1. Nama harapan ke udah diberi Jehovah ngagai kitai?

 JEHOVAH udah meri kitai harapan ti amat manah, iya nya pengidup ti meruan belama iya. Sekeda bisi harapan idup belama iya ba serega sereta ngembuan tubuh roh ke enda ulih mati. (1 Kor. 15:50, 53) Tang mayuh orang deka ngembuan harapan idup belama iya ba dunya. Sida deka idup enggau gaga ati sereta ngembuan pengerai ti sempurna. (Pem. 21:3, 4) Enda ngira sekalika kitai deka idup belama iya ba serega tauka ba dunya, harapan ke dikembuan kitai nya amat berega.

2. Harapan kitai bepelasarka nama, lalu nama kebuah kitai ulih madah baka nya?

² “Harapan” ulih mai reti “nganti utai ti manah ke deka nyadi.” b Kitai nemu harapan kitai ke jemah ila tentu deka nyadi laban harapan nya diberi Jehovah. (Rom. 15:13) Kitai nemu utai ke disemayaka Iya, lalu kitai nemu Iya seruran ngamatka semaya Iya. (P-pau. 23:19) Kitai yakin Jehovah bisi pengeran sereta kuasa kena ngereja semua utai ke udah dipadah Iya. Nya alai, harapan kitai ukai datai ari imaginasi kitai tauka ari utai ke dikedekaka kitai nyadi. Harapan kitai datai ari utai ke ditemu kitai endang nyata.

3. Nama deka dipejuraika kitai dalam artikel tu? (Masmur 27:14)

³ Apai kitai ti di serega rinduka kitai, lalu Iya dekaka kitai arapka Iya. (Bacha Masmur 27:14.) Lebuh pengarap kitai  ngagai Jehovah tegap, lalu kitai yakin harapan kitai deka dikeamatka, kitai ulih mengkang berani sereta gaga ati enda ngira nama utai ke nyadi ngagai kitai. Aram kitai beratika chara harapan nya nyaga kitai. Terubah, kitai deka beratika baka ni harapan nya baka sauh enggau tupi besi. Udah nya, kitai deka bejuraika chara kitai ulih negapka harapan kitai.

4. Baka ni harapan nya baka sauh? (Hebrew 6:19)

⁴ Ba surat rasul Paul ngagai Hebrew, iya nyemaka harapan kitai baka sauh. (Bacha Hebrew 6:19.) Iya suah belayar ngena kapal. Nya alai, Paul nemu sauh dikena ngetanka kapal ari anyut. Bisi sekali maya kabut besai nyadi, Paul benung dalam siti kapal. Maya kabut besai nya nyadi, iya meda kelasi ngulurka sauh ngagai ai kena nagang kapal ari telantakka batu. (SKR. 27:29, 39-41) Baka sauh ke ngetanka kapal ari anyut, harapan kitai nentuka kitai mengkang semak ngagai Jehovah ngambika kitai enda anyut lebuh kitai bisi penanggul ke baka kabut besai. Lebuh kitai napi penanggul, harapan nulung kitai mengkang tenang laban kitai pechaya utai deka nyadi manah agi. Kingatka, Jesus madah kitai deka diperinsa. (Jhn. 15:20) Nya alai, belematika utai ke udah disemaya Jehovah deka nulung kitai terus nyembah Iya.

5. Baka ni harapan negapka Jesus lebuh iya deka diukum mati?

⁵ Peratika baka ni harapan udah nulung Jesus mengkang tetap ati taja pan iya nemu iya deka mati enggau chara ti merinsa. Ba hari Pentakos 33 M., rasul Peter nyebut siti jaku benabi ari bup Masmur ke madahka pengandal sereta asai ati Jesus: “Aku deka andalka Petara ba pengidup aku, laban Nuan enda ninggalka aku ba Kubur, tauka nejuka tubuh ulun Nuan ke taluk nyadi reput. . . Nuan deka ngasuh aku penuh enggau pengaga ati ba mua Nuan.” (SKR. 2:25-28; Mas. 16:8-11) Taja pan Jesus nemu iya deka mati tang iya andal Petara deka ngangkatka iya idup baru, sereta iya deka bisi pengaga ati laban ulih betemu baru enggau Apai iya di serega.—Heb. 12:2, 3.

