ARTIKEL DIPELAJAR 41
Baka Ni Nulung Pemelajar Bup Kudus Mansang ngambika Dibaptisa?—Begian Satu
“Kita empu ke ngayanka diri endang amat surat Kristus, ti udah disediaka kami [‘ke nyadi ulun Petara,’ NWT].”—2 KOR. 3:3.
LAGU 78 ‘Ngajar Jaku Petara’
DALAM ARTIKEL TU *
Nadai utai ke lebih agi ngagaka ati bala menyadi Kristian lebuh meda pemelajar Bup Kudus ti dikerinduka sida dibaptisa. (Peda genteran 1)
1. Baka ni 2 Korint 3:1-3 nulung kitai nemu ngajar orang Bup Kudus nyentukka sida dibaptisa nya pemeri ti berega ari Jehovah? (Peda gambar ba mua majalah.)
NAMA asai ati nuan lebuh meda pemelajar Bup Kudus ari eklisia nuan dibaptisa? Nuan tentu gaga ati, kelebih agi enti iya pemelajar nuan! (Mat. 28:19; 1 Tes. 2:19, 20) Sida ke baru dibaptisa baka “surat puji” ke pengajar sida sereta eklisia.—Bacha 2 Korint 3:1-3.
2. (a) Nama tanya ke patut diperundingka kitai, lalu nama kebuah? (b) Nama reti pelajar Bup Kudus? (Peda nota kaki.)
2 Dalam empat taun ti udah, bisi kira-kira sepuluh juta pelajar Bup Kudus * dipejalaika ninting bulan ba serata dunya. Pia mega bisi lebih ari 280,000 iku orang dibaptisa ninting taun. Riput tu endang ngagaka ati! Baka ni kitai ulih nulung pemelajar Bup Kudus dibaptisa? Seagi-agi Jehovah meri peluang ngagai orang nyadi nembiak Iya, kitai enggau naka ulih nulung sida ngaga pemansang nyentukka sida dibaptisa. Kitai nyau suntuk hari. Nya alai kitai enggai betangguh ngereja nya!—1 Kor. 7:29a; 1 Pet. 4:7.
3. Nama deka dipejuraika kitai ba artikel tu pasal ngajar orang Bup Kudus?
3 Ketegal pengawa ngaga orang nyadi murid amat beguna, Raban ti Ngiring nanya sekeda pampang opis nama patut digaga ngambika ulih nulung pemelajar Bup Kudus mansang nyentukka dibaptisa. Ba artikel tu enggau ke nangkanka tu, kitai deka belajar ari bala pengerintis, pengerintis seberai tasik, sereta tuai ti ngabas ti bepeneleba. * (J-lam. 11:14; 15:22) Sida nerangka utai ke ulih digaga pengajar sereta pemelajar Bup Kudus ngambika ulih mujur agi. Ba artikel tu, kitai deka bejuraika lima iti utai ke ulih digaga pemelajar ngambika sida ulih mansang nyentukka dibaptisa.
BELAJAR NINTING MINGGU
Tanya pemelajar sekalika seduai ulih duduk berandauka Bup Kudus (Peda genteran 4-6)
4. Nama nyadi enti kitai semina belajar ba mua pintu orang?
4 Mayuh menyadi Kristian kitai ngajar Bup Kudus ba mua pintu orang. Taja pan chara tu ulih meransang minat sida ba Bup Kudus, tang randau tu enda lama sereta engka enda digaga ninting minggu. Sekeda menyadi Kristian minta lumur telefon ngambika ulih kol tauka mesej kena bekunsika ayat Bup Kudus sebedau sida betemu baru. Tu ulih nyadi bebulan-bulan tang nadai entu bisi asil. Enti pia, pemelajar nya engka tusah deka mansang nyentukka dibaptisa enti iya enda bebendar sereta enda meri mayuh agi awak belajarka Bup Kudus.
