1-2. Nama chara ti pemadu manah kitai ulih macha sereta belajarka Bup Kudus? Beri siti chunto.

 GAMBARKA nuan deka meli sebuah rumah. Nama utai ke deka dipeda nuan sebedau nuan ngaga pemutus? Kati nuan puas ati enti meda gambar begian depan rumah nya aja? Nuan tentu deka ngagai rumah nya ngambika ulih meda rumah nya kediri empu. Nuan tama ngagai rumah nya, meresa semua bilik ba dia, sereta begian ke bukai ba rumah nya. Endang amat, nuan tentu deka meresa rumah nya enggau silik sebedau meli iya.

² Kitai ulih ngereja utai ti sama lebuh macha sereta belajarka Bup Kudus. Siku pakar Bup Kudus madahka: “Bup Kudus nya baka siti bengunan ti besai sereta tinggi, lalu pugu iya amat dalam.” Nyadi, nama deka nulung kitai nemu utai dalam Bup Kudus enggau manah agi? Enti nuan macha enggau jampat, nuan engka semina belajarka “pekara asas ti bekaul enggau pesan ti kudus ari Petara.” (Heb. 5:12) Baka rumah ke dipadah tadi, kitai mesti tama ngambika ulih nemu mayuh agi pasal rumah nya. Baka nya mega, kitai mesti mansik Bup Kudus enggau dalam agi ngambika ulih meretika iya enggau manah agi. Baka ni kitai ulih ngereja nya? Uji beratika baka ni utai ke ditulis dalam siti bup mit bisi kaul enggau bup mit ke bukai dalam Bup Kudus. Bebendar nguji faham nama pemendar ke dipechayaka nuan, sereta kebuah nuan pechayaka iya.

3. Paul meransang bala menyadi Kristian ngereja nama, lalu nama kebuah? (Epesus 3:​14-19)

³ Ngambika ulih meretika semua begian dalam Bup Kudus enggau manah agi, bisi sekeda utai ke patut dipelajarka kitai enggau dalam agi. Rasul Paul meransang bala menyadi Kristian ngambika bagas agi belajarka Bup Kudus. Enggau nya, sida ulih  “amat-amat nemu pemesai buka, pemanjai, peninggi, enggau penalam” pemendar. Tu deka nulung sida “beurat sereta tegap” ba pengarap. (Bacha Epesus 3:​14-19.) Kitai mega patut ngereja utai ti sama. Aram kitai beratika baka ni kitai ulih belajarka Jaku Petara enggau dalam agi ngambika kitai bisi gambaran ti penuh pasal utai ke bisi dalam Bup Kudus.

4. Nama ulih dikereja kitai ngambika ulih majak semak ngagai Jehovah? Beri sekeda chunto.

⁴ Kitai enggai puas ati enggau penemu pasal pekara ti asas dalam Bup Kudus aja. Enggau tulung ari kuasa kudus Petara, kitai keran deka belajarka “penemu Petara ti dalam.” (1 Kor. 2:​9, 10) Nuan tau nguji ngaga sekeda pansik ngambika ulih majak semak ngagai Jehovah. Ambika chunto, nuan ulih ngaga pansik pasal chara Jehovah ngayanka pengerindu ngagai bala nembiak Iya ba jeman kelia, sereta baka ni tu nunjukka Iya rinduka nuan mega. Nuan mega ulih beratika atur ke digaga Jehovah ke pengawa sembah ba menua Israel, lalu mandingka nya enggau baka ni Iya dekaka kitai nyembah Iya kemayaharitu. Tauka nuan ulih belajar enggau silik agi pasal jaku benabi ke udah dikeamatka Jesus maya iya idup ba dunya sereta ba pengawa nginjil iya.

5. Nama utai ti deka dipelajarka nuan enggau dalam agi?

⁵ Sekeda bala menyadi ke rindu belajarka Bup Kudus madahka utai ti deka dipelajarka sida enggau dalam agi. Sekeda ari utai nya bisi dalam kutak “ Topik Kena Belajarka Bup Kudus Kediri Empu.” Nuan ulih ngena Bup Dikena Saksi-Saksi Jehovah Ngiga Pansik kena nemu mayuh agi pasal topik nya. Lebuh nuan belajarka nya, nuan deka majak gaga ati. Belajarka Bup Kudus enggau dalam agi ulih negapka pengarap nuan sereta nulung nuan ‘belajarka pasal Petara.’ (J-lam. 2:​4, 5) Diatu, aram kitai beratika sekeda pemendar Bup Kudus ti dalam ke ulih dipelajarka kitai enggau silik agi.

