SIKU pegawai Nazi merak ngagai seraban Saksi-Saksi Jehovah lebuh Perang Dunya Kedua, “Enti sapa-sapa enggai beperang ngelaban Perancis tauka England, semua kita enda tau enda mati!” Taja pan bala soldadu Nazi bisi semak sida, tang nadai siku ari bala menyadi tu deka ngelanggar Adat Jehovah. Utai ke dikereja sida nunjukka sida amat berani. Tu chunto ti manah kena nunjukka runding Saksi-Saksi Jehovah pasal perang. Kitai enggai enggau perang ba dunya tu. Taja pan orang madah deka munuh kitai enti kitai enda beperang, tang kitai mengkang neutral sereta enggai ngambi begian ba kelikuh dunya.

1. SEMUA NEMBIAK PETARA SEBAGI ARI SITI BANSA

Suba, Jehovah milih siti bansa nyadika nembiak Iya, iya nya bansa Israel. Iya ngangau orang Israel nya “nembiak [Iya], ke dipilih [Iya] ari semua bansa di dunya.” (P-sut. 19:5) Petara mega meri sida siti endur ti nyemetak nyadika endur diau. Nya alai, lebuh Petara ngasuh orang Israel beperang ngelaban bansa bukai, sida enda munuh bala penyembah Jehovah kebukai. a

Kemayaharitu, bala penyembah Jehovah datai ari “semua menua, raban bansa, bansa, enggau jaku.” (Pem. 7:9) Enti nembiak Petara beperang,  sida engka belaban tauka munuh bala menyadi Kristian sida kebukai.

2. JEHOVAH NGASUH ORANG ISRAEL BEPERANG

Suba, Jehovah ke nentuka ni maya sereta nama kebuah orang Israel patut beperang. Ambika chunto, Jehovah ngasuh orang Israel beperang kena ngereja pengawa ngakim Iya ngagai orang Kanaan. Orang Kanaan amat tebilang enggau pengawa nyembah antu, ulah seks ti balat kamah, sereta munuh anak mit nyadika piring. Jehovah ngasuh orang Israel ngemunaska orang ke ngereja utai ti jai tu ba Menua ti Udah Disemaya ngambika orang Israel enda nitihka sida ngereja utai ti jai nya. (Lew. 18:24, 25) Pengudah orang Israel tama sereta diau ba Menua ti Udah Disemaya, bisi maya iya Petara ngasuh sida beperang kena ngetanka Israel ari bala munsuh sida. (2 Sam. 5:17-25) Taja pia, Jehovah enda kala nejuka orang Israel ngaga pemutus pasal ni maya sida deka beperang. Lebuh sida ngereja nya, kesuah iya mayuh utai ti enda manah nyadi.—P-pau. 14:41-45; 2 Ban. 35:20-24.

Kemayaharitu, Jehovah enda ngasuh mensia beperang. Orang beperang kena ngulihka utai ke dikedekaka mensia, ukai ketegal peneka Petara. Sida beperang laban deka merintah mayuh agi endur, bulih mayuh agi duit, tauka ngemansangka penemu politik. Tang baka ni enggau sida ke madahka diri beperang ngarika Petara kena ngelindung sembah sida tauka munuh bala munsuh Petara? Jehovah deka ngelindung bala penyembah Iya ti bendar, sereta ngerusak bala munsuh iya ba perang ti deka nyadi jemah ila, iya nya perang Armagedon. (Pem. 16:14, 16) Ba perang nya, bala soldadu Petara semina bala melikat Iya aja, ukai bala mensia ba dunya ti nyembah Iya.—Pem. 19:11-15.

3. ORANG ISRAEL ENDA MUNUH SIDA KE NGAYANKA PENGARAP NGAGAI JEHOVAH

Suba, bala soldadu orang Israel ngayanka pengasih ngagai sida ke ngayanka pengarap ngagai Petara, sereta semina munuh orang ti udah diakim Jehovah ke patut mati. Peratika dua iti  chunto tu. Taja pan Jehovah ngasuh orang Israel ngemunaska Jeriko, tang orang Israel ngayanka pengasih sereta ngelepaska Rahap enggau diri sebilik iya ketegal pengarap Rahap. (Jos. 2:9-16; 6:16, 17) Udah nya, semua menua Gibeon enda dirusakka ketegal orang Gibeon ngayanka basa ngagai Petara.—Jos. 9:3-9, 17-19.

