Orang ke madahka gaya hari meresa gambar gaya hari ke ayan ba radar. Iya meda ribut ti balat mansang semak endur ke bisi mayuh orang. Ketegal irauka pengelikun orang, iya enggau naka ulih nangkan sida sebedau ribut nya datai mangkaka endur nya.

Pia mega enggau Jehovah. Iya benung nangkan orang pasal “ribut ti balat” agi ari ke kala didinga sida. Baka ni Iya ngereja nya? Nama kebuah kitai pechaya Iya meri orang chukup awak kena nitihka jaku tangkan ari Iya? Kena nyaut tanya tu, keterubah aram kitai beratika sekeda jaku tangkan ke dipadah Jehovah menya.

Maya jeman Bup Kudus, Jehovah nangkan pasal mayuh bengkah “ribut ti balat” tauka pengawa ngakim ke deka dikena Iya ngelaban orang ke sengaja enda ngasika pesan Iya. (J-lam. 10:25; Jer. 30:23) Tiap kali sebedau ngukum orang ti enda ngasika Iya, Iya tumu madah ngagai sida lalu ngasuh sida ngaga ubah ti sejalai enggau peneka Iya. (2 Raj. 17:12-15; Neh. 9:29, 30) Ngambika orang deka ngaga ubah, Iya suah ngena nembiak Iya ti taluk madah pasal pengawa ngakim ari Iya sereta kebuah orang patut ngaga ubah enggau jampat. —Amo. 3:7.

Seiku ari orang ke dikena Jehovah madah pasal pengawa ngakim ari Iya, iya nya Noah. Betaun-taun, Noah enggau berani nangkan orang ke ngereja ulah ti kamah sereta orang ti kasar pasal Bah Besai ti deka datai. (P-kal. 6:9-13, 17) Iya mega madahka utai ti patut digaga sida ngambika ulih selamat maya Bah Besai. Ketegal nya, Noah dikumbai orang “ke ngajar pasal pengelurus.”—2 Pet. 2:5.

Taja pan Noah bebendar nangkan orang, tang sida enda ibuhka pesan pasal Bah Besai. Sida nunjukka diri enda arap. Ketegal nya, semua sida mati magang lebuh Bah Besai datai. (Mat. 24:39; Heb. 11:7) Nya alai, sida enda ulih ngumbai Petara nadai nangkan sida.

Ba maya bukai, Jehovah nangkan orang enda lama sebedau Iya bejalaika pengawa ngakim. Taja pia, Iya nentuka orang ke ngasika jaku tangkan Iya enda ditinggang penusah. Ambika chunto, Iya tumu nangkan orang lebuh Iya ngena Sepuluh Tulah ngukum orang Ejip. Jehovah nganjung Moses enggau Aron kena nangkan raja Ejip enggau bala pemesai iya pasal tulah ti ketujuh, iya nya ujan batu ti balat. Ketegal ujan batu nya deka nyadi hari siti, kati Petara enda meri sida chukup awak dikena ngiga endur ti likun alai belindung? Bup Kudus madahka: ‘Sekeda pemesai raja takutka utai ti udah disebut Jehovah, lalu mai bala ulun enggau jelu tupi sida tama ke dalam rumah. Tang sida ti bukai, enggai mendingka jaku tangkan Jehovah, lalu nejuka bala ulun sida enggau jelu sida mengkang di padang.’ (P-sut. 9:18-21) Amat, Jehovah meri chukup awak ngambika sida ke jampat nitihka jaku tangkan nya ulih selamat.

Raja Ejip enggau bala pemesai iya tentu nemu pasal tulah kesepuluh ti deka nyadi. Taja pia, sida enggai ngasika jaku tangkan nya. (P-sut. 4:22, 23) Ketegal nya, sida meda semua anak tuai sida mati magang. Tu chukup ngenyinuka ati! (P-sut. 11:4-10; 12:29) Kati sida bisi chukup awak kena nitihka jaku tangkan nya? Au! Moses beguai nangkan orang Israel pasal tulah kesepuluh ti deka nyadi, lalu madahka chara sida nyelamatka diri sebilik. (P-sut. 12:21-28) Berapa penyampau orang ke ngasika jaku tangkan nya? Bisi kira-kira  tiga juta iku orang, nyengkaum orang Israel, “orang bansa bukai” enggau orang Ejip. Sida enda kena ukum lalu sida ninggalka menua Ejip.​—P-sut. 12:38.

Ari beberapa iti chunto tu kitai nemu, Jehovah seruran meri orang chukup awak kena nitihka jaku tangkan Iya. (U-dat. 32:4) Nama tuju Iya ngereja nya? Rasul Peter nerangka, Jehovah ‘enggai nejuka indah siku kitai dirusak, tang semua nesal ati.’ (2 Pet. 3:9) Jehovah amat ibuhka orang. Iya deka orang nesal ati lalu ngaga ubah ba pengidup sebedau Iya datai ngakim.—Isa. 48:17, 18; Rom. 2:4.

Kemayaharitu mega, semua orang enda tau enda ngasika jaku tangkan ti berat ke benung ditusui ba serata dunya. Lebuh Jesus ba dunya, iya nangkan pasal sistem dunya ke deka dirusak maya ‘Penusah ti Besai.’ (Mat. 24:21) Bekaul enggau pengawa ngakim ke deka datai, Jesus madah ngagai bala murid iya pasal utai ke deka nyadi seraya jam nya majak semak. Kitai meda utai ti dipadah Jesus nya benung nyadi di serata dunya.​—Mat. 24:3-12; Luk. 21:10-13.

Sejalai enggau utai ke dipadah Jesus nya, Jehovah diatu meransang tiap iku orang ngambika milih deka ngasi sereta nyembah Iya. Iya deka orang ke ngasi bulih pengidup ti manah agi diatu sereta berekat ba dunya baru ti deka datai. (2 Pet. 3:13) Jehovah deka nulung orang arapka semaya Iya. Iya ngereja nya enggau chara meri pesan ke ulih nyelamatka nyawa sida. Pesan nya ‘Berita Manah pasal Perintah Petara.’ Jesus madahka pesan nya deka “ditusui di serata dunya, nyadika saksi ngagai semua bansa.” (Mat. 24:14) Jehovah udah ngatur nembiak Iya ngambika meri “saksi” tauka nusui pesan Iya ba kira-kira 240 buah menua. Iya deka mayuh orang ngasika jaku tangkan ari Iya lalu nyelamatka diri maya Iya datai ngakim. —Sep. 1:14, 15; 2:2, 3.

Tang utai ke berat nya ukai pasal sekalika orang bisi chukup awak kena ngasika jaku tangkan ari Petara Jehovah tauka enda. Chunto ba Bup Kudus nunjukka Iya endang seruran meri chukup awak. Utai ke berat nya: Kati orang deka ngasika jaku tangkan Petara seraya sida agi bisi awak? Aram meh kitai terus nulung mayuh orang ngambika sida ulih selamat maya pengujung sistem tu datai.