1-2. Nama bida entara raja Ahap enggau raja Manasi, lalu nama tanya ke deka dipejuraika kitai?

 KITAI deka berandauka dua iku raja ke idup ba jeman kelia. Seiku ari raja nya merintah sepuluh raban bansa orang Israel lalu seiku agi merintah dua raban bansa Judah. Taja pan sida idup ba maya ti enda sama, tang sida mayuh ngereja utai ti sama. Dua iku raja tu ngelaban Jehovah lalu nguluka orang bedosa. Seduai iya nyembah engkeramba sereta munuh mayuh orang. Tang, bisi utai ke enda sama entara dua iku raja tu. Seiku ari seduai iya terus ngereja penyai nyentukka iya mati. Seiku agi nesal ati lalu semua penyalah iya ke amat jai diampunka. Sapa seduai iya?

² Seiku nya benama Ahap, raja Israel, lalu seiku agi Manasi, raja Judah. Bida entara dua iku raja tu ulih ngajar kitai mayuh utai pasal nesal ati. (SKR. 17:30; Rom. 3:23) Nama reti nesal ati? Lalu baka ni kitai nunjukka diri nesal ati? Kitai enda tau enda nemu tu laban kitai dekaka Jehovah ngampunka kitai lebuh kitai bedosa. Kena nemu saut ke tanya tu, kitai deka mansik pengidup dua iku raja tu, lalu nama ulih dipelajarka kitai ari chunto seduai iya. Udah nya, kitai deka bejuraika utai ke diajar Jesus pasal nesal ati.

3. Ahap nya raja ke baka ni?

³ Ahap nya raja ti ketujuh ba perintah sepuluh raban bansa orang Israel. Iya jadi enggau Jesebel, iya nya anak raja Sidon, ke kaya ba utara. Tikah nya mai pengaya ngagai menua Israel. Tang tu ngasuh kaul bansa Israel enggau Jehovah nyadi rusak ketegal Jesebel nyembah Baal. Iya ngasuh Ahap meransang orang Israel sama nyembah Baal, lalu nguluka sida ngereja  ulah ti kamah sereta nunu anak sida nyadika pemeri. Lebuh Jesebel megai kuasa, semua nabi Jehovah dalam bahaya. Mayuh ari sida udah dibunuh Jesebel. (1 Raj. 18:13) Bup Kudus madah, Ahap ‘bedosa ngelaban Jehovah lebih agi ari semua orang ke dulu agi ari iya.’ (1 Raj. 16:30) Tang Jehovah nemu utai ke digaga Ahap enggau Jesebel. Taja pia Jehovah nunjukka pengasih, lalu nganjung nabi Elijah kena nulung orang Israel berubah lalu nyembah Iya. Tang, Ahap enggau Jesebel enggai ngasika pesan nya.

4. Baka ni Jehovah madah Iya deka ngukum Ahap, lalu baka ni gaya Ahap nerima jaku tangkan nya?

⁴ Pengujung iya, Jehovah deka ngujungka penyai sida. Jehovah nganjung Elijah nangkan Ahap enggau Jesebel. Jehovah deka munuh ruang bilik sida. Jaku Elijah ngasuh Ahap balat tusah ati! Enda disangka, Ahap ke sumbung nya sanggup “ngemaruhka diri” di mua Petara.—1 Raj. 21:19-29.

5-6. Baka ni kitai nemu Ahap enda bebendar nesal ati?

⁵ Taja pan Ahap ngemaruhka diri ba maya nya, tang ulah iya pengudah nya nunjukka iya enda entu nesal ati. Iya enda bebendar muai penyembah Baal ari perintah iya. Lalu iya enda meransang orang nyembah Jehovah. Bisi utai bukai mega ke digaga Ahap nunjukka iya enda nesal ati.

