1. Ba jeman kelia, baka ni Petara ngeringka bala nembiak Iya?

 NEMBIAK Petara ti tetap ati suah dikumbai kering dalam Bup Kudus. Taja pia, sida enda seruran ngasaika diri kering. Ambika chunto, bisi maya iya Raja David ngasaika diri kering “baka kuta ti ba bukit.” Tang bisi maya iya mega, iya berasai “takut.” (Mas. 30:7) Peratika mega chunto Samson. Kuasa kudus Petara meri Samson pengering ti luar biasa. Tang Samson nemu, enti Petara enda meri iya pengering nya, iya deka nyadi “lemi baka orang bukai.” (P-ulu. 14:​5, 6; 16:17) Endang amat, Jehovah meh ke meri pengering ngagai bala nembiak Iya ke tetap ati.

2. Nama kebuah Rasul Paul madahka: “Lebuh aku lemi, aku nyadi kering”? (2 Korint 12:​9, 10)

² Rasul Paul mega ngaku, iya begunaka pengering ari Jehovah. (Bacha 2 Korint 12:​9, 10.) Baka mayuh ari kitai, Paul mega napi penanggul ba pengerai. (Gal. 4:​13, 14) Bisi maya iya, Paul tusah deka ngereja utai ti betul. (Rom. 7:​18, 19) Lalu kekadang, iya berasai irau sereta takut enggau utai ke engka nyadi ngagai iya. (2 Kor. 1:​8, 9) Taja pia, lebuh Paul lemi, iya nyadi kering. Nama kebuah? Laban Jehovah meri iya pengering ke diguna iya. Jehovah meh ke ngasuh Paul nyadi kering.

3. Nama tanya ke deka disaut kitai dalam artikel tu?

³ Jehovah besemaya, Iya mega deka meri kitai pengering. (1 Pet. 5:10) Tang kitai enda ulih ngarapka diri nerima tulung ari Jehovah enti kitai enda berusaha. Ambika chunto, injin kerita ulih ngasuh kerita bejalai. Taja pia, orang ke deriba mesti nekan minyak. Enti enda, kerita nya enda ulih kini-kini. Baka nya mega, Jehovah sedia deka meri kitai pengering ke diguna  kitai. Tang kitai mesti berusaha ngambika bulih penguntung ari utai ke disediaka Iya. Nama utai ke udah disediaka Jehovah ngambika kitai ulih nyadi kering? Lalu nama utai ke patut digaga kitai ngambika bulih pengering nya? Tanya nya deka disaut lebuh kitai beratika chara Jehovah ngeringka tiga iku orang dalam Bup Kudus, iya nya Nabi Jonah, Maria indai Jesus, enggau Rasul Paul. Kitai mega deka meda baka ni Jehovah ngena chara ti sama ngeringka bala nembiak Iya kemayaharitu.

4. Baka ni kitai tau bulih pengering ari Jehovah?

⁴ Siti chara kitai bulih pengering ari Jehovah nya nengah sampi, lalu Jehovah deka nyaut sampi kitai. Iya deka meri kitai “kuasa ke ngelui ari pengering mensia.” (2 Kor. 4:7) Kelimpah ari nya, kitai mega bulih pengering ari Jehovah lebuh kitai macha Bup Kudus sereta belematika nya. (Mas. 86:11) Pesan Jehovah ke kitai, ke bisi dalam Bup Kudus nya “bekuasa.” (Heb. 4:12) Lebuh nuan besampi ngagai Jehovah sereta macha Jaku Iya, nuan deka bulih pengering. Pengering nya deka nulung nuan tan napi penguji, mengkang gaga ati, tauka mujur ngereja tanggung pengawa ti tusah. Peratika baka ni Jehovah ngeringka Nabi Jonah.

5. Nama kebuah Nabi Jonah begunaka pemerani?

⁵ Nabi Jonah begunaka pemerani. Iya nerima siti tanggung pengawa ti tusah ari Jehovah. Tang ketegal iya takut, iya ngerarika diri. Iya nepan siti kapal ke mai iya ngagai endur bukai. Tang bisi kabut ti balat nyadi. Ketegal nya, Jonah enggau orang bukai ke dalam kapal nya nyauka bebadi. Lebuh sida muai Jonah ke tasik, siku ikan ti besai nelan iya. Diatu, Jonah dalam endur ti ngenakutka, iya nya ba dalam perut ikan ti besai. Ba runding nuan, nama asai ati Jonah? Iya engka ngumbai diri deka mati dia. Tauka ngumbai Jehovah udah ninggalka iya. Jonah tentu berasai balat irau.

