1-2. (a) Nama deka disebut bala pemerintah ba dunya enda lama agi? (b) Nama tanya ti berat ke patut disaut kitai?

UJI gambarka, bala pemerintah ba dunya baru udah nyebut pasal “pemaik sereta likun.” Pengawa sida tu endang udah dipadah dalam Bup Kudus. Sida enggau ati ti temegah madahka dunya deka likun ari ke sebedau tu. Sida deka kitai ngumbai sida ulih mutarka semua penusah ba dunya. Tang tu enda amat. Indah sida enda ulih nagang utai ke deka nyadi! Nama kebuah enda ulih? Nitihka Bup Kudus, “pengerusak deka ngenyit ninggang sida, . . . lalu sida nadai jalai ngerarika diri.”​—1 Tes. 5:3.

² Bisi tanya ti berat ke patut disaut: Nama deka nyadi maya ‘Penusah ti Besai’? Nama utai ke diasuh Jehovah gaga kitai maya nya? Lalu baka ni chara kitai ulih nyikap diri ari diatu ngambika ulih mengkang tetap ati?​—Mat. 24:21.

3. Nitihka Pemandang 17:5, 15-18, baka ni Petara deka ngerusak ‘Babilon ti Besai’?

³ Bacha Pemandang 17:5, 15-18. ‘Babilon ti Besai’ deka dirusak! Baka ke dipadah tadi, bala pemerintah ba dunya enda ulih nyeliahka pengerusak ke deka ninggang Babilon ti Besai. Nama kebuah? Laban ‘Petara udah ngasuh sida raja nya seati ngereja juluk ati Iya.’ Nama juluk ati Iya? Iya deka ngerusak semua pengarap pelesu di serata dunya. Tu nyengkaum Gerempung Gerija. * Petara deka nyimpan juluk ati Iya dalam  ati “sepuluh iti tanduk” ari “jelu ti mirah-redam.” Sepuluh iti tanduk ngambarka semua bala pemerintah ke nyukung “jelu,” iya nya Pertubuhan Bangsa-Bangsa Bersatu. (Pem. 17:3, 11-13; 18:8) Lebuh bala pemerintah nya nyerang pengarap pelesu, nya kelai ke nunjukka Penusah ti Besai berengkah. Nya ngenyit nyadi lalu ngenakutka tiap iku orang ba dunya.

4. (a) Nama engka dipadah bala pemerintah pasal kebuah sida nyerang pengarap pelesu? (b) Nama engka deka digaga raban ke enggau pengarap pelesu?

⁴ Kitai enda nemu kebuah sida deka nyerang ‘Babilon ti Besai.’ Sida engka madahka, pengarap ba dunya nagang bala pemerintah ngulihka pemaik lalu seruran nguji masuk champur dalam hal politik. Tauka sida engka madahka gerempung pengarap nya ngumpul kelalu mayuh reta enggau pengaya. (Pem. 18:3, 7) Lebuh bala pemerintah nyerang pengarap pelesu nya, sida engka enda ngerusak tiap iku orang ke enggau gerempung nya. Ari tu kitai nemu, bala pemerintah deka muai gerempung pengarap. Pengudah gerempung nya nadai agi, nya baru orang ke enggau gerempung nya nemu bala tuai pengarap sida enda ngamatka semaya. Lalu ketegal tu sida nguji ngenyauhka diri ari gerempung nya.

5. Nama semaya Jehovah bekaul enggau Penusah ti Besai, lalu nama kebuah?

⁵ Bup Kudus nadai madahka berapa lama pengawa ngerusak Babilon ti Besai deka nyadi, tang kitai nemu nya enda lama. (Pem. 18:10, 21) Jehovah besemaya, deka “ngurangka penyampau hari” Penusah ti Besai ngambika “nembiak ke udah dipilih” Iya sereta pengarap ti bendar enda dirusak. (Mrk. 13:19, 20) Tang nama diasuh Jehovah gaga kitai pengudah Penusah ti Besai berengkah nyentuk ngagai perang Armagedon datai?

6. Nama utai ke patut digaga pengudah nyeraraka diri ari Babilon ti Besai?

⁶ Baka ke udah dikerandau ba artikel sebedau tu, Jehovah deka nembiak Iya nyeraraka diri ari Babilon ti Besai. Tang sida ukai semina nyeraraka diri aja. Sida enda tau enda terus nyembah Jehovah. Peratika dua iti chara kitai ulih ngereja nya.

