1. Nama runding nuan pasal orang ti bisi pengasih?

 LEBUH kitai berundingka orang ti bisi pengasih, kitai engka ngambarka orang nya manah, nemu ngelantangka ati sereta deka nulung. Kitai mega engka berundingka cherita Jesus pasal seiku orang Samaria ti manah ati. Orang Samaria nya “kasihka iya,” iya nya orang Judah ti udah dirumpak. Pia mega, iya “kasihka” orang Judah ti bakal nya lalu ngaga atur deka ngintu iya. (Luk. 10:29-37) Sempama tu ngajar kitai pasal pengasih. Tu meh siti kualiti Petara ti badas. Petara nya pengasih laban Iya sayauka kitai lalu Iya nunjukka pengasih ngagai kitai ninting hari dalam mayuh chara.

2. Nama chara bukai orang ulih nunjukka pengasih?

² Bisi chara bukai ulih nunjukka pengasih. Orang ke pengasih enda ngukum orang taja pan orang nya endang patut diukum. Dalam chara ti sama, Jehovah mega udah nunjukka pengasih ngagai kitai. Bup Kudus madahka: “Iya enda ngukum kitai nitihka dosa kitai.” (Mas. 103:10) Taja pia, Jehovah meri disiplin ngagai orang ti udah ngereja dosa ti besai.

3. Nama tanya ke deka dipejuraika kitai?

³ Ba artikel tu, kitai deka nyaut tiga iti tanya tu: (1) Nama kebuah Jehovah nunjukka pengasih? (2) Nama kaul entara disiplin enggau pengasih? Lalu, (3) Nama ulih nulung kitai nunjukka pengasih? Aram meh kitai meda baka ni Bup Kudus nyaut tiga iti tanya tu.

4. Nama kebuah Jehovah nunjukka pengasih?

⁴ Jehovah rindu nunjukka pengasih. Rasul Paul nulis, Petara bisi pengasih ti besai. Ba ditu, Paul nerangka “pemesai pengasih” Petara laban Iya meri pengadang ulih idup belama iya ba serega  ngagai sida ke dipilih, taja pan sida nya enda sempurna. (Eps. 2:4-7) Tang Jehovah ukai semina nunjukka pengasih ngagai sida ke dipilih aja. Ku pemasmur David madahka: “Iya manah enggau semua orang lalu siru enggau semua utai ti udah digaga Iya.” (Mas. 145:9) Ketegal Jehovah sayauka mensia, Iya seruran ngiga peluang endur nunjukka pengasih ngagai mensia.

5. Baka ni Jesus belajar pasal pengasih Jehovah?

⁵ Jesus nemu Jehovah amat rindu nunjukka pengasih. Jehovah enggau Jesus udah lama begulai ba serega sebedau Jesus datai ke dunya. (J-lam. 8:30, 31) Jesus udah mayuh kali meda Apai iya nunjukka pengasih ngagai mensia ti bedosa. (Mas. 78:37-42) Lebuh Jesus ngajar, Jesus suah nyebut pasal kualiti Apai iya, iya nya pengasih.

6. Baka ni Jesus nulung kitai meretika pasal pengasih Jehovah?

⁶ Baka ke udah dipadah ba artikel sebedau tu, Jesus ngena sempama pasal anak ti tesat kena nulung kitai meretika baka ni Jehovah rindu nunjukka pengasih. Anak nya ninggalka rumah, lalu “masau reta tengkira iya idup ngena chara ti enda menuku.” (Luk. 15:13) Udah nya, iya nunjukka diri nesal ati ke penyalah iya sereta pulai ke rumah. Tu mega nunjukka iya baruh ati. Lebuh anak nya pulai ke rumah, nama asai ati apai iya? Anak ti tesat nya enda ibuh nganti lama kena nemu asai ati apai iya. Jesus madah: “Lebuh iya [anak ti tesat] agi jauh ari rumah, apai iya tepedaka iya, lalu sinu ati ke iya. Iya belanda lalu merap iya, lalu nyium iya.” Apai nya enda nganu anak iya. Tang, iya kasih sereta ngampunka anak iya lalu ngelaluka iya pulai baru ngagai ruang bilik iya. Taja pan anak ti tesat nya udah ngereja dosa ti besai, tang iya udah nesal ati lalu apai iya ngampunka iya. Apai ti pengasih dalam sempama Jesus nya ngambarka Jehovah. Nya alai dalam chara ti sama, Jesus ngambarka Apai iya sanggup ngampunka orang ke bedosa, ke udah nesal ati.—Luk. 15:17-24.

