NINTING taun, mayuh bala menyadi ti baka bedus ti amat berega pulai baru ngagai Jehovah. Uji gambarka lebuh tiap iku sida pulai baru, orang di serega din deka “lebih agi rami gaga ati!” (Luk. 15:7, 10) Enti nuan udah pulai baru, andal meh Jesus, bala melikat sereta Jehovah amat gaga ati laban nuan udah nyadi sebagi ari eklisia Kristian baru. Tang seraya nuan deka ngaduka baru kaul nuan enggau Jehovah, nuan engka deka napi penanggul. Nama sekeda penanggul nya? Lalu nama ulih nulung nuan?

Mayuh bala menyadi agi berasai asa ati taja pan udah pulai baru ngagai eklisia. Nya alai, nuan engka ngasaika utai ti sama baka Raja David. Taja pan dosa iya udah diampun, tang iya agi madahka: “Dosa udah ngasuh aku balat lemi.” (Mas. 40:12; 65:3, NWT) Pengudah seiku orang pulai baru ngagai Jehovah, iya engka agi berasai malu tauka asai besalah. Isabelle, ke udah dibuai ari gerempung lebih ari 20 taun * madahka: “Aku tusah pechayaka Jehovah deka ngampunka aku.” Enti nuan berasai asa ati, pengarap nuan ulih nyadi lemi baru. (J-lam. 24:10) Anang meh nejuka utai nya nyadi ba nuan!

Sekeda orang berasai irau. Sida engka ngasaika enda ulih ngereja semua utai ti patut kena ngaduka baru kaul sida enggau Jehovah. Pengudah pulai baru ngagai eklisia, Antoine madahka: “Aku enda ingatka mayuh utai pasal utai ke dipelajar sereta digaga lebuh aku nyadi Saksi suba.” Ketegal ngembuan asai ati ti baka nya, sekeda orang ngasaika diri enda ulih ngereja semua utai ke Jehovah.

Ambika chunto, enti rumah seiku orang rusak ketegal kabut ti balat, iya tentu berasai balat tusah ati lebuh berundingka penyampau awak sereta pemayuh pengawa ke diguna kena nirika rumah nya baru.  Sama mega, engka kaul nuan enggau Jehovah udah rusak ketegal dosa ti besai ke udah digaga nuan. Nuan mega nemu diri patut ngereja mayuh pengawa kena ngaduka baru kaul nuan enggau Jehovah. Tang, nuan enda ibuh kediri ngereja tu.

Jehovah mai kitai: “Aram kitai ngatur pekara tu.” (Isa. 1:18) Nuan udah bebendar ngatur pekara nya enggau Iya. Jehovah rinduka nuan ketegal udah bebendar ngereja nya. Perunding meh tu: Ketegal nuan udah pulai baru ngagai Jehovah, Iya temegah ati ulih ngena nuan nyaut pemula ti datai ari Sitan!—J-lam. 27:11.

Lebuh nuan pulai baru ngagai Jehovah, nuan udah datai semak ngagai Iya. Lalu, Iya besemaya deka datai semak ngagai nuan. (Jas. 4:8) Endang amat, semua bala menyadi gaga ati laban nuan udah pulai baru ngagai eklisia. Tang nuan patut ngereja lebih agi ari nya. Nuan patut terus negapka pengerindu ngagai Jehovah. Baka ni nuan ulih ngereja nya?

Tetapka meh juluk ati ke ulih dijapai nuan. Nuan engka agi ingat batang ajar ke dipelajar nuan pasal Jehovah sereta semaya Iya pasal Paradais. Tang diatu, nuan enda tau enda ngatur baru pengidup nuan nyadi orang Kristian. Lalu tu nyengkaum nginjil enggau tetap, seruran datai begempuru sereta meri awak kena begulai enggau bala menyadi Kristian. Peratika sekeda juluk ati tu.

Suah besampi ngagai Jehovah. Jehovah meretika asai besalah nuan ba ati ti ngasuh nuan tusah deka besampi ngagai Iya. (Rom. 8:26) Taja pia, nuan patut “majak besampi” lalu padahka meh ngagai Jehovah nuan amat keran deka nyadi pangan Iya. (Rom. 12:12) Ku Andrej ngenang baru: “Aku berasai amat besalah sereta malu. Tang ninting kali pengudah besampi, asai ati ke baka nya nyau bekurang. Aku berasai lantang agi ati.” Enti nuan enda nemu utai ke patut disampika nuan, belajar meh ari sampi Raja David ke nesal ati ari dosa iya ba Masmur 51 sereta 65.

Belajarka Bup Kudus enggau tetap. Pengawa belajarka Bup Kudus enggau tetap deka nulung nuan ngembuan pengarap ti tegap. Pengawa tu ulih nulung pengerindu nuan ngagai Jehovah majak nambah. (Mas. 19:7-11) Ku Felipe madahka: “Ketegal aku suba enda macha sereta belajarka Bup Kudus enggau tetap, aku nyadi lemi sereta ngasuh Jehovah tusah ati. Aku enggai agi ngenusahka ati Jehovah. Nya alai, aku nentuka diri bisi jadual ti tetap belajarka Bup Kudus.” Nuan mega ulih ngereja nya. Enti sema nuan enda nemu ngiga topik ti ngena kena belajarka Bup Kudus kediri empu, nuan ulih minta penemu ari menyadi ti tegap ba pengarap.

Ngaduka baru kaul nuan enggau bala menyadi Kristian. Sekeda bala menyadi ke pulai baru ngagai eklisia berasai irau enti bisi menyadi ringat ngagai sida. Larissa madahka: “Aku berasai amat malu. Aku ngasaika diri udah ngemediska ati bala menyadi sereta ngasuh sida asa ati. Aku udah lama berasai baka nya.” Taja pia, andal meh bala tuai gempuru sereta bala menyadi Kristian ti tegap ba pengarap keran deka nulung ngaduka baru kaul nuan enggau Jehovah. (Peda mega kutak “ Nama Ulih Digaga Bala Tuai Gempuru?”) Sida amat gaga ati meda nuan udah pulai baru lalu sida mega deka nuan gaga ati!—J-lam. 17:17.

Baka ni nuan ulih majak semak enggau bala menyadi Kristian ba eklisia? Suah meh datai begempuru sereta nginjil enggau bala menyadi Kristian nuan. Baka ni tu ulih nulung nuan? Felix madahka: “Bala menyadi ba eklisia enda sabar nganti aku pulai baru. Nya alai tu ngasuh aku berasai dikesayau. Sida nulung aku ngasaika diri sebagi ari ruang bilik Kristian, nulung aku nemu mega Jehovah udah ngampunka aku lalu nulung aku terus nyembah Jehovah.”—Peda kutak “ Nama Ulih Digaga Nuan?”

Sitan deka terus ngena mayuh macham chara kena ngelemika kaul nuan enggau Jehovah. (Luk. 4:13) Tang, nuan ulih mujur enti nuan terus negapka pengarap nuan ngagai Jehovah diatu.

Bekaul enggau bedus Iya, Jehovah besemaya: “Aku deka ngiga sida ke tesat, mai sida ke lelang pulai baru, malut telih sida, lalu ngeraika sida ke sakit.” (Esk. 34:16) Jehovah udah nulung mayuh orang ngaduka baru kaul sida enggau Iya. Nyadi, andal meh Iya deka terus nulung nuan ngembuan kaul ti tegap agi enggau Iya.