⁶ Pengudah nya, lebuh Ahap mai Raja Jehosapat ari menua Judah, beperang enggau orang Siria, Jehosapat madah manah agi seduai iya ningaka penemu nabi Jehovah dulu. Keterubah, Ahap enda setuju penemu nya. Ku iya: “Bisi. Mikaiah anak Imlah. Tang aku begedika iya, laban iya nadai kala benabika utai ti manah ke aku. Iya selalu nyebut utai ti jai.” Taja pia, seduai iya tetap nanyaka penemu nabi Mikaiah. Lalu baka ke disadang, nabi Jehovah nya madahka Ahap deka dituntung penusah! Ari ke nesal ati sereta minta Jehovah ngampunka iya, Ahap ngaga pemutus ngejil nabi nya. (1 Raj. 22:7-9, 23, 27) Taja pan Ahap udah ngejil Mikaiah, tang iya enda ulih nagang jaku benabi nya dikeamatka. Dalam perang nya, Ahap dibunuh.—1 Raj. 22:34-38.

7. Pengudah Ahap mati, baka ni Jehovah nunjukka runding Iya pasal Ahap?

⁷ Pengudah Ahap mati, Jehovah nunjukka pasal runding Iya bekaul enggau Ahap. Pengudah raja Jehosapat pulai ke rumah enggau selamat pengudah perang nya, Jehovah nganjung nabi Jehu kena ngerara iya laban udah kerejasama enggau Ahap. Nabi Jehovah nya madahka: ‘Kati nuan ngumbai diri ngereja utai ti ngena nulung orang ke jai, lalu setanah enggau orang ke begedika Jehovah?’ (2 Ban. 19:1, 2) Diatu perundingka meh pekara tu: Enti Ahap bebendar nesal ati, nabi Jehovah tentu enda madahka Ahap nya orang ti jai ke begedika Jehovah. Nya alai, taja pan terubah iya Ahap bisi nunjukka diri nesal ati, tang iya enda bebendar nesal ati ke penyalah iya.

8. Nama ulih dipelajarka kitai pasal reti nesal ati ari chunto Ahap?

⁸ Nama ulih dipelajarka kitai ari chunto Ahap? Lebuh iya ningaka pesan Elijah pasal penusah ke deka nuntung ruang bilik iya, Ahap tekala nya nesal ati. Nya utai ti manah. Tang utai ke digaga iya pengudah nya nunjukka Ahap enda bebendar nesal ati. Nya alai, nesal ati ukai semina minta ampunka penyalah ke udah digaga kitai. Diatu aram kitai meda chunto ke bukai ti ulih nulung kitai nemu reti nesal ati.

9. Nama utai ke digaga raja Manasi?

⁹ Kira-kira dua ratus taun udah nya, Manasi nyadi raja menua Judah. Dosa iya balat agi ari dosa Ahap! Bup Kudus madahka: ‘Iya balat bedosa ngelaban Jehovah, lalu nyungkak  Jehovah ringat.’ (2 Ban. 33:1-9) Manasi nirika alta ke petara pelesu sereta ngaga engkeramba lalu ngengkahka nya ba Rumah Sembiang Jehovah! Engkeramba nya engka ngambarka sembah ngagai ulah seks ti kamah. Iya mega ngereja pengawa beburung, bedukun, sereta bemanang. Nambahka nya, Manasi “udah munuh mayuh amat orang ke nadai penyalah.” Iya indah “nyerahka anak lelaki iya nyadika piring tunu” ngagai petara pelesu.—2 Raj. 21:6, 7, 10, 11, 16.