7. Baka ni pengasih ke diayanka Jehovah nunjukka Iya amat bepenemu-dalam?

⁷ Jehovah nunjukka pengasih ketegal Iya amat bepenemu-dalam. Jehovah seruran ngaga pemutus ti mai penguntung ngagai utai ke ditempa Iya. Nya kebuah Bup Kudus madahka “penemu-dalam ti datai ari atas nya . . . penuh laban pengasih enggau buah ti manah.” (Jas. 3:17) Baka apai indai ti bepengerindu, Jehovah mega nemu bala nembiak Iya deka bulih  penguntung ari pengasih Iya. (Mas. 103:13; Isa. 49:15) Ketegal pengasih Jehovah, nembiak Iya bisi pengadang ke jemah ila taja pan sida enda sempurna. Nya alai ketegal Jehovah bepenemu-dalam, Iya seruran deka nunjukka pengasih lebuh Iya tetemuka kebuah ti manah deka ngereja nya. Tang, bisi maya Jehovah enda nunjukka pengasih laban Iya enggai nejuka orang sengaja ngereja penyai.

8. Lebuh seiku orang berengkah ngereja dosa, nama patut digaga, lalu nama kebuah?

⁸ Kitai engka nemu seiku menyadi ke sengaja milih pengidup ti enda menuku. Nama patut digaga kitai ba pekara tu? Rasul Paul nulis: “Kita enda tau begulai enggau orang ke baka nya.” (1 Kor. 5:11, Bup Kudus Berita Manah Ka Rebak Diatu) Orang ke bedosa ti enda nesal ati patut dibuai ari gerempung. Atur tu beguna kena nyaga bala menyadi Kristian kitai sereta ngetanka pengudus Jehovah. Tang sekeda menyadi engka ngumbai lebuh seiku orang dibuai ari gerempung, tu reti iya Petara enda kasih ke iya. Kati nya amat? Aram kitai meresa tu.

9-10. Nitihka Hebrew 12:5, 6, nama kebuah kitai ulih madahka atur dibuai ari gerempung nya nunjukka pengasih? Padahka siti sempama.

⁹ Lebuh kitai ninga jaku gerah bekaul enggau orang ke dikesayau sereta dikelala kitai “badu agi nyadi Saksi-Saksi Jehovah,” kitai tentu balat tusah ati. Kitai engka berunding sekalika atur nya endang patut digaga tauka enda. Kati atur dibuai ari gerempung nya amat nunjukka pengasih ari Jehovah? Au. Lebuh seiku orang nerima disiplin ti patut diterima iya, atur nya nunjukka pengasih, pengerindu sereta penemu-dalam ari Jehovah. (J-lam. 13:24) Kati atur nya ulih nulung iya berubah sereta nesal ati? Ulih. Mayuh menyadi ke kala ngereja dosa ti besai lalu dibuai ari gerempung madahka sida begunaka atur tu. Tuju atur nya kena nulung sida sedar penyalah ke digaga sida amat besai. Pia mega, atur tu ulih nulung sida nesal ati sereta ngubah ulah sida, lalu udah nya pulai baru ngagai Jehovah.—Bacha Hebrew 12:5, 6.

