1, 2. (a) Nama kebuah chara Jehovah megai nembiak Iya enda sama enggau chara mensia ti bekuasa megai sida? (b) Nama deka dikerandauka kitai ba artikel tu?

ORANG ti tinggi pangkat suah bekuasa atas orang bukai tauka nekan sida. (Mat. 20:25; P-jar. 8:9) Tang Jehovah enda kala baka nya! Taja pan Iya ti Pemadu Bekuasa ba dunya raya, Iya ibuhka mensia ti enda sempurna. Iya siru sereta ibuhka asai ati enggau utai ti diguna kitai. Iya nemu kitai enda sempurna lalu bisi pengurang, nya alai Iya enda minta lebih ari utai ke ulih dikereja kitai.—Mas. 103:13, 14.

² Ba Bup Kudus, kitai nemu Jehovah balat ibuhka nembiak Iya. Aram kitai berandauka tiga iti chunto: Kesatu, Jehovah enggau siru nulung Samuel ke agi nembiak ngenataika pesan pasal pengawa ngakim ngagai Imam Besai Eli. Kedua, Jehovah sabar enggau Moses lebuh Moses ngasaika diri enda ulih mai bansa Israel pansut ari menua Ejip. Lalu ketiga, Jehovah nunjukka Diri ibuhka orang Israel lebuh sida pansut ari menua Ejip. Nama dipelajarka kitai pasal Jehovah ari tiga iti chunto tu, lalu baka ni kitai ulih neladan Iya?

3. Nama utai nyelai ke nyadi ba Samuel, lalu nama tanya ke engka ditanya kitai? (Peda gambar ba pun artikel.)

³ Samuel berengkah gawa ba langkau sembiang lebuh iya agi mit. (1 Sam. 3:1) Bisi sekali lebuh malam hari, pengudah iya tinduk, bisi utai ti amat nyelai nyadi. * (Peda nota kaki.) (Bacha 1 Samuel 3:2-10.) Samuel ninga orang ngangauka nama iya. Iya ngumbai Imam Besai Eli ke udah tuai ngangauka iya. Nya alai iya angkat lalu belanda ngagai Eli, ku iya: “Nuan bisi ngangauka aku; tu aku.” Tang ku Eli nyaut: “Nadai aku ngangauka nuan.” Pengudah utai ti sama nyadi dua kali da agi, Eli nyau nemu Petara ke ngangauka Samuel. Nya alai Eli ngajar Samuel utai ke patut disebut, lalu Samuel nitihka utai ku iya. Nama kebuah Jehovah enda madah tumu ngagai Samuel pasal Iya ke ngangauka Samuel? Bup Kudus nadai madahka kebuah. Tang nya engka ketegal Jehovah ibuhka asai ati Samuel.

4, 5. (a) Nama digaga Samuel lebuh Jehovah ngasuh iya ngenataika pesan ngagai Eli? (b) Nama ulih dipelajarka kitai pasal Jehovah ari cherita ke bekaul enggau Samuel?

⁴ Bacha 1 Samuel 3:11-18. Adat Jehovah ngasuh orang ke nembiak bebasaka orang ti tuai agi umur, kelebih agi sida ke bisi kuasa. (P-sut. 22:28; Lew. 19:32) Nya alai tusah deka ngambarka Samuel ke agi nembiak mupuk ngagai Eli maya pagi hari, lalu enggau berani ngenataika pesan berat pasal pengawa ngakim ari Petara. Bup Kudus madahka Samuel “takut madahka genera nya ngagai Eli.” Taja pia, Petara enggau terang madah ngagai Eli pasal Iya ti ngangauka Samuel. Ketegal nya, Eli enda ngasuh Samuel ngelalaika utai ti dipadah Petara. Samuel nitihka jaku Eli lalu “madahka semua utai ngagai iya.”

⁵ Pesan tu ukai utai ti enda dijangka. Dulu agi ari nya “siku nabi” udah ngenataika pesan ti sama ngagai Eli. (1 Sam. 2:27-36) Ari cherita tu kitai nemu, Jehovah nya Petara ti ibuhka orang sereta bepenemu.

6. Nama ulih dipelajarka kitai ari chara Petara nulung Samuel ke agi nembiak?

⁶ Kati nuan nya orang ke nembiak? Enti ya, cherita pasal Samuel nunjukka Jehovah meretika penanggul sereta asai ati nuan. Nuan engka malu sereta tusah deka bebida ari orang ke serambau enggau nuan tauka deka nginjil ngagai orang ke besai tuai. Nuan ulih pechaya Jehovah deka nulung nuan. Nya alai besampi ngagai Iya lalu padahka utai ti amat diasaika nuan ba ati. (Mas. 62:8) Pikirka pasal sekeda chunto dalam Bup Kudus pasal nembiak bukai ke baka Samuel. Lalu berandau enggau bala menyadi Kristian ke serambau enggau nuan tauka ke tuai agi ke udah napi penanggul ti sebaka enggau enggi nuan. Sida engka madah ngagai nuan pasal Jehovah ke udah nulung sida ngena chara ti enda dijangka.

7, 8. Baka ni Jehovah ngayanka Diri amat ibuhka asai ati Moses?