6. Nitihka Jonah 2:​1, 2, 7, nama utai ke ngeringka Jonah lebuh iya dalam perut ikan?

⁶ Jonah kediri dalam perut ikan. Nama digaga iya kena ngulihka pengering? Iya besampi ngagai Jehovah. (Bacha Jonah 2:​1, 2, 7.) Amat, Jonah enda ngasika Jehovah. Tang iya udah nesal ati. Ketegal nya, iya andal Jehovah deka ningaka sampi iya. Jonah mega belematika ayat Bup Kudus ke kala dibacha iya. Nama kebuah kitai ulih nyebut munyi nya? Dalam sampi iya ke ditulis dalam Jonah bagi 2, iya ngena mayuh leka jaku tauka rambai jaku ke ditemu dalam bup Masmur. (Ambika chunto, banding Jonah 2:​2, 5 enggau Masmur 69:1; 86:7.) Endang terang, Jonah nemu ayat Bup Kudus nya enggau manah. Lebuh iya belematika ayat Bup Kudus nya dalam perut ikan, tu nulung iya andal Jehovah deka nulung iya. Udah nya, Jehovah nyelamatka Jonah. Diatu, Jonah sedia deka ngereja utai ke diasuh Jehovah.—Jon. 2:10–3:4.

7-8. Baka ni siku menyadi ba Taiwan bulih pengering ngambika ulih tan napi penguji?

⁷ Teladan Jonah ulih nulung kitai lebuh kitai napi mayuh macham penguji. Ambika chunto, Zhiming, b siku menyadi lelaki ba Taiwan, bisi penanggul ti balat ba pengerai. Nambahka nya, diri sebilik iya balat nyakal iya ketegal pengarap iya. Iya bulih pengering ari Jehovah nengah sampi sereta belajarka Bup Kudus. Ku Zhiming madahka: “Kekadang lebuh penanggul nyadi, aku balat irau sereta charut runding. Tu ngasuh aku tusah deka belajarka Bup Kudus kediri empu.” Taja pia, Zhiming bepanggai ba Jehovah. Ku iya agi: “Keterubah iya, aku besampi ngagai Jehovah. Udah nya, aku ngena earphones ningaka lagu Perintah  Petara. Kekadang aku nyanyi lagu nya enggau nyawa ti mit nyentukka aku berasai tenang. Udah nya, aku ulih belajarka Bup Kudus kediri empu.”

⁸ Pengawa belajarka Bup Kudus kediri empu udah nulung Zhiming tan napi situasi ti tusah. Ambika chunto, pengudah Zhiming beputung, siku indu misi madahka Zhiming begunaka transfusi darah laban sel darah mirah iya kurang. Tang ba malam sebedau iya beputung, Zhiming bisi macha pasal siku menyadi indu ke bisi pembedahan ti sama. Sel darah mirah menyadi indu nya kurang agi ari Zhiming. Tang menyadi indu nya enggai nerima transfusi darah. Taja pia, iya agi ulih gerai. Pengalaman menyadi indu nya ngeringka Zhiming ngambika iya ulih mengkang tetap ati.

9. Enti nuan irau ketegal sesiti penguji, nama ulih dikereja nuan? (Peda mega gambar.)

⁹ Lebuh nuan napi penguji, kala nuan ngasaika kelalu irau nyentukka nuan tusah deka besampi? Tauka, nuan kelalu lelak nyentukka nuan enda ulih belajarka Bup Kudus? Kingatka meh, Jehovah amat nemu situasi nuan. Taja pan nuan semina ulih meri sampi ti pandak, andal meh Iya deka meri nuan utai ke diguna nuan. (Eps. 3:20) Pemedis ba fisikal enggau penanggul ba emosi engka ngasuh nuan tusah deka macha sereta belajarka Bup Kudus. Enti pia, nuan ulih nguji ningaka audio Bup Kudus tauka litaricha ke bukai. Nuan mega ulih ningaka siti ari lagu kitai tauka meda video ba jw.org. Jehovah keran deka ngeringka nuan. Iya tentu deka ngereja nya enti nuan besampi ngagai Iya. Lalu udah nya, giga saut ngagai sampi nuan dalam Bup Kudus sereta utai bukai ke udah disediaka Iya.

10. Baka ni bala menyadi Kristian ngeringka kitai?

¹⁰ Jehovah ulih ngena bala menyadi Kristian ngeringka kitai. Sida ulih “ngelantangka ati” kitai lebuh kitai napi penguji tauka lebuh kitai tusah deka ngereja sesiti tanggung pengawa. (Kol. 4:​10, 11) Kitai amat begunaka kaban “enggau natka penusah.” (J-lam. 17:17) Lebuh kitai berasai lemi, bala menyadi Kristian ulih nyediaka utai ke diguna kitai, ngelantangka ati kitai, sereta meransang kitai terus nyembah  Jehovah enggau tetap ati. Peratika baka ni Maria, indai Jesus, bulih pengering ari orang bukai.