10. Baka ni Jehovah disiplin Manasi, lalu nama deka digaga raja nya?

¹⁰ Baka Ahap, Manasi enggai ningaka jaku tangkan ari Jehovah ke diberi nengah bala nabi Iya. Pengujung iya, ‘Jehovah nejuka bala tuai soldadu menua Asiria nyerang menua Judah. Sida nangkap Manasi, ngaitka pengait ba iya, nanchang iya ngena rantai, lalu nabanka iya ngagai menua Babilon.’ Ba dia, iya dikurung ba rumah jil. Lebuh iya dijil ba Babilon, iya ngenang pasal utai ke udah digaga iya. Iya ‘ngemaruhka diri, nguing ngagai Jehovah Petara iya.’ Pia mega iya ngereja lebih agi ari nya. Iya ‘minta tulung ari Jehovah.’ Manasi ke jai nya berengkah ngaga ubah sereta nerima Jehovah nya ‘Petara iya.’ Manasi mega majak besampi ngagai Jehovah.—2 Ban. 33:10-13.

11. Nitihka 2 Bansa Israel 33:15, 16, baka ni Manasi nunjukka iya amat nesal ati?

¹¹ Jehovah nyaut sampi Manasi. Ari sampi Manasi, Jehovah nemu Manasi udah berubah. Jehovah ninga lebuh Manasi minta ampun lalu ngasuh iya nyadi raja sekali agi. Manasi ngena peluang kedua nya kena nunjukka diri amat nesal ati. Iya ngereja utai ke nadai kala dikereja Ahap. Iya ngubah ulah iya. Manasi mega ngelaban sembah ti pelesu lalu meransang orang nyembah Jehovah. (Bacha 2 Bansa Israel 33:15, 16.) Kena ngereja tu, Manasi begunaka pemerani enggau pengarap ti tegap. Tu ketegal Manasi udah lama nyadi chunto ti enda manah ngagai ruang bilik iya, orang ke gawa enggau iya ba istana, sereta rayat iya. Lebuh Manasi udah tuai, iya bebendar mutarka semua penanggul ke nyadi ketegal penyalah iya. Nya kebuah iya ulih nyadi teladan ti manah ngagai uchu iya, iya nya Josiah, ke udah nya deka nyadi raja ti manah.—2 Raj. 22:1, 2.

12. Nama ulih dipelajarka kitai pasal nesal ati ari chunto Manasi?

¹² Nama ulih dipelajarka kitai ari teladan Manasi? Iya ukai semina ngemaruhka diri aja, tang iya mega ngereja utai bukai. Iya besampi minta pengasih ari Jehovah lalu ngubah ulah iya ti enda manah. Iya bebendar deka mutarka penanggul ti udah nyadi ketegal penyalah iya empu, lalu nyembah Jehovah sereta meransang orang bukai ngereja utai ti sama. Chunto Manasi ulih nulung sida ke kala ngereja utai ti amat jai. Ari cherita tu, kitai nemu Petara Jehovah nya “endang manah sereta ngampun.” (Mas. 86:5) Jehovah tentu deka ngampunka sida ti amat nesal ati.

13. Padahka siti sempama ti ulih ngajar kitai pasal utai ti beguna bekaul enggau nesal ati.

 ¹³ Manasi ngereja lebih agi ari minta ampun ke penyalah iya. Tu ngajar kitai utai ti beguna pasal nesal ati. Peratika sempama tu: Nuan ngagai bakeri deka meli kek. Tang pekereja ba bakeri nya meri nuan telu, ukai kek. Kati nuan deka gaga ati enggau nya? Enda. Tang baka ni enti pekereja nya madahka nuan, telu nya beguna kena ngaga kek? Sekali agi, nuan sigi enda puas ati enggau nya! Sama mega, Jehovah deka orang ke udah bedosa bebendar nesal ati. Enti orang ke bedosa nya minta ampun ke penyalah diri, nya utai ti manah laban nya deka ngasuh iya berasai amat-amat nesal ati. Taja pia, nya enda chukup. Nama utai ke patut digaga orang ke udah ngereja dosa? Kitai ulih belajar ari sempama Jesus.