¹⁰ Peratika siti sempama tu. Pengibun bedus nemu seiku ari bedus iya benung sakit. Enti iya deka ngubat bedus iya ke sakit nya, iya patut nyeraraka bedus nya ari raban bedus ke bukai. Taja pia, bedus nya rindu begulai enggau raban bedus ke bukai. Lalu bedus nya engka berasai enda nyamai enti diseraraka ari raban iya. Kati pengibun bedus nya nadai pengasih ngagai bedus ke sakit nya? Tentu enda. Iya nemu, enti iya ngelakka bedus ke sakit nya begulai enggau raban bedus, penyakit deka ngerampit ngagai bedus ke bukai. Nya alai, pengibun bedus kebendar iya deka ngelindung semua bedus ba raban nya.—Bandingka Adat Lewi 13:3, 4.

11. (a) Baka ni orang ke dibuai ari gerempung ulih disemaka enggau bedus ke sakit? (b) Baka ni orang ke dibuai ari gerempung nya ulih ngaduka baru kaul iya enggau Jehovah?

¹¹ Kitai ulih nyemaka orang Kristian ke dibuai ari gerempung nya baka bedus ke sakit. Tu ketegal kaul iya enggau Jehovah udah rusak. Nya alai, iya baka orang ke sakit. (Jas. 5:14) Baka sekeda orang ke bisi penyakit ti ulih ngerampit, orang ke udah rusak kaul enggau Jehovah mega ulih ngerampit orang bukai ngereja utai ti jai. Nya kebuah orang ke sakit tu patut diseraraka ari eklisia. Atur dibuai ari gerempung nya nunjukka pengerindu Jehovah ke nembiak Iya ti tetap ati dalam eklisia, lalu nya mega ulih nulung orang ke bedosa nya sedar penyalah ke digaga iya amat besai lalu iya patut nesal ati. Taja pan iya udah dibuai ari gerempung, iya agi ulih datai begempuru ngambika iya ulih nerima iring ari Bup Kudus sereta negapka baru pengarap iya ngagai Jehovah. Iya mega ulih nerima litaricha ngambika iya ulih macha sereta belajarka Bup Kudus sereta iya mega ulih meda Berita  JW. Lalu lebuh bala tuai gempuru meda iya ngaga ubah, sida engka deka meri jaku lalau ngambika ulih nulung iya ngaduka baru kaul enggau Jehovah. Enggau nya, iya ulih diterima baru nyadi Saksi-Saksi Jehovah. *

12. Nama ulih digaga tuai gempuru ti pengasih ngagai sida ke enggai nesal ati?

¹² Kingatka, semina orang ke bedosa ti enda nesal ati deka dibuai ari gerempung. Bala tuai gempuru nemu pemutus deka muai orang ari gerempung nya pemutus ti berat. Nya kebuah sebedau sida ngereja nya, sida enda tau enda mansik pekara nya enggau dalam. Sida nemu Jehovah semina meri disiplin “ba takat ti patut.” (Jer. 30:11, NWT) Bala tuai gempuru rinduka bala menyadi sida, lalu sida enggai kaul bala menyadi enggau Jehovah dirusak. Nya alai, atur dibuai ari gerempung nya nunjukka pengasih ari Jehovah.

13. Nama kebuah seiku ari menyadi Kristian ba Korint patut dibuai ari eklisia?

¹³ Pikirka utai ke digaga rasul Paul ngagai orang ke bedosa ti enda nesal ati ba abad keterubah. Seiku orang Kristian ba Korint beleman enggau bini apai iya. Tu pengawa ti amat jai. Paul nemu Jehovah udah madah ngagai orang Israel kelia menya. Ku Jehovah: “Lelaki ke beleman enggau siku ari bala bini apai iya, ngemaluka apai iya, lalu iya enggau indu nya deka sama dibunuh.” (Lew. 20:11) Paul enda ulih madah ngagai eklisia, orang ke besalah nya patut diukum bunuh. Tang iya meri iring ngagai bala menyadi ba Korint kena muai orang nya ari eklisia. Ulah lelaki nya udah ngachau bala menyadi Kristian ba eklisia, laban sekeda ari sida ngumbai pengawa nya ukai dosa ti besai!—1 Kor. 5:1, 2, 13.