6. (a) Nama bida entara pelan enggau tuju? (b) Nama kebuah kitai ulih ngumbai tuju Jehovah ke mensia enggau dunya “meruan belama iya”? (Epesus 3:11)

⁶ Ambika chunto, perundingka utai ti dipadah Bup Kudus pasal tuju Petara. Bisi bida ti  besai entara pelan enggau tuju. Pelan baka jalai ke udah dipilih kitai ngambika ulih datai ngagai destinasi kitai. Tang, enti bisi utai nekul jalai nya, kitai engka enda ulih datai ngagai destinasi kitai. Baka ni enggau tuju? Tuju befokus ba destinasi nya empu. Kitai nemu dini destinasi nya, tang kitai enda netapka jalai ke patut dikena. Jalai ke deka dikena kitai ulih diubah enti patut. Kitai amat beterima kasih laban Jehovah udah belubah-lubah madahka kitai tuju Iya ti “meruan belama iya” dalam Bup Kudus. (Eps. 3:11) Enda ngira nama utai ke nyadi, Jehovah ulih ngena chara bukai kena ngamatka tuju Iya. Iya seruran mujur laban ‘semua utai ti udah digaga Jehovah endang bisi tuju magang.’ (J-lam. 16:4) Lalu asil ari utai ti dikereja Jehovah deka tan belama iya. Nama tuju Jehovah? Nama ubah ke udah digaga Iya kena nyapai tuju nya?

7. Pengudah sepasang laki bini ti keterubah angkat ngelaban Jehovah, baka ni Jehovah ngubah chara Iya nyapai tuju Iya? (Matthew 25:34)

⁷ Petara madah ngagai sepasang laki bini ti keterubah pasal tuju Iya ke seduai iya. Petara madah ngagai seduai iya: “Beranak betelesak, lalu ngemenuhka dunya. Bekuasa meh ba serata dunya. Nyadi meh tuan atas . . . semua macham jelu.” (P-kal. 1:28) Lebuh Adam enggau Awa angkat ngelaban Jehovah, nya ngujungka semua mensia bedosa. Tang tu enda ulih nagang Jehovah ari ngamatka tuju Iya. Iya ngubah chara kena nyapai tuju Iya. Tekala nya, Jehovah ngaga pemutus deka numbuhka siti perintah ba serega ke deka ngamatka tuju asal Iya ke mensia enggau ke dunya. (Bacha Matthew 25:34.) Ba maya ke udah ditetapka Jehovah, Iya nganjung Anak Tuai Iya ke dunya. Ba dia, Jesus ngajar orang pasal Perintah Petara sereta meri nyawa iya kena nebus kitai ari dosa enggau pemati. Udah nya, Jesus diangkatka idup baru ke serega, lalu merintah nyadi Raja ba Perintah Petara. Tang, bisi mayuh agi utai ke ulih dipelajarka kitai pasal tuju Petara.

8. (a) Nama tema Bup Kudus? (b) Baka ke diterangka ba Epesus 1:​8-11, nama tuju Jehovah ti pemadu besai? (Peda gambar ba mua majalah.)

⁸ Tema utama Bup Kudus iya nya nama Jehovah deka dikuduska seraya Iya ngamatka tuju Iya ke dunya. Iya deka ngereja tu nengah Perintah Iya ke dipegai Jesus. Tuju Jehovah enda ulih diubah. Iya udah besemaya, semua utai deka nyadi baka ke udah dipadah Iya. (Isa. 46:​10, 11; Heb. 6:​17, 18) Dunya tu deka nyadi Paradais, alai bala peturun Adam enggau Awa ti sempurna sereta lurus deka “nyamai diau belama iya!” (Mas. 22:26) Tang, ukai tu aja tuju Jehovah. Tuju Iya ti pemadu besai, iya nya nyerakupka semua bala nembiak Iya ba serega enggau ba dunya. Udah nya, semua sida deka enggau setia ngasika Jehovah nyadika Pemerintah sida. (Bacha Epesus 1:​8-11.) Kitai tentu kagum enggau chara ti ngalitka ati ke dikena Jehovah ngamatka tuju Iya.

