1. Nama kebuah Saksi-Saksi Jehovah nya orang ke gaga ati? (Peda gambar ba pun artikel.)

SAKSI-SAKSI JEHOVAH nya orang ke gaga ati. Lebuh sida begulai, sekalika ba gempuru, gempuru besai, tauka beserumpu makai, sida berandau sereta ketawa enggau pangan diri. Nama kebuah sida gaga ati? Nya ketegal sida ngelala Jehovah, “Petara ti gaga ati.” Sida nyembah Iya sereta neladan Iya. (1 Tim. 1:11, NW; Mas. 16:11) Jehovah nya Pun pengaga ati. Nya alai Iya deka kitai gaga ati, lalu Iya meri kitai mayuh kebuah ulih gaga ati.—U-dat. 12:7; P-jar. 3:12, 13.

2, 3. (a) Nama reti gaga ati? (b) Nama kebuah tusah deka gaga ati?

² Baka ni enggau nuan? Kati nuan gaga ati? Gaga ati reti nya berasai nyamai, puas ati tauka rindu enggau pengidup nuan. Bup Kudus madahka, orang ke diberekat Jehovah ulih gaga ati. Tang nama kebuah nya tusah deka gaga ati ba dunya kemayaharitu?

 ³ Lebuh napi utai ti balat nekan, kitai endang tusah deka gaga ati. Ambika chunto, kitai tusah deka gaga ati lebuh orang ti dikesayau kitai udah nadai tauka dibuai ari gerempung, lebuh tikah enda mujur ketegal sarak, tauka lebuh kitai lenyau kereja. Pia mega engka tusah deka gaga ati lebuh nadai pemaik ba rumah ketegal seruran belaya, lebuh orang ke sama gawa tauka sama kelas enggau kitai ngeleseka kitai, lebuh kitai diperinsa tauka dijil ketegal nyembah Jehovah. Kitai mega tusah deka gaga ati lebuh napi penanggul ba pengerai, penyakit ti raya, tauka kitai engka merinsa ketegal balat ditekan pemerinsa dalam ati. Tang anang enda ingat, Jesus Kristus rindu merindang sereta ngasuh orang gaga ati. (Mat. 11:28-30) Ari Ajar ba atas Bukit, Jesus bisi nyebut sekeda kualiti ke ulih nulung kitai gaga ati indah lebuh kitai napi mayuh penanggul ketegal diau ba dunya Sitan.

4, 5. Nama ulih digaga kitai ngambika gaga ati sereta mengkang gaga ati?

⁴ Utai ti keterubah ke disebut Jesus nya amat beguna. Ku iya madahka: “Gaga ati meh orang ke nemu diri begunaka Petara, laban Perintah serega endang enggi sida.” (Mat. 5:3, NW) Enti kitai nemu diri begunaka Petara, kitai patut nemu pasal Petara lalu kitai begunaka tulung sereta iring ari Iya. Baka ni kitai ulih ngayanka diri begunaka Petara? Enggau belajarka Bup Kudus, ngasika Petara, lalu ngemeratka sembah ngagai Iya ba pengidup kitai. Enti kitai ngereja semua utai nya, kitai ulih gaga ati. Pengarap kitai pasal semaya Petara ke deka nyadi enda lama da agi deka majak nyata. Lalu ‘pengadang ti ngagaka ati’ ke dipadah dalam Bup Kudus deka meransang kitai.—Tit. 2:13.

⁵ Enti kitai deka gaga ati enda ngira nama utai nyadi ba pengidup, kitai enda tau enda terus ngeringka kaul kitai enggau Jehovah. Rasul Paul nulis: ‘Seruran gaga ati dalam Tuan. Aku nandu nya baru: awakka kita gaga ati!’ (Plp. 4:4) Ngambika ulih nyadi pangan rapat Jehovah, kitai begunaka penemu-dalam ari Iya. Ku Bup Kudus madahka: ‘Gaga ati meh orang ke nyadi orang ke bepenemu-dalam, ke nemu meretika utai. Orang ke bepegai erat ba penemu-dalam deka diau lantang senang. Penemu-dalam deka meri sida pengidup.’—J-lam. 3:13, 18.

