1. Nama utai ti disebut siku melikat, lalu nama reti nya ba kitai?

 ENTI siku melikat bejaku enggau nuan, kati nuan deka mendingka utai ku iya? Kebendar iya, kemayaharitu siku melikat benung bejaku ngagai orang “ke datai ari tiap iti menua, raban bansa, jaku, enggau bansa.” Nama utai ku iya? “Nangika Petara lalu beri mulia ngagai Iya . . . Sembah meh Iya ke udah ngaga langit [enggau] dunya.” (Pem. 14:​6, 7) Endang amat, Jehovah siku aja Petara ke patut disembah semua orang. Jehovah udah meri kitai peluang nyembah Iya ba rumah sembiang rohani Iya. Kitai tentu berasai amat beterima kasih laban bisi peluang ti spesial nya.

2. Nama rumah sembiang rohani Jehovah nya? (Peda mega kutak “ Rumah Sembiang Rohani Nya Ukai . . . ”)

² Nama rumah sembiang rohani nya, lalu dini kitai ulih tetemuka penerang bekaul enggau rumah sembiang nya? Rumah sembiang rohani nya ukai bengunan ti amat. Tang, nya atur ke digaga Jehovah ngambika kitai ulih nyembah Iya nengah genselan tebus Jesus. Rasul Paul madahka mayuh agi pasal atur tu dalam surat ke ditulis iya ngagai orang Kristian ke bebansa Hebrew, ke diau ba Judea. b

3-4. Nama kebuah Paul irau pasal orang Kristian ke bebansa Hebrew ba Judea, lalu baka ni iya nulung sida?

³ Nama kebuah Paul nulis surat ngagai orang Kristian ke bebansa Hebrew ba Judea? Paul ngereja nya engka ketegal dua iti kebuah. Kesatu, Paul deka meransang sida. Sebedau sida nyadi  orang Kristian, mayuh ari sida nitihka pengarap Judah. Tang lebuh sida nyadi orang Kristian, tuai pengarap suba engka ngeleseka sida. Nama kebuah sida dikelese? Laban orang Kristian nadai rumah sembiang alai sida ulih nyembah Petara. Sida mega nadai alta kena nyerahka korban ngagai Petara. Pia mega, sida nadai imam ke nulung sida. Ketegal nya, bala murid Jesus engka asa ati, lalu lemi ba pengarap. (Heb. 2:1; 3:​12, 14) Sekeda ari sida indah engka bisi runding deka pulai baru ngagai pengarap Judah.

⁴ Kedua, Paul deka sida nemu, sida patut berusaha ngambika ulih faham ajar ti dalam. Paul nyemaka ajar nya enggau “pemakai ti kering” ke bisi dalam Jaku Petara. (Heb. 5:​11-14) Maya nya, bisi ari sida enda berusaha meretika ajar ti dalam. Bisi mega ke agi nitihka Adat Moses. Paul nerangka, korban ke dipinta di baruh Adat Moses enda ulih muai dosa enggau pengabis iya. Ketegal nya, Adat nya “udah dikinsil.” Pengudah nya, Paul ngajar sida ajar ti dalam. Iya ngingatka sida, genselan tebus Jesus nya “utai ti manah agi,” ke deka nulung sida “majak rapat enggau Petara.”—Heb. 7:​18, 19.

5. Ari bup Hebrew, nama utai ke patut ditemu kitai, lalu nama kebuah?

⁵ Paul nerang ngagai bala menyadi ke bebansa Hebrew kebuah chara orang Kristian nyembah Jehovah nya jauh manah agi ari chara sida nyembah Iya suba, lebuh sida agi megai pengarap Judah. Orang Judah suba nyembah Jehovah nitihka Adat Moses, tang Adat nya “semina ayuk ari utai ti deka datai, tang pekara ti amat nya Kristus.” (Kol. 2:17) Ayuk nya semina bayang-bayang sesiti utai. Iya ukai utai ti amat. Baka nya mega, chara orang Judah nyembah Petara suba semina ngambarka utai ke deka datai, iya nya chara nyembah Jehovah ti manah agi. Kitai patut faham atur ke udah digaga Jehovah ke kitai. Nengah atur nya, dosa kitai ulih diampun, lalu kitai ulih nyembah Iya enggau chara ke dikedekaka Iya. Aram kitai mandingka “ayuk,” iya nya chara sembah orang Judah enggau “pekara ti amat,” iya nya chara sembah orang Kristian. Utai tu diterangka ba bup Hebrew. Lebuh kitai ngereja nya, kitai ulih faham agi nama rumah sembiang rohani nya sereta nama kaul Iya enggau kitai.

