1. Baka ni mayuh orang nerima jaku ajar ke datai ari Bup Kudus? (Jaku Dalam 1:20, 21)

 BA MAYUH menua, kitai suah meda bala menyadi kitai bediri ba endur alai orang ke suah mansa. Sida tuchum lalu meri orang utai ti dibacha. Nuan empu engka kala ngereja utai nya, lalu tu engka ngasuh nuan berunding pasal ayat ba Jaku Dalam ke bejaku pasal penemu-dalam ke ngangau ba endur orang mayuh ngambika orang ulih ninga jaku ajar iya. (Bacha Jaku Dalam 1:20, 21.) Bup Kudus enggau litaricha kitai ngundan penemu-dalam ke datai ari Jehovah. Penemu-dalam tu meh ke diguna orang ngambika sida tau bulih pengidup ti meruan belama iya. Kitai gaga ati lebuh bisi orang nerima litaricha kitai, tang ukai semua orang deka nerima. Sekeda orang enggai belajar pasal utai ke diajar Bup Kudus. Bisi mega ketawaka kitai. Sida ngumbai Bup Kudus nya kelalu tuai sereta enda ulih dikena. Kebukai ngemaruhka ajar Bup Kudus bekaul enggau moral. Ba sida, orang ke nitihka Bup Kudus nya kelalu terit sereta alim. Taja pia, Jehovah enggau bepengerindu meri penemu-dalam ngagai semua orang. Nama chara iya?

2. Dini alai kitai ulih tetemuka penemu-dalam ti bendar kemayaharitu, tang mayuh orang milih deka ngereja nama?

² Siti chara Jehovah ngasuh penemu-dalam ti bendar didinga orang, iya nya nengah Jaku Iya, Bup Kudus. Nyauka semua orang tau bulih bup nya. Baka ni enggau litaricha kitai ti bepelasarka Bup Kudus? Ketegal berekat ari Jehovah, litaricha kitai udah disediaka dalam lebih ari 1,000 bengkah bansa jaku. Orang ke ninga, iya nya orang ke macha sereta nitihka utai  ti dipelajarka sida deka bulih penguntung. Taja pia, mayuh orang milih enggai ningaka Jehovah. Lebuh sida patut ngaga pemutus, sida deka agi bepanggai ba diri empu tauka jaku ajar ke datai ari orang bukai. Sida mega engka enda bebasaka kitai, laban kitai deka nitihka utai ti dipadahka Bup Kudus. Artikel tu deka berandauka kebuah orang berunding baka nya. Terubah aram kitai beratika baka ni kitai tau bulih penemu-dalam ari Jehovah.

3. Nama patut digaga kitai ngambika bisi penemu-dalam ti bendar?

³ Penemu-dalam ulih mai reti penau ngena utai ti ditemu kitai kena ngaga pemutus ti manah. Taja pia penemu-dalam ti bendar lebih agi ari nya. Bup Kudus madahka: ‘Nangika Jehovah nya pun penemu-dalam. Enti nuan nemu Iya ti Kudus, nuan ulih meretika utai.’ (J-lam. 9:10) Nya alai, lebuh kitai patut ngaga pemutus ti penting, kitai patut nemu utai ti diperundingka Jehovah pasal utai nya. Kitai ulih ngereja nya enggau belajarka Bup Kudus sereta litaricha ti bepelasarka Bup Kudus. Lebuh kitai ngereja nya kitai ngayanka penemu-dalam ti bendar.—J-lam. 2:5-7.