6. Nama utai bukai ke enda tau enda digaga kitai ngambika mengkang gaga ati?

⁶ Taja pia, ngambika kitai ulih mengkang gaga ati, kitai patut bebendar ngena utai ti dipelajarka kitai ari Bup Kudus. Jesus amat ngemeratka utai nya lebuh iya madahka: ‘Enti kita nemu utai tu, kita gaga ati enti kita ngereja nya.’ (Jhn. 13:17; bacha James 1:25.) Tu beguna bendar enti kitai deka bisi kaul ti manah enggau Petara lalu mengkang gaga ati. Tang baka ni kitai ulih gaga ati lebuh  bisi mayuh utai ke ngenusahka ati kitai? Aram kitai beratika nama agi utai bukai ke disebut Jesus dalam Ajar ba atas Bukit.

7. Baka ni orang ke tusah ati ulih gaga?

⁷ ‘Gaga ati meh orang ke tusah ati, laban sida deka diperindang.’ (Mat. 5:4) Kitai engka berunding: ‘Baka ni orang ke tusah ati ulih gaga?’ Ditu, Jesus ukai nyebut pasal semua orang ke tusah ati. Mayuh orang ke jai tusah ati, ketegal napi penanggul ti balat “ba hari ti penudi” ke “mayuh macham penusah deka nyadi.” (2 Tim. 3:1) Tang sida semina berundingka diri empu aja lalu ukai berundingka Jehovah. Nya alai sida enda ngemansangka kaul enggau Iya, lalu sida enda ulih gaga ati. Jesus nyebut pasal orang ke nemu diri begunaka Petara. Sida tusah ati laban sida meda mayuh amat orang nulak Petara tauka enggai nitihka chara idup ti dikedekaka Petara. Sida mega ngaku diri bedosa, lalu sida meda penusah ke nyadi ba dunya tu. Jehovah beratika orang ti amat tusah ati, merindang sida nengah Bup Kudus, lalu meri sida pengelantang sereta pengidup ti meruan belama iya.—Bacha Esekiel 5:11 ari nota kaki *; 9:4.

8. Baka ni penelap ulih nulung nuan gaga ati?

⁸ ‘Gaga ati meh orang ke nelap, laban sida deka bempu dunya.’ (Mat. 5:5) Baka ni penelap ulih nulung nuan gaga ati? Mayuh orang kasar sereta enda beradat, lalu tu ulih ngujungka mayuh penanggul. Tang lebuh sida belajar pemendar, sida berubah lalu nyadi “mensia ti baru.” Diatu sida ‘ngerasukka penyiru, penelap, ati ti baruh, ati ti nemu nunduk ngagai pangan diri, enggau ati ti liat.’ (Kol. 3:9-12) Ketegal nya sida bisi pemaik, bisi kaul ti manah enggau orang, lalu sida gaga ati. Pia mega Bup Kudus besemaya, sida deka “bempu dunya.”—Mas. 37:8-10, 29.

9. (a) Nama reti utai ku Jesus lebuh iya madah pasal orang ke nelap deka “bempu dunya”? (b) Nama kebuah “orang ke lapar sereta auska pengelurus” ulih gaga ati?

⁹ Nama reti utai ku Jesus lebuh iya madah pasal orang ke nelap deka “bempu dunya”? Orang ti dipilih ke serega deka bempu dunya lebuh sida merintah nyadi raja sereta imam. (Pem. 20:6) Bejuta-juta iku orang ke nadai pengadang ke serega deka bempu dunya lebuh sida dikemendarka idup belama iya dia. Sida deka nyadi sempurna lalu bisi pemaik sereta gaga ati. Jesus mega nyebut pasal sida tu, lebuh iya madahka: ‘Gaga ati meh orang ke lapar sereta auska pengelurus.’ (Mat. 5:6) Sida ti keran ke pengelurus deka puas ati lebuh Jehovah muai semua penyai. (2 Pet. 3:13) Ba dunya baru, orang ke lurus deka gaga ati sereta badu agi tusah ati ketegal penyai ke digaga orang.—Mas. 37:17.

10. Nama reti kasihka orang?

¹⁰ ‘Gaga ati meh orang ke kasihka orang, laban sida deka nerima pengasih.’ (Mat. 5:7) Kasihka orang reti nya manah ati, nelap, sereta bisi penyiru, iya nya, berasai sinu ngagai orang ke merinsa. Taja pia, pengasih ukai semina ngembuan asai ati ti nelap aja. Bup Kudus madahka pengasih nyengkaum ngereja siti-siti utai kena nulung orang.

