1. Baka ni kitai nemu pengawa ngaga orang nyadi murid nya ulih nyelamatka nyawa?

PENGAWA ngaga orang nyadi murid nya ulih nyelamatka nyawa! Baka ni kitai nemu? Lebuh Jesus meri pesan ba Matthew 28:19, 20, iya madah: “Bejalai, . . . gaga sida nyadi murid . . . , maptisa sida.” Kati baptisa nya amat beguna? Au. Enti kitai deka diselamatka, kitai enda tau enda dibaptisa. Orang ke deka dibaptisa patut pechaya iya ulih diselamatka ketegal Jesus udah mati ke kitai lalu diangkatka idup baru. Nya kebuah rasul Peter madah ngagai bala menyadi Kristian: “Pemaptisa ti nyelamatka kita diatu . . . ulih pengangkat Jesus Kristus ari mati.” (1 Pet. 3:21) Nya alai lebuh pemelajar dibaptisa, iya bisi pengadang idup belama iya.

2. Nitihka 2 Timoti 4:1, 2, kitai patut nyadi pengajar ke baka ni?

² Kena ngaga orang nyadi murid, kitai patut ngemanahka chara ngajar. (Bacha 2 Timoti 4:1, 2.) Nama kebuah? Laban Jesus ngasuh kitai: “Bejalai, . . . gaga sida nyadi murid . . . , ajar sida.” Rasul Paul madahka “majak” ngereja pengawa tu “laban enti nuan ngereja nya, nuan deka nyelamatka diri empu enggau orang ke mendingka nuan.” Nya alai, Paul madahka: “Jaga . . . ajar ti diberi nuan ngagai orang.” (1 Tim. 4:16) Ketegal pengawa ngajar bisi kaul enggau ngaga orang nyadi murid, kitai deka nentuka chara kitai ngajar ti pemadu manah.

3. Nama deka dikerandauka kitai ba artikel tu?

 ³ Kitai ngajar bejuta iku orang Bup Kudus di serata dunya. Tang baka ke udah dikerandauka ba artikel sebedau tu, kitai deka nemu baka ni ulih nulung sida nyadi murid Jesus Kristus. Ba artikel tu, kitai deka bejuraika lima agi pekara ke ulih digaga tiap iku pengajar ngambika pemelajar mansang nyentukka dibaptisa.

4. Nama kebuah pengajar patut nagang diri lebuh ngajar? (Peda mega nota kaki.)

⁴ Kitai engka rindu sekeda topik ari Bup Kudus, lalu gagit deka madahka semua utai ti ditemu kitai. Taja pia, lebuh ngiring Gempuru Belajarka Majalah, Gempuru Belajarka Bup Kudus, tauka belajarka Bup Kudus ba rumah, orang ke ngajar enda patut mayuh bejaku. Ngambika Bup Kudus ulih negu ati pemelajar, pengajar patut nagang diri lalu enda nerangka semua utai ke ditemu iya pasal ayat Bup Kudus tauka topik ti dikerandau. * (Jhn. 16:12) Uji bandingka penemu Bup Kudus ke diulih nuan lebuh dibaptisa enggau ke diatu. Lebuh nuan dibaptisa, nuan engka semina nemu batang ajar Bup Kudus. (Heb. 6:1) Tang pengudah betaun-taun, penemu nuan majak nambah. Nya alai, nuan enda ibuh ngajar semua utai ngagai pemelajar ba maya nya.

5. (a) Nitihka 1 Tesalonika 2:13, nama patut ditemu pemelajar pasal utai ke dipelajar iya? (b) Baka ni kitai ulih meransang pemelajar bejaku pasal utai ke dipelajar iya?

⁵ Kitai deka pemelajar nemu utai ke dipelajar iya datai ari Bup Kudus. (Bacha 1 Tesalonika 2:13.) Baka ni kitai ngereja nya? Kitai ulih meransang pemelajar bejaku pasal utai ke dipelajar iya. Ari ke seruran nerangka ayat Bup Kudus, nuan ulih minta iya nerangka ayat nya ngagai nuan. Tulung iya meda baka ni Jaku Petara bisi kaul enggau pengidup iya. Kena tanya ke ulih nulung iya mansutka asai ati pasal ayat ke dibacha. (Luk. 10:25-28) Ambika chunto, tanya iya: “Nama ulih dipelajar nuan pasal Jehovah ari ayat tu?” “Nama asai ati nuan pasal utai ke dipelajar nuan?” “Baka ni utai ke dipelajar nuan ulih nulung nuan?” (J-lam. 20:5) Ke pemadu beguna nya, ukai pemayuh penemu ke dikembuan iya, tang tikas pengerindu iya ba utai ti dipelajar sereta ngena nya ba pengidup.