14. Baka ni Paul ngayanka pengasih ngagai menyadi ba Korint ti dibuai ari eklisia, lalu nama kebuah? (2 Korint 2:5-8, 11)

¹⁴ Nyau kelama, Paul nemu lelaki nya udah ngaga ubah ti besai ba pengidup iya. Lelaki nya bebendar nesal ati! Taja pan iya udah kala ngemaluka eklisia, tang Paul madah ngagai bala tuai gempuru ke bukai anang “kelalu kasar” enggau lelaki nya. Iya madah ngagai sida: “Ngampun sereta merindang iya.” Peratika kebuah Paul ngasuh sida ngereja nya. Iya madahka: “Enggai ke iya enda ulih natka penusah ati diri.” Paul kasihka lelaki ke udah nesal ati nya. Enti bala tuai gempuru ba maya nya enggai ngampunka iya, tu ulih ngasuh lelaki nya balat  tusah ati nyentukka iya enda nemu agi chara kena minta ampun ke dosa iya.—Bacha 2 Korint 2:5-8, 11.

15. Baka ni tuai gempuru ulih nunjukka pengasih lebuh disiplin orang ke besalah?

¹⁵ Bala tuai gempuru rindu nunjukka pengasih laban sida neladan Jehovah. Ba maya ti patut, sida disiplin orang ke besalah. Lalu enti ulih, sida mega nunjukka pengasih ngagai orang nya. Enti bala tuai gempuru enda meri disiplin ngagai orang ke besalah, tu reti nya sida enda kasihka iya. Tang sida ngelakka orang nya terus ngereja penyalah. Kelimpah ari tuai gempuru, sapa agi ulih nunjukka pengasih?

16. Nitihka Jaku Dalam 21:13, nama asai ati Jehovah ngagai sida ke enggai nunjukka pengasih?

¹⁶ Semua orang Kristian bebendar deka neladan pengasih Jehovah. Nama kebuah? Siti kebuah nya, Jehovah enggai mendingka sampi orang ti enggai nunjukka pengasih ngagai orang bukai. (Bacha Jaku Dalam 21:13.) Semua kitai tentu enggai Jehovah nulak sampi kitai. Nya alai, kitai enggai kasar enggau orang ke begunaka pengasih. Lebuh seiku menyadi Kristian benung napi pemerinsa lalu deka madahka asai ati iya ti tusah nya, kitai enda tau enda “mendingka sabak” orang nya. Sama mega, kitai deka ingatka ayat tu: “Iya enda ngayanka pengasih ngagai orang ke enda ngayanka pengasih ngagai orang bukai.” (Jas. 2:13) Enti kitai belemati enggau dalam pemesai pengasih ke diguna kitai, kitai mega deka diperansang nunjukka pengasih. Kelebih agi, kitai deka nunjukka pengasih lebuh orang ke bedosa ti udah nesal ati pulai baru ngagai eklisia.

17. Baka ni Raja David ngayanka pengasih?

¹⁷ Chunto ari Bup Kudus ulih nulung kitai ngayanka pengasih sereta enda kasar. Ambika chunto, peratika Raja David. Iya suah nunjukka pengasih. Taja pan Saul deka munuh iya, tang David enggai bedendam tauka deka ngemediska Saul. Tu ketegal David nemu Saul udah dipilih Jehovah nyadi raja.—1 Sam. 24:9-12, 18, 19.

18-19. Ni maya David enda nunjukka pengasih?

