Ba taun 1923, gerempung ngaga sekeda ubah ngambika Nembiak Bup Kudus majak beserakup maya begempuru. Majalah Menara Jaga berengkah ngeluarka penerang pasal ayat Bup Kudus ke dikerandauka ninting minggu ba Gempuru Sampi sereta Puji ngagai Jehovah. Nambahka nya, Nembiak Bup Kudus ngeluarka siti kelinda. Kelinda nya nunjukka ayat ke deka dikerandauka ba gempuru ninting minggu. Pia mega, tiap hari, bisi siti lagu ke ulih dinyanyika sida lebuh belajarka Bup Kudus kediri empu, tauka lebuh belajar Bup Kudus enggau diri sebilik.

Lebuh ba gempuru, Nembiak Bup Kudus suah bekunsika pengalaman sida lebuh nginjil sereta kebuah sida beterima kasih ngagai Jehovah. Sida mega belagu enggau besampi. Eva Barney dibaptisa ba taun 1923, lebuh iya beumur 15 taun. Ku iya ngenang baru: “Enti nuan deka bekunsi, nuan patut bediri lalu nyebut, ‘Aku deka beterima kasih ngagai Tuan ketegal semua utai ti manah ke dikereja Iya ke aku.’” Sekeda menyadi amat rindu bekunsi. Ku Menyadi Eva nampung: “Siku menyadi lelaki ke tuai ti benama Godwin rindu bekunsi. Maya iya bekunsi asai beterima kasih iya ngagai Tuan, iya rindu nyebut mayuh utai. Lebuh bini iya beratika gamal menyadi ke ngiring nya berubah, iya narit kot laki iya ngambika laki iya ngetu bejaku lalu duduk.”

Sebulan sekali, tiap iti raban gempuru deka bisi Gempuru Sampi sereta Puji ngagai Jehovah ti spesial. Bekaul enggau gempuru tu, majalah Menara Jaga kena 1 April 1923 madahka: “Setengah ari program gempuru nya patut dikena meri komen sereta pengalaman ba pengawa nginjil sereta meransang bala menyadi. . . . Kami pechaya gempuru ke baka tu deka meransang sereta ngerapatka kaul enggau pangan diri.”

Charles Martin ke beumur 19 taun, diau ba Vancouver, Kanada. Iya siku penginjil ke bulih penguntung ari gempuru ke baka nya. Ku iya ngenang baru: “Aku belajar utai ke patut disebut aku lebuh nginjil ari gempuru baka nya. Kesuah iya, bisi menyadi ke bekunsika pengalaman sida lebuh nginjil. Tu nulung aku nemu utai ke patut disebut sereta baka ni nyaut jaku sakal.”

Bala menyadi mega majak beserakup laban gerempung ngatur siti hari alai semua orang diperansang pansut nginjil. Majalah Menara Jaga kena  1 April 1923 madahka: “Ngambika semua kitai ulih beserakup ba siti pengawa . . . , 1 Mei 1923, iya nya Hari Dua, udah dipilih alai semua orang pansut nginjil. Atur tu deka dipejalaika tiap Hari Dua ti keterubah ninting bulan . . . Semua orang ba tiap raban gempuru diperansang sama enggau ba pengawa tu.”

Indah Nembiak Bup Kudus ti biak pan enggau ba pengawa nginjil. Hazel Burford ke beumur 16 taun maya nya, ngenang baru: “Bulletin bisi chara ke ulih dikena berandau, lalu kami ngafal chara nya. a Aku enggau aki aku bebendar enggau semua pengawa nginjil.” Taja pia, Menyadi Hazel tekenyit enggau reaksi siku menyadi lelaki pasal pengawa nginjil iya. Ku iya: “Siku menyadi lelaki ti tuai ngasaika aku enda patut nginjil. Ba maya nya, sekeda menyadi enda faham, semua Nembiak Bup Kudus, nyengkaum ‘indu ke biak, enggau orang bujang’ patut enggau meri puji ngagai Penempa kitai.” (Mas. 148:​12, 13) Tang Menyadi Hazel enda ngetu nginjil. Pengudah nya, iya enggau kelas kedua Sekula Gilead lalu nyadi pengerintis seberai tasik ba Panama. Nyau kelama, bala menyadi nya ngemetulka runding sida. Sida sedar, orang ke nembiak pan patut enggau pengawa nginjil.

