1. Nama kebuah kitai patut nyembah Jehovah seiku aja?

KITAI patut nyembah Jehovah seiku aja laban Iya nempa kitai lalu meri kitai pengidup. (Pem. 4:11) Taja pia, bisi utai ke ulih ngachau kitai nyembah Iya. Taja pan kitai rindu sereta bebasaka Iya, kitai engka dilimpangka utai bukai ari nyembah Iya. Kitai patut nemu baka ni nya ulih nyadi. Tang keterubah, aram kitai berandauka sekeda pekara ke bekaul enggau nyembah Iya seiku aja.

2. Nitihka Pemansut 34:14, nama deka digaga kitai enti kitai nyembah Jehovah seiku aja?

² Ba Bup Kudus, ngembuan pengerindu ti dalam ngagai Jehovah bekaul bendar enggau nyembah Iya seiku aja. Nya alai, kitai enggai nyembah sapa-sapa tauka sebarang utai kelimpah ari Iya.​—Bacha Pemansut 34:14. *

3. Nama kebuah kitai ukai nyembah Jehovah pia aja?

³ Kitai ukai nyembah Jehovah pia aja. Nama kebuah? Laban sembah kitai ngagai Iya bepelasarka pekara ke udah dipelajarka kitai pasal Iya. Kitai nyau rinduka pemanah Iya ti badas. Kitai nemu utai ti dikerindu sereta dipegedika Iya, lalu kitai pan nunda Iya. Kitai mereti sereta nyukung tuju Iya bekaul enggau mensia. Endang basa ti chukup besai laban Iya ngemendarka kitai nyadi pangan Iya. (Mas. 25:14) Tiap iti pekara ti dipelajar kitai pasal Iya ngasuh kitai semak agi ngagai Iya.​—Jas. 4:8.

4. (a) Nama dikena Sitan ngelemika sembah kitai ngagai Jehovah? (b) Nama deka dipejuraika kitai ba artikel tu?

⁴ Sitan ke megai dunya tu, lalu iya ngena dunya tu ngasuh  utai ti dikinginka mensia beguna agi ba pengidup sereta ngasuh pengingin kitai ti salah tusah deka diseliahka. (Eps. 2:1-3; 1 Jhn. 5:19) Iya deka kitai rinduka utai bukai ngambika kitai enda rinduka Jehovah aja. Kitai deka bejuraika dua chara ke dikena Sitan ngereja tu. Chara keterubah nya, iya nguji ngasuh kitai angkunka duit. Lalu chara kedua nya, iya nguji ngasuh kitai milih pemerindang ti enda manah.

5. Nama kebuah kitai enda tau enda nyeliah ari angkunka duit?

⁵ Semua kitai deka bisi chukup pemakai, gari, enggau endur diau. Taja pia, kitai enda tau enda nyeliah ari angkunka duit. Mayuh orang kemayaharitu “angkunka duit” sereta utai ke ulih dibeli ngena duit. (2 Tim. 3:2) Jesus nemu bala murid iya engka bisi pengingin deka angkunka duit. Ku Jesus madah: ‘Nadai orang ulih betuaika dua iku tuan, laban iya deka begedika siku, lalu rinduka siku, tauka angkunka siku, lalu mechat siku. Kita enda ulih betuaika Petara enggau duit.’ (Mat. 6:24) Enti seiku orang ke nyembah Jehovah ngena mayuh jam enggau pengering ngulihka pengaya dunya tu, iya baka orang ke nguji betuaika dua iku tuan. Iya enda ulih nyembah Jehovah seiku aja.

6. Nama ulih dipelajarka kitai ari jaku Jesus ngagai eklisia ba Laudisia?

⁶ Ba urung taun 100 M., bala menyadi ba Laudisia enggau temegah madahka: “Aku kaya, bisi semua utai, lalu nadai suntuk utai.” Tang ba Jehovah enggau Jesus, sida “merinsa, tusah, seranta, buta sereta telanjai.” Jesus nangkan sida ukai ketegal sida kaya, tang ketegal pengangkun sida ke pengaya ngerusak kaul sida enggau Jehovah. (Pem. 3:14-17) Enti kitai beratika diri berengkah angkunka duit, kitai enda tau enda ngemetulka runding kitai enggau jampat. (1 Tim. 6:7, 8)  Enti enda, kitai deka berengkah rinduka utai bukai kelimpah ari Jehovah. Lalu Jehovah enggai nerima sembah ari kitai. Iya ‘Petara ti chemburu.’ Reti nya Iya deka kitai nyembah Iya seiku aja. (U-dat. 4:24) Nyadi, baka ni kitai nyau nunjukka diri beberatka duit ba pengidup?

7-9. Nama dipelajarka nuan ari cherita seiku tuai gempuru ke benama David?

⁷ Peratika chunto David, seiku tuai gempuru ti bagas ba Amerika Serikat. Iya pekereja ti bagas. Kompeni alai iya gawa meri iya kereja ti manah agi sereta gaji ti besai. Lalu iya seiku ari pekereja ke pemadu badas bejalaika pengawa nya ba menua iya. David madahka: “Maya nya, aku ngumbai tu berekat ari Jehovah.” Tang kati nya amat?