5. Nitihka Luke 14:27-33, nama dipadah Jesus ke ulih nulung kitai ngaga orang nyadi murid?
5 Bisi sekali, Jesus ngena sempama nerangka utai ke patut digaga enti seseiku orang deka nyadi murid iya. Keterubah iya bejaku pasal orang ke deka ngaga menara patut “ngira ungkus” ngambika ulih nembuka menara nya. Kedua, iya madah pasal raja ‘duduk dulu lalu ngira’ enti raban soldadu iya ulih ngalahka munsuh. (Bacha Luke 14:27-33.) Nya alai, Jesus meransang orang ke deka nyadi murid iya patut meresa enggau manah utai ke patut digaga iya. Ketegal nya kitai patut meransang pemelajar Bup Kudus belajar ninting minggu. Baka ni kitai ulih ngereja nya?
6. Nama patut digaga kitai enti deka nulung pemelajar mansang?
6 Terubah uji berandau lama agi lebuh belajar ba mua pintu. Engka nuan ulih berandauka dua iti ayat Bup Kudus. Enti orang ke bempu rumah berasai nyamai berandau lama agi, uji nanya enti bisi endur seduai ulih duduk lalu neruska randau. Saut iya deka nunjukka enti iya amat rindu belajarka Bup Kudus. Kena nulung iya mansang enggau jampat, nuan ulih nanya enti iya deka belajar dua kali seminggu. Tang bisi utai ke beguna agi ari belajar sekali tauka dua kali dalam seminggu.
BESEDIA SEBEDAU BELAJAR
Besedia enggau manah sebedau nuan ngajar, lalu ajar pemelajar chara nyediaka diri (Peda genteran 7-9)
7. Baka ni pengajar besedia enggau manah sebedau ngajar?
7 Nuan ke pengajar, besedia meh enggau manah sebedau ngajar. Nuan ulih macha utai ke deka dipelajar sereta ayat Bup Kudus ke deka dikerandauka. Perundingka poin, tajuk pelajar, tajuk mit, tanya, ayat “bacha”, gambar, sereta video ke ulih nerangka topik nya. Udah nya, pikirka pemelajar nuan sereta chara nuan deka nerangka poin nya enggau mudah sereta terang. Enggau nya, pemelajar nuan deka senang mereti sereta ngena nya ba pengidup.—Neh. 8:8; J-lam. 15:28a.
8. Nama ulih dipelajarka kitai ari jaku Paul ba Kolosi 1:9, 10 pasal besampi ke pemelajar Bup Kudus kitai?
8 Lebuh nyediaka diri, besampi meh ngagai Jehovah pasal pemelajar nuan sereta utai ke diguna iya. Nuan ulih minta Jehovah nulung nuan ngajar ngena Bup Kudus ngambika ulih negu ati pemelajar. (Bacha Kolosi 1:9, 10.) Uji perundingka utai ke tusah dimeretika tauka diterima pemelajar nuan. Seruran ingatka tuju nuan iya nya, deka nulung iya mansang ngambika dibaptisa.
9. Baka ni pengajar ulih nulung pemelajar nyediaka diri sebedau belajar? Terangka.
9 Semua kitai ngarapka pengawa belajarka Bup Kudus enggau tetap ulih nulung pemelajar ngembuan asai beterima kasih ke utai ti udah digaga Jehovah enggau Jesus lalu meransang iya belajar mayuh agi. (Mat. 5:3, 6) Tang ngambika iya bulih penguntung, pemelajar patut beratika utai ke dipelajar iya. Nya alai, padahka kebuah iya patut nyediaka diri sebedau belajar. Iya ulih macha utai ke deka dikerandauka sereta belemati chara iya ulih ngena nya ba pengidup. Baka ni nuan ulih nulung iya? Seduai ulih sama nyediaka siti pelajar. * Terangka baka ni ngiga saut ke tanya, lalu meransang iya nanda sekeda leka jaku ngambika iya ulih ingatka saut. Udah nya, meransang iya nyaut ngena leka jaku diri empu. Tu deka nulung nuan nemu sekalika iya meretika pelajar nya tauka enda. Tang nuan mega patut meransang iya ngereja siti agi utai.