7. (a) Baka ni kitai ulih mengkang bepegai rat ba standard moral Jehovah ti lurus? (b) Baka ni Hebrew 10:24, 25 nunjukka pengawa begempuru nya beguna bendar, kelebih agi diatu?

⁷ Keterubah, kitai enda tau enda mengkang bepegai rat ba standard moral Jehovah ti lurus. Kitai enda patut nerima ulah dunya ti enda bemoral. Ambika chunto, kitai enggai nerima sebarang bansa ulah seks ti kamah, nyengkaum pengawa jadi enggau sama penempa tauka pendiau ti homoseksual. (Mat. 19:4, 5; Rom. 1:26, 27) Kedua, kitai enda tau enda terus nyembah Jehovah begulai enggau bala menyadi Kristian kitai. Kitai enggau naka ulih ngereja tu, sekalika ba Palan Gempuru, ba rumah bala menyadi Kristian kitai, tauka lebuh begempuru belalai. Enda ngira nama utai ke nyadi, kitai enggai ngetu datai begempuru nyembah Jehovah. Kebendar iya, kitai patut “bebendar agi ngereja nya laban [kitai] meda Hari Tuhan nyau semak.”​—Bacha Hebrew 10:24, 25.

8. Nama pesan ke engka ditusui kitai maya Penusah ti Besai ila?

⁸ Maya Penusah ti Besai, pesan ke ditusui kitai tentu deka berubah. Diatu, kitai nusui berita manah pasal Perintah Petara lalu nguji enggau naka ulih ngaga orang nyadi murid. Tang maya Penusah ti Besai ila, kitai engka nusui pesan ke berat agi. Bup Kudus mandingka pesan nya baka ujan batu ti besai. (Pem. 16:21) Kitai engka nginjil pasal dunya Sitan ti deka dirusak abis lengis enda lama agi. Datai maya nya ila, kitai deka nemu pesan nya sereta chara kitai nusui iya. Kati kitai agi ngena chara nginjil sereta ngajar orang ke udah dikena kitai ngelama tu? Tauka kati kitai deka ngena chara ke bukai? Kitai enda nemu. Enda ngira baka ni chara kitai nginjil, kitai deka bisi peluang nusui pesan pasal pengawa ngakim ari Jehovah enggau berani!​—Esk. 2:3-5.

9. Nama engka digaga bala pemerintah bekaul enggau pesan ke dibai kitai? Tang, nama ulih dipechaya kitai?

⁹ Pesan ke dibai kitai engka deka nyungkak bala pemerintah nagang kitai ari terus nginjil. Sama baka kitai ke bepanggai ba sukung ari Jehovah ba pengawa nginjil kemayaharitu, kitai mega patut bepanggai ba Iya maya nya ila. Kitai pechaya Jehovah deka meri kitai pengering kena nembuka peneka Iya.​—Mik. 3:8.

10. Baka ke dipadah ba Luke 21:25-28, baka ni gaya orang lebuh meda utai ke nyadi maya Penusah ti Besai?

¹⁰ Bacha Luke 21:25-28. Maya Penusah ti Besai, orang deka tekenyit lebuh sida meda semua utai ke dikumbai sida tan ba dunya tu baka politik, pengawa dagang enggau utai bukai ke bisi ba dunya tu, deka berengkah rusak. Sida deka irauka diri dibunuh ba maya ti pemadu tusah nya. (Sep. 1:14, 15) Maya nya ila, pengidup majak tusah ba nembiak Jehovah. Ketegal kitai mengkang ukai enggi dunya, kitai engka deka napi penusah. Kitai engka nadai ngembuan mayuh utai agi.

11. (a) Pengudah pengarap pelesu dirusak, nama kebuah orang enggau bala pemerintah beratika Saksi-Saksi Jehovah? (b) Nama kebuah kitai enda patut takut enggau Penusah ti Besai?

