1. Baka ni pengaga ati kitai bisi kaul enggau nemu diri begunaka iring ari Petara?

 PENGAGA ATI ti bendar ukai semina asai ati ti kekadang bisi, kekadang nadai. Pengaga ati ti bendar ulih meruan ba pengidup sesiku orang. Nama reti tu? Jesus nerangka tu ba Jaku Ajar ba atas Bukit: “Gaga ati meh sida ke nemu diri begunaka iring ari Petara.” (Mat. 5:3) Jesus nemu mensia digaga enggau pengingin deka nemu sereta nyembah Penempa sida, iya nya Petara Jehovah. Lalu, ketegal Jehovah nya “Petara ti gaga ati,” orang ke nyembah Iya mega ulih gaga ati.—1 Tim. 1:11.

2-3. (a) Nitih ku Jesus, sapa agi ke ulih gaga ati? (b) Nama deka dikerandauka kitai dalam artikel tu, lalu nama kebuah nya penting?

² Kati kitai semina ulih gaga ati enti kitai nadai penanggul ba pengidup? Enda. Ba jaku ajar Jesus, iya madahka utai ti ngalitka ati. Indah “sida ke tusah ati”—engka laban sida bisi penanggul ti besai tauka asai ati ti besalah ketegal dosa sida—agi ulih gaga ati. Jesus mega madahka, “sida ke kena perinsa ketegal ngereja utai ti lurus” tauka sida ke merinsa ketegal orang “ngelese” sida laban nyadi nembiak Kristus, agi ulih gaga ati. (Mat. 5:4, 10, 11) Tang baka ni kitai deka gaga ati enti napi penanggul ke baka nya?

³ Jesus benung ngajar kitai—pengaga ati ukai datai ari utai ti nyadi ba pengidup kitai, tang ari belajarka Bup Kudus sereta datai semak ngagai Petara. (Jas. 4:8) Baka ni kitai ulih ngereja nya? Dalam artikel tu, kitai deka beratika tiga iti utai ke patut dikereja kitai ngambika bulih pengaga ati ti bendar.

4. Nama chara keterubah ke patut digaga kitai ngambika ulih amat gaga ati? (Masmur 1:1-3)

⁴ CHARA 1: Ngambika ulih amat gaga ati, kitai patut macha sereta belajarka Jaku Petara. Jesus mandingka Jaku Petara nya baka pemakai. Mensia enggau jelu patut makai ngambika terus idup, tang semina mensia aja ke ulih macha Jaku Petara. Lalu sida patut ngereja nya. Nya kebuah Jesus madah: “Mensia enda ulih beridup ba roti aja, tang beridup ba genap leka jaku ti pansut ari mulut Jehovah.” (Mat. 4:4) Nya alai, kitai enda tau enda macha Jaku Petara, iya nya Bup Kudus, ninting hari. Pemasmur madahka: ‘Beberekat meh orang ti gaga ati ke Adat Jehovah, lalu belematika Adat nya siang malam.’—Bacha Masmur 1:1-3.

5-6. (a) Nama ulih dipelajarka kitai ari Bup Kudus? (b) Baka ni macha Bup Kudus ulih nulung kitai?

⁵ Ketegal Jehovah rinduka kitai, Iya udah nunjukka kitai nengah Bup Kudus utai ti patut dikereja kitai ngambika ulih idup enggau gaga ati. Kitai belajar tuju Iya ke pengidup kitai. Kitai mega belajar chara kitai ulih datai semak ngagai Jehovah sereta utai ti patut dikereja kitai ngambika Iya ulih ngampunka dosa kitai. Lalu, kitai mega belajar pasal harapan ti manah ke disemayaka Iya ke kitai jemah ila. (Jer. 29:11) Pemendar tu ke dipelajarka kitai ari Bup Kudus ngasuh kitai gaga ati!