⁸ Belubah-lubah David nyau nemu kereja iya ngachau kaul iya enggau Jehovah. Ku iya madah: “Lebuh enggau begempuru sereta nginjil, aku berundingka pasal penanggul ba endur kereja. Aku bulih mayuh duit, tang kereja ngasuh aku balat stres. Lalu aku enggau bini aku berengkah bisi penanggul.”

⁹ David sedar iya patut mutuska utai ti patut dikenuluka. Ku iya madah: “Aku mutuska deka mutarka utai ke ditapi aku.” David deka ngubah jadual kereja iya, lalu iya madah ngagai tuke iya pasal utai ti dikedekaka iya. Nama nyadi udah nya? David dibuai kereja! Nama digaga iya? Ku iya madah: “Hari siti, aku ngisi pom minta nyadi pengerintis sukung ti tetap.” Kena ngulihka belanja, David enggau bini iya berengkah gawa nyadi tukang meresi bengunan ti besai. Enda lama udah nya, iya berengkah nyadi pengerintis biasa lalu bini iya mega sama enggau nyadi pengerintis. Seduai iya milih kereja sekular ke  enggai digaga mayuh orang. Tang, bansa kereja ukai utai ti dikemeratka seduai. Taja pan penatai pemisi seduai jauh amat kurang ari ke udah, tang ninting bulan seduai bisi chukup duit ke dikena. Seduai deka ngenuluka Jehovah lalu nemu Jehovah ibuhka orang ti ngenuluka Perintah Iya.​—Mat. 6:31-33.

10. Baka ni chara kitai nyaga ati?

¹⁰ Sekalika kitai bisi mayuh duit tauka mimit, kitai patut nyaga ati kitai. Baka ni chara iya? Anang ngemansangka pengingin angkunka pengaya. Lalu anang ngelakka kereja sekular nyadi utai ti berat agi ari pengawa ke Jehovah. Baka ni nuan ulih nemu sekalika nuan nyau beberatka kereja sekular? Nuan ulih nanya diri empu: ‘Kati aku suah berunding pasal kereja sekular lebuh aku begempuru tauka nginjil? Kati aku seruran irau pasal belanja ke dikena dudi hari? Kati duit enggau reta tengkira nyadi penanggul ba tikah? Kati aku deka ngereja pengawa ke dikemaruhka orang taja pan kereja nya nulung aku ulih ngena mayuh agi jam gawa ke Jehovah?’ (1 Tim. 6:9-12) Lebuh berundingka tanya nya, kingatka meh, Jehovah rinduka kitai lalu ku Iya besemaya ngagai orang ke milih nyembah Iya: “Aku enggai sekali-kali ninggalka kita, tauka ngelengkaka kita.” Nya kebuah rasul Paul nulis: “Anang angkunka duit.”​—Heb. 13:5, 6.

11. Nama ulih nyadi enti orang salah milih pemerindang?

¹¹ Jehovah deka kitai lantang ati ba pengidup, lalu pemerindang ulih ngelantangka ati kitai. Indah Bup Kudus madahka “utai ti pemadu manah ti tau dikereja kitai nya makai, ngirup lalu ngelantangka diri ngena utai ti udah ulih kitai.” (P-jar. 2:24) Tang, mayuh pemerindang ba dunya tu enda manah ke kitai. Pemerindang ke bansa nya ulih ngasuh orang nerima tauka rinduka utai ti dipegedika Jehovah.

12. Nitihka 1 Korint 10:21, 22, nama kebuah kitai patut bejimat milih pemerindang?

¹² Kitai deka nyembah Jehovah seiku aja. Nya alai, kitai enda makai ba “mija Tuhan, lalu makai mega ba mija antu.” (Bacha 1 Korint 10:21, 22.) Lebuh makai begulai enggau orang, nya suah nunjukka kitai bisi kaul ti manah enggau sida. Enti kitai milih pemerindang ke ngemansangka pemangah, pengawa bemanang, ulah seks ti kamah tauka pengingin enggau ulah ti salah, kitai baka ke begulai makai enggau munsuh Petara lalu makai utai ke disediaka sida. Ketegal tu, kitai  ngemediska diri empu sereta ngerusakka kaul kitai enggau Jehovah.

13-14. (a) Baka ni pemerindang disemaka baka pemakai? (b) Nitihka James 1:14, 15, nama kebuah pemerindang ti enda manah ulih ngachau kitai?

¹³ Peratika baka ni pemerindang nya baka pemakai. Lebuh kitai makai, kitai ulih milih utai ke diempa kitai. Tang pengudah kitai nelan pemakai nya, kitai enda ulih nentuka nama empas pemakai nya ba tubuh kitai. Pemakai ti manah ngeraika tubuh, tang pemakai ti enda manah ngasuh sakit. Kitai enda tekala nya meda empas pemakai nya ba tubuh kitai, tang nyau kelama baru kitai ulih meda empas iya.

