1. Nama kebuah mayuh orang saru penemu pasal pengarap?

 KEMAYAHARITU bisi mayuh jalai pengarap ke ngumbai diri orang Kristian sereta nyembah Petara ngena chara ti ngelantangka ati Iya. Nya kebuah mayuh orang saru penemu pasal pengarap! Nya alai sida nanya, “Kati semina bisi siti aja pengarap ti bendar, tauka kati semua pengarap ngelantangka ati Petara?” Kati kitai pechaya kitai ke nyadi Saksi-Saksi Jehovah ngajar pemendar lalu semina chara ke dikena ba sembah kitai ngelantangka ati Jehovah? Kati kitai ulih bebendar pechayaka utai tu? Aram meh kitai beratika sekeda bukti ke nunjukka kebuah kitai ulih andalka pekara tu.

2. Nitihka 1 Tesalonika 1:5, nama kebuah rasul Paul andal iya bisi pemendar?

² Rasul Paul amat andal iya bisi pemendar. (Bacha 1 Tesalonika 1:5.) Iya andal ukai semina ketegal pemendar nya bisi diasaika iya dalam ati. Tang Paul bebendar belajarka Jaku Petara. Iya pechaya ‘semua Bup Kudus endang bepun ari Petara magang.’ (2 Tim. 3:16) Nama utai ti dipelajarka iya ari Jaku Petara? Paul belajar, iya udah tetemuka bukti ke nunjukka Jesus nya endang Messiah ke disemaya. Tang tuai pengarap orang Judah enggai pechayaka utai tu. Sida ngumbai diri ngajar orang pemendar pasal Petara, tang sida ngereja utai ti nunjukka diri nulak Iya. (Tit. 1:16) Paul bebida ari bala tuai pengarap  tu, iya enda milih ni bagi Jaku Petara ke deka dipechayaka iya. Paul seruran sedia deka ngajar sereta nitihka ‘semua juluk ati Petara.’—SKR. 20:27.

3. Kati kitai patut bisi saut ngagai semua tanya ngambika ulih andal kitai bisi pemendar? (Peda mega kutak “ Pengawa enggau Runding Jehovah—‘Nya Kelalu Mayuh.’”)

³ Sekeda orang ngumbai pengarap ti bendar patut ulih nyaut tiap iti tanya, indah tanya ke nadai saut ari Bup Kudus. Kati nya chara berunding ti ngena? Peratika teladan Paul. Iya meransang orang Kristian “uji dulu semua utai.” Lalu, iya mega madahka diri enda meretika mayuh utai. (1 Tes. 5:21) Paul nulis: “Kitai semina nemu mimit aja, kitai diatu semina meda ayas aja, baka ke meda dalam cheremin.” (1 Kor. 13:9, 12) Baka Paul, kitai enda ulih meretika semua utai. Taja pan Paul semina meretika batang ajar pemendar pasal Jehovah, tang nya udah chukup kena ngasuh iya andal iya bisi pemendar!

4. Baka ni kitai ulih andal agi kitai bisi pemendar, sereta nama deka dipejuraika kitai pasal orang Kristian ti bendar?

⁴ Kitai bisi siti agi chara kena ngasuh kitai andal kitai bisi pemendar. Kitai deka mandingka chara sembah ti bendar ke udah ditetapka Jesus enggau utai ti digaga Saksi-Saksi Jehovah kemayaharitu. Ba artikel tu, kitai deka bejuraika baka ni orang Kristian ti bendar: (1) nulak engkeramba, (2) bebasaka nama Jehovah, (3) rinduka pemendar sereta (4) rinduka pangan diri.

5. Nama ulih dipelajarka kitai ari chara Jesus nyembah Petara enggau betul, lalu baka ni kitai ulih nitihka utai ti diajar iya?