⁶ Kitai nemu, Bup Kudus penuh enggau jaku ajar ke ulih dikena kitai ba pengidup besehari-sehari. Kitai deka gaga ati lebuh kitai nitihka jaku ajar nya. Lebuh nuan berasai asa ati enggau penanggul ba pengidup, kena meh mayuh agi awak macha Jaku Petara sereta  berundingka enggau dalam pasal utai ti dibacha nuan. Jesus madah: “Iya ke gaga ati nya orang ke ninga sereta ngasika jaku Petara!”—Luk. 11:28.

7. Nama ulih nulung nuan bulih penguntung ti pemadu mayuh ari awak ke dikena nuan macha Jaku Petara?

⁷ Seraya nuan macha Jaku Petara, kena meh awak belematika utai ti benung dibacha nuan. Ambika chunto, kala nuan ngasaika tu? Bisi orang manduk siti ari pemakai ti amat dikerinduka nuan. Tang engka nuan amat kisuk tauka nuan benung berundingka utai bukai. Nyadi, nuan makai enggau jampat lalu enda entu ngasaika penyamai pemakai nya. Pengudah nuan tembu makai, nuan nyau sedar, nuan makai enggau kelalu jampat nyentukka nuan enda ulih ngasaika penyamai pemakai nya. Tu ngasuh nuan ngesal. Nya engka sama enggau macha Bup Kudus. Kekadang, kitai macha enggau kelalu jampat nyentukka kitai enda entu berunding enggau dalam pasal utai ti benung dibacha kitai. Kena meh awak belematika utai ti dibacha nuan ari Jaku Petara; gambarka situasi nya, bunyi orang ke benung bejaku, sereta perundingka enggau dalam pasal utai ti udah dibacha nuan. Lebuh nuan ngereja tu nuan deka gaga agi ati.

8. Baka ni “ulun ke tetap ati sereta bepenemu-dalam” ngereja tanggungjawap sida? (Peda mega nota kaki.)

⁸ Jesus milih “ulun ke tetap ati sereta bepenemu-dalam” ngambika nyediaka utai ti negapka pengarap kitai ba maya ti patut. Lalu kitai bisi mayuh utai ti ulih negapka pengarap kitai. b (Mat. 24:45) Bup Kudus nya utai ti pemadu penting ke dikena dalam semua utai ti disediaka ulun ke tetap ati nya. (1 Tes. 2:13) Utai ti negapka pengarap nya nulung kitai nemu chara Jehovah berunding baka ke dipadah dalam Bup Kudus. Nya kebuah kitai macha majalah Menara Jaga enggau Peratika! sereta artikel ke bisi ba jw.org. Kitai mega besedia kena gempuru tengan minggu enggau gempuru ujung minggu. Lalu kitai mega meda program Berita JW ninting bulan enti bisi. Enti kitai nentuka diri terus macha sereta belajarka Bup Kudus, nya baru kitai ulih ngereja chara kedua ti patut dikereja kitai ngambika ulih amat gaga ati.

9. Nama chara kedua ke patut digaga kitai ngambika ulih amat gaga ati?

⁹ CHARA 2: Ngambika ulih amat gaga ati, kitai patut ngasika standard Jehovah. Pemasmur nya madahka: “Gaga ati meh orang ke nangika Jehovah, ke ngasika adat Iya.” (Mas. 128:1, NWT) Nangika Jehovah reti iya kitai amat bebasaka Iya nyentukka kitai enggai ngereja sebarang utai ti enda dikerinduka Iya. (J-lam. 16:6) Nya alai, kitai bebendar nitihka standard Jehovah bekaul enggau utai ti betul sereta salah, baka ke udah dipadah Iya dalam Bup Kudus. (2 Kor. 7:1) Kitai deka gaga ati enti kitai ngereja utai ti dikerinduka Jehovah sereta begedika utai ti dipegedika Jehovah.—Mas. 37:27; 97:10; Rom. 12:9.