11. Nama kebuah Maria begunaka pengering?

¹¹ Maria begunaka pengering ngambika ulih ngereja peneka Petara. Gambarka pengirau Maria lebuh Melikat Gabriel madahka iya deka betubuh-bisi, taja pan iya bedau kawin. Iya nadai kala bisi anak. Tang diatu, iya patut nyaga anak mit ke deka nyadi Messiah. Iya mega agi dara. Tang iya patut madah ngagai tunang iya Josep, iya betubuh-bisi. Tu tentu enda senang ke Maria.—Luk. 1:​26-33.

12. Nitihka Luke 1:​39-45, baka ni Maria bulih pengering ke diguna iya?

¹² Pengawa ke diterima Maria nya tusah sereta luar biasa. Baka ni Maria nerima pengering kena ngereja pengawa nya? Iya minta tulung ari orang bukai. Ambika chunto, iya nanya Melikat Gabriel mayuh agi penerang pasal pengawa nya. (Luk. 1:34) Enda lama pengudah nya, iya bejalai ngagai “nengeri ti bebukit” ba menua Judah, lalu ngabas kaban belayan iya Elisabet. Tu mai penguntung ngagai Maria. Elisabet muji Maria, lalu nengah kuasa kudus Jehovah, Elisabet bekunsika jaku ti benabi ke meransang pasal anak Maria ke bedau ada. (Bacha Luke 1:​39-45.) Maria madahka, Jehovah “udah ngereja utai ti besai ngena lengan Iya.” (Luk. 1:​46-51) Jehovah ngeringka Maria nengah Gabriel enggau Elisabet.

13. Nama asil iya lebuh siku menyadi indu ba Bolivia minta tulung ari bala menyadi Kristian?

¹³ Baka Maria, nuan mega tau bulih pengering ari bala menyadi Kristian. Tu meh pengering ke diguna Dasuri, siku menyadi indu ari Bolivia. Apai iya sakit raya, lalu penyakit nya ulih ngujungka iya mati. Lebuh apai iya ditan ba sepital, Dasuri bebendar deka nyaga apai iya. (1 Tim. 5:4) Tang nya enda seruran senang. Ku Dasuri madah: “Bisi mayuh kali aku ka putus asa.” Kati iya bisi minta tulung? Terubah iya, Dasuri enda minta tulung ari orang bukai. Dasuri nerangka: “Aku enggai ngiruhka bala menyadi Kristian ke bukai. Aku berunding, ‘Jehovah meh ke deka nulung aku.’ Tang udah nya aku sedar, enti aku ngenyauhka diri ari orang bukai, nya baka aku nguji deka mutarka penanggul nya kediri empu.” (J-lam. 18:1) Dasuri mutuska deka nulis surat ngagai sekeda ari bala kaban iya lalu nerangka situasi iya. Ku iya: “Aku berasai amat diperansang nengah bala menyadi Kristian ke bukai. Sida mai pemakai ngagai sepital, lalu bekunsika sekeda ayat Bup Kudus ti ngelantangka ati aku. Aku berasai amat lantang laban nemu kitai enda kediri. Semua kitai sebagi ari ruang bilik Jehovah ti besai. Bala menyadi Kristian sedia deka nulung kitai, nyabak enggau kitai, lalu meransang kitai ngambika terus nyembah Jehovah enggau sida.”

14. Nama kebuah kitai patut nerima tulung ari bala tuai gempuru?

¹⁴ Siti chara Jehovah ngeringka kitai, iya nya nengah bala tuai gempuru. Sida pemeri ari Jehovah. Jehovah ngena sida ngeringka sereta ngelantangka ati kitai. (Isa. 32:​1, 2) Nyadi, lebuh nuan berasai irau, kunsika meh pengirau nuan enggau bala tuai gempuru. Anang kakang ati nerima tulung ari bala tuai gempuru. Nengah sida, Jehovah ulih ngasuh nuan nyadi kering.

15. Nama harapan ke dikembuan kitai?

¹⁵ Semaya dalam Bup Kudus ulih meri kitai harapan sereta pengering ngambika ulih terus nyembah Jehovah. (Rom. 4:​3, 18-20) Sekeda ari kitai bisi harapan idup belama iya ba serega, lalu ke bukai bisi harapan idup belama iya ba dunya Paradais. Harapan tu meri kitai  pengering ngambika tan napi penguji, terus nginjil pasal Berita Manah, sereta ngereja utai ke bala menyadi Kristian kitai. (1 Tes. 1:3) Harapan ti sama nya meh ke ngeringka Rasul Paul.

