Bala menyadi lelaki ba Bethel udah gawa lebih ari setaun kena nirika stesen radio WBBR ba Staten Island, New York City. Keterubah iya, sida mutung pun kayu. Udah nya, sida ngaga siti rumah ti besai alai bala pekereja diau, sereta siti agi bengunan kena nyimpan perengka. Pengudah nembuka pengawa nya, sida berengkah ngiga perengka ngambika ulih naburka program ba radio. Tang sida napi sekeda penanggul.

Bala menyadi bisi penanggul masang antena utama ke stesen radio nya. Pemanjai antena nya 91 meter. Antena nya patut digantung ba entara dua batang tiang kayu. Pemanjai tiap iti tiang kayu nya 61 meter. Keterubah kali sida ngereja nya, sida gagal. Tang ketegal sida arapka tulung ari Jehovah, sida nyau mujur. Calvin Prosser, ke gawa ba projek nya madahka: “Enti sema kami mujur masang antena nya maya terubah kali, kami engka nyadi sumbung.” Tang bala menyadi muji Jehovah laban udah nulung sida. Taja pia, sida bisi penanggul ke bukai.

Maya nya, pengawa nabur program ba radio utai ti amat baru, lalu enda senang ngulihka perengka ke diguna. Taja pia, bala menyadi tetemuka transmitter 500-watt secondhand ke digaga orang enda jauh ari endur nya. Ari ke meli mikrofon, sida ngena mikrofon ari talipun biasa. Ba siti malam maya bulan Februari, bala menyadi nguji semua perengka tu. Sida begunaka siti program ke ulih dimainka ba radio. Nyadi, sida nyanyi lagu Perintah Petara. Siku ari bala menyadi nya, Ernest Lowe, madahka utai ti lucu ke nyadi sehari nya. Maya sida benung belagu, sida  nerima kol ari Hakim Rutherford. b Iya ninga sida belagu ba radio iya di Brooklyn, kira-kira 25 kilometer penyauh ari sida.

Ku Menyadi Rutherford: “Badu agi kita belagu! Bunyi kita belagu nyau baka mayau!” Ketegal sida berasai amat malu, sida enggau jejampat ngetuka program nya. Tang ari utai ke nyadi nya, sida nemu pengawa sida mujur, lalu stesen radio nya udah sedia dikena.

Kena 24 Februari 1924, stesen radio nya naburka program ti keterubah. Menyadi Rutherford madahka, stesen radio nya deka dikena ngereja pengawa ke diberi Raja Jesus Kristus ke sida. Iya mega madahka tuju stesen radio nya digaga, iya nya kena nulung semua orang meretika ajar Bup Kudus, sereta sedar reti timpuh alai kitai benung idup.

Program keterubah nya amat mujur. Stesen radio tu dikena pengelama 33 taun kena naburka program nembiak Jehovah.

Ba Julai 1924, Nembiak Bup Kudus begempuru ba siti konvensyen di Columbus, Ohio. Bala menyadi datai ari serata dunya. Sida ningaka cheramah dalam bansa jaku Arab, English, Perancis, Jerman, Greek, Hungary, Itali, Lithuania, Polish, Russia, Ukraine, sereta bansa jaku-bansa jaku Scandinavia. Orang ulih ninga sekeda ari cheramah tu ba radio. Lalu bala menyadi ngasuh surat khabar tempatan nulis pasal program konvensyen tiap hari.

Kena Hari Empat, 24 Julai, lebih ari 5,000 iku menyadi Kristian pansut nginjil ba endur alai konvensyen nya dipejalaika. Sida nyadung nyauka 30,000 iti bup sereta ngepunka beribu iti pengawa belajarka Bup Kudus. Menara Jaga ngumbai sehari nya “begian konvensyen ti pemadu ngagaka ati.”