10. Nitihka Rome 12:2, nama tanggungjawap kitai?

¹⁰ Bacha Rome 12:2. Sesiku orang engka nemu Jehovah bisi hak netapka standard bekaul enggau utai ti betul sereta utai ti salah, tang iya mega patut ngaga pemutus ngambika ngasika standard Jehovah. Ambika chunto, sesiku orang engka nemu perintah bisi hak netapka had laju ba jalai alun, tang iya engka enggai ngasika sida. Ketegal nya, iya mai kerita laju agi ari ke patut. Ari ulah kitai, kitai deka nunjukka diri ngasika standard Jehovah nya chara ti pemadu manah ngena pengidup kitai. (J-lam. 12:28) David mega berasai baka  nya. Nya kebuah iya nyebut tu pasal Jehovah: “Nuan nunjukka ngagai aku jalai ti nuju ngagai pengidup. Ati aku gaga laban Nuan bisi enggau aku lalu ati aku lantang belama iya.”—Mas. 16:11.

11-12. (a) Nama utai ti enda patut dikereja kitai lebuh berasai irau tauka asa ati? (b) Baka ni utai ti dipadah ba Pilipi 4:8 nulung kitai lebuh milih pemerindang?

¹¹ Lebuh kitai berasai irau tauka asa ati, kitai engka ngasaika diri patut ngereja utai ke ulih nulung kitai badu agi berundingka pasal penanggul nya. Nya endang amat, tang kitai patut bejimat ngambika enda ngereja utai ti dipegedika Jehovah.—Eps. 5:10-12, 15-17.

¹² Ba surat ngagai bala menyadi ba Pilipi, rasul Paul meransang orang Kristian ngambika terus berundingka “utai ti . . . lurus, . . . tuchi, . . . dikerinduka, [sereta] manah.” (Bacha Pilipi 4:8.) Taja pan Paul enda nyebut enggau nyemetak pasal pemerindang, tang utai ti ditulis iya patut bisi kaul enggau pemerindang ke dipilih kitai. Uji tu: Tiap kali leka jaku “utai” pansut ba ayat nya, nganti leka jaku nya enggau leka jaku “lagu,” “cherita wayang,” “novel,” tauka “video game.” Tu deka nulung nuan nemu ni bagi pemerindang ke diterima tauka enda diterima Petara. Kitai deka ngasika standard Jehovah ti tinggi. (Mas. 119:1-3) Udah nya, enggau ati ti beresi, kitai ulih ngereja chara ketiga ke nulung kitai tetemuka pengaga ati ti bendar.—SKR. 23:1.

13. Nama chara ketiga ke ulih digaga kitai ngambika ulih amat gaga ati? (John 4:23, 24)

¹³ CHARA 3: Tentuka sembah ngagai Jehovah nya utai ti pemadu penting ba pengidup nuan. Jehovah nempa kitai. Nya kebuah kitai patut nyembah Iya. (Pem. 4:11; 14:6, 7) Nya alai, utai ti pemadu penting ba pengidup kitai nya nyembah Jehovah enggau chara ti diterima iya, iya nya “nitihka iring kuasa kudus Iya sereta sejalai enggau pemendar.” (Bacha John 4:23, 24.) Kitai dekaka kuasa kudus Petara ngiring sembah kitai ngambika sembah kitai sejalai enggau pemendar ke ditemu dalam Jaku Iya. Sembah kitai patut dikenuluka, indah enti kitai diau ba menua alai pengawa kitai disekat tauka ditagang. Ke diatu, lebih ari 100 iku bala menyadi kitai dijil ketegal sida nyadi Saksi-Saksi Jehovah. c Taja pan baka nya, sida enggau gaga ati ngereja sebarang utai kena besampi, belajarka Bup Kudus, sereta madah ngagai orang pasal Petara enggau Perintah Iya. Lebuh orang nyakal tauka merinsa kitai, kitai gaga ati laban nemu Jehovah bisi enggau kitai sereta deka ngupah kitai.—Jas. 1:12; 1 Pet. 4:14.