6. Nama dipadah siku menyadi lelaki pasal harapan?

⁶ Harapan Kristian kitai udah nulung mayuh bala menyadi Kristian betan. Peratika chunto Leonard Chinn, siku menyadi lelaki ti tetap ati ke diau ba England. Maya Perang Dunya Kesatu, iya dijil ketegal iya enggai nyadi soldadu. Pengelama dua bulan iya ditan dalam rumah jil. Dalam bilik jil iya semina bisi iya siku aja. Pengudah nya, iya dipejal ngereja pengawa ti berat. Ku iya nulis: “Pengalaman aku nulung aku nemu kitai amat begunaka harapan kena betan. Kitai bisi teladan ari Jesus, bala rasul enggau bala nabi, sereta semaya ti amat berega dalam Bup Kudus. Semua utai tu meri kitai harapan ti besai ke jemah ila sereta negapka kitai ngambika ulih betan.” Harapan udah nyadi baka sauh ke Leonard, lalu harapan mega ulih nyadi baka sauh ke kitai.

7. Baka ni penguji negapka harapan kitai? (Rome 5:3-5; James 1:12)

⁷ Lebuh kitai tan napi penguji sereta ngasaika tulung ari Jehovah, kitai nemu kitai udah ngelantangka ati Iya. Tu ngasuh harapan kitai majak tegap. (Bacha Rome 5:3-5; James 1:12.) Nya alai, diatu harapan kitai tegap agi ari maya kita keterubah kali nemu pemendar. Sitan dekaka penguji ngelemika kitai tang enggau tulung ari Jehovah, kitai ulih tan napi tiap iti penguji enggau mujur.

8. Baka ni harapan baka tupi besi? (1 Tesalonika 5:8)

⁸ Bup Kudus mega mandingka harapan kitai baka tupi besi. (Bacha 1 Tesalonika 5:8.) Siku soldadu ngena tupi besi ngambika ulih  ngelindung pala iya ari serang bala munsuh. Ba perang entara kitai enggau Sitan, kitai patut ngelindung runding kitai ari serang Sitan. Iya ngena mayuh macham utai kena manjuk kitai sereta ngerusak runding kitai. Baka tupi besi ke ngelindung pala soldadu, harapan ulih ngelindung runding kitai ngambika kitai ulih mengkang tetap ati ngagai Jehovah.

9. Nama nyadi ngagai orang enti sida nadai harapan?

⁹ Harapan kitai ke pengidup ti meruan belama iya deka nulung kitai idup sejalai enggau penemu-dalam sereta ngaga pemutus ti manah. Pia mega, enti harapan kitai majak lemi lalu kitai berengkah semina berunding pasal pengingin kitai empu, kitai ulih lenyau fokus ba harapan kitai, iya nya pengidup ti meruan belama iya. Peratika utai ke nyadi ngagai sekeda orang Kristian ke idup ba jeman Korint kelia. Sida lenyau pengarap ba semaya Petara ti penting, iya nya harapan deka diangkatka idup baru. (1 Kor. 15:12) Paul nulis, orang ke enda pechayaka pengangkat ari mati semina idup kena ngemuaska pengingin sida empu. (1 Kor. 15:32) Kemayaharitu, mayuh orang ke enda pechayaka semaya Petara ngereja sebarang utai ke ulih ngasuh pengidup sida lantang diatu, tang kitai bebida ari sida laban kitai pechayaka semaya Petara ke jemah ila. Harapan kitai baka tupi besi ke ngelindung runding kitai, sereta nulung kitai enda semina berunding pasal diri empu aja ke ulih ngerusak kaul kitai enggau Jehovah.—1 Kor. 15:33, 34.

