing, pengajar ti landik, orang ti landik meransang orang bukai, pekereja ti landik, bakih ke ulih nyukung, tauka sebarang utai bukai ti dikedekaka Iya kena ngemujurka peneka Iya.

15. Baka ke dipadah ba 1 Timoti 4:12, 15, nama bantu ke patut dipinta bala nembiak lelaki ke agi biak ari Jehovah?

¹⁵ Baka ni enggau bala menyadi lelaki ke agi biak? Gerempung kitai begunaka menyadi lelaki ti regas nyadi penulung gempuru. Ba mayuh eklisia, penyampau bala tuai gempuru mayuh agi ari penulung gempuru. Kati ulih kita ngereja mayuh agi tanggung pengawa ba eklisia? Kadang-kadang sekeda bala menyadi ke lelaki madahka, “Aku gaga ati enti nyadi penginjil aja.” Enti tu utai ke diasai nuan, besampi minta Jehovah nulung nuan ngemansangka pengingin ngambika ulih nyadi penulung gempuru. Pia mega, minta Iya meri nuan pengelandik ngereja pengawa ke diberi Iya enggau naka ulih. (P-jar. 12:1) Kami begunaka bantu ari kita!​—Bacha 1 Timoti 4:12, 15.

16. Nama utai ke patut dipinta kitai ari Jehovah, lalu nama kebuah?

¹⁶ Jehovah ulih ngasuh nuan nyadi sebarang utai ti dikedekaka Iya kena ngemujurka peneka Iya. Nya alai, minta Iya ngasuh nuan deka sereta ulih ngereja peneka Iya. Enda ngira tuai tauka biak, kena meh jam, pengering enggau pengelandik nuan ngemuliaka Jehovah ari diatu. (P-jar. 9:10) Lebuh nuan diberi peluang ngereja mayuh agi pengawa ke Jehovah, anang beguai nulak ketegal ngumbai diri enda ulih ngereja pengawa nya. Endang peluang ti besai ulih ngereja sebarang utai ke tau ngenataika mulia enggau basa ngagai Jehovah!