14. Nama utai ke nyadi ngagai siku menyadi lelaki ti biak ba Tajikistan, lalu nama kebuah?

¹⁴ Sekeda bala menyadi Kristian kitai napi penanggul ti balat tang sida agi ulih gaga ati laban sida ngereja tiga iti utai ke baru dikerandauka kitai. Peratika utai ti nyadi ngagai Jovidon Bobojonov ari Tajikistan ke beumur 19 taun, ti enggai nyadi soldadu. Kena 4 Oktober 2019, iya ditabanka ari rumah lalu ditan ba rumah jil pengelama beberapa bulan. Iya diintu baka siku penjenayah. Utai ti enda lurus tu ditusui ba berita di sekeda menua. Nitihka riput, iya dipalu kena mejal iya besumpah nyadi soldadu ti tetap ati sereta ngerasukka baju soldadu. Pengudah nya, mahkamah madahka iya besalah lalu nganjung iya ngagai kem pengawa berat. Lalu pengujung iya, Presiden menua nya ngasuh Jovidon dilepaska ari rumah jil. Sekumbang timpuh iya  diperinsa, Jovidon ngetanka penetap ati sereta pengaga ati iya. Baka ni? Iya seruran beratika utai ti diguna iya ba pengarap.

15. Baka ni Jovidon nerima utai ti negapka pengarap iya lebuh dalam rumah jil?

¹⁵ Lebuh dalam rumah jil, Jovidon terus belajar pasal Jehovah, taja pan iya nadai Bup Kudus tauka litaricha kitai. Baka ni iya ulih ngereja nya? Bala menyadi ba endur dia nganjung pemakai ngagai iya, lalu sida nulis ayat Bup Kudus ninting hari ba plastik alai pemakai nya diengkah. Nya alai, iya ulih macha Bup Kudus sereta belematika nya ninting hari. Pengudah dilepaska ari jil, iya madahka tu ngagai sida ke bedau napi perinsa ti balat: “Kita enda tau enda ngena pengelepas kita ke diatu ngenalamka agi penemu pasal Jehovah enggau chara macha Bup Kudus sereta litaricha kitai.”

16. Nama utai ti seruran diperundingka Jovidon?

¹⁶ Menyadi Jovidon ngasika standard Jehovah. Iya enda berunding pasal pengingin ti salah tauka deka ngereja utai ti jai, tang iya befokus ba Jehovah sereta utai ti dikerinduka Iya. Jovidon rindu meda utai ti ditempa Petara. Ninting pagi iya dani lalu ningaka burung enchiap enggau belagu. Kena malam hari, iya merening ngagai bulan enggau bintang. Ku  iya madah: “Pemeri ari Jehovah baka tu ngagaka ati aku sereta meransang aku.” Lebuh kitai beterima kasihka semua utai fizikal sereta iring Bup Kudus ke udah diberi Jehovah ngagai kitai, kitai deka gaga ati, lalu pengaga ati nya ulih nulung kitai tan napi perinsa.

17. Baka ni utai ti disebut ba 1 Peter 1:6, 7 ulih nulung orang ke napi utai ti sama baka Jovidon?

¹⁷ Jovidon mega ngenuluka sembah ngagai Jehovah. Iya nemu, ngetanka penetap ati ngagai Petara ti bendar nya amat penting. Jesus madahka: “Nuan patut besugang ngagai Petara nuan, Jehovah, lalu patut nyembah Iya siku aja.” (Luk. 4:8) Mayuh komandant enggau soldadu dekaka Jovidon badu agi nyadi Saksi Jehovah. Tang, ninting hari, enda ngira siang tauka malam, iya bebendar besampi minta Jehovah nulung iya mengkang tetap ati. Taja pan Jovidon diintu enggau enda lurus, tang iya mengkang tetap ati. Ketegal nya, diatu iya ulih gaga ati laban bisi utai ti nadai ba iya enti nyema iya enda ditaban, dipalu, tauka dijil. Diatu iya bisi pengarap ti tegap agi laban pengarap iya udah diuji.—Bacha 1 Peter 1:6, 7.

18. Baka ni kitai ulih ngetanka pengaga ati kitai?

¹⁸ Jehovah nemu utai ti diguna kitai ngambika ulih amat gaga ati. Enti nuan ngereja tiga iti chara ke nulung nuan bulih pengaga ati ti bendar, nuan ulih ngetanka pengaga ati nuan taja pan napi penanggul ti balat. Enggau nya, nuan mega ulih madah: ‘Gaga ati meh mensia ti ngaku Jehovah nyadika Petara sida!’—Mas. 144:15.