4. Nama kebuah Jehovah siku aja ke ulih meri kitai penemu-dalam ti bendar?

⁴ Jehovah siku aja ke ulih meri kitai penemu-dalam ti bendar. (Rom. 16:27) Nama kebuah kitai ulih ngumbai penemu-dalam nya datai ari Jehovah? Kesatu, Jehovah nya Penempa semua utai. Nya alai, Iya nemu pasal semua utai ti ditempa Iya. (Mas. 104:24) Kedua, semua utai ti dikereja Jehovah nunjukka Iya bepenemu-dalam. (Rom. 11:33) Ketiga, jaku ajar ti bepenemu-dalam ari Jehovah seruran mai penguntung ngagai orang ke nitihka Iya. (J-lam. 2:10-12) Enti kitai deka nyadi orang ti bepenemu-dalam, kitai patut nerima tiga iti pemendar tu, lalu nejuka nya ngiring kitai lebuh ngaga pemutus tauka ngereja utai.

5. Nama nyadi lebuh orang enggai ngaku Jehovah nya Pun semua penemu-dalam ti bendar?

⁵ Mayuh orang ke ditemu kitai ba pengawa nginjil setuju, utai ti ngelingi sida ba alam semula jadi digaga enggau manah. Tang sida madahka nadai Penempa. Sida madahka semua utai tu datai ari evolusi. Kebukai madahka diri pechayaka Petara, tang ba sida utai ti diajarka Bup Kudus nya kelalu tuai. Nya alai, sida milih idup nitihka peneka diri empu. Nama penyadi iya? Kati dunya diatu manah agi ketegal orang bepanggai ba penemu diri empu ari ke bepanggai ba Petara? Kati sida bisi tetemuka pengaga ba ati ti bendar tauka harapan ti nyata ke jemah ila? Utai ke ngelingi kitai ngasuh kitai yakin agi ke pemendar tu: ‘Penemu-dalam, pemandai, penalam runding mensia enda ulih nulung nuan, enti Jehovah ngelaban nuan.’ (J-lam. 21:30) Tu meransang kitai terus minta Jehovah meri penemu-dalam ti bendar ngagai kitai! Sayau amat, mayuh orang enggai ngereja nya. Nama kebuah?

6. Nitihka Jaku Dalam 1:22-25, sapa ke enggai ninga penemu-dalam ti datai ari Jehovah?

⁶ Mayuh orang enggai ninga lebuh penemu-dalam ti bendar ke “benung ngangau ba sebelah jalai raya.” Nitihka Bup Kudus, bisi tiga raban orang ke enggai nerima penemu-dalam: “Orang ke enda bepeneleba,” “orang ke rindu ngelese,” enggau “orang ke beli.” (Bacha Jaku Dalam 1:22 ari nota kaki, b 23-25.) Aram kitai meda kebuah sida enggai nerima  penemu-dalam ari Petara, sereta baka ni kitai ulih nyeliahka diri ari nyadi baka sida.

7. Nama kebuah sekeda orang milih deka terus nyadi “orang ke enda bepeneleba”?

⁷ “Orang ke enda bepeneleba” nya orang ke pechayaka sebarang utai ti didinga sida sereta senang ditipu. (J-lam. 14:15) Kitai suah betemu enggau orang ke baka tu lebuh nginjil. Ambika chunto, perundingka pasal bejuta iku orang ke benung ditipu tuai pengarap tauka orang politik. Sekeda orang tekenyit lebuh sida nyau nemu bala tuai nya udah ngemulaka sida. Tang orang ke disebut ba Jaku Dalam 1:22 milih deka terus nyadi orang ke enda bepeneleba laban sida rindu baka nya. (Jer. 5:31) Sida ngereja utai sepeneka ati, sereta enggai belajarka utai ti dipadah Bup Kudus tauka ngasika standard Iya. Siku indu ba Kanada ke amat bepegai ba pengarap madahka tu ngagai siku Saksi, “Enti paderi ngemulaka kami, iya ke salah ukai kami!” Mayuh orang ngasaika utai ti sama baka indu nya. Kitai tentu enggai nunda orang ke sengaja enda bedulika sebarang utai!—J-lam. 1:32; 27:12.