AJAR IYA BERANDAU ENGGAU JEHOVAH NINTING HARI
Ajar pemelajar nuan chara berandau enggau Jehovah (Peda genteran 10-11)
10. Nama kebuah beguna macha Bup Kudus ninting hari, lalu nama ulih digaga ngambika pengawa nya ulih mai penguntung?
10 Kelimpah ari belajar Bup Kudus ninting minggu, pemelajar patut berandau enggau Jehovah ninting hari. Baka ni? Iya ulih mendingka Petara lebuh macha Bup Kudus ninting hari. (Jos. 1:8; Mas. 1:1-3) Padahka chara iya ulih ngena “Jadual Pembacaan Bible” ke bisi ba jw.org. * Tang ngambika iya bulih penguntung ari macha Bup Kudus, peransang iya belemati utai ke diajar Bup Kudus pasal Jehovah sereta baka ni iya ulih ngena nya ba pengidup.—SKR. 17:11; Jas. 1:25.
11. Baka ni pemelajar ulih belajar chara besampi, lalu nama kebuah nya beguna iya besampi ninting hari?
11 Peransang pemelajar nuan besampi ninting hari ngagai Jehovah. Sebedau enggau pengudah belajar, nuan ulih besampi ari ati lalu nyebut pasal pemelajar nuan dalam sampi. Lebuh iya ninga sampi nuan, iya mega deka besampi ari ati lalu besampi ngagai Jehovah nengah nama Jesus Kristus. (Mat. 6:9; Jhn. 15:16) Enti pemelajar nuan macha Bup Kudus ninting hari, lalu berandau enggau Jehovah nengah sampi, iya deka majak semak enggau Petara. (Jas. 4:8) Enti iya ngereja nya ninting hari, tu deka meransang iya nyerahka diri ngagai Jehovah lalu dibaptisa. Nama utai bukai ke ulih nulung iya?
TULUNG PEMELAJAR NGEMBUAN KAUL ENGGAU JEHOVAH
12. Baka ni pengajar nulung pemelajar ngembuan kaul enggau Jehovah?
12 Kitai deka pemelajar belajar pasal Jehovah. Tang utai ke dipelajar iya enda tau enda negu ati iya ngambika iya diperansang ngena nya ba pengidup. Jesus ngajar enggau chara ti ulih ngasuh orang berunding. Tang sida nitihka iya ketegal utai ke diajar Jesus negu ati sida. (Luk. 24:15, 27, 32) Tulung pemelajar nuan meda Jehovah nya endang amat. Iya ulih ngembuan kaul enggau Jehovah lalu ngumbai Iya Apai, Petara, enggau Pangan iya. (Mas. 25:4, 5) Lebuh belajar, tulung pemelajar nuan meda pemanah Jehovah. (P-sut. 34:5, 6; 1 Pet. 5:6, 7) Enda ngira topik ke dikerandau, uji beratika kualiti Jehovah baka pengerindu, penyiru, enggau pemanah ati. Enggau nya pemelajar nuan deka rindu agi ke Jehovah. Jesus madahka “pesan ti keterubah sereta pemadu besai” nya ‘rinduka Jehovah Petara nuan.’—Mat. 22:37, 38.
13. Padahka siti chara nuan ulih nulung pemelajar belajar pasal kualiti Jehovah.
13 Lebuh nuan berandau enggau pemelajar, padahka kebuah nuan rinduka Jehovah. Tu ulih nulung iya sedar, iya mega patut ngembuan kaul enggau Jehovah. (Mas. 73:28) Ambika chunto, kati bisi rambai jaku ba litaricha tauka ba ayat Bup Kudus ke madah pasal pengerindu, penemu-dalam, pengelurus, tauka kuasa Jehovah ti negu ati nuan? Enti bisi, nuan ulih bekunsi enggau pemelajar nuan. Padahka iya, tu siti ari kebuah nuan rinduka Jehovah. Taja pia bisi utai bukai ke patut digaga pemelajar ngambika ulih mansang ba pengarap.
MERANSANG PEMELAJAR DATAI BEGEMPURU
Anang nganti lama deka meransang pemelajar Bup Kudus nuan datai begempuru (Peda genteran 14-15)
14. Nama dipadah Hebrew 10:24, 25 pasal pengawa begempuru ke ulih nulung pemelajar Bup Kudus ngaga pemansang?
14 Semua kitai deka pemelajar ngaga pemansang ngambika ulih dibaptisa. Siti chara nya meransang iya datai begempuru. Pengajar ti bepeneleba madahka, pemelajar ti datai begempuru jampat agi ngaga pemansang. (Mas. 111:1) Sekeda pengajar nerangka ngagai pemelajar, enti sida deka belajar Bup Kudus enggau manah, sida patut datai begempuru. Bacha Hebrew 10:24, 25 enggau pemelajar nuan, lalu terangka penguntung ke diulih enti datai begempuru. Mainka video Nama Nyadi ba Palan Gempuru? * Tulung pemelajar nuan ngembuan juluk ati datai ngagai tiap iti gempuru.