6. Nama kebuah nya manah mai menyadi ti bepeneleba lebuh ngajar pemelajar nuan?

 ⁶ Kala nuan mai menyadi ti bepeneleba lebuh ngajar pemelajar nuan? Enti pia, nuan ulih minta iya beratika chara nuan ngajar sereta chara nuan ngena Bup Kudus lebuh ngajar. Enti nuan deka nyadi pengajar ti landik, nuan patut baruh ati. (Bandingka Kereja Rasul 18:24-26) Udah nya, nuan tau nanya menyadi nya enti pemelajar nuan meretika utai ke dipelajar. Nuan mega tau ngasuh iya ngajar pemelajar nuan enti sema nuan enda ulih ngajar minggu nya. Tu deka nulung pemelajar nemu pengawa belajar amat beguna sereta patut digaga enggau tetap. Seliahka ari berunding iya pemelajar “nuan”, lalu nadai orang bukai ulih ngajar iya. Nuan tentu deka utai ti pemadu manah ke pemelajar nuan ngambika iya ulih terus belajar sereta ngaga pemansang ba pemendar.

7. Nama deka nulung pemelajar rindu agi enggau utai ke dipelajar iya?

⁷ Pemelajar patut meda pengeransing nuan sereta ninga utai ti ngasuh nuan rindu sereta andalka pemendar ba Bup Kudus. (1 Tes. 1:5) Enggau nya, iya deka rindu agi enggau utai ke dipelajar iya. Engka nuan ulih madahka baka ni nitihka jaku lalau Bup Kudus udah nulung nuan ba pengidup. Udah nya, iya deka nemu Bup Kudus ulih nulung iya mega.

8. Nama chara bukai nuan ulih nulung pemelajar Bup Kudus, lalu nama kebuah nuan deka ngereja nya?

⁸ Lebuh belajar, nuan ulih madahka pemelajar pasal menyadi Kristian ke kala napi penanggul baka iya sereta chara sida mutarka nya. Nuan ulih mai menyadi Kristian ke tau nyadi teladan pemelajar nuan. Tauka nuan ulih ngiga peneleba ti meransang ari jw.org ba begian “Bup Kudus Ngubah Pengidup.” * Artikel enggau video ke baka tu deka nulung pemelajar nuan nemu, nitihka jaku lalau Bup Kudus ulih ngemanahka pengidup iya.

9. Baka ni nuan ulih meransang pemelajar bekunsika utai ti dipelajar iya ngagai diri sebilik sereta bala bakih?

⁹ Enti pemelajar nuan udah kawin, kati kaling iya mega enggau belajar? Enti enda, bai meh iya enggau belajar. Peransang pemelajar bekunsika utai ti dipelajar iya enggau diri sebilik sereta bala bakih. (Jhn. 1:40-45) Nuan tau nanya iya: “Baka ni nuan deka nerangka  pemendar tu ngagai diri sebilik?” tauka “Nama ayat Bup Kudus ke ulih dikena nuan nerangka pasal tu ngagai bakih nuan?” Enggau chara nya, nuan ngelatih iya nyadi pengajar. Lalu lebuh iya udah layak, iya ulih sama nginjil enggau bala menyadi. Nuan mega ulih nanya enti iya ngelala orang bukai ti deka belajar Bup Kudus. Enti bisi, nuan ulih ngiga orang nya lalu mai iya belajar Bup Kudus. Tunjukka iya video Nama Nyadi Lebuh Belajarka Bup Kudus? *

10. Nitihka 1 Tesalonika 2:7, 8, baka ni pengajar neladan chunto Paul?

¹⁰ Pengajar enda tau enda ibuhka pemelajar sida laban sida engka ulih nyadi menyadi Kristian. (Bacha 1 Tesalonika 2:7, 8.) Sida enda senang ngelengkaka bakih ba dunya sereta ngaga ubah kena nyembah Jehovah. Kitai patut nulung sida ngiga bakih ti bendar ba eklisia. Pia mega kitai ulih nyadi bakih sida enggau nyediaka awak begulai ukai semina ba maya belajarka Bup Kudus aja, tang mega ba maya bukai. Kitai ulih kol sida, nganjung mesej, tauka ngabas sida ba hari bukai. Enggau nya, nuan nunjukka diri amat ibuhka iya.

11. Nama dikearapka kitai lebuh pemelajar datai begempuru, lalu nama kebuah?

¹¹ Bisi jaku dalam madahka, semua orang ba kampung patut beserakup ngemesaika seiku anak. Nya alai kena nulung orang nyadi murid, semua menyadi Kristian bisi ungkup nulung iya. Pengajar Bup Kudus ti landik mai pemelajar datai begempuru ngambika ulih ngelala menyadi ba eklisia. Enggau nya, pemelajar bulih bakih ke ulih nulung sida semak enggau Jehovah sereta meransang sida lebuh napi penanggul. Kitai deka pemelajar ngasaika sida diterima sereta dikerindu bala menyadi ba eklisia. Tu deka nulung iya senang agi badu begulai enggau bakih ke enda rinduka Jehovah. (J-lam. 13:20) Lalu enti sida enggai agi begulai enggau iya, pemelajar enda tusah ati laban iya nemu bisi kaban ti bendar ba gerempung Jehovah.—Mrk. 10:29, 30; 1 Pet. 4:4.