9. Lebuh macha Bup Kudus, ni pemayuh utai pasal jemah ila ke ulih ditemu kitai?

⁹ Perundingka jaku benabi ke dipadah Jehovah ba taman Eden, ke ditulis ba Pemungkal 3:15. b Jaku benabi nya madahka utai ti deka nyadi ngambika tuju Iya dikeamatka. Taja pia, utai tu semina nyadi beribu taun pengudah jaku benabi nya dipadah. Ambika chunto, Petara madah ngagai Abraham, siku ari peturun iya deka nyadi Kristus. (P-kal. 22:​15-18) Lalu baka ke udah dipadah dalam jaku benabi nya, ba taun 33 M., tumbit Jesus dipantuk. (SKR. 3:​13-15) Utai ti penudi ke deka nyadi ba jaku benabi nya, iya nya pala Sitan deka diredak.  Utai tu deka nyadi lebih ari 1,000 taun ari diatu. (Pem. 20:​7-10) Bup Kudus mega madahka mayuh agi penerang pasal utai ti deka nyadi entara dunya Sitan enggau gerempung Jehovah sebedau pengujung datai.

10. (a) Nama utai ti deka nyadi enda lama da agi? (b) Baka ni kitai ulih nyediaka ati enggau runding kitai? (Peda nota kaki.)

¹⁰ Perundingka pasal jaku benabi ti ngalitka ati ke dipadah dalam Bup Kudus. Keterubah, bala perintah ba dunya tu deka madahka: “Diatu, kitai bisi pengelantang enggau pengelikun!” (1 Tes. 5:​2, 3) “Tekala nya,” Penusah ti Besai deka berengkah. Bala perintah ba dunya tu deka nyerang sereta ngerusak semua pengarap pelesu. (Pem. 17:16) Pengudah nya, siti utai ti ngalitka ati deka nyadi. Bup Kudus madahka: “Anak Mensia datai ba atas remang, ngena kuasa enggau mulia ti besai.” (Mat. 24:30) Jesus deka ngakim semua mensia, lalu nyeraraka raban bedus ari raban kambin. (Mat. 25:​31-33, 46) Ba maya tu, Sitan deka terus ngelaban Jehovah. Sitan balat begedika bala nembiak Petara. Ketegal nya, iya deka nyungkak bemacham-macham bansa ti udah begempung ngambika nyerang bala nembiak Jehovah. Bup Kudus ngumbai bansa ti udah begempung tu Gok ari Magok. (Esk. 38:​2, 10, 11) Ba siti maya ti udah ditetapka, bala menyadi ke dipilih ke serega, ke agi ba dunya, deka dibai ke serega. Sida deka enggau Jesus Kristus enggau bala melikat iya ke bukai belaban ba perang Armagedon. Tu meh begian ti penudi ari Penusah ti Besai. c (Mat. 24:31; Pem. 16:​14, 16) Udah nya, Kristus deka berengkah merintah pengelama 1,000 taun atas dunya.—Pem. 20:6.

11. Nama asai ati nuan pasal pengidup ti meruan belama iya? (Peda mega gambar.)

¹¹ Diatu, gambarka pengidup nuan jemah ila pengudah Seribu Taun Kristus Merintah. Bup Kudus madahka: “Petara udah ngaga kitai enggau pengeran deka idup belama iya.” (P-jar. 3:​11, NWT) Perundingka reti tu ke nuan sereta kaul nuan enggau Jehovah. Bup Hampirilah Yehuwa, lambar 319, bisi madahka utai ti ngalitka ati tu: “Pengudah idup pengelama  bebiliun-biliun taun, kitai tentu udah belajar mayuh utai pasal Jehovah. Taja pia, ba maya nya mega, kitai agi deka terus belajar pasal Petara. . . . Pengidup ba dunya baru tentu amat ngemuaska ati. Tang, berekat ti pemadu besai maya nya, kitai bisi peluang majak semak ngagai Jehovah belama iya.” Tang sebedau utai nya nyadi, seraya kitai terus belajarka Jaku Petara, nama utai bukai ke ulih dipelajarka kitai?