8. Nama deka nulung kitai bulih peneleba ti betul?

⁸ Bup Kudus bisi kebuah ti manah meransang kitai enda terus nyadi orang ke enda bepeneleba tang “berunding baka orang ke besai tuai.” (1 Kor. 14:20) Kitai bulih peneleba ti betul lebuh nitihka prinsip Bup Kudus ba pengidup kitai. Enti kitai ngereja nya, kitai deka meda baka ni Bup Kudus nulung kitai nyeliahka penanggul sereta ngaga pemutus ti manah. Manah enti kitai berunding pasal pemutus ke udah digaga kitai. Ambika chunto, enti nuan udah belajarka Bup Kudus sereta datai ngagai gempuru tang bedau nyerahka diri ngagai Jehovah sereta dibaptisa, nuan patut berunding pasal utai ke patut digaga nuan ngambika ulih nyapai juluk ati nuan. Enti nuan udah dibaptisa, kati nuan benung ngaga pemansang ngambika ulih nyadi penginjil sereta pengajar Bup Kudus ti landik agi? Kati pemutus ke digaga nuan nunjukka nuan diiring prinsip Bup Kudus? Kati nuan ngintu orang bukai sama baka chara Jesus deka ngintu sida? Enti kitai patut ngaga ubah, kitai patut berunding enggau dalam pasal jaku lalau ari Jehovah ke “meri penemu-dalam ngagai orang ke nadai penemu-dalam.”—Mas. 19:7.

9. Baka ni “orang ke rindu ngelese” ngayanka diri nulak penemu-dalam ke datai ari Petara?

⁹ Raban orang ti kedua ke enda bedulika penemu-dalam ke datai ari Petara nya “orang ke rindu ngelese.” Bisi maya iya, kitai betemu enggau orang ke baka tu maya nginjil. Sida rindu ngeleseka orang bukai. (Mas. 123:4) Bup Kudus nangkan ba hari ti penudi deka bisi mayuh orang ke ngelese. (2 Pet. 3:3, 4) Baka dua iku menantu lelaki Lot, sekeda orang kemayaharitu enggai ningaka jaku tangkan ari Petara. (P-kal. 19:14) Mayuh orang ketawaka sida ke ngasika prinsip Bup Kudus. Sida ngereja tu laban deka “nurutka pengingin diri ti jai.” (Jud. 7, 17, 18) Chara Bup Kudus ngambarka orang ke ngelese nya sama enggau ulah orang ti limpang ke udah ngelaban Jehovah sereta sida ke enggai nerima Jehovah!

10. Baka ke dipadah ba Masmur 1:1, baka ni kitai ulih nyeliahka diri ari nyadi baka orang ke rindu ngelese?

¹⁰ Baka ni kitai ulih nentuka diri enda nyadi baka orang ke rindu ngelese? Siti chara iya, iya nya nyeliahka diri ari begulai enggau orang ke rindu mutap pasal sebarang utai. (Bacha Masmur 1:1.) Reti iya, kitai enda ninga tauka macha sebarang utai ari orang ti limpang ke udah ngelaban Petara. Kitai patut bejimat ngambika enda berengkah mutap pasal sebarang utai tauka ngembuan ati ti kakang pasal Jehovah sereta iring ti diterima ari gerempung Iya. Nya alai, kitai patut nanya diri empu: ‘Kati aku suah mutap lebuh nerima iring tauka penerang  ti baru? Kati aku rindu ngiga penyalah bala menyadi ti ngiring ba gerempung?’ Lebuh kitai jejampat ngetu ngereja utai ke baka tu, Jehovah deka gaga ati enggau kitai.—J-lam. 3:34, 35.