10. Baka ni harapan ngelindung kitai ari runding ti salah?

¹⁰ Harapan kitai mega ulih ngelindung kitai ari berunding pasal kitai ke enda ulih ngelantangka ati Jehovah. Ambika chunto, sekeda orang engka madah: ‘Aku ukai entara orang ke deka idup belama iya. Nadai utai ti manah ba aku. Aku enda ulih ngereja utai ke dikedekaka Petara kereja aku.’ Kingatka pasal Elipas, pangan Jop ti pepura. Iya ngena runding ti sama ke baka tu ngagai Jop. Elipas madahka: “Kati mensia ulih nyadi chukup tuchi?” Udah nya, iya madahka tu pasal Petara: “Indah bala melikat Iya deh enda dipechayaka Iya. Indah sida nya deh enda tuchi ba mata Iya.” (Jop 15:14, 15) Tu pemula ti besai! Anang enda ingat, Sitan meh ke dekaka nuan berunding baka nya. Iya nemu enti nuan terus berunding baka nya, harapan ke dikembuan nuan deka belubah-lubah lenyau. Nya alai, tulak meh pemula ke baka nya, lalu betumpu ba semaya ari Jehovah. Anang sesekali kakang ati pasal Iya ke deka nuan idup belama iya enggau pasal Iya ke deka nulung nuan nyapai juluk ati nya.—1 Tim. 2:3, 4.

11. Nama kebuah kitai patut sabar seraya kitai nganti harapan kitai dikeamatka?

¹¹ Endang enda seruran senang deka nentuka harapan kitai mengkang tegap. Kitai engka tusah deka nganti enggau sabar maya Petara deka ngamatka semaya Iya. Tang, Jehovah seruran bisi, lalu runding Iya pasal timpuh nya bebida ari enggi kitai. (2 Pet. 3:8, 9) Iya deka ngereja utai ke udah disemayaka Iya enggau chara ti pemadu manah, tang Iya engka enda ngereja utai baka ke dikearapka kitai. Nama ulih nulung kitai nentuka harapan kitai mengkang tegap seraya kitai nganti enggau sabar ngagai Petara ti deka ngamatka semaya Iya?—Jas. 5:7, 8.

12. Nitihka Hebrew 11:1, 6, baka ni harapan bisi kaul enggau pengarap?

¹² Harapan kitai deka mengkang tegap enti kita terus semak ngagai Jehovah laban Iya siku aja ke ulih ngasuh harapan kitai nyadi nyata. Ngambika bisi harapan, kitai patut arap Jehovah endang bisi, lalu Iya “meri upah ngagai orang ke bebendar ngiga Iya.” (Bacha Hebrew  11:1, 6.) Enti kitai amat pechayaka Jehovah nya endang bisi, kitai deka yakin agi Iya deka ngereja semua utai ke udah disemayaka Iya. Aram kitai beratika chara ti praktikal kena ngerapatka agi kaul kitai enggau Jehovah, sereta nentuka harapan kitai mengkang tegap.

13. Baka ni kitai ulih datai semak ngagai Petara?

¹³ Besampi ngagai Jehovah, sereta macha Jaku Iya. Taja pan kitai enda ulih meda Jehovah, tang kitai ulih datai semak ngagai Iya. Kitai ulih bejaku ngagai Iya nengah sampi, lalu yakin Iya deka ningaka kitai. (Jer. 29:11, 12) Lebuh kitai macha Jaku Iya lalu belematika utai ti dibacha, kitai benung ningaka Petara. Seraya kitai macha pasal chara Jehovah ibuhka sida ke tetap ati ngagai Iya suba, harapan kitai deka majak tegap agi. Semua utai dalam Jaku Petara nya “endang ditulis kena ngajar kitai, laban Bup Kudus nulung kitai betan sereta meri kitai peransang. Nya alai, kitai andal nganti utai ke deka diberi Petara jemah ila.”—Rom. 15:4.

