Tanya ari Pemacha
Maya ba menua puang, kati orang Israel bisi pemakai ke bukai kelimpah ari manna enggau burung puyuh?
Pemakai utama orang Israel maya sida diau ba menua puang pengelama 40 taun, iya nya manna. (P-sut. 16:35) Pia mega, bisi dua kali, Jehovah meri sida burung puyuh nyadika pemakai. (P-sut. 16:12, 13; P-pau. 11:31) Taja pia, orang Israel bisi pemakai ke bukai taja pan enda mayuh.
Ambika chunto, kekadang Jehovah ngiring bala nembiak Iya ngagai “endur alai sida tau nirika kem.” Endur nya bisi pemakai sereta ai ke ulih diirup. (P-pau. 10:33) Siti ari endur nya ba Elim. “Endur nya bisi dua belas iti mata ai, enggau tujuh puluh pun kayu engkerema.” Pun-pun kayu nya engka pun kurma. (P-sut. 15:27) Bup Plants of the Bible madahka, pun kurma “tumbuh ba mayuh endur. Pun kurma nya pun kayu ti pemadu mayuh dikena nyadika pemakai ba padang pasir. Ari pun kurma nya, orang tau ngulihka pemakai, minyak, sereta nyadika endur belindung ke bejuta iku orang.”
Orang Israel mega engka bisi ngetu ba endur ke bisi ai ti besai, tauka oasis, ke dikumbai Feiran kemayaharitu. Endur nya sebagi ari Wadi Feiran. Nitihka bup Discovering the World of the Bible, “pemanjai wadi tauka lebak sungai tu 130 kilometer. Wadi tu siti ari wadi ti pemadu panjai, pemadu manah, sereta pemadu tebilang ba Sinai.” Bup nya mega madahka: “Enti sesiku orang bejalai 45 kilometer ari nanga sungai nya, iya deka datai ba Oasis Feiran. Oasis nya kira-kira 610 meter atas paras tasik, lalu pemanjai iya 4.8 kilometer. Endur nya penuh enggau pun kayu engkerema, lalu amat manah dipeda nyentukka iya dibandingka enggau taman Eden. Pengelama beribu taun, mayuh orang udah datai ditu ketegal endur tu bisi beribu iti pun kurma.”
Pun kurma ba oasis di Feiran
Lebuh ninggalka menua Ejip, orang Israel bisi mai tekang tepung, sereta mangkuk ke dikena ngenyak tepung. Sida mega engka bisi mai sekeda bijirin sereta minyak. Endang amat, semua utai tu enda ulih tan lama. Sida mega bisi mai “raban bedus, kambin enggau sapi.” (P-sut. 12:34-39) Ketegal gaya ba menua puang amat mencabar, mayuh jelu engka mati. Sekeda ari jelu nya engka diempa orang Israel. Jelu ke bukai engka diserah nyadika korban, indah ngagai petara ti pelesu. a (SKR. 7:39-43) Taja pia, orang Israel agi bisi sekeda raban jelu tupi. Kitai ulih nemu tu ari utai ti disebut Jehovah ngagai bala nembiak Iya lebuh sida enda ngasika Iya. Ku Iya: “Bala anak kita deka nyadi pengibun bedus ba menua puang tu pengelama 40 taun.” (P-pau. 14:33, NWT) Ari jelu tupi sida, sida engka bulih ai tusu sereta sekeda dagin. Tang, tu tentu enda chukup kena ngintu kira-kira tiga juta iku orang pengelama 40 taun. b
Ari ni bala jelu bulih pemakai enggau ai irup? c Maya nya, bisi mayuh agi ai ujan sereta utai tumbuh ba menua puang. Bup Pemahaman Alkitab Jilid 1 madahka, 3,500 taun kelia, “bisi mayuh agi ai ba endur alai orang Israel nya enti dibandingka enggau kemayaharitu. Kitai nemu tu laban bisi mayuh lebak ti dalam sereta udah rangkai ba dia. Suba, lebak tu sungai. Tu nunjukka, suba bisi chukup ai ujan kena ngasilka sungai.” Taja pia, menua puang nya endur ti ngenakutka sereta nadai utai. (U-dat. 8:14-16) Enti Jehovah enda ngena kereja ajih nyediaka ai, orang Israel enggau bala jelu tupi sida tentu mati.—P-sut. 15:22-25; 17:1-6; P-pau. 20:2, 11.
Moses madah ngagai orang Israel, Jehovah meri sida manna nyadika pemakai, ngambika sida nemu ‘mensia ukai beridup makai roti aja, tang beridup ba genap leka jaku ti pansut ari mulut Jehovah.’—U-dat. 8:3.
a Bup Kudus bisi madahka dua situasi alai bala jelu dibunuh nyadika korban ngagai Jehovah ba menua puang. Kesatu, maya bala imam dilantik. Kedua, maya Pengerami Paska. Dua iti pengawa tu nyadi ba taun 1512 S.M., kira-kira setaun pengudah orang Israel ninggalka menua Ejip.—Lew. 8:14–9:24; P-pau. 9:1-5.
b Semak pengujung 40 taun orang Israel diau ba menua puang, sida ngerampas beratus ribu iku jelu pengudah perang. (P-pau. 31:32-34) Taja pia, sida agi makai manna nyentuk ngagai sida tama ngagai Menua ti Udah Disemaya.—Jos. 5:10-12.
c Kitai ulih ngumbai bala jelu enda makai manna, laban Jehovah ngasuh bala nembiak Iya ngumpul manna nitihka penyampau ke diguna tiap iku orang. Iya nadai nyebut pasal bala jelu.—P-sut. 16:15, 16.