11. Nama runding “orang ke beli” pasal standard moral Jehovah?

¹¹ Raban orang ti ketiga ke nulak penemu-dalam ke datai ari Petara nya “orang ke beli.” Sida beli laban sida enggai idup nitihka standard moral Petara. Sida semina ngereja utai ti betul ba mata sida empu. (J-lam. 12:15) Orang ke baka tu nulak Jehovah, Pun penemu-dalam. (Mas. 53:1) Lebuh kitai betemu enggau orang ke baka tu ba pengawa nginjil, sida suah ngutuk kitai laban kitai bebasaka Bup Kudus. Tang sida enda ulih meri kitai pengidup ti manah agi. Bup Kudus madahka: “Jaku-dalam enda ulih diperatika orang ke beli. Sida nadai utai disebut lebuh orang berandauka pekara ti besai.” (J-lam. 24:7) Orang ke beli enda ulih meri jaku lalau ti manah. Nya kebuah Jehovah nangkan kitai, “Anang bepangan enggau orang ke beli”!—J-lam. 14:7.

12. Nama deka nulung kitai ngambika enda nyadi baka orang ke beli?

¹² Kitai ukai baka orang ke begedika jaku lalau ari Petara, tang kitai belajar rinduka chara Petara berunding nyengkaum semua standard moral Iya. Baka ni kitai ulih ngemansangka pengerindu nya? Kitai ulih mandingka utai ke deka nyadi enti kitai ngasi tauka enti kitai enda ngasi. Peratika penanggul ke ditapi orang ke beli ketegal sida nulak jaku ajar ari Jehovah. Udah nya, peratika penyamai pengidup nuan diatu ketegal nuan ngasika Petara.—Mas. 32:8, 10.

13. Kati Jehovah mejal kitai ngasika jaku ajar Iya ti bepenemu-dalam?

¹³ Jehovah meri jaku lalau Iya ti bepenemu-dalam ngagai semua orang. Tang Iya enda mejal sapa-sapa nerima nya. Taja pia, Iya madahka utai ke nyadi lebuh orang enggai ningaka penemu-dalam Iya. (J-lam. 1:29-32) Orang ke milih enggai ngasika Jehovah deka “nerima utai ti endang patut diterima [sida],” tauka nerima kesan ari pemutus sida. Nyau kelama, sida deka napi mayuh pemerinsa ketegal chara sida idup. Lalu pengujung iya, Jehovah deka ngerusak sida. Taja pia, orang ke ninga sereta ngasika jaku ajar ari Jehovah deka nerima utai ti disemayaka Iya: “Barang sapa mendingka aku, deka bulih pengelikun. Iya deka diau likun, lalu nadai kebuah takut.”—J-lam. 1:33.

14-15. Nama ulih dipelajarka kitai ari Jaku Dalam 4:23?

¹⁴ Kitai seruran deka bulih penguntung enti kitai nitihka penemu-dalam ke datai ari Petara. Baka ke udah dikerandauka kitai, jaku ajar ari Jehovah nya senang digiga. Ambika chunto, dalam bup Jaku Dalam, Jehovah nyediaka jaku ajar ti praktikal ke seruran deka ngemanahka agi pengidup kitai enti kitai nitihka nya.  Aram kitai beratika empat iti jaku ajar ke baka nya.

¹⁵ Jaga meh ati enggau runding nuan. Bup Kudus madahka: “Bejimat lebuh nuan berunding, laban gaya pengidup nuan ditempa runding nuan.” (J-lam. 4:23) Nya alai, kitai patut nyaga ati tauka runding kitai. Perundingka utai ti patut digaga kitai kena nyaga jantung kitai. Kitai patut makai pemakai ti manah, chukup sesais, sereta nyeliahka tebiat ti enda manah ke ulih ngamahka tubuh. Kitai mega ngereja utai ti sama kena nyaga ati enggau runding kitai. Kitai macha sereta belajarka Bup Kudus ninting hari, besedia sebedau datai ngagai gempuru, sereta meri komen. Kitai seruran enggau pengawa nginjil. Kitai mega nyeliahka sebarang utai ti ulih ngamahka runding kitai baka pemerindang ti enda bemoral sereta kaul ti enda manah.