11. Nama ulih dipelajarka kitai ari sempama pasal seiku orang Samaria ti manah ati?

 ¹¹ Bacha Luke 10:30-37. Sempama Jesus pasal seiku orang Samaria ti manah ati ngambarka enggau manah reti kasihka orang. Orang Samaria nya berasai sinu sereta kasihka orang ti merinsa, lalu tu meransang iya deka nulung orang nya. Pengudah Jesus madahka sempama nya, ku iya: “Mupuk meh nuan lalu kereja baka nya.” Nya alai kitai engka nanya diri empu: ‘Kati aku ngereja utai ti sama? Kati aku ngereja utai ti digaga orang Samaria nya? Lebuh orang merinsa, ulih aku ngereja sekeda utai kena nulung sida? Ambika chunto, ulih aku nulung orang ke tuai ba eklisia, balu, tauka nembiak ke ngembuan apai indai ti enda nyembah Jehovah? Ulih aku “meransang orang” ke tusah ati ngambika sida berasai lantang?’—1 Tes. 5:14; Jas. 1:27.

12. Nama kebuah kitai gaga ati lebuh kitai kasihka orang?

¹² Nama kebuah kitai gaga ati lebuh kitai kasihka orang? Lebuh kitai ngayanka pengasih ngagai orang, kitai meri, lalu Jesus madahka meri deka ngasuh kitai gaga ati. Siti agi kebuah nya kitai nemu diri ngerinduka ati Jehovah. (SKR. 20:35; bacha Hebrew 13:16.) Ku Raja David madah pasal orang ke ngayanka pengasih: ‘Jehovah deka nyaga sida lalu ngidupka sida. Iya deka ngasuh sida diau lantang senang di menua.’ (Mas. 41:1, 2) Enti kitai ngayanka pengasih sereta penyiru ngagai orang, kitai mega deka nerima pengasih ari Jehovah lalu kitai ulih gaga ati belama iya.—Jas. 2:13.

13, 14. Nama kebuah nya beguna bendar “tuchi ati”?

¹³ Jesus madahka: ‘Gaga ati meh orang ke tuchi ati, laban sida deka meda Petara.’ (Mat. 5:8) Ngambika ulih nyadi orang ke tuchi ati, kitai patut mengkang tuchi tauka beresi ba runding enggau pengingin kitai. Tu beguna bendar enti deka sembah kitai diterima Jehovah.—Bacha 2 Korint 4:2; 1 Tim. 1:5.

¹⁴ Orang ke tuchi ati ulih ngembuan kaul ti manah enggau Jehovah, ke madahka: ‘Gaga ati meh orang ke masu baju panjai sida.’ (Pem. 22:14) Nama reti sida “masu baju panjai sida”? Ba  orang Kristian ti dipilih ke serega, Jehovah ngumbai sida tuchi, laban Iya meri sida pengidup ti enda nemu mati di serega, lalu sida deka gaga ati belama iya. Ba orang mayuh ke bisi pengadang idup ba dunya, tu reti iya Jehovah ngemendarka sida nyadi pangan Iya laban Iya ngumbai sida nya orang ti lurus. Bup Kudus madahka “sida udah masu baju panjai sida, lalu ngaga baju nya burak ngena darah Anak Domba.”—Pem. 7:9, 13, 14.

15, 16. Baka ni orang ke tuchi ati ulih ‘meda Petara’?

¹⁵ Jehovah madahka: “Nadai orang ulih idup enti iya meda mua Aku.” (P-sut. 33:20) Baka ni orang ke tuchi ati ulih ‘meda Petara’? Dalam jaku Gerika “meda” ulih mai reti ngambarka, meretika, tauka ngelala. Nya alai ‘meda Petara’ reti nya meretika sapa Petara nya ke bendar sereta rinduka kualiti Iya. (Eps. 1:18) Jesus enggau sempurna neladan kualiti Petara, nya alai iya ulih nyebut: ‘Barang sapa udah meda aku, udah meda Apai.’—Jhn. 14:7-9.

¹⁶ Nambahka nya, kitai ‘meda Petara’ lebuh ngasaika bantu ari Iya ba pengidup kitai. (Jop 42:5) Kitai mega ulih “meda,” tauka beberatka semaya ti ngerinduka ati ari Petara ngagai orang ke mengkang tuchi sereta enggau taluk nyembah Iya. Lalu sida ti dipilih ke serega ulih meda Jehovah enggau nyengala lebuh sida diangkatka idup baru, lalu niki ke serega.—1 Jhn. 3:2.

