Ruang depan nya sebagi ari pintu penama ngagai Endur ti Kudus ba Rumah Sembiang. Nitihka Bup Kudus Salin Dunya Baru ke dikeluarka sebedau taun 2023, “pemanjai ruang depan nya 20 kiubit, sama enggau pemesai buka Rumah Sembiang nya empu. Peninggi ruang nya 120.” (2 Ban. 3:​4, NWT) Salin Bup Kudus ke bukai mega madahka, peninggi ruang depan nya “120 kiubit.” Reti iya, peninggi nya nyauka sama enggau siti menara ke tinggi iya 53 meter.

Taja pia, Bup Kudus Salin Dunya Baru ke dichelak ba taun 2023, madah pasal ruang depan Rumah Sembiang Solomon: “Peninggi iya 20 kiubit,” tauka kira-kira 9 meter. a Peratika beberapa iti kebuah ubah tu digaga.

Peninggi ruang depan nya enda disebut ba 1 Raja 6:3. Ba ayat nya, Jeremiah nulis pasal pemanjai enggau pemesai ruang depan, tang iya nadai nyebut pasal peninggi ruang depan nya. Udah nya, ba 1 Raja bagi 7, iya nulis enggau silik pasal utai bukai ke ngalitka ati ba Rumah Sembiang nya. Ambika chunto, baka Tasik Temaga, 10 iti kerita temaga, sereta dua iti tiang temaga ke ba luar ruang depan. (1 Raj. 7:​15-37) Enti peninggi ruang depan nya amat lebih ari 50 meter sereta tinggi agi ari begian Rumah Sembiang ke bukai, nama kebuah Jeremiah nadai nyebut nama-nama pasal nya? Beratus taun pengudah nya, pakar sejarah orang Yahudi nulis, peninggi ruang depan enda setinggi begian Rumah Sembiang Solomon ke bukai.

Bala pakar kakang ati sekalika dinding Rumah Sembiang ulih nyukung ruang depan ke peninggi iya 120 kiubit. Ba jeman kelia, bengunan tinggi ke digaga ari batu bata, baka pintu penama rumah sembiang ba Ejip, ngembuan buka ti besai ba baruh lalu buka nya majak mit ba atas. Tang Rumah Sembiang Solomon bebida. Bala pakar pechaya, tebal dinding ba Rumah Sembiang nya enda lebih ari 6 kiubit tauka 2.7 meter. Pakar sejarah reka bentuk, Theodor Busink, madahka: “Bepelasarka penebal dinding [pintu penama Rumah Sembiang], [peninggi] ruang depan enda patut 120 kiubit.”

Ayat ba 2 Bansa Israel 3:4 engka salah dikupi. Sekeda manuskrip jeman kelia madahka, peninggi ruang depan nya “120.” Tang manuskrip bukai ke ulih dikearapka, baka Codex Alexandrinus abad kelima enggau Codex Ambrosianus abad keenam, madahka peninggi ruang depan nya “20 kiubit.” Nama kebuah bisi bida ti besai? Dalam jaku Hebrew, leka jaku “ratus” enggau “kiubit” nyauka sama. Nyadi, penulis Adat engka ngupi “ratus dua puluh” ari ke ngupi “kiubit dua puluh.”

Endang amat, kitai berusaha deka faham semua penerang tu sereta enggau bebendar deka nulis utai ti betul pasal Rumah Sembiang Solomon. Tang utai ti pemadu penting nya, utai ti digambarka Rumah Sembiang nya, iya nya rumah sembiang rohani. Kitai amat gaga ati laban Jehovah mai semua nembiak Iya nyembah Iya ba rumah sembiang rohani nya!—Heb. 9:​11-14; Pem. 3:12; 7:​9-17.