Jehovah meri pengering ngagai bala penginjil ti ransing tu. Sepemanjai taun nya, penyampau colporteurs, tauka pengerintis majak nambah ari 225 ngagai 350 iku. Lalu keterubah kali iya bisi lebih ari 8,000 iku class workers, tauka penginjil, ke nganjung riput nginjil sida ngagai indu opis. Jehovah merekatka pengawa sida ti bebendar nya.

Kena 21 Mac 1920, Joseph F. Rutherford, ke ngiring Nembiak Bup Kudus, meri cheramah ke betajuk, “Bejuta Iku Orang ke Idup Diatu Enda Mati.” Nembiak Bup Kudus enggau naka ulih mai orang ke bisi minat ngagai pengawa nya. Sida nyua siti palan ti besai ba New York City lalu nyadung kira-kira 320,000 iti surat mai datai.

Bala Nembiak Bup Kudus enda nyangka mayuh orang deka datai. Bisi lebih ari 5,000 iku orang ke datai ngemenuhka palan nya, lalu 7,000 iku orang patut diasuh pulai. The Watch Tower ngumbai nya “siti ari gempuru ti pemadu mujur ke kala dipejalaika Nembiak Bup Kudus Entarabansa.”

Nembiak Bup Kudus dikelala ketegal mai pesan “bejuta iku orang ti idup diatu enda mati.” Ba maya nya, sida enda entu meretika pesan Perintah Petara patut ditusui ngagai mayuh bengkah menua, sereta deka ngena timpuh ti lama. Taja pia, pengeransing sida amat ngalitka ati. Ida Olmstead, ke berengkah datai begempuru ba taun 1902, madahka, “Kami nemu bisi pengadang ti manah ke semua mensia, lalu kami enda ngetu madahka berita manah tu ngagai orang ke ditemu kami lebuh nginjil.”

Ngambika seruran bisi litaricha ke ulih negapka pengarap, bala menyadi lelaki ba Betel berengkah nyelak litaricha. Sida meli perengka nyelak lalu masang nya ba bengunan ke disua di 35 Myrtle Avenue, Brooklyn, New York, enda jauh ari endur sida diau.

Leo Pelle enggau Walter Kessler ngeriput diri ngagai Betel ba Januari 1920. Ku Walter, “Lebuh kami datai, tuai ti ngemata pengawa nyelak meda kami lalu madah, ‘Seduai bisi sejam setengah sebedau makai tengah hari.’ Nya alai, iya ngasuh kami mai  kutak bup ari tingkat baruh ngagai tingkat atas.”

Leo ngenang baru utai ke nyadi ba hari siti: “Kami diberi pengawa nuchi dinding ba tingkat baruh bengunan nya. Nya pengawa ti pemadu kamah ke kala dikereja aku. Ketegal nya pengawa ke Jehovah, nya alai kami ngereja nya enggau gaga ati.”

Dalam beberapa minggu aja, menyadi lelaki ti ransing nyelak enam puluh ribu iti majalah The Watch Tower kena 1 Februari 1920. Sida ngereja nya ba tingkat 1. Lalu ba tingkat baruh sekali, bala menyadi lelaki masang mesin chelak ke dikumbai sida Battleship. Majalah The Golden Age dichelak berengkah ari edisi 14 April 1920. Endang terang Jehovah merekatka pengawa sida.

Sekali agi nembiak Jehovah ti taluk ulih nginjil sereta beserakup. Taja pia, sekeda Nembiak Bup Kudus udah ninggalka gerempung lebuh penusah nyadi ari taun 1917 ngagai 1919. Nama digaga gerempung kena nulung sida?

Majalah The Watch Tower kena 1 April 1920, mansutka artikel “Aram Kitai Diau dalam Pemaik.” Artikel tu meransang sida: “Kami nemu . . . semua orang ke deka ngasika Jehovah . . . badu agi ngenang penyalah ke kala digaga . . . beserakup enggau nembiak Petara ngereja peneka Iya.”

Artikel tu negu ati mayuh orang. Sepasang laki bini madah: “Kami nemu penyalah diri laban enda enggau nginjil lebih ari setaun . . . Diatu kami keran deka nginjil enggau ransing.” Au, bisi mayuh pengawa ke nganti sida ke pulai baru ngagai gerempung.

Kena 21 Jun 1920, nembiak Bup Kudus berengkah kimpin nyadung “ZG,” iya nya siti bup ke dikumbai The Finished Mystery. * Lebuh perintah nagang bup tu disadung ba  taun 1918, penyampau bup tu agi mayuh tinggal.