15. Baka ni kitai ulih meransang pemelajar Bup Kudus datai begempuru enggau tetap?
15 Nama ulih digaga nuan enti pemelajar nuan bedau datai begempuru tauka enda datai enggau tetap? Padahka enggau ransing utai ke dipelajar nuan ba gempuru. Lebuh iya meda nuan rindu datai begempuru, iya engka diperansang deka datai. Beri iya Menara Jaga tauka Bup Kereja Kena Gempuru Pengidup enggau Pengawa Kristian ke benung dipelajar ba gempuru. Padahka utai ke deka dikerandau ba gempuru ti deka datai, lalu tanya iya ni begian ke narit ati iya. Utai ke dipeda enggau didinga iya ba gempuru ti terubah, tentu manah agi ari sebarang gempuru pengarap bukai. (1 Kor. 14:24, 25) Iya deka betemu enggau orang ti ulih nyadika teladan lalu nulung iya mansang nyentukka dibaptisa.
16. (a) Baka ni kitai ulih nulung pemelajar Bup Kudus ngambika ulih dibaptisa? (b) Nama deka dipelajar kitai ba artikel pengudah tu?
16 Baka ni kitai ulih nulung pemelajar Bup Kudus ngambika ulih dibaptisa? Kitai ulih nulung pemelajar meda kebuah nya beguna belajar ninting minggu sereta nyediaka diri sebedau belajar. Kitai mega deka meransang iya macha Bup Kudus sereta besampi ngagai Jehovah ninting hari. Pia mega kitai deka meransang iya ngembuan kaul enggau Jehovah sereta datai begempuru. (Peda kutak ba lambar 12, “ Nama Patut Digaga Pemelajar ngambika Mansang nyentukka Dibaptisa?”) Taja pia, bisi lima iti utai bukai ke ulih digaga pengajar Bup Kudus kena nulung pemelajar sida. Kitai deka berandauka nya ba artikel pengudah tu.
LAGU 76 Kati Asai Nuan?
^ per. 5 Reti ngajar nya nulung orang “ngembuan runding, asai ati sereta ulah ti baru.” Ayat taun 2020 ke diambi ari Matthew 28:19, nulung kitai nemu kebuah nya beguna ngajar orang Bup Kudus sereta nulung sida dibaptisa ngambika ulih nyadi murid Jesus Kristus. Ba artikel tu enggau ke nangkanka tu, kitai deka bejuraika baka ni ulih ngemansangka chara ngajar.
^ per. 2 PENERANG JAKU: Enti nuan seruran berandauka topik Bup Kudus nitihka ripih, nuan ulih ngumbai nya pelajar Bup Kudus. Nuan ulih ngumbai iya siti pelajar Bup Kudus ba riput nginjil enti seduai udah belajar dua kali, lalu enti nuan nemu iya deka terus belajar.
^ per. 3 Dua iti artikel tu mega bisi penerang ti beguna ari “Memimpin Pengajaran Alkitab yang Progresif,” kena bulan Julai 2004 ngagai bulan Mei 2005 ba Kereja Teokratik Kitai dalam jaku Indonesia.
^ per. 9 Peda video empat minit Ngajar Pemelajar Bup Kudus Nyediaka diri Sebedau belajar. Ba jw.org, peda ba LIBRARI > PENGAWA BEGEMPURU ENGGAU NGINJIL KAMI > NGEMANAHKA AGI PENGELANDIK KITAI.
^ per. 10 Peda ba AJARAN BIBLE > ALAT BANTU PEMBELAJARAN BIBLE > JADUAL PEMBACAAN BIBLE, dalam jaku Melayu.
^ per. 14 Ba jw.org®, peda ba LIBRARI > PENGAWA BEGEMPURU ENGGAU NGINJIL KAMI > PERENGKA KENA NGINJIL.
