Nembiak Bup Kudus patut berani kena ngereja pengawa nginjil. Sida ukai semina madahka ‘Berita Manah’ ngagai orang ke baruh ati aja, tang mega madahka ‘alai Jehovah ngalahka bala munsuh’ ngagai orang ke jai.

Menyadi J. H. Hoskin, ke diau ba Kanada, nginjil enggau berani taja pan disakal. Ba musin bungai taun 1921, iya betemu enggau seiku penginjil ari Methodist. Menyadi Hoskin ngepunka randau lalu madah: “Kitai patut berandau pasal Bup Kudus enggau manah. Taja pan kitai enda sepenemu enggau sekeda utai, tang kitai agi ulih ngujungka randau nya enggau pemaik lalu mengkang manah enggau pangan diri.” Tang utai tu enda nyadi. Menyadi Hoskin ngenang baru: “Kami bejaku enda lama aja lalu iya nikupka pintu enggau balat nyentukka jenila asai deka pechah.”

Penginjil ari Methodist nya nyaut enggau nyawa ti inggar: “Nama kebuah nuan enda ngagai orang ke nadai pengarap lalu berandau enggau sida?” Menyadi Hoskin enda nyaut iya. Tang lebuh iya mupuk ari endur nya, iya berunding: ‘Aku ngasaika aku udah bejaku enggau orang ke nadai pengarap!’

Ba hari siti lebuh penginjil Methodist nya meri cheramah ba gerija, iya nangkan orang mayuh. Ku Menyadi Hoskin ngenang baru: “Iya madahka ngagai sida pasal aku tu orang ke bebula lalu patut dibunuh.” Taja pia, tu enda ngachau pengawa Menyadi Hoskin. Iya terus nginjil sereta mujur ba pengawa nya. Iya madah: “Aku amat rinduka pengawa nginjil. Sekeda orang madah ngagai aku: ‘Aku nemu nuan ngereja pengawa ke Petara!’ Sida mega meri utai ke diguna aku kena beridup.”

Kena nulung orang nemu agi pasal Bup Kudus enggau manah, Nembiak Bup Kudus ngeluarka majalah ke bisi tanya sereta saut ari Bup Kudus. Majalah nya diatu dikumbai Peratika! Ba majalah nya, bisi tanya Bup Kudus ngagai orang ke nembiak. Pia mega, apai indai ulih berandauka tanya Bup Kudus enggau bala anak sereta “ngiga saut ari Bup Kudus.” Sekeda tanya nanya pasal batang ajar Bup Kudus. Ambika chunto, tanya baka “Berapa iti bup mit ke bisi dalam Bup Kudus?” nulung sida nemu sekeda fakta pasal Bup Kudus. Lalu tanya ke dalam agi baka “Kati tiap iku orang  Kristian ti bendar deka dikeduan?” deka nyikap bala nembiak ngambika sida ulih nginjil enggau berani.

Bisi mega tanya enggau saut ari Bup Kudus ngagai orang ke udah bisi penemu pasal Bup Kudus. Semua saut ari Bup Kudus ulih ditemu ba bup Studies in the Scriptures. Lebuh bala pemacha ngena chara tu, sida ulih belajar mayuh utai. Tang bisi jaku gerah ke madahka, chara nya deka diketuka. Nama kebuah ubah tu digaga?

Menyadi lelaki ke ngiring nemu, orang begunaka chara ti manah agi kena belajarka Bup Kudus. Nya alai, bup The Harp of God dikeluarka kena bulan November taun 1921. Sida ti beminat ke nerima bup nya deka nitihka kursus belajarka Bup Kudus ke ulih digaga diri empu. Kursus tu nulung orang nemu pasal “Tuju Petara ke deka meri peluang ngagai mensia idup belama iya.” Baka ni sida ngereja tu?

Lebuh seiku orang nerima bup nya, iya deka diberi siti kad mit ke madahka bagi lambar ke patut dibacha iya ba bup nya. Udah nya ba minggu siti, iya deka diberi siti da agi kad ke bisi tanya pasal utai ke udah dibacha iya. Ba ujung ba kad nya bisi ditulis lumur lambar ke patut dibacha iya ba minggu ti deka datai.

Pemelajar kursus nya deka nerima kad ti baru ninting minggu, ari eklisia ke semak enggau iya. Kesuah iya, kad nya dianjung sida ke udah tuai tauka sida ke bisi penanggul ba pengerai ke enda ulih ngereja mayuh ba pengawa nginjil. Ambika chunto, Anna K. Gardner, ari Millvale, Pennsylvania, Amerika Serikat, madah: “Lebuh bup The Harp of God dikeluarka, tu nulung Thayle, menyadi indu aku ke enda entu ulih bejalai, ulih ngereja mayuh agi ba pengawa nginjil. Iya ninting minggu nganjung kad nya ngagai orang.” Lebuh sida tembu kursus, seiku menyadi ari eklisia ke semak deka betemu enggau sida ke tembu kursus nya kena ngajar mayuh agi pasal Bup Kudus.

Ba ujung taun, Menyadi J.F. Rutherford nganjung surat ngagai semua eklisia. Iya nulis, “pengawa nginjil madahka Perintah Petara udah dijapai sereta nulung mayuh agi orang enti dibandingka enggau taun sebedau tu.” Udah nya ku iya agi: “Kitai bisi mayuh agi pengawa ke deka digaga. Peransang meh orang bukai ngambika ulih enggau ba pengawa ti manah tu.” Endang amat, Nembiak Bup Kudus nitihka iring ti datai ari Menyadi Rutherford. Asil iya, ba taun 1922, sida ransing agi nginjil enggau berani madahka pasal Perintah Petara.