14. Nama kebuah kitai patut berunding pasal utai ke udah digaga Jehovah ke orang bukai?

¹⁴ Belematika chara Jehovah udah ngamatka semaya Iya. Peratika utai ke udah digaga Petara ke Abraham enggau Sarah. Ketegal seduai iya udah kelalu tuai, seduai iya tusah deka bisi anak. Taja pia Petara besemaya seduai iya deka bisi anak. (P-kal. 18:10) Nama reaksi Abraham? Bup Kudus madahka: “Abraham andal sereta arap deka nyadi apai ke mayuh bansa.” (Rom. 4:18) Taja pan Abraham enda nemu baka ni semaya Petara deka dikeamatka, tang Abraham yakin Jehovah deka ngamatka semaya Iya. Lelaki ke tetap ati tu enda lebu ngapa. (Rom. 4:19-21) Cherita ke baka tu ngajar kitai pasal kitai ke ulih yakin Jehovah deka seruran ngamatka semaya Iya, taja pan situasi nya baka ke enda ulih diputarka kitai.

15. Nama kebuah kitai patut berunding pasal utai ke udah digaga Petara ke kitai?

 ¹⁵ Perundingka utai ke udah digaga Jehovah ke nuan. Pikirka penguntung ke udah diasaika nuan ari semaya dalam Bup Kudus ke udah dikeamatka. Ambika chunto, Jesus udah besemaya Apai iya deka nyediaka utai ke diguna nuan ba pengidup. (Mat. 6:32, 33) Jesus mega ngasuh nuan yakin Jehovah deka meri nuan kuasa kudus lebuh nuan minta Iya. (Luk. 11:13) Jehovah udah ngamatka semaya tu. Pia mega, nuan ulih berunding pasal semaya kebukai ke udah dikeamatka Iya ke nuan. Ambika chunto, Iya besemaya deka ngampunka nuan, ngelantangka ati nuan, sereta meri nuan utai ke diguna nuan ngambika mengkang semak ngagai Iya. (Mat. 6:14; 24:45; 2 Kor. 1:3) Lebuh nuan belematika utai ke udah digaga Petara ke nuan, nuan deka negapka harapan nuan ba utai ke deka digaga Petara ke nuan ba jemah ila.

16. Nama kebuah harapan nya pemeri ti amat berega?

¹⁶ Harapan kitai ke pengidup ti meruan belama iya nya siti pemeri ti amat berega ari Petara. Kitai enda sabar nganti harapan jemah ila ke endang deka nyadi. Harapan kitai baka sauh ke ulih ngetan kitai ngambika kitai ulih tan napi penguji, lebuh napi perinsa, sereta indah lebuh napi pemati. Harapan kitai mega baka tupi besi ke ngelindung runding kitai ngambika kitai ulih nulak utai ti salah, lalu ngereja utai ti betul. Harapan ke dipadah dalam Bup Kudus tu nulung kitai ngelala Petara enggau manah agi, sereta ngayanka penalam pengerindu Petara ngagai kitai. Enti kitai nentuka harapan kitai mengkang tegap, kitai deka bulih mayuh penguntung.

17. Nama kebuah harapan kitai ngasuh kitai gaga ati?

¹⁷ Ba surat Paul ngagai orang ba Rome, iya meransang sida: “Gaga ati lebuh kita nganti utai ke dikearapka kita.” (Rom. 12:12) Paul ulih gaga ati laban iya pechaya enti iya mengkang tetap ati, iya deka bulih pengidup ti meruan belama iya ba serega. Kitai mega ulih gaga ati nganti utai ti dikearapka kitai laban kitai yakin Jehovah deka ngamatka semaya Iya. Baka ke ditulis pemasmur: ‘Beberekat meh orang ke manggaika diri ba Jehovah Petara sida. Iya endang seruran ngamatka semaya Iya.’—Mas. 146:5, 6.