14. Baka ke dipadah dalam sempama Jesus, baka ni anak ti tesat nunjukka diri nesal ati?

¹⁴ Jesus madahka siti sempama ti meransang pasal seiku anak lelaki ti tesat. Tu bisi dipadah ba Luke 15:11-32. Seiku lelaki ti biak angkat ngelaban apai iya, ninggalka rumah, lalu bejalai “ngagai menua ti jauh.” Lebuh diau kediri, iya ngereja ulah ti enda manah. Tang lebuh pengidup iya nyadi tusah, anak lelaki nya ngenang baru semua penyalah ti udah digaga iya. Lalu iya sedar, manah agi enti iya diau enggau apai iya. Jesus madahka lelaki nya “nyau sedarka pemeli diri.” Iya deka pulai ke rumah lalu minta apai iya ngampunka iya. Lebuh anak lelaki nya sedar diri udah ngaga pemutus ti salah, nya utai ti manah. Taja pia, nya enda chukup. Iya patut ngereja sekeda utai!

15. Baka ni anak ti tesat dalam sempama Jesus nunjukka diri amat nesal ati?

¹⁵ Anak ti tesat nya nunjukka diri amat nesal ati ke penyalah iya. Nya alai iya mutuska deka pulai ke rumah. Lebuh iya betemu enggau apai iya, iya madahka: “Apai, aku udah bedosa ngelaban serega enggau ngelaban nuan. Aku enda patut agi dikumbai anak nuan.” (Luk. 15:21) Utai ke dipadah anak ti tesat tu nunjukka iya keran deka ngaduka baru kaul iya enggau Jehovah. Iya mega sedar utai ke digaga iya udah ngemediska ati apai iya. Lalu iya sedia deka ngaduka baru kaul iya enggau apai iya. Indah anak ti tesat tu sanggup deka nyadi orang gaji apai iya! (Luk. 15:19) Sempama Jesus tu ukai semina cherita ti meransang aja. Cherita tu ulih nulung bala tuai gempuru lebuh sida deka nemu sekalika orang ti udah ngereja dosa ti besai amat nesal ati tauka enda.

16. Nama kebuah bala tuai gempuru tusah deka nentuka sekalika menyadi ke udah ngereja penyalah amat nesal ati tauka enda?

¹⁶ Lebuh seiku orang udah ngereja penyalah ti besai, bala tuai gempuru tusah deka nemu sekalika iya amat udah nesal ati tauka enda. Nama kebuah? Tu ketegal bala tuai gempuru enda ulih macha ati. Nya alai, sida nguji ngiga  bukti ke nunjukka menyadi nya udah badu ngereja penyalah. Ba sekeda kes, seiku menyadi engka udah ngereja penyalah ti amat besai nyentukka bala tuai gempuru tusah deka pechaya sekalika iya amat udah nesal ati tauka enda.

17. (a) Nama chunto ke nunjukka orang enda bebendar nesal ati taja pan iya udah madahka diri amat minta ampun? (b) Nitihka 2 Korint 7:11, nama utai ke patut digaga orang ke amat nesal ati?

¹⁷ Peratika chunto tu. Seiku menyadi lelaki udah betaun-taun ngereja pengawa butang. Ari ke minta tulung, iya ngelalaika pengawa iya ari bini, bala pangan, enggau bala tuai gempuru. Pengujung iya, bala tuai gempuru nemu pengawa ke digaga iya. Lebuh tuai gempuru madahka sida bisi bukti ke nunjukka iya ngereja pengawa butang, iya ngaku penyalah diri lalu beamat-amat minta ampun. Kati nya chukup nunjukka iya amat udah nesal ati? Enda. Bala tuai gempuru ke ngatur kes tu patut ngiga mayuh agi bukti, ukai semina bepanggai ba asai ati orang ke besalah nya. Menyadi nya ukai sekali aja ngereja penyalah tu, tang iya udah betaun-taun ngereja nya. Pia mega, menyadi nya enda dulu ngaku dosa diri, tang penyalah iya ditemu orang lalu dipadahka ngagai bala tuai gempuru. Nya alai, bala tuai gempuru patut ngiga bukti ke nunjukka menyadi nya udah ngaga ubah ari chara iya berunding, asai ati, enggau ulah. (Bacha 2 Korint 7:11.) Tu begunaka mayuh awak kena nunjukka menyadi nya amat udah nesal ati. Ba pekara tu, iya deka dibuai ari gerempung nyentukka iya nunjukka diri amat udah nesal ati.—1 Kor. 5:11-13; 6:9, 10.