16. Nama kebuah Jaku Dalam 23:4, 5 amat beguna ke kitai kemayaharitu?

¹⁶ Puas ati enggau utai ti dikemisi nuan. Bup Kudus meri jaku lalau tu: “Anang ngelelakka diri ngiga pengaya. . . Duit nuan tau abis dalam sekejap mata aja, baka ke bisi sayap, lalu terebai baka burung menaul.” (J-lam. 23:4, 5) Orang ulih lenyau duit enggau utai ti dikemisi sida enggau senang. Tang mayuh orang ke kaya enggau seranta kemayaharitu kelalu irau pasal duit. Nya kebuah sida suah ngereja utai ti ulih ngerusak reputasi, kaul, sereta indah pengerai sida. (J-lam. 28:20; 1 Tim. 6:9, 10) Taja pia, penemu-dalam nulung kitai ngembuan runding ti seimbang pasal duit. Lalu tu nulung kitai ngambika enda amu, tang puas ati sereta gaga ati enggau utai ti dikemisi kitai.—P-jar. 7:12.

17. Baka ke dipadah Jaku Dalam 12:18, baka ni kitai ulih bejaku enggau bejimat?

¹⁷ Berunding dulu sebedau bejaku. Enti kitai enda bejimat, jaku ke disebut kitai ulih balat ngemediska orang. Bup Kudus madahka: “Leka jaku ti disebut enggau enda berunding, ngasuh ati balat telih baka diachuk pedang, tang jaku ti disebut enggau bejimat, ulih nyuman.” (J-lam. 12:18, NWT) Kitai ulih nulung ngemansangka pemaik lebuh kitai nyeliahka ari begosip pasal penyalah orang bukai.  (J-lam. 20:19) Enti kitai dekaka jaku kitai ngelantangka orang ari ke ngemediska sida, kitai patut seruran macha sereta berunding pasal Jaku Petara. (Luk. 6:45) Lebuh kitai belematika utai ke dipadah Bup Kudus, jaku kitai deka nyadi “chiru baka ai sungai” ti ngelantangka orang bukai.—J-lam. 18:4.

18. Baka ni Jaku Dalam 24:6 ulih nulung kitai mujur ba pengawa nginjil?

¹⁸ Titihka iring ke udah diberi gerempung. Bup Kudus meri kitai jaku lalau ti amat beguna: “Ari iring penemu-dalam, kita ulih beperang, lalu ari iring bala penyanding penemu, kita deka menang.” (J-lam. 24:6) Baka ni ayat tu nulung kitai nyadi penginjil sereta pengajar Bup Kudus ti manah agi ari ke nginjil sereta nitihka chara kitai empu? Kitai nguji nitihka chara ti udah diberi ngagai kitai. Kitai bulih iring ti manah ari gempuru kitai. Dia kitai ulih belajar ari chara ti manah ke dikena bala menyadi bukai kena ngajar Bup Kudus. Nambahka nya, gerempung Jehovah meri kitai video enggau litaricha ke ulih nulung orang meretika agi Bup Kudus. Kena meh semua perengka tu enggau manah.

19. Nama asai ati nuan pasal penemu-dalam ke diberi Jehovah? (Jaku Dalam 3:13-18)

¹⁹ Bacha Jaku Dalam 3:13-18. Kitai amat beterima kasihka jaku lalau ti manah ke ditemu dalam Jaku Petara. Kitai enda ulih idup tauka gaga ati enti nadai jaku ajar ari Jehovah. Kitai bepanggai ba Iya. Dalam artikel tu, kitai udah beratika sekeda chunto jaku ajar ti manah ke bisi dalam bup Jaku Dalam. Endang amat, semua Bup Kudus nya penuh enggau jaku ajar ti manah ari Jehovah. Kitai patut seruran nitihka jaku ajar Iya ba pengidup kita. Mayuh orang enda beterima kasihka penemu-dalam ti datai ari Petara, tang kitai yakin “orang ke bepegai erat ba penemu-dalam deka diau lantang senang.”