12. Nama kebuah kitai patut berandau pasal pengawa nyerahka diri sereta dibaptisa enggau pemelajar kitai?

¹² Nuan patut seruran berandau kebuah pengawa nyerahka diri ngagai Jehovah sereta dibaptisa nya beguna. Kingatka, kebuah  kitai ngajar orang Bup Kudus laban deka nulung iya nyembah Jehovah lalu dibaptisa. Pengudah pemelajar belajarka Bup Kudus beberapa bulan lalu berengkah datai begempuru, iya patut nemu tuju belajarka Bup Kudus nya nulung iya nyadi seiku ari Saksi-Saksi Jehovah.

13. Nama pekara ke ulih digaga pemelajar Bup Kudus ngambika ulih dibaptisa?

¹³ Bisi beberapa pekara ke ulih digaga pemelajar Bup Kudus enti iya deka dibaptisa. Terubah, pemelajar patut ngelala sereta rinduka Jehovah lalu arapka Iya. (Jhn. 3:16; 17:3) Udah nya, iya bisi kaul enggau Jehovah sereta berengkah begulai enggau bala menyadi Kristian. (Heb. 10:24, 25; Jas. 4:8) Iya mega nulak ulah ti salah sereta nesal ati ke dosa diri. (SKR. 3:19) Pia mega, pengarap iya deka meransang iya bekunsika pemendar enggau orang bukai. (2 Kor. 4:13) Udah nya, iya nyerahka diri ngagai Jehovah lalu dibaptisa. (1 Pet. 3:21; 4:2) Nya tentu maya ti amat ngagaka ati semua orang! Lebuh pemelajar enggau naka ulih ngereja semua utai tu, terus meh muji sereta meransang iya.

14. Baka ni pengajar Bup Kudus beratika pemansang pemelajar?

¹⁴ Kitai patut sabar lebuh nulung pemelajar ngaga pemansang ngambika ulih dibaptisa. Tang, kitai mega patut nemu sekalika pemelajar kitai bisi ati deka nyembah Jehovah tauka enda. Kati pemelajar nuan enggau naka ulih ngasika pesan Jesus? Tauka kati iya semina deka nemu pasal Bup Kudus aja?

15. Nama utai ti nulung pengajar nemu pemelajar iya sedia deka dibaptisa?

¹⁵ Kitai patut seruran meresa pemansang ke digaga pemelajar kitai. Ambika chunto, kati iya besampi ngagai Jehovah? Bisi iya madahka asai ati ngagai Jehovah? (Mas. 116:1, 2) Kati iya rindu macha Bup Kudus? (Mas. 119:97) Kati iya datai begempuru enggau tetap? (Mas. 22:22) Kati iya bisi ngaga ubah ba pengidup nitihka utai ke dipelajar iya? (Mas. 119:112) Kati iya udah berengkah bekunsika utai ke dipelajar enggau diri sebilik sereta bala bakih? (Mas. 9:1) Ke pemadu  beguna, kati iya deka nyadi seiku ari Saksi-Saksi Jehovah? (Mas. 40:8) Enti pemelajar nadai ngaga pemansang ba siti ari pekara tu, uji meh nanya iya enggau manah kebuah iya enda ngereja nya, lalu enggau nelap sereta beterus-terang berandauka pekara nya enggau iya. *

16. Ni maya nuan patut badu belajar enggau pemelajar?

¹⁶ Pengajar patut suah nanya diri empu sekalika deka neruska belajar enggau pemelajar. Ambika chunto, ‘Kati pemelajar bisi nyediaka diri sebedau belajar? Kati iya rindu datai begempuru? Kati iya agi bisi ulah ti enda manah? Kati iya agi enggau pengarap pelesu?’ Saut ngagai semua tanya tu tau nunjukka enti iya rindu enggau utai ke dipelajar iya. Enti enda, tu baka ke ngajar orang nyemerai tang iya enggai basah! Enti pemelajar enda sanggup ngaga ubah, kitai ulih badu belajar enggau iya.

17. Nitihka 1 Timoti 4:16, nama enda tau enda digaga pengajar Bup Kudus?

¹⁷ Kitai ngemeratka pengawa ngaga orang nyadi murid Kristus, lalu kitai deka nulung pemelajar Bup Kudus ngaga pemansang nyentukka dibaptisa. Nya kebuah kitai ngena Bup Kudus lebuh ngajar. Kitai mega ngajar enggau ransing sereta andal enggau utai ke diajar. Kitai deka meransang pemelajar ngiga bakih ba eklisia. Lalu kitai mega deka suah berandau pasal pengawa nyerahka diri sereta dibaptisa enggau pemelajar kitai. Pia mega kitai seruran beratika pemansang pemelajar Bup Kudus. (Peda kutak ba lambar 13, “ Nama Patut Digaga Pengajar ngambika Pemelajar Mansang nyentukka Dibaptisa?”) Kitai gaga ati ulih enggau pengawa ti nyelamatka pengidup orang. Aram meh kitai enggau bebendar nulung pemelajar Bup Kudus mansang nyentukka sida dibaptisa!