¹⁸ Taja pia, David enda seruran nunjukka pengasih. Peratika chunto tu: Nabal ngeleseka David lalu enggai nyediaka pemakai ngagai iya enggau empat ratus iku orang ke nitihka iya. Tu ngasuh David amat ringat lalu mutuska deka munuh Nabal sereta semua lelaki ba ruang bilik Nabal. Tang bini Nabal, iya nya Abigail, amat manah sereta sabar. Lalu iya enggau jampat meri pemakai ngagai David. Nya alai, David enda nyadi munuh Nabal sereta bala lelaki ba ruang bilik iya.—1 Sam. 25:9-22, 32-35.

¹⁹ Ba maya bukai, nabi Natan madahka siti cherita ngagai David pasal seiku lelaki ke kaya ti ngenchuri bedus ari orang ke seranta. Lebuh David ningaka cherita nya, iya balat ringat lalu madahka: ‘Aku besumpah dalam nama Jehovah ti idup, orang ke ngereja nya patut dibunuh!’ (2 Sam. 12:1-6) David nemu pasal Adat Moses ti madahka orang ke ngenchuri seiku bedus enda tau enda mayar baru empat  iku bedus ngagai orang nya. (P-sut. 22:1) Tang lebuh David madahka orang ke ngenchuri nya patut diukum bunuh, nya ukum ti kelalu berat. Kebendar iya, Natan madahka cherita tu kena nulung David nemu, iya udah ngereja dosa ti besai agi ari orang ke ngenchuri nya! David enda ngayanka pengasih ngagai orang ke ngenchuri bedus dalam sempama Natan. Tang, Jehovah ngayanka pengasih ti besai ngagai David!—2 Sam. 12:7-13.

20. Nama ulih dipelajarka kitai ari chunto David?

²⁰ Peratika tu, lebuh David balat ringat, iya mutuska deka munuh Nabal enggau semua lelaki ba ruang bilik iya. Udah nya, David madahka lelaki ke kaya dalam sempama Natan nya patut dibunuh ketegal ngenchuri. Tang David kebendar iya seiku lelaki ti amat manah ati. Nya alai nama kebuah iya deka jampat ngakim penchuri nya? Tu ketegal David benung berasai besalah. Ari tu kitai belajar, enti seiku orang jampat ngakim orang bukai, nya nunjukka kaul iya enggau Jehovah enda tegap. Nya alai, Jesus nangkan bala murid iya: “Anang ngakim, ngambika kita enda diakim. Laban chara kita ngakim, deka dikena ngakim kita.” (Mat. 7:1, 2) Aram meh kitai nyeliahka ulah ti kasar ke jampat ngakim orang bukai lalu kitai deka neladan “pemesai pengasih” Jehovah.

21-22. Nama sekeda chara ke ulih nulung kitai nunjukka pengasih?

²¹ Enti kitai kasihka orang, kitai ukai semina nunjukka penyiru ngagai sida. Tang pengasih deka meransang kitai nulung orang bukai. Semua kitai deka ngiga peluang kena nulung ruang bilik kitai empu, bala menyadi Kristian kitai sereta orang ke semak endur kitai diau. Kitai tentu tetemuka peluang kena nunjukka pengasih! Kati nuan nemu sapa ke begunaka jaku peransang? Enti sema bisi orang begunaka pemakai tauka utai bukai, kati kitai ulih nulung sida? Enti bisi seiku menyadi Kristian ke udah pulai baru ngagai gerempung ti begunaka bakih ke ulih meransang iya, kati nuan deka nulung? Ulih kitai bekunsika Berita Manah enggau orang bukai? Tu meh siti ari mayuh chara ke ulih nulung kitai nunjukka pengasih ngagai semua orang ke ditemu kitai.—Jop 29:12, 13; Rom. 10:14, 15; Jas. 1:27.

²² Enti kitai seruran ibuhka utai ke diguna orang bukai, kitai deka tetemuka mayuh peluang nunjukka pengasih. Lebuh kitai nunjukka pengasih, kitai ngagaka ati Apai kitai ti di serega, iya nya Jehovah ti ngembuan pengasih ti besai!