6. Nama digaga orang Israel ba Langkau Sembiang?

⁶ Ayuk. Dalam surat iya, Paul bejaku pasal Langkau Sembiang ke didirika Moses ba taun 1512 S.M. (Peda carta “Ayuk—Pekara ti Amat.”) Langkau Sembiang nya endur alai orang Israel begempuru nyembah Petara sereta nyerahka korban. (P-sut. 29:​43-46) Maya sida agi ba menua puang, orang Israel mai Langkau Sembiang nya lebuh sida mindah ngagai endur ke bukai. Orang Israel ngena Langkau Sembiang nya nyauka 500 taun. Pengudah Rumah Sembiang didirika ba Jerusalem, sida nadai agi ngena Langkau Sembiang nya. (P-sut. 25:​8, 9; P-pau. 9:22) Taja pia, Langkau Sembiang nya mega ngambarka utai ti manah agi ke deka datai ke orang Kristian.

7. Kemaya rumah sembiang rohani berengkah bisi?

⁷ Pekara ti amat. Langkau Sembiang kelia ‘ngambarka utai ke ba serega,’ iya nya rumah sembiang rohani Jehovah. Paul madahka, “Langkau Kain [tauka, Langkau Sembiang] ti keterubah nya ngambarka utai ke diatu.” (Heb. 8:5; 9:9) Nyadi, maya iya nulis surat ngagai orang ke bebansa Hebrew, rumah sembiang rohani nya udah bisi. Rumah sembiang rohani nya ditumbuhka ba taun 29 M. Nya meh taun Jesus dibaptisa sereta dipilih ngena kuasa kudus. Ba taun nya mega, iya berengkah nyadi “imam besai ti bemulia” ba rumah sembiang rohani Jehovah. c—Heb. 4:14; SKR. 10:​37, 38.

8-9. Nitihka Hebrew 7:​23-27, nama bida entara imam besai orang Israel enggau Imam Besai Jesus Kristus?

⁸ Ayuk. Imam besai ngarika orang ba depan Petara. Lebuh Langkau Sembiang diserahka ngagai Jehovah, Iya milih Aron nyadi imam besai ti keterubah orang Israel. Tang Paul nerangka, “ketegal pemati, bala imam patut diganti orang bukai laban sida enda ulih agi bejalaika pengawa sida.” d (Bacha Hebrew 7:​23-27.) Lalu ketegal sida mega enda sempurna, sida patut nyerahka korban ketegal dosa sida empu. Tu meh bida ti besai entara imam besai orang Israel enggau Imam Besai Jesus Kristus.

⁹ Pekara ti amat. Jesus Kristus nya Imam Besai kitai. Iya “gawa ba endur ti kudus, ba langkau kain ti bendar ke didirika Jehovah, ukai mensia.” (Heb. 8:​1, 2) Paul nerangka, “ketegal Jesus idup nyentuk ke belama iya, iya enda ibuh diganti orang bukai nyadi imam.” Paul mega nerangka, Jesus nya “tuchi, diseraraka ari orang ke bedosa.” “Bala imam besai ke bukai patut meri pemeri ninting hari, keterubah ketegal dosa sida empu . . . Tang, [Jesus] enda baka sida.” Diatu, kitai deka beratika bida entara alta enggau korban ba ayuk enggau ba pekara ti amat.

10. Korban ba atas alta temaga ngambarka nama?

¹⁰ Ayuk. Ba luar Langkau Sembiang, bisi siti alta temaga. Korban jelu ke diserahka ngagai Jehovah ditunu ba alta nya. (P-sut. 27:​1, 2; 40:29) Taja pia, korban ke diserahka nya enda ulih muai semua dosa orang Israel. (Heb. 10:​1-4) Orang Israel patut terus meri korban jelu ba Langkau Sembiang nya. Pengawa nya ngambarka utai manah ke deka datai, iya nya korban ke deka muai semua dosa mensia.