Konvensyen mega nulung bala menyadi majak beserakup. Maya konvensyen, siti hari deka diatur ke pengawa nginjil. Ambika chunto, ba konvensyen di Winnipeg, Kanada, semua orang ke datai ngagai konvensyen nya dibai enggau pengawa nginjil ba bandar kena 31 Mac. Mayuh orang ditemu maya pengawa nginjil ti spesial nya, lalu bisi asil ti manah. Kena 5 Ogos, kira-kira 7,000 iku orang datai ngagai siti da agi konvensyen ba Winnipeg. Nya meh penyampau orang ti pemadu mayuh ke datai ngagai konvensyen di Kanada ba maya nya.

Siti konvensyen ti pemadu penting ke nembiak Jehovah dipejalaika ba Los Angeles, California kena 18-26 Ogos 1923. Beberapa minggu sebedau konvensyen nya, surat khabar mandangka iklan pasal pengawa nya, lalu Nembiak Bup Kudus nyadung lebih ari 500,000 surat mit. Sida ngantung banner ba perengka pengangkut ke orang mayuh sereta ba kerita diri empu kena madahka pasal konvensyen nya.

 Ba 25 Ogos, Hari Enam, Menyadi Rutherford meri cheramah ke betajuk “Bedus enggau Kambin.” Dalam cheramah nya, iya nerangka “bedus” ngambarka orang ke dikumbai Petara lurus lalu deka diau ba dunya Paradais. Iya mega meri siti agi cheramah lalu macha siti resolusi ke betajuk “Jaku Tangkan.” Resolusi tu madahka penyai gerempung gerija lalu meransang sida ke lurus pansut ari “Babilon ti Besai.” (Pem. 18:​2, 4) Udah nya, semua Nembiak Bup Kudus ti ransing ba serata dunya nyadung bejuta iti surat mit ke ngundan resolusi nya.

Ba hari ti penudi konvensyen nya, bisi lebih ari 30,000 iku orang datai ningaka cheramah Menyadi Rutherford. Iya ngenataika cheramah ke betajuk “All Nations Marching to Armageddon, but Millions Now Living Will Never Die.” Ketegal bala Nembiak Bup Kudus ngadang bisi mayuh orang deka datai, sida nyiwa stadium Los Angeles ke baru aja didirika. Ngambika semua orang ulih ninga cheramah, bala menyadi lelaki ngena sepika ke udah disediaka ba stadium nya. Sepika ba stadium nya ngena teknologi ke pemadu baru ba maya nya. Ke bukai ninga program konvensyen nengah radio.

Ba taun 1923, pengawa nginjil ngerembai ngagai Afrika, Eropah, India, sereta Amerika Selatan. Ba India, bisi siku menyadi lelaki ke benama A. J. Joseph. Iya patut ngintu bini iya enggau 6 iku anak iya. Taja pia, iya agi nulung ba pengawa ngeluarka litaricha dalam bansa jaku Hindi, Tamil, Telugu, sereta Urdu.