Kena Hari Lima, 25 Julai, ba siti ari cheramah iya, Menyadi Rutherford enggau berani macha siti dokumen ke madahka pasal penyai bala tuai pengarap. Iya madahka, bala tuai politik, tuai pengarap, sereta orang bebisnis nagang orang ari belajarka pemendar pasal Perintah Petara, iya nya Perintah ke deka dikena Petara merekatka mensia. Iya mega madah pasal penyalah sida ke nyukung Liga Bangsa-Bangsa sereta  ngumbai nya chara Petara merintah dunya. Bala Nembiak Bup Kudus begunaka pemerani kena ngenataika pesan tu ngagai orang bukai.

Pengudah nya, siti artikel ba majalah Menara Jaga madahka, konvensyen ba Columbus nya udah negapka pengarap bala menyadi. Sida berani agi nginjil taja pan napi sakal. Leo Claus, ke enggau konvensyen nya ngenang baru: “Pengudah konvensyen nya, kami amat gagit ati deka bekunsika pesan tu ngagai endur alai kami nginjil.”

Ba bulan Oktober, Nembiak Bup Kudus berengkah nyadung bejuta iti salin surat mit Ecclesiastics Indicted. Surat mit nya ngundan pesan ke dibacha Menyadi Rutherford pasal penyai bala tuai pengarap. Ba Cleveland, Oklahoma, Amerika Serikat, Frank Johnson udah tumu abis nyadung surat mit iya. Iya patut nganti 20 minit da agi sebedau bala menyadi ngambi iya. Tang endur iya nganti nya enda selamat laban endur nya tebuka. Orang ke diau ba kawasan nya benung ngiga iya laban sida ringat enggau pengawa nginjil iya ba dia. Nyadi, Menyadi Frank ngelalaika diri ba gerija semak dia. Gerija nya kusung, nyadi iya ninggalka surat mit ba Bup Kudus paderi sereta ba tiap iti endur duduk. Udah nya, iya pansut ari gerija nya enggau jampat. Ketegal iya agi bisi awak, iya ngabas dua iti agi gerija, lalu ngereja utai ti sama.

Udah nya, Frank enggau jampat pulai baru ngagai endur iya patut betemu enggau bala menyadi. Iya belalai ba belakang stesen minyak lalu beratika orang ke benung ngiga iya. Bala orang nya deriba mansa stesen nya, tang sida nadai meda iya. Sepengudah orang nya mupuk, bala menyadi ke benung nginjil semak dia, datai ngambi Frank, lalu sida pan mupuk.

Ku siku ari menyadi lelaki nya ngenang: “Lebuh kami ka ninggalka endur nya, kami mansa tiga iti gerija nya. Kami meda kira-kira 50 iku orang bediri ba depan tiap iti gerija. Bisi sekeda orang benung macha surat mit nya, lalu ke bukai benung nunjukka surat nya ngagai paderi. Kami mupuk ari endur nya ba maya ti chun, sebedau penanggul nyadi. Kami besyukur laban Jehovah nyaga kami. Iya mega nulung kami nemu nama utai ke patut digaga ngambika kami ulih nusui pesan nya lalu enda ditangkap.”

Bala Nembiak Bup Kudus ba menua bukai mega nginjil enggau berani. Ba utara Perancis, Józef Krett nginjil ngagai pekereja lumbung ke datai ari Poland. Iya diatur meri siti cheramah ke betajuk “Pengangkat ari Mati Enda Lama Da Agi.” Lebuh bala menyadi nyadung surat jemputan ngagai orang ba bandar nya, siku paderi tempatan nangkan orang ba gerija iya ngambika enda datai. Tang jaku tangkan nya bisi asil ti enda dijangka. Lebih ari 5,000 iku orang datai ngagai cheramah nya, nyengkaum paderi nya empu. Menyadi Józef mai paderi nya ngetanka pengarap iya, tang paderi nya enggai. Pengudah cheramah nya, Menyadi Józef meri semua litaricha ke dikemisi iya ngagai orang ke datai laban sida amat deka nemu pasal Jaku Petara.—Amo. 8:11.