⁵ Jesus amat rinduka Jehovah, nya kebuah iya semina nyembah Jehovah aja. (Luk. 4:8) Iya mega ngajar bala murid iya ngambika nyembah Jehovah aja. Jesus enggau bala  murid iya ti tetap ati enda kala ngena engkeramba ba pengawa sembah. Petara enda ulih dipeda, nya alai nadai utai ke digaga orang ti sebaka enggau Iya! (Isa. 46:5) Tang baka ni enggau ngaga engkeramba ti nunda gamal saint lalu besampi ngagai sida? Ba pesan kedua dalam Sepuluh iti Pesan, Jehovah madahka: “Anang ngaga engkeramba ke diri empu neladan [‘sebarang,’ NWT] gamal utai ti di langit, tauka utai ti ba tanah. Anang meremi ngagai engkeramba.” (P-sut. 20:4, 5) Orang ke deka ngelantangka ati Petara nemu Iya enggai kitai nyembah engkeramba.

6. Baka ni Saksi-Saksi Jehovah nyembah Petara kemayaharitu?

⁶ Orang ke belajarka pasal sejarah madahka maya jeman bala rasul, orang Kristian semina nyembah Petara. Ambika chunto, siti bup sejarah madahka orang Kristian “amat begedika” pengawa ngena engkeramba ba Rumah Sembiang. Kemayaharitu, Saksi-Saksi Jehovah nitihka teladan orang Kristian ba abad keterubah. Kitai enda besampi ngagai engkeramba ti digaga nunda gamal “saint” tauka bala melikat, indah kitai enda besampi ngagai Jesus. Lalu kitai mega enda nabi bendira tauka ngereja utai bukai ke ngasuh kitai meri sembah ngagai bala pemerintah tauka menua. Enda ngira nama utai ke deka digaga orang ngagai kitai, kitai keran deka ngasika pesan Jesus: ‘Sembah Jehovah Petara nuan, lalu betuaika Iya siku aja.’—Mat. 4:10.

7. Baka ni Saksi-Saksi Jehovah amat bebida ari jalai pengarap bukai?

⁷ Kemayaharitu, mayuh orang rindu ningaka tuai pengarap ti tebilang. Sida kelalu rinduka bala tuai pengarap tu nyentukka baka nyembah sida. Mayuh orang ngagai gerija sida, meli bup sida, sereta meri mayuh duit kena nyukung gerempung sida. Sekeda ari sida amat arapka semua utai ke dipadah bala tuai pengarap. Lebuh sida meda bala tuai pengarap tu, sida balat gagit ati baka ke meda Jesus! Tang, orang ke nyembah Petara ngena chara ti betul, enda nitihka mensia. Taja pan kitai bebasaka sida ke ngiring, tang kitai ingatka jaku Jesus ti terang madahka: “Semua kita tu diri menyadi.” (Mat. 23:8-10) Kitai enggai meri sembah ngagai mensia, sekalika sida nya tuai pengarap tauka bala pemerintah ba politik. Lalu kitai enda nyukung utai ti deka digaga sida. Tang, kitai mengkang neutral sereta nyeraraka diri ari dunya. Nya alai dalam semua utai tu, kitai amat bebida ari jalai pengarap ke ngumbai diri orang Kristian.—Jhn. 18:36.

8. Baka ni kitai nemu Jehovah deka nama Iya dimuliaka sereta ditemu semua orang?

⁸ Bisi sekali, Jesus besampi: “Apai, muliaka nama Nuan.” Jehovah nyaut sampi Jesus lalu besemaya deka muliaka nama Iya. (Jhn. 12:28) Lebuh iya ngereja pengawa nginjil, Jesus ngemuliaka nama Apai iya. (Jhn. 17:26) Nya alai, orang Kristian ti bendar patut temegah ati ulih ngena nama Petara lalu madahka nama Iya ngagai orang bukai.

9. Baka ni orang Kristian ba abad keterubah nunjukka sida bebasaka nama Petara?

⁹ Enda lama pengudah eklisia Kristian ditumbuhka ba abad keterubah M., Jehovah meda “orang bansa bukai, lalu ngaga sekeda sida nyadi nembiak Iya” ngambika ulih ngena nama Iya. (SKR. 15:14) Orang Kristian ba abad keterubah temegah ati ngena nama Petara, lalu madahka nama Iya ngagai orang bukai. Bala rasul enggau murid Jesus ngena nama Petara lebuh sida nginjil sereta lebuh nulis ayat Bup Kudus. Enggau chara tu,  sida nunjukka semina sida orang ke madahka nama Petara ngagai orang bukai.—SKR. 2:14, 21.