11. Jesus nyerahka nyawa diri ba alta nama? (Hebrew 10:​5-7, 10)

¹¹ Pekara ti amat. Jesus nemu, Jehovah udah nganjung iya ke dunya kena nyerahka nyawa diri nyadika tebus ke orang mayuh.  (Mat. 20:28) Nya alai, lebuh iya dibaptisa, iya nyerahka diri kena ngereja peneka Jehovah. (Jhn. 6:38; Gal. 1:4) Jesus ukai nyerahka diri ba alta ke digaga mensia, tang ba alta ke ngambarka “peneka” Petara. Jehovah dekaka Anak Iya nyerahka nyawa mensia iya ti sempurna. Nyawa Jesus “diserahka sekali aja ke belama iya.” Ketegal nya, dosa sida ke arapka Kristus deka diampun belama iya. (Bacha Hebrew 10:​5-7, 10.) Diatu, kitai deka beratika utai ke bisi dalam Langkau Sembiang sereta nama reti utai nya.

12. Sapa ke tau tama ngagai Endur ti Kudus, lalu sapa ke tau tama ngagai Endur ti Pemadu Kudus?

¹² Ayuk. Langkau Sembiang enggau Rumah Sembiang ke didirika ba Jerusalem bisi reka bentuk ti sama. Ba dalam Langkau Sembiang tauka Rumah Sembiang, bisi dua iti bilik. Siti bilik dikumbai “Endur ti Kudus,” lalu siti agi “Endur ti Pemadu Kudus.” Dua iti bilik tu diseraraka enggau siti kain tirai. (Heb. 9:​2-5; P-sut. 26:​31-33) Dalam Endur ti Kudus bisi penuduk lampu emas, alta kena nunu menyan, enggau mija alai nyimpan roti ke diserahka. Semina ‘sida ke udah ditata sereta dichiri nyadi imam’ ulih tama ngagai Endur ti Kudus kena ngereja pengawa imam sida. (P-pau. 3:​3, 7, 10) Dalam Endur ti Pemadu Kudus, bisi peti lampang batu Adat emas ke ngambarka Jehovah bisi ba dia. (P-sut. 25:​21, 22) Semina imam besai ulih ngagai belakang tirai lalu tama ngagai Endur ti Pemadu Kudus. Iya ngereja nya sekali setaun, ba Hari Pengampun Dosa. (Lew. 16:​2, 17) Ninting taun, iya mai darah jelu tama ngagai Endur ti Pemadu  Kudus. Iya ngereja nya kena ngulihka pengampun dosa ke iya empu sereta ke orang Israel. Nyau kelama, ngena kuasa kudus, Jehovah nerangka nama reti utai ke bisi dalam Langkau Sembiang nya.—Heb. 9:​6-8.

13. Nama digambarka Endur ti Kudus enggau Endur ti Pemadu Kudus ba pekara ti amat?

¹³ Pekara ti amat. Sekeda ari bala murid Jesus udah dipilih ngena kuasa kudus. Penyampau sida nya 144,000 iku, lalu sida deka nyadi imam enggau Jesus ba serega. (Pem. 1:6; 14:1) Endur ti Kudus ngambarka sida udah diambu Petara nyadi anak Iya lebuh sida agi ba dunya. (Rom. 8:​15-17) Endur ti Pemadu Kudus ngambarka serega, endur alai Jehovah diau. “Kain tirai” ke nyerara Endur ti Kudus enggau Endur ti Pemadu Kudus ngambarka tubuh mensia Jesus. Seagi-agi iya bisi tubuh mensia, iya enda tau tama ngagai serega, lalu nyadi Imam Besai ba rumah sembiang rohani. Lebuh Jesus nyerahka tubuh mensia iya nyadika genselan tebus ke semua mensia, iya muka jalai ngambika 144,000 iku nya ulih ngagai serega. Kena ngulihka upah sida ba serega, sida mega patut ngelengkaka tubuh mensia sida. Ketegal darah enggau isi enda ulih tama ngagai serega, sida patut tetap ati nyentukka mati. (Heb. 10:​19, 20; 1 Kor. 15:50) Pengudah Jesus diangkatka idup baru, iya tama ngagai Endur ti Pemadu Kudus ba rumah sembiang rohani. Sida ke dipilih ngagai serega deka belubah-lubah enggau iya ba dia.

14. Nitihka Hebrew 9:​12, 24-26, nama kebuah chara sembah ba rumah sembiang rohani Jehovah jauh manah agi ari chara sembah di baruh Adat Moses?