Menyadi Claude Brown ngagai siti endur ke dikumbai Ghana ba Afrika kena nginjil Berita Manah. Ketegal iya meri mayuh cheramah sereta nyadung mayuh litaricha, pemendar ulih dikerembaika enggau jampat ba menua nya. Siku ari orang ke datai ngagai cheramah Menyadi Claude nya John Blankson, ke benung belajar  kursus farmasi. Iya tekala nya sedar iya udah tetemuka pemendar. Ku John ngenang baru: “Pemendar ngasuh aku amat gaga ati, lalu aku bejaku pasal nya ngagai mayuh orang ba sekula aku.”

John udah belajar, Bup Kudus nadai kala nyebut Petara nya Triniti. Nyadi bisi sekali, iya ngagai gerija lalu nanya paderi pasal ajar nya. Paderi nya nyadi ringat lalu merak: “Nuan ukai orang Kristian, nuan enggi Sitan! Pansut nuan!”

Lebuh John pulai rumah, iya nulis surat ngagai paderi nya lalu mai iya ngetanka ajar Triniti ba depan orang mayuh. Paderi nya ngasuh John ngagai opis cikgu ba endur alai John belajar. Ba dia, cikgu nya nanya John enti iya amat udah nulis surat ngagai paderi nya.

Ku John nyaut: “Au, amat, bisi aku nulis.”

Cikgu nya ngasuh John nulis surat minta ampun ngagai paderi nya. Ku John nulis:

“Tuan, cikgu aku bisi ngasuh aku nulis surat minta ampun ngagai nuan. Lalu aku sedia deka nulis surat nya enti nuan ngaku nuan ngajar ajar ti salah.”

Cikgu nya tekenyit lalu nanya: “John, amat nuan ka nulis nya?”

“Au, nya aja meh ka ditulis aku.”

“Nuan deka dibuai ari sekula tu. Nuan enda ulih terus ba sekula tu enti nuan terus ngelaban paderi agama ke disukung perintah.”

“Tang cikgu . . . lebuh nuan ngajar kami lalu kami enda faham sekeda utai, endaka kami nanya nuan mega?”

“Au.”

“Cikgu, nya meh utai ke nyadi. Paderi nya ngajar kitai Bup Kudus, lalu aku nanya iya siti tanya. Enti iya enda ulih nyaut tanya nya, nama kebuah aku patut minta ampun ngagai iya?”

Pengujung iya, John ulih terus belajar ba sekula nya, lalu enda ibuh nulis surat minta ampun.

Pasal pengawa ke udah digaga ba taun 1924, majalah Menara Jaga madahka: “Kitai setuju enggau utai ke dipadah David: ‘Nuan ngasuh aku kering beperang.’ (Masmur 18:39) Utai ke nyadi ba taun tu amat meransang kitai. Tu ketegal kitai udah meda Jehovah nulung kitai ba pengawa Iya . . . Bala nembiak Iya ke tetap ati . . . enggau gaga ati nginjil pasal Berita Manah.”

Ba ujung taun nya, bala menyadi ngaga pelan deka nirika siti agi stesen radio. Stesen radio nya didirika ba Chicago, Amerika Serikat. Stesen tu diberi nama WORD, ke mai reti jaku, laban sida deka nusui Jaku Petara ba radio. Kali tu, sida ngena perengka ti manah agi, ngambika orang ke diau jauh, indah orang ke diau ba utara Kanada, ulih ninga pasal pesan Perintah Petara.

Ba taun 1925, Jehovah nulung bala menyadi faham agi penerang ti baru pasal Pemandang bagi 12. Ketegal penemu ti baru nya, sekeda orang badu agi nyembah Jehovah. Tang mayuh orang gaga ati laban ulih meretika agi utai ke nyadi ba serega, lalu baka ni utai nya bisi kesan ngagai nembiak Petara ba dunya.