¹⁴ Pia mega, lebuh kitai milih pemerindang, kitai ulih milih utai ke deka disimpan dalam runding kitai. Tang udah nya pemerindang ke dipilih kitai deka bisi empas ba asai ati sereta chara kitai berunding. Pemerindang ti manah meri penguntung ngagai kitai, tang pemerindang ti enda manah ulih ngachau kitai. (Bacha James 1:14, 15.) Empas pemerindang ti enda manah enda ulih dipeda kitai tekala nya, tang nyau kelama baru kitai ulih meda empas iya. Nya kebuah Bup Kudus nangkan kitai: ‘Anang nejuka diri ditipu. Petara enda ulih dikeleseka, laban kita deka ngetau utai ti ditanam kita empu. Enti kita nanam nitihka pengingin tubuh, kita deka ngetau pemati.’ (Gal. 6:7, 8) Endang beguna bendar kitai nulak semua pemerindang ke ngemansangka utai ti dipegedika Jehovah!​—Mas. 97:10.

15. Nama pemeri ke udah disediaka Jehovah ngagai kitai kena ngelantangka ati?

¹⁵ Mayuh nembiak Jehovah rindu meda Berita JW ke bisi ba Internet. Berita nya ngundan program ti manah ke kitai. Seiku menyadi Kristian indu ke benama Marilyn madahka: “Berita JW udah nulung aku nyadi orang ke gaga agi ati, lalu aku ulih meda semua program ke bisi dipandangka laban semua nya meri penguntung ke aku. Lebuh aku berasai sunyi tauka lemi, aku ngiga cheramah tauka program Sembah Pagi ti meransang ati. Tu ngasuh aku semak agi ngagai Jehovah sereta gerempung Iya. Berita JW udah ngubah pengidup aku.” Kati nuan bulih penguntung ari pemeri ke disediaka Jehovah tu? Ninting bulan, Berita JW bisi program ti baru. Berita tu mega bisi audio, video enggau lagu ti meransang ati ke ulih dipeda sereta didingaka nuan ba sebarang maya.

16. Nama kebuah kitai enda tau enda bejimat enggau penyampau jam ke dikena ba pemerindang?

¹⁶ Kitai ukai semina enda tau enda bejimat milih bansa pemerindang ke dikedeka, tang mega penyampau jam ke dikena ba pemerindang. Enti enda, kitai engka ngena kelalu mayuh jam ngelantangka ati diri ari ke nyembah Jehovah. Mayuh orang tusah deka ngatur jam ke dikena ba pemerindang. Abigail, seiku menyadi Kristian indu ke beumur 18 taun madahka: “Meda TV nya chara aku belelak. Tang enti enda bejimat, nya ulih ngujungka aku meda TV bejam-jam.” Samuel, seiku menyadi Kristian lelaki ke biak madahka: “Kadang-kadang aku meda mayuh video pandak ba Internet. Aku berengkah enggau siti video, tang enda berasai aku nyau ngena tiga tauka empat jam meda video pandak ke bukai.”

17. Baka ni kitai ulih ngatur jam ke dikena ba pemerindang?

¹⁷ Baka ni nuan ulih ngatur jam ke dikena ba pemerindang? Keterubah, peratika penyampau jam ke dikena nuan. Uji tulis ba kelinda penyampau jam ke dikena meda TV, Internet, sereta main game ba talipaun binching. Enti nuan ngasaika diri udah ngena kelalu mayuh jam ba semua nya, gaga meh  jadual. Tetapka jam ba utai ke patut dikenuluka, udah nya baru netapka jam ke dikena ba pemerindang. Udah nya, besampi minta Jehovah nulung nuan nitihka jadual nuan. Enggau chara nya, nuan deka bisi jam enggau pengering kena belajarka Bup Kudus kediri sereta enggau diri sebilik, datai begempuru, nginjil sereta ngajar orang Bup Kudus. Enti nuan ngenuluka utai ti beguna baka sembah ngagai Jehovah, ati nuan tentu enda nyalahka nuan lebuh ngena jam ke udah ditetapka ba pemerindang.

18-19. Baka ni kitai ulih nunjukka diri nyembah Jehovah seiku aja?

¹⁸ Pengudah nulis pasal pengujung dunya Sitan enggau pasal dunya baru ti deka datai, ku rasul Peter madah: “Menyadi, lebuh kita nganti semua utai nya, kita enda tau enda enggau naka ulih diau bebaik enggau Iya, nadai bepenyalah, nadai penimpang.” (2 Pet. 3:14) Lebuh kitai ngasika jaku lalau nya lalu enggau naka ulih mengkang tuchi ba ulah sereta ba pengarap, kitai nunjukka diri nyembah Jehovah seiku aja.

¹⁹ Sitan enggau dunya iya deka terus nguji ngasuh kitai beberatka utai bukai ba pengidup, ukai Jehovah. (Luk. 4:13) Tang enda ngira nama penanggul ke ditapi kitai, kitai enggai nyembah sapa-sapa tauka sebarang utai kelimpah ari Jehovah. Kitai keran deka nyembah Iya seiku aja!