16. Nama kebuah Rasul Paul begunaka pengering?

¹⁶ Paul begunaka pengering. Dalam surat iya ngagai orang Kristian ba Korint, Paul nyemaka diri baka periuk ke digaga ari tanah liat. Paul madah iya “diansak,” “charut runding,” “diperinsa,” lalu ‘dipalu ngambika rebah.’ Indah, iya napi utai ke tau nabanka nyawa. (2 Kor. 4:​8-10) Paul nulis nya ba pejalai nginjil iya ti ketiga. Tang ba maya nya, iya enda nyangka situasi iya deka nyadi majak balat. Iya diserang seraban orang, ditangkap, nyauka lemas ba tasik, sereta dijil.

17. Nitihka 2 Korint 4:​16-18, nama utai ke nulung Paul nyadi kering ngambika iya tan napi penguji?

¹⁷ Paul bulih pengering ngambika tan napi penguji lebuh iya fokus ba harapan iya. (Bacha 2 Korint 4:​16-18.) Iya madah ngagai orang Kristian ba Korint, taja pan tubuh iya “majak lemi,” tang iya enggai nejuka utai nya ngasaka ati iya. Paul fokus ngagai harapan iya ke jemah ila. Harapan iya idup belama ba serega nya “mulia ti amat besai.” Paul ngumbai harapan nya amat spesial nyentukka iya sanggup napi sebarang penusah kena ngulihka upah nya. Paul belematika harapan nya. Asil iya, “ninting hari . . .[iya] dikeringka baru.”

18. Baka ni harapan ke jemah ila ngeringka Tihomir enggau ruang bilik iya?

¹⁸ Harapan ke jemah ila udah ngeringka siku menyadi lelaki ba Bulgaria, ke benama Tihomir. Beberapa taun sebedau nya, menyadi iya ke biak, Zdravko, bebadi ketegal eksiden ba jalai alun. Ketegal nya, pengelama siti timpuh, Tihomir balat tusah ati. Nama utai ke nulung iya tan napi penguji tu? Sida sebilik ngambarka baka ni gaya pengangkat ari mati. Iya nerangka: “Ambika chunto, kami berandau dini alai kami deka betemu enggau Zdravko, nama pemakai ke deka dipanduk kami ke iya, sapa ke deka dibai kami ngagai gathering sepengudah iya diangkatka idup baru, sereta utai ke deka  dipadahka kami ngagai iya pasal pengidup ba hari ti penudi. Ketegal kami fokus ngagai harapan tu, tu nulung kami terus tan ba timpuh ti tusah tu, sereta nganti nyentuk ngagai maya Jehovah deka ngangkatka menyadi aku idup baru.”

19. Nama ulih dikereja nuan kena ngeringka pengarap nuan ngagai semaya Jehovah ke jemah ila? (Peda mega gambar.)

¹⁹ Nama ulih dikereja nuan kena ngeringka pengarap nuan ngagai semaya Jehovah ke jemah ila? Ambika chunto, enti nuan bisi harapan idup belama iya ba dunya, bacha meh utai ke dipadah Bup Kudus pasal gaya dunya Paradais sereta belematika nya. (Isa. 25:8; 32:​16-18) Gambarka diri benung idup ba dunya baru. Nuan deka betemu enggau sapa? Nama bunyi ke didinga nuan? Nama asai ati nuan maya nya? Kena nulung nuan ngambarka gaya ba dunya Paradais, peda meh gambar ba litaricha kitai. Tauka peda video musik baka Dunya Baru ti Deka Datai, Dunya Baru Endang Amat Deka Datai, sereta Gambarka Jemah Ila. Enti kitai seruran belematika harapan kitai ke jemah ila, penanggul ke ditapi kitai diatu “enda lama sereta enda kelalu balat.” (2 Kor. 4:17) Harapan ke diberi Jehovah ngagai nuan ulih nulung nuan tan napi penguji.

20. Indah lebuh kitai berasai lemi, baka ni kitai tau bulih pengering?

²⁰ Indah lebuh kitai berasai lemi, “Petara deka meri kitai pengering.” (Mas. 108:​13, NWT) Jehovah udah nyediaka utai ke diguna kitai ngambika tau bulih pengering ari Iya. Lebuh kitai besampi sereta belajarka Bup Kudus kediri empu, kitai bulih pengering ngambika ulih ngereja sesiti tanggung pengawa, tan lebuh napi sesiti penguji, sereta ngetanka pengaga ati kitai. Terima meh peransang ari bala menyadi Kristian kitai. Seruran belematika harapan kitai ke jemah ila. ‘Arapka kuasa Petara ti besai sereta bemulia ngeringka kitai, ngambika kitai betan napi semua utai enggau sabar sereta gaga ati.’—Kol. 1:11.