18. Baka ni orang ke udah dibuai ari gerempung nunjukka diri amat udah nesal ati lalu nama asil iya?

¹⁸ Orang ke dibuai ari gerempung patut datai ngagai gempuru enggau tetap sereta nitihka jaku lalau ari tuai gempuru ke ngasuh iya seruran besampi enggau belajarka Bup Kudus enggau tetap. Enti iya ngereja nya, iya nunjukka diri amat udah nesal ati. Iya mega patut bebendar nyeliahka utai ti tau manjuk iya bedosa baru. Enti iya bebendar deka ngaduka baru kaul iya enggau Jehovah, iya ulih andal Jehovah tentu deka ngampunka iya. Pia mega, tuai gempuru deka ngemendarka iya pulai baru ngagai eklisia. Endang amat, lebuh bala tuai gempuru nguji deka nemu sekalika seiku orang udah amat nesal ati, sida patut nemu tiap iti kes nya bebida. Nya alai, bala tuai gempuru enda patut ngakim enggau chara ti kasar.

19. Nama pekara ke disengkaum enggau nesal ati? (Esekiel 33:14-16)

¹⁹ Kitai udah belajar, semina madahka diri udah nesal ati enda chukup. Nesal ati nya nyengkaum kitai patut ngubah chara berunding sereta asai ati lalu ngereja utai ti betul kena nunjukka diri amat udah nesal ati. Nambahka nya, kitai patut badu agi ngereja ulah ti  enda manah lalu ngasika standard Jehovah. (Bacha Esekiel 33:14-16.) Ke pemadu beguna, orang ke udah ngereja penyalah patut ngaduka baru kaul iya enggau Jehovah.

20-21. Baka ni kitai nulung orang ke udah ngereja dosa ti besai?

²⁰ Bekaul enggau pengawa nginjil iya, Jesus nerangka pasal siti utai ti beguna. Ku iya: “Aku datai ngangauka . . . orang ke bedosa ngasuh sida nesal ati.” (Luk. 5:32) Kitai mega deka ngereja utai ti sama. Tang nama patut digaga enti seiku ari kaban rapat kitai bisi ngereja dosa ti besai?

²¹ Enti kitai ngelalaika dosa ke digaga kaban rapat kitai, tu semina ngemediska iya. Kitai enda ulih mujur ngelalaika dosa iya laban Jehovah ulih meda semua utai ti dikereja kitai. (J-lam. 5:21, 22; 28:13) Nuan ulih nulung kaban nuan nya enggau madahka iya, bala tuai gempuru deka nulung. Enti iya enggai nerima tulung, nuan patut madahka utai nya ngagai bala tuai gempuru. Enggau ngereja nya, nuan nunjukka diri keran deka nulung iya. Tu ketegal enti iya enda minta tulung ari bala tuai gempuru sereta enda nesal ati, kaul iya enggau Jehovah ulih rusak!

22. Nama utai deka dikerandauka kitai ba artikel pengudah tu?

²² Tang, baka ni enti bisi orang ke udah lama ngereja dosa ti besai nyentukka bala tuai gempuru mutuska iya patut dibuai ari gerempung? Kati tu nunjukka bala tuai gempuru jai enggau iya? Ba artikel pengudah tu, kitai deka berandauka chara Jehovah meri disiplin enggau pengasih ngagai orang ke ngereja dosa ti besai lalu baka ni kitai ulih neladan Iya.