MUSIK nya siti utai ti amat penting ba budaya orang Israel. Bup Kudus suah nyebut pasal orang ke nebah perengka musik sereta orang ke nyanyi lagu. Kira-kira satu persepuluh Bup Kudus nya lagu. Ambika chunto, bup Masmur, Pelandai Solomon, sereta Sabak Kenang ditulis ngambika dipelaguka. Siti bup pasal pengidup ba jeman Bup Kudus madahka, orang Israel ngena musik ba mayuh aktiviti ba pengidup sida.

Musik ba pengidup besehari-sehari. Orang Israel mantaika asai ati sida nengah lagu. (Isa. 30:29) Bala indu betanda lalu belagu enggau gaga ati sambil nebah tamborin ba pengawa penting, baka ba pengerami, lebuh menang ba perang, sereta lebuh raja dilantik. (P-ulu. 11:34; 1 Sam. 18:​6, 7; 1 Raj. 1:​39, 40) Orang Israel mega nyanyi lagu kena mantaika penusah ati sida lebuh bisi orang mati. (2 Ban. 35:25) Endang terang, orang Israel amat rinduka musik.

Bala raja Israel rinduka musik. Raja Saul mai David ngagai istana iya ngambika nebah belikan ke iya. (1 Sam. 16:​18, 23) Udah nya, lebuh David nyadi raja, iya ngaga perengka musik ti baru, nulis lagu ti ngerinduka ati, sereta ngatur orkestra, iya nya seraban orang ke nebah perengka musik, ba Rumah Sembiang Jehovah. (2 Ban. 7:6; Amo. 6:5) Lalu Raja Solomon milih lelaki enggau indu belagu ke iya ba istana.—P-jar. 2:8.

Orang Israel ngena musik nyembah Jehovah. Bisi 4,000 iku lelaki nebah perengka musik ba Rumah Sembiang di Jerusalem. (1 Ban. 23:5) Sida nebah simbal, perengka musik ti betali, belikan, sereta terumpit. (2 Ban. 5:12) Taja pan sida landik nebah perengka musik, tang bisi orang bukai mega ke nyembah Jehovah ngena musik. Ba pejalai sida ngagai Jerusalem kena ngintu pengerami, mayuh orang Israel belagu. Sida belagu Masmur 120 ngagai 134. Lalu nitihka utai ke ditulis orang Judah, orang Israel nyanyi sekeda ari Masmur a maya ngintu Pengerami Paska.

Kemayaharitu, musik agi penting ke bala nembiak Petara. (Jas. 5:13) Kitai belagu kena muji Jehovah. (Eps. 5:19) Musik nyerakupka kitai enggau bala menyadi Kristian. (Kol. 3:16) Musik mega ngeringka kitai lebuh kitai napi penusah. (SKR. 16:25) Musik nya siti chara ngayanka pengarap sereta pengerindu kitai ngagai Jehovah.