Semua penginjil ukai semina pengerintis dibai enggau pengawa nyadung bup tu. “Semua orang ke udah dibaptisa ulih enggau pengawa tu patut ngereja nya enggau gaga ati. Arapka semua orang bisi runding: ‘Utai ti dikereja aku’ nya nyadung ZG.” Ku Edmund Hooper: “Maya kimpin nya mayuh penginjil keterubah kali iya nginjil ari rumah ke rumah.” Ku iya nampung: “Diatu baru kami nemu utai ke patut digaga ba pengawa nginjil. Lalu kami enda nyangka pengawa tu deka ngerembai enggau besai agi.”

Ketegal tusah deka nemu rita Nembiak Bup Kudus di menua bukai maya Perang Dunya I, Menyadi Rutherford deka meransang sida sereta ngatur baru pengawa nginjil. Nya alai, kena 12 Ogos 1920, iya enggau empat iku menyadi lelaki mupuk ngagai England sereta menua bukai.

Lebuh Rutherford datai ba Britain, Nembiak Bup Kudus bejalaika tiga iti konvensyen enggau 12 iti gempuru. Penyampau orang ke datai kira-kira 50,000 iku. The Watch Tower madahka: “Bala menyadi berasai diperansang. Sida begulai sereta gawa enggau pangan diri, lalu tu ngasuh sida gaga ati.” Lebuh ba Paris, Menyadi Rutherford sekali agi meri cheramah pasal “Bejuta Iku Orang ke Idup Diatu Enda Mati.” Lebuh cheramah nya berengkah, palan nya penuh enggau mensia. Tiga ratus iku orang minta mayuh agi penerang.

Ba minggu pengudah nya, Rutherford enggau empat iku menyadi lelaki datai ngagai Athens, Cairo, sereta Jerusalem. Kena meransang orang ke minat ba dia, Menyadi Rutherford muka gudang kena nyimpan litaricha di Ramallah, semak Jerusalem. Udah nya iya pulai ngagai Eropah lalu numbuhka Pampang Opis Eropah Tengah. Ba dia, sida deka nyelak litaricha.

Ba musin ruruh 1920, Nembiak Bup Kudus ngeluarka majalah The Golden Age, No. 27. Majalah tu madahka pasal Nembiak Bup Kudus ke diperinsa ba taun 1918. Mesin  chelak ke diberi nama Battleship, enda ngetu nyelak lalu ngasilka lebih ari empat juta iti majalah The Golden Age.

Orang ke macha majalah tu nemu pasal utai ke nyadi ngagai Emma Martin. Menyadi Emma seiku pengerintis ba San Bernardino, California. Maya 17 Mac, 1918, iya enggau tiga iku menyadi lelaki, iya nya Edward Hamm, Edward Julius Sonnenburg, enggau E. A. Stevens, datai ngagai gempuru Nembiak Bup Kudus.

Ba gempuru nya, bisi seiku lelaki ke datai ukai ketegal deka belajarka Bup Kudus. Tang iya datai ketegal diasuh opis perintah ngiga bukti. Ba gempuru nya, iya tetemuka “bukti” iya nya salin The Finished Mystery. Beberapa hari udah nya, Menyadi Emma enggau tiga iku menyadi lelaki nya ditangkap. Sida dituduh ngelanggar undang-undang laban nyadung bup ke ditagang perintah.

Emma enggau tiga iku menyadi lelaki dituduh besalah lalu diukum jil tiga taun. Ketegal sida nadai chara bukai kena ngapil agi, nya alai ba 17 Mei 1920 sida dianjung ngagai jil. Tang utai ti manah deka nyadi.

Kena 20 Jun 1920, Menyadi Rutherford madahka utai ke nyadi ba konvensyen di San Francisco. Orang mayuh ke datai ngagai konvensyen nya, ringat enggau chara menyadi tu digaga enggau enda lurus. Sida nganjung telegram ngagai presiden Amerika Serikat. Ku sida nulis, “Kami ngasaika ukum ke dikena ngagai Emma Martin enda lurus. Utai ke digaga perintah kena manjuk Emma Martin lalu nganjung iya ngagai jil nunjukka sida salah ngena kuasa.”

Ba hari siti, Presiden Woodrow Wilson enggau jampat ngampunka Menyadi Emma, sereta Menyadi Edward, Edward Julius, enggau Stevens. Ketegal nya, sida dilepaska ari jil.

Ba pengujung taun 1920, bisi mayuh utai ke udah nyadi ke ngasuh Nembiak Bup Kudus gaga ati. Pengawa ba indu opis majak mayuh lalu Nembiak Bup Kudus majak ransing madahka pasal Perintah Petara ke ulih mutarka penanggul mensia. (Mat. 24:14) Ba taun 1921, mayuh agi pengawa ke deka dijapai kena ngerembaika berita manah.