¹⁴ Genselan tebus Jesus enggau pengawa iya ke nyadi imam ngasuh chara sembah ba rumah sembiang rohani Jehovah jauh manah agi ari chara sembah di baruh Adat Moses. Imam besai ba Israel mai darah jelu tama ngagai Endur ti Pemadu Kudus ke digaga mensia. Tang Jesus “tama ngagai serega nya empu,” iya nya endur ti pemadu kudus lalu ngayanka diri ba mua Jehovah. Kebendar iya, Jesus ulih milih idup nyadi mensia ti sempurna ba dunya. Tang iya “udah nyerahka nyawa diri kena muai dosa.” Lebuh iya ngayanka diri ba mua Jehovah, iya nyerahka nyawa mensia iya ti sempurna ngagai Jehovah. (Bacha Hebrew 9:​12, 24-26.) Ketegal genselan tebus Jesus, semua dosa kitai ulih diampun magang belama iya. Enda ngira harapan kitai ba dunya tauka ba serega, semua kitai ulih nyembah Jehovah ba rumah sembiang rohani Iya. Aram kitai berandauka utai tu.

15. Sapa ke gawa ba laman Langkau Sembiang?

¹⁵ Ayuk. Langkau Sembiang bisi siti laman. Laman nya luas sereta dikelingi pagar. Ba dia, bala imam ngereja pengawa sida. Ba laman nya, bisi siti alta temaga ti besai, alai pemeri tunu diserahka. Pia mega, bisi bisin temaga ke diisi enggau ai ngambika bala imam ulih masu diri sebedau sida ngereja pengawa imam sida. (P-sut. 30:​17-20; 40:​6-8) Rumah Sembiang ke didirika pengudah nya bisi laman luar, alai orang ke ukai imam ulih datai nyembah Petara.

16. Sapa ke gawa ba laman dalam rumah sembiang rohani, lalu sapa ke gawa ba laman luar?

¹⁶ Pekara ti amat. Sebedau sida niki ke serega lalu gawa nyadi imam enggau Jesus, orang ke dipilih ngagai serega gawa enggau tetap ati ba laman dalam rumah sembiang rohani ke ba dunya. Bisin ai ti besai ngingatka sida sereta semua kitai, ngambika mengkang tuchi ba moral enggau ba pengarap. Ba dini alai “seraban orang ti mayuh,” ke enggau setia nyukung bala menyadi Kristus, nyembah Jehovah? Rasul John meda sida “bediri ba mua kerusi diraja.” Endur nya ba laman luar, iya nya ba  dunya. “Ba Rumah Sembiang [Petara], siang malam sida bejalaika pengawa ti tuchi ke Iya.” (Pem. 7:​9, 13-15) Kitai berasai amat besyukur laban Jehovah udah meri kitai peluang ulih nyembah Iya ba rumah sembiang rohani Iya.

17. Nama utai ke ulih diberi kitai ngagai Jehovah?

¹⁷ Kemayaharitu, orang Kristian bisi basa ti besai laban ulih nyembah Jehovah. Sida meri awak, pengering, enggau utai ke dikemisi sida ngambika ulih ngenuluka Perintah Petara. Baka ke dipadah Rasul Paul ngagai orang Kristian ke bebansa Hebrew, kitai ulih “seruran meri puji ngagai Petara. Nya meh pemeri kitai ngagai Petara nengah mulut kitai, lebuh kitai nusui nama Iya ba mua orang mayuh.” (Heb. 13:15) Nyadi, lebuh kitai enggau naka ulih gawa ke Jehovah, kitai nunjukka diri beterima kasihka basa ke dikembuan kitai laban ulih nyembah Jehovah.

18. Nitihka Hebrew 10:​22-25, nama utai ke patut seruran digaga kitai, lalu nama utai ke patut seruran dikingatka kitai?

¹⁸ Bacha Hebrew 10:​22-25. Nyauka ba pengujung surat Paul ngagai orang Kristian ke bebansa Hebrew, Paul nulis pasal utai ke patut seruran digaga kitai lebuh kitai nyembah Jehovah. Nya nyengkaum besampi ngagai Jehovah, nginjil ngagai orang bukai, begempuru, sereta meransang pangan diri, “kelebih agi lebuh [kitai] meda hari [Jehovah] nya nyau semak.” Nyauka ba pengujung bup Pemandang, siku melikat Jehovah madah: “Sembah meh Petara!” (Pem. 19:10; 22:9) Iya nyebut utai tu dua kali, kena nunjukka pengawa tu amat penting. Arapka semua kitai seruran ingatka semua utai ke udah dipelajarka kitai pasal rumah sembiang rohani Jehovah sereta nyaga peluang kitai ke ulih nyembah Petara kitai, Jehovah!