10. Baka ni kitai nemu semina Saksi-Saksi Jehovah aja ke ngarika nama Jehovah?

¹⁰ Kati semina Saksi-Saksi Jehovah aja ke ngarika nama Jehovah? Peratika bukti tu. Kemayaharitu, mayuh bala tuai pengarap ngena kuasa sida enggau chara ti salah. Sida enggai nama Petara ditemu orang. Sida udah muai nama Petara ari Bup Kudus ke disalin sida, lalu sekeda sida mega, enda ngemendarka nama Petara dikena ba gerija sida. * Semua tu terang nunjukka semina Saksi-Saksi Jehovah ke bebasaka nama Petara. Kitai madahka nama Petara mayuh agi ari pengarap bukai! Ketegal kitai ngarika nama Petara, kitai enggau naka ulih idup sejalai enggau nama nya! (Isa. 43:10-12) Kitai udah ngeluarka lebih ari 240 juta Bup Kudus New World Translation of the Holy Scriptures. Dalam salin tu, kitai udah nepuka baru nama Jehovah ba endur asal iya, ke kala dibuai bala penyalin Bup Kudus ke bukai. Lalu kitai mega ngeluarka litaricha Bup Kudus ti ngena nama Jehovah ba lebih ari 1,000 iti bansa jaku!

11. Baka ni orang Kristian ba abad keterubah nunjukka sida amat rinduka pemendar?

¹¹ Jesus rinduka pemendar, iya nya pemendar pasal Petara sereta tuju Iya. Jalai pengidup Jesus nunjukka iya idup sejalai enggau  pemendar nya, lalu iya madahka pemendar nya ngagai orang bukai. (Jhn. 18:37) Bala murid Jesus mega amat rinduka pemendar. (Jhn. 4:23, 24) Kebendar iya, rasul Peter madahka pengarap Kristian nya “jalai pemendar.” (2 Pet. 2:2) Ketegal orang Kristian ba abad keterubah amat rinduka pemendar, sida nulak jalai pengarap, adat sereta penemu ti enda sejalai enggau pemendar. (Kol. 2:8) Kemayaharitu mega, orang Kristian ti bendar “diau nitihka pemendar.” Semua utai ke dikearapka sida sereta jalai pengidup sida bepelasarka Bup Kudus.—3 Jhn. 3, 4.

12. Nama utai ke digaga Raban ti Ngiring lebuh sida nemu penemu pasal Bup Kudus patut diaduka baru, lalu nama kebuah sida ngereja nya?

¹² Saksi-Saksi Jehovah enda madahka diri meretika semua utai dalam Bup Kudus. Kekadang, sida mega salah meretika chara nerangka ajar Bup Kudus tauka chara sida ngatur gerempung. Tu enda ngasuh kitai tekenyit. Bup Kudus madahka nembiak Jehovah deka meretika pemendar enggau belubah-lubah. (Kol. 1:9, 10) Jehovah mandangka pemendar enggau belubah-lubah. Nya alai, kitai patut nganti enggau liat ati nyentukka kitai ulih meretika pemendar enggau manah agi. (J-lam. 4:18) Lebuh Raban ti Ngiring nemu kitai patut ngaduka baru sekeda penemu kitai pasal Bup Kudus, sida ngaga ubah enggau jampat. Mayuh gerija kemayaharitu ngubah ajar sida ketegal deka ngelantangka ati orang ke nitihka sida tauka sida deka tampak nama ba dunya tu. Tang lebuh Saksi-Saksi Jehovah ngaga ubah, tu ketegal kitai deka majak semak agi ngagai Petara lalu nyembah Iya nitihka chara Jesus suba. (Jas. 4:4) Lebuh kitai ngaga ubah, tu ukai ketegal penemu orang ba dunya tu mega berubah, tang laban kitai meretika Bup Kudus enggau manah agi. Kitai amat rinduka pemendar!—1 Tes. 2:3, 4.