¹¹ Pengudah pengarap pelesu dirusak, orang ke enggau pengarap nya engka balat  pedis ati laban Saksi-Saksi Jehovah agi bejalaika pengarap sida. Sida ke enggau pengarap pelesu tentu deka madah ngagai orang pasal pemedis ati sida. Ambika chunto, sida ngereja nya nengah Internet. Sitan enggau bala pemerintah deka begedika kitai laban semina pengarap kitai aja ke enda dirusak. Sida enda mujur nyapai juluk ati ke deka muai semua pengarap ba dunya tu. Nya alai, sida deka meratika kitai. Maya tu, orang ari bemacham-macham bansa enggau bala pemerintah deka bejalaika pengawa sida nyadi Gok ari Magok. * Sida deka begempung lalu nyerang nembiak Jehovah ngena semua kuasa sida. (Esk. 38:2, 14-16) Kitai engka berengkah irau pasal utai ke deka nyadi maya Penusah ti Besai nya ila, kelebih agi laban kitai enda nemu enggau nyemetak utai ke deka nyadi. Tang, kitai pechaya: Kitai enda patut takut enggau Penusah ti Besai. Jehovah deka meri iring kena nyelamatka kitai. (Mas. 34:19) Kitai tentu ulih ‘bediri lalu ngangkatka pala kitai’ laban kitai deka nemu ‘pengelepas kitai nyau semak.’ *

12. Baka ni “ulun ti tetap ati sereta bepenemu-dalam” nyikap kitai napi utai ti deka nyadi dudi hari?

¹² “Ulun ti tetap ati sereta bepenemu-dalam” benung nyikap kitai ngambika mengkang tetap ati maya Penusah ti Besai. (Mat. 24:45) Sida udah ngereja tu ngena mayuh chara. Siti ari chara nya nengah program konvensyen kitai ba taun 2016-2018. Nengah program nya, kitai diperansang negapka pemanah ke diguna kitai seraya Hari Jehovah nyau semak. Aram kitai ngelansa tiga iti pemanah nya.

13. (a) Baka ni kitai ulih negapka penaluk ngagai Jehovah? (b) Nama kebuah kitai enda tau enda ngereja nya ari diatu?

¹³ Penaluk: Tema konvensyen 2016 nya “Mengkang Taluk Ngagai Jehovah!” Ari konvensyen tu kitai belajar, kitai deka taluk ngagai Jehovah enti kitai bisi kaul ti rapat enggau Iya. Kitai mega belajar, kitai ulih semak ngagai Jehovah nengah sampi ari ati sereta rajin belajarka Bup Kudus. Ngereja nya meri kitai pengering kena napi penanggul ti pemadu besai. Seraya Penusah ti Besai majak semak, kitai tentu ngadang penaluk kitai ngagai Jehovah sereta Perintah Iya deka balat diuji. Orang tentu deka agi ngeleseka kitai. (2 Pet. 3:3, 4) Siti ari kebuah nya laban kitai enda nyukung nama-nama utai ke bekaul enggau dunya Sitan. Kitai enda tau enda negapka penaluk kitai ari diatu ngambika ulih mengkang taluk maya Penusah ti Besai.

14. (a) Nama ubah ti deka nyadi bekaul enggau bala menyadi lelaki ke ngiring ba dunya? (b) Nama kebuah kitai patut taluk maya nya ila?

¹⁴ Maya Penusah ti Besai, bisi ubah deka nyadi ba bala menyadi lelaki ke ngiring nembiak Jehovah di dunya tu. Semua sida ti dipilih niki ke serega ke agi diau ba dunya deka dibai ke serega ngambika ulih enggau ba perang Armagedon. (Mat. 24:31; Pem. 2:26, 27) Reti nya, Raban ti Ngiring nadai agi enggau kitai ba dunya maya nya ila. Taja pia, nembiak Jehovah ke ari raban orang mayuh deka tetap diatur enggau manah. Bala menyadi lelaki ke bisi pengelandik sereta bepeneleba ari  raban nya deka ngiring kitai. Kitai nunjukka diri taluk ngagai Jehovah enggau chara nyukung sida sereta nitihka iring ti diberi Jehovah nengah sida. Nitihka iring ari sida ulih nyelamatka kitai!