17. Nama kebuah orang ke ngereja utai ti pulaika pemaik ulih gaga ati?

¹⁷ Jesus udah nya madahka: “Gaga ati meh orang ke ngereja utai ti pulaika pemaik.” (Mat. 5:9, NW) Lebuh kitai bebendar deka bebaik enggau orang, kitai ulih gaga ati. Murid Jesus ke benama James nulis: “Buah pengelurus ditanam ba maya ti bisi pemaik, ke orang ti keran deka ngulihka pemaik.” (Jas. 3:18, NW) Nya alai enti nuan tusah deka begulai enggau diri sebilik tauka orang ba eklisia, minta Jehovah nulung nuan ngambika ulih ngereja utai ti pulaika pemaik. Udah nya, Jehovah deka meri nuan roh kudus Iya kena nulung nuan ngayanka kualiti Kristian, lalu nuan deka gaga ati. Kitai enda ibuh nganti orang bukai ngereja nya, tang kitai empu dulu bebaik enggau orang. Jesus nekanka tu lebuh iya nyebut: “Nya alai lebuh kita deka meri pemeri kita ba alta, lalu teingatka menyadi lelaki tauka menyadi indu kita bisi enda nyamai ati ngagai kita, tinggalka pemeri kita dia di mua alta, bebaik dulu enggau iya, udah nya baru kita mansang lalu meri pemeri kita.”—Mat. 5:23, 24.

18, 19. Nama kebuah orang Kristian ulih gaga ati taja pan sida diperinsa?

¹⁸ ‘Gaga ati meh kita lebuh orang mechat kita lalu merinsaka kita, lalu nyebut semua macham utai ti bula ngelaban kita ketegal aku.’ Nama reti ku Jesus? Ku iya agi: “Lantang sereta  gaga meh kita, laban upah ti besai udah disedia ke kita di serega, laban nya mega chara orang merinsaka sida nabi ke dulu ari kita.” (Mat. 5:11, 12) Lebuh bala rasul disipat sereta diasuh badu nginjil, “sida rasul angkat ari balai Kunsil, sida lalu rami gaga ati.” Amat, sida ukai gaga ati ketegal disipat. Tang sida gaga ati “udah dikira patut kena perinsa ketegal” nama Jesus.—SKR. 5:41.

¹⁹ Kemayaharitu, nembiak Jehovah mega betan enggau ati ti lantang lebuh sida diperinsa ketegal nama Jesus. (Bacha James 1:2-4.) Baka bala rasul, kitai ukai deka diperinsa tauka dipediska. Tang enti kitai mengkang tetap ati ngagai Jehovah, Iya deka meri kitai pemerani ke diguna kena betan. Peratika utai ke nyadi ngagai Henryk Dornik enggau menyadi lelaki tuai iya. Kena Ogos 1944, seduai iya dianjung ngagai kem alai ngetan orang tangkap. Orang ke merinsaka seduai iya madahka: “Endang enda ulih ngumbuk seduai iya ngereja nama-nama utai. Seduai iya gaga ati enti diperinsa.” Henryk madahka: “Taja pan aku enggai mati, tang natka pemerinsa ketegal berani sereta taluk ngagai Jehovah mai pengaga ati ke aku.” Ku iya agi: “Majak besampi ngerapatka kaul aku enggau Jehovah, lalu Iya nunjukka Diri endang Penyaup ti tau dikeandalka.”

20. Nama kebuah kitai gaga ati nyembah ‘Petara ti gaga ati’?

²⁰ Jehovah nya “Petara ti gaga ati.” Nya alai, enti kitai ngerinduka ati Iya, kitai ulih gaga ati taja pan diperinsa, disakal diri sebilik, sakit, tauka majak tuai. (1 Tim. 1:11, NW) Kitai mega ulih gaga ati laban Petara kitai ke “enda kala bula,” udah besemaya deka meri mayuh utai ti ngerinduka ati ngagai kitai. (Tit. 1:2) Lebuh Jehovah ngamatka semaya Iya, kitai nadai agi ingatka penanggul ti ditapi kitai diatu. Nambahka nya, kitai enda ulih ngambarka pemanah pengidup sereta pengaga ati ti deka diasaika kitai ba Paradais! Amat, kitai deka ngasaika pengaga ati enggau pemaik ti belimpah.—Mas. 37:11.