Kemayaharitu, bala soldadu enda kakang ati deka munuh orang ke ngayanka pengarap ngagai Petara, tauka indah sida ke ukai soldadu.

4. ORANG ISRAEL ENDA TAU ENDA NITIHKA ATUR PETARA PASAL PERANG

Suba, Jehovah ngasuh bala soldadu orang Israel beperang nitihka pesan Iya. Ambika chunto, bisi maya iya Petara ngasuh sida meri peluang ngagai menua ti ngelaban ngambika nunduk ngagai sida. (U-dat. 20:10) Jehovah mega ngarapka bala soldadu orang Israel nentuka diri sida enggau kem sida beresi ba fizikal, sereta nitihka standard moral Jehovah. (U-dat. 23:9-14) Taja pan bala soldadu ari menua ke ngelingi sida suah masung orang indu ari menua ti dialahka sida, tang Jehovah enda ngemendarka orang Israel ngereja nya. Nambahka nya, sida enda ulih jadi enggau orang indu ke ditabanka sida nyentuk ngagai sebulan pengudah sida ngalahka menua nya.—U-dat. 21:10-13.

Kemayaharitu, mayuh menua udah besetuju deka beperang nitihka sekeda atur entarabansa. Taja pan atur tu digaga kena ngelindung sida ke ukai soldadu, tang mayuh menua suah ngelanggar atur nya.

5. PETARA BELABAN NGARIKA NEMBIAK IYA

Suba, Jehovah beperang ngarika orang Israel. Iya suah ngereja kereja ajih ngambika sida ulih menang lebuh beperang. Ambika chunto, baka ni Jehovah nulung orang Israel ngalahka menua Jeriko? Baka ke dipadah Jehovah, lebuh orang Israel ‘manjung enggau naka penginggar nyawa sida, dinding kuta nengeri nya lalu runtuh.’ Tu ngasuh sida senang agi ngalahka menua nya. (Jos. 6:20) Lalu baka ni sida ulih menang beperang ngelaban orang Amor? ‘Jehovah lalu ngasuh tekang ujan batu ti besai ninggang sida. Mayuh agi sida mati laban ujan batu nya ari ke dibunuh orang Israel.’—Jos. 10:6-11.

ORANG KRISTIAN TI BENDAR BEBENDAR DEKA NGULIHKA KAUL TI MANAH ENGGAU ORANG BUKAI

Baka ke udah dikerandauka kitai, situasi kitai kemayaharitu amat bebida enggau situasi orang Israel kelia. Taja pia, ukai kebuah tu aja ke ngasuh kitai enda beperang. Bisi kebuah kebukai. Ambika chunto, Petara madahka, ba hari ti penudi, sida ke diajar Iya “nadai agi nyendiaka diri beperang.” Nya alai, sida tentu enda enggau beperang. (Isa. 2:2-4) Nambahka nya, Kristus madahka, bala murid iya “ukai sebagi ari dunya.” Nya alai, sida enda ngambi begian dalam politik sereta mengkang neutral ba kelikuh dunya tu.—Jhn. 15:19.

Kristus mega ngasuh bala murid iya ngereja mayuh agi. Iya ngasuh sida nyeliahka ulah ti ulih ngujungka asai ati ti deka malas dendam, pengeringat, sereta perang. (Mat. 5:21, 22) Pia mega, iya ngasuh bala murid iya “bebendar deka ngulihka kaul ti manah enggau orang bukai” sereta rinduka bala munsuh sida.—Mat. 5:9, 44.

Baka ni kitai ulih ngereja tu? Kitai tentu enda enggau perang. Tang kati kitai ngasaika bisi sesiku bala menyadi ba raban gempuru nya munsuh kitai? Terus meh bebendar nguji muai asai ati ti baka nya.—Jas. 4:1, 11.

Kitai enda enggau perang ba dunya tu, tang kitai bebendar ngemansangka pemaik enggau pengerindu entara pangan diri. (Jhn. 13:34, 35) Arapka kitai terus bisi pengingin deka mengkang neutral seraya kitai nganti maya Jehovah deka ngemunaska semua perang belama iya.—Mas. 46:9.