15. Baka ni kitai ulih nambahka pengeliat ati? Nama kebuah kitai patut ngereja nya ari diatu?

¹⁵ Pengeliat Ati: Tema konvensyen 2017 nya “Anang Ngalahka Diri!” Konvensyen tu nulung kitai ngambika tan napi penguji. Kitai belajar, kitai ulih liat ati lebuh maya tusah tauka senang. Kitai ulih nambahka pengeliat ati. Chara iya, enggau bepanggai ba Jehovah. (Rom. 12:12) Kitai patut seruran ingatka semaya Jesus: “Orang ke tan datai ke ujung, deka diselamatka.” (Mat. 24:13) Tu reti iya, kitai patut mengkang tetap ati enda ngira nama penanggul ke ditapi kitai. Enti kitai tan napi semua penguji kitai ari diatu, pengarap kitai deka tegap agi sebedau Penusah ti Besai berengkah.

16. Nama nentuka pemerani kitai? Baka ni kitai nambahka pemerani ari diatu?

¹⁶ Pemerani: Tema konvensyen 2018 nya “Mengkang Berani!” Konvensyen tu madahka, pemerani ukai bepanggai ba pengelandik ke dikembuan kitai. Sama baka kitai ke patut bepanggai ba Jehovah ngambika ulih betan, kitai mega enda tau enda bepanggai ba Jehovah ngambika tau bulih pemerani ti bendar. Baka ni kitai ulih belajar bepanggai agi ba Jehovah? Kitai ulih ngereja nya enggau macha Bup Kudus ninting hari lalu belematika chara Jehovah nyelamatka nembiak Iya menya. (Mas. 68:20; 2 Pet. 2:9) Lebuh bala pemerintah ba dunya nyerang kitai maya Penusah ti Besai, kitai tentu begunaka pemerani sereta arapka Jehovah lebih agi ari ke udah. (Mas. 112:7, 8; Heb. 13:6) Enti kitai bepanggai ba Jehovah ari diatu, kitai tentu deka ngembuan pemerani ke diguna kitai lebuh Gok nyerang kitai. *

17. Nama kebuah kitai enda patut takut maya perang Armagedon nyadi? (Peda gambar ba kulit majalah.)

¹⁷ Baka ke udah dikerandauka ba artikel sebedau tu, mayuh ari kitai idup ba hari ti penudi. Tang kitai mega ngarapka diri selamat maya Penusah ti Besai. Perang Armagedon  nya pengujung Penusah ti Besai. Taja pia, kitai enda patut takut. Nama kebuah? Laban tu perang Petara. (J-lam. 1:33; Esk. 38:18-20; Sek. 14:3) Lebuh Jehovah madahka perang nya berengkah, Jesus Kristus deka nguluka bala soldadu Jehovah ba serega mupuk beperang. Semua sida ke dipilih ke serega enggau bala melikat ke bukai deka enggau Jesus. Sida deka beperang ngelaban Sitan, bala melikat ti jai sereta bala soldadu ba dunya.​—Dan. 12:1; Pem. 6:2; 17:14.

18. (a) Nama udah disemaya Jehovah? (b) Baka ni Pemandang 7:9, 13-17 nulung nuan andal pasal jemah ila?

¹⁸ Jehovah udah besemaya: “Nadai senyata ti digaga ulih ngemediska nuan.” (Isa. 54:17) Nembiak Jehovah ti tetap ati ke ari raban orang mayuh, deka ‘pansut ari Penusah ti Besai.’ Lalu sida deka terus nyembah Jehovah. (Bacha Pemandang 7:9, 13-17.) Bup Kudus meri kitai mayuh kebuah andalka diri deka selamat jemah ila. Kitai nemu ‘Jehovah nyaga orang ke tetap ati.’ (Mas. 31:23) Semua orang ke rindu sereta muji Jehovah deka gaga ati meda nama Iya dikuduska.—Esk. 38:23.

19. Nama berekat ti badas ke deka diulih kitai enda lama agi?

¹⁹ Uji gambarka baka ni jaku ba 2 Timoti 3:2-5 deka berubah, enti iya dikena nerangka pasal orang ti diau ba dunya baru ke bibas ari dipegai Sitan. (Peda kutak “ Pendiau Orang Jemah Ila.”) Menyadi George Gangas, * ke kala nyadi seiku ari Raban ti Ngiring, ngambarka pendiau orang jemah ila: “Dunya tentu deka nyadi endur ti badas lebuh semua orang nyembah Jehovah! Enda lama agi nuan deka bisi peluang idup belama iya di baruh perintah ti baru. Kitai deka idup belama iya.” Nya endang berekat ti badas!