Ba Sierra Leone, Nembiak Bup Kudus ke benama Alfred Joseph enggau Leonard Blackman bisi nulis ngagai indu opis ba Brooklyn, New York. Seduai iya minta indu opis nganjung penginjil bukai ngagai endur alai seduai iya. Ba 14 April 1923, peminta seduai iya disaut. Ku Alfred ngenang baru: “Ba siti malam, iya nya ba Hari Enam, aku tekenyit lebuh nerima siti kol.” Iya ninga siku orang bejaku enggau nyawa ti inggar. Orang nya nanya: “Nuan ka ke nulis ngagai Watch Tower Society minta orang datai nginjil ditu?” Ku Alfred nyaut: “Au.” “Sida udah nganjung aku.” Orang ke bejaku nya William R. Brown. Iya, bini iya, Antonia, sereta dua iku anak indu seduai iya ke agi biak, Louise enggau Lucy, baru datai ari Caribbean sehari nya. Dua iku menyadi nya enda ibuh nganti lama deka betemu enggau sida.

Ku Alfred nampung baru: “Ba pagi hari siti, aku enggau Leonard benung berandauka Bup Kudus baka ke selalu dikereja kami ninting minggu. Enda memukai, siku lelaki ti tinggi bediri ba depan pintu. Orang nya Menyadi Brown. Iya amat ransing  nyentukka iya ka meri cheramah ba mua orang mayuh ba hari siti.” Dalam timpuh kurang ari sebulan, Menyadi Brown udah nyadung semua litaricha ke dibai iya. Enda lama udah nya, iya nerima 5,000 da agi bup, lalu iya begunaka mayuh agi bup pengudah nya. Taja pia, Menyadi Brown ukai dikumbai orang ke nyual bup. Sepemanjai iya gawa ke Jehovah enggau ati ti ransing, iya seruran ngena ayat Bup Kudus dalam cheramah iya. Nya alai, iya dikumbai Bible Brown.

Ba Jerman, bala menyadi lelaki mutuska deka mindahka pampang opis ba Barmen. Nya ketegal opis nya kelalu mit. Sida mega bisi ninga bala soldadu orang Perancis deka nyerang bandar nya enda lama da agi. Bala nembiak Bup Kudus tetemuka siti bengunan ba Magdeburg, ke sesuai alai sida ulih nyelak litaricha. Ba 19 Jun, bala menyadi lelaki tembu mungkus semua perengka kena nyelak sereta perabot ke bukai, lalu pindah ngagai pampang opis ti baru ba Magdeburg. Ba hari siti, pengudah bala menyadi madah ngagai indu opis sida udah mujur mindah, surat khabar madahka bandar Barmen udah dirampas bala soldadu Perancis. Bala menyadi lelaki berasai beterima kasih ngagai Jehovah laban udah nyaga sereta nulung sida.

Ba Brazil, Menyadi George Young bejalai jauh ngambika ulih ngerembaika Berita Manah. Iya muka pampang opis ti baru, lalu berengkah ngeluarka majalah Menara Jaga dalam jaku Portugis. Dalam beberapa bulan aja, iya nyadung lebih ari 7,000 iti litaricha. Sarah Ferguson amat gagit ati maya Menyadi George Young datai ngabas sida sebilik. Sarah udah macha majalah Menara Jaga kenyau ari taun 1899. Tang, iya nadai peluang dibaptisa. Beberapa bulan udah nya, Menyadi Sarah enggau empat iku anak iya dibaptisa.

Ba pengujung taun, majalah Menara Jaga kena 15 Disember 1923 madahka baka ni ubah ba gempuru, pengawa nginjil, sereta konvensyen, udah nulung bala Nembiak Bup Kudus. Ku majalah nya: “Kami ulih meda bala menyadi ba raban gempuru . . . bisi pengarap ti tegap . . . Aram meh kitai nyikap diri ngereja mayuh agi pengawa lalu terus gawa ke Petara enggau ransing sereta gaga ati ba taun 1924.”

Taun 1924 mega taun ti ngagitka ati ke bala Nembiak Bup Kudus. Bala menyadi ba Betel udah bebulan-bulan nirika bengunan ba Staten Island, enda jauh ari indu opis ba Brooklyn. Bengunan baru nya tembu digaga ba pun taun 1924. Pengudah bisi bengunan nya, bala menyadi majak beserakup lalu ulih ngerembaika Berita Manah enggau chara ti manah agi.