13. Nama kualiti ke pemadu beguna ti patut ditunjukka orang Kristian ti bendar, lalu baka ni Saksi-Saksi Jehovah kemayaharitu nunjukka nya?

¹³ Orang Kristian ba abad keterubah dikelala orang laban sida ngembuan mayuh kualiti ti manah. Tang kualiti ke pemadu manah ke dikembuan sida, iya nya pengerindu. Jesus madahka: ‘Enti kita rinduka pangan diri, nya baru semua orang deka nemu kita murid aku.’ (Jhn. 13:34, 35) Kemayaharitu, Saksi-Saksi Jehovah ari serata dunya rinduka pangan diri sereta beserakup. Kitai bebida ari jalai pengarap ke bukai, laban semua kitai baka siti ruang bilik ti besai taja pan kitai datai ari bemacham bansa sereta menua. Kitai ulih ngasaika pengerindu tu lebuh kitai begempuru, gempuru besai, sereta konvensyen. Semua tu ngasuh kitai andal agi, chara kitai nyembah Jehovah endang ngelantangka ati Iya.

14. Nitihka Kolosi 3:12-14, baka ni kitai ulih nunjukka pengerindu ngagai pangan diri?

¹⁴ Bup Kudus meransang kitai “seruran rinduka pangan diri.” (1 Pet. 4:8) Siti chara kitai ulih ngayanka pengerindu iya nya, ngampunka pangan diri sereta sabar enggau pangan diri laban semua kitai enda sempurna. Kitai mega ngiga peluang kena nulung bala menyadi ba eklisia, indah ngagai sida ke udah ngemediska ati kitai. (Bacha Kolosi 3:12-14.) Enti kitai ngayanka pengerindu, kitai nunjukka diri orang Kristian ti bendar.

15. Nama agi chara sembah orang Kristian ba abad keterubah ke dititihka kitai?

¹⁵ Kelimpah ari nya, bisi mega utai bukai ba chara sembah orang Kristian abad keterubah ke dititihka kitai. Ambika chunto, kitai mega bisi tuai ti ngabas, tuai gempuru sereta penulung gempuru ke sama atur enggau orang  Kristian ba abad keterubah. (Plp. 1:1; Tit. 1:5) Baka sida, kitai mega bebasaka atur Jehovah bekaul enggau seks sereta pengawa jadi melaki-bini. Nambahka nya, kitai mega nitihka utai ti dipadah Petara pasal darah, lalu enggau naka ulih ngelindung eklisia ari orang ke ngereja utai ti jai sereta enggai nesal ati.—SKR. 15:28, 29; 1 Kor. 5:11-13; 6:9, 10; Heb. 13:4.

16. Nama ulih dipelajarka kitai ari Epesus 4:4-6?

¹⁶ Jesus madahka mayuh orang deka ngumbai diri murid iya, tang sida enda ngereja utai ti diajar iya. (Mat. 7:21-23) Bup Kudus mega madahka, ba Hari ti Penudi mayuh orang “baka ke bepegai ba agama.” (2 Tim. 3:1, 5) Tang Bup Kudus mega madah ngagai kitai, semina “siti aja pengarap” ti diterima Petara.—Bacha Epesus 4:4-6.

17. Kemayaharitu, sapa orang ke bebendar nitihka ajar Jesus sereta enggau jalai pengarap ti bendar?

¹⁷ Sapa ke nitihka jalai pengarap ti bendar kemayaharitu? Kitai udah mansik semua bukti. Kitai mega udah meda chara sembah ti diajar Jesus sereta baka ni orang Kristian ba abad keterubah nitihka chara nya. Nya alai semina siti aja saut ngagai tanya nya—Saksi-Saksi Jehovah. Kitai ngembuan basa ti besai ulih nyadi nembiak Jehovah sereta nemu pemendar pasal Jehovah enggau tuju Iya! Nya alai, aram meh semua kitai mengkang bepegai teguh ba pemendar.