12. Baka ni kitai ulih engkadah ke langit? Beri siti chunto.

¹² Jaku Petara madahka, Jehovah “diau ba endur ti tinggi.” (Isa. 33:​5, NWT) Lalu iya mega madahka sekeda utai pasal gaya ba endur nya. Bup Kudus bisi nyebut sekeda utai ti ngalitka ati pasal Jehovah sereta gerempung Iya ba serega. (Isa. 6:​1-4; Dan. 7:​9, 10; Pem. 4:​1-6) Ambika chunto, kitai ulih macha pasal utai ti luar biasa ke dipeda Esekiel lebuh ‘langit tebuka, lalu iya begenera meda Petara.’—Esk. 1:1.

13. Nitihka Hebrew 4:​14-16, nama asai ati nuan pasal utai ti benung dikereja Jesus ari serega?

¹³ Perundingka mega pasal utai ti benung dikereja Jesus ke kitai ari serega. Iya Raja enggau Imam Besai kitai ti siru. Dalam sampi, kitai ulih datai ngagai “kerusi diraja Petara ke ngayanka pemanah ati ti besai,” nengah Jesus. Lalu kitai ulih minta pengasih sereta tulung “ba maya ti ngena.” (Bacha Hebrew 4:​14-16.) Ninting hari, kitai mesti berundingka utai ti udah sereta ke benung dikereja Jehovah enggau Jesus ke kitai ari serega. Pengerindu seduai iya ke kitai patut negu ati kitai, sereta meransang kitai ransing agi ba pengawa sembah kitai ke Jehovah.—2 Kor. 5:​14, 15.

14. Nama siti chara ti pemadu manah kena ngayanka asai beterima kasih ngagai Jehovah enggau Jesus? (Peda mega gambar.)

¹⁴ Siti ari chara ti pemadu manah kitai ulih ngayanka asai beterima kasih ngagai Jehovah enggau Anak Iya, iya nya bebendar nulung orang bukai nyadi Saksi-Saksi Jehovah sereta  murid Jesus. (Mat. 28:​19, 20) Tu meh utai ti dikereja Rasul Paul kena nunjukka asai beterima kasih iya ngagai Petara enggau Jesus Kristus. Iya nemu, Jehovah deka “semua macham orang diselamatka sereta bulih penemu ti betul pasal pemendar.” (1 Tim. 2:​3, 4) Nya alai, iya bebendar nginjil kena nulung mayuh orang ngambika iya “ulih nyelamatka sekeda ari sida ngena semua macham chara.”—1 Kor. 9:​22, 23.

15. Nitihka Masmur 1:​2, nama utai ke deka ngasuh kitai gaga ati?

¹⁵ Penulis Masmur madahka, orang ke lantang ati sereta mujur nya, orang ke ‘gaga ati ke Adat Jehovah, lalu belematika Adat nya siang malam.’ (Mas. 1:​1-3) Bekaul enggau ayat-ayat tu, siku penyalin Bup Kudus ke benama Joseph Rotherham madahka: “Sesiku orang patut keran ke iring ari Petara nyentukka iya deka ngiga, belajar, sereta ngena mayuh awak belematika utai nya.” Iya mega madahka: “Enti sesiku orang enda macha Bup Kudus ba hari nya, hari nya udah dibasau.” Nuan mega tau bulih pengaga ati lebuh belajarka Bup Kudus. Baka ni nuan ulih ngereja nya? Beratika meh penerang ti penting ke bisi dalam Bup Kudus, sereta baka ni semua tu bisi kaul enggau pangan diri. Endang ngagaka ati lebuh kitai belajarka Jaku Petara enggau dalam sereta silik agi!

16. Nama deka dikerandauka kitai ba artikel ke nangkanka tu?

¹⁶ Pemendar ke diajar Jehovah ngagai kitai dalam Bup Kudus enda kelalu tusah dimeretika kitai. Ba artikel ke nangkanka tu, kitai deka belajarka pasal siti ari pemendar ti dalam, iya nya rumah sembiang rohani Jehovah, ke diterangka Paul dalam surat iya ngagai orang Kristian ke bebansa Hebrew. Arapka nuan bulih pengaga ati ti besai lebuh belajarka pemendar nya!