⁷ Lebuh Moses beumur 80 taun, Jehovah  meri iya pengawa ti mar: ngelepaska bansa Israel ari nyadi ulun di menua Ejip. (P-sut. 3:10) Pengawa tu engka ngenyitka ati Moses, laban iya udah 40 taun nyadi pengibun bedus di menua orang Midian. Moses madahka: “Sapa aku tu? Baka ni ku aku ulih betemu enggau raja? Lalu baka ni ku aku ulih mai orang Israel pansut ari menua Ejip?” Ku Jehovah madah ngagai Moses: “Aku deka meruan enggau nuan.” (P-sut. 3:11, 12) Jehovah mega madahka, bala tuai orang Israel deka “mendingka” Moses. Tang Moses agi nanya: “Kati enti orang Israel enda arapka aku, lalu enggai mendingka utai ti disebut aku?” (P-sut. 3:18; 4:1) Moses engka ngumbai Jehovah nya salah! Tang Jehovah sabar enggau Moses. Iya indah meri Moses kuasa dikena ngaga kereja ajih. Bup Kudus madahka, Moses nya mensia ti keterubah ke ngembuan kuasa baka nya.—P-sut. 4:2-9, 21.

⁸ Taja pia Moses meri siti agi kebuah. Iya madahka diri enda lanchar bejaku. Nya alai Petara madah ngagai iya: “Aku deka nulung nuan bejaku, lalu Aku deka madahka utai ti patut disebut nuan.” Kati Moses arapka jaku Petara nya? Enda, iya ngasuh Petara nganjung orang bukai! Udah nya Jehovah ringat. Tang Iya agi ibuhka asai ati Moses, nya alai Iya nganjung Aron bejaku ngarika Moses.—P-sut. 4:10-16.

9. Baka ni ulah Jehovah ti sabar sereta siru nulung Moses nyadi tuai ti manah?

⁹ Nama dipelajarka kitai pasal Jehovah ari cherita nya? Laban Jehovah nya Petara ti Pemadu Bekuasa, Iya ulih ngena kuasa Iya ngemba sereta ngasuh Moses ngasi. Tang Jehovah sabar sereta siru, lalu Iya madahka Diri deka enggau nembiak Iya ti baruh ati. Kati chara tu mujur? Au! Moses nyadi tuai ti manah ke nembiak Petara. Moses enda kasar lalu iya ibuhka orang  bukai, sama baka ke digaga Jehovah ngagai iya.—P-pau. 12:3.

10. Nama penguntung enti kitai ibuhka orang bukai baka Jehovah?

¹⁰ Nama ulih dipelajarka kitai kemayaharitu? Enti sema nuan nya laki, apai, tauka tuai gempuru, nuan bekuasa atas orang bukai. Ketegal tu, nuan patut neladan Jehovah nyadi orang ke mentas, sabar sereta ibuhka bini, anak, enggau orang bukai ba eklisia. (Kol. 3:19-21; 1 Pet. 5:1-3) Enti nuan neladan Petara Jehovah enggau Jesus Kristus, nuan nulung orang bukai senang datai sereta berandau enggau nuan, lalu nuan ulih meransang sida. (Mat. 11:28, 29) Nuan mega deka nyadi teladan ti manah ke sida.—Heb. 13:7.

11, 12. Baka ni Jehovah nulung orang Israel berasai likun sereta selamat lebuh Iya mai sida pansut ari menua Ejip?

¹¹ Engka lebih ari tiga juta iku orang Israel pansut ari menua Ejip ba taun 1513 sebedau Kristus ada. Dalam raban nya bisi bala anak mit, orang ke tuai, lalu sekeda nya engka sakit tauka bisi penimpang. Raban ti besai nya begunaka Ketuai ti ibuhka orang sereta ngembuan pemereti ati. Lalu nya meh utai ke digaga Jehovah nengah Moses. Ketegal tu, orang Israel berasai likun lebuh sida pansut ari kengka menua ti ditemu sida.—Mas. 78:52, 53.

¹² Baka ni Jehovah nulung nembiak Iya berasai likun sereta selamat? Iya ngatur sida baka seraban soldadu lebuh sida pansut ari menua Ejip. (P-sut. 13:18) Ketegal sida diatur baka tu, sida ulih meda Jehovah nya ke ngatur semua utai. Jehovah mega meri sida remang lebuh siang hari lalu “penampak daun api” lebuh malam hari ngambika sida nemu Iya enggau sida, ngiring sereta ngelindung sida. (Mas. 78:14) Lalu bansa Israel begunaka peransang ke baka tu kena napi utai ke deka nyadi.

13, 14. (a) Baka ni Jehovah ngelindung orang Israel lebuh sida ba Tasik Mirah? (b) Baka ni Jehovah ngayanka Diri kering agi ari orang Ejip?

¹³ Bacha Pemansut 14:19-22. * Uji gambarka, nuan bisi enggau orang Israel. Bala soldadu Ejip ba belakang nuan, lalu  Tasik Mirah ba mua nuan. Nuan enda ulih kini-kini. Udah nya Petara nyelamatka kita. Tiang remang ke bisi ba mua nuan mindah ke belakang, entara nuan enggau orang Ejip. Diatu sida dalam pemetang, tang nuan enggau orang Israel bisi penampak! Udah nya nuan meda Moses ngedarka jari iya ngagai tasik lalu ribut ti deras ari timur datai, muka jalai nyentuk ke seberai. Nya alai nuan enggau diri sebilik sereta bala jelu tupi kita, ulih bejalai nengah tasik enggau sida ke bukai enggau chara ti teratur. Nuan alit ati laban tanah enda luchak sereta lichin. Tanah nya rangkai sereta kering, nya alai iya nyamai alai bejalai. Ketegal tu, indah orang ke pemadu lubah bejalai pan ulih meraka ke seberai enggau selamat.

¹⁴ Bacha Pemansut 14:23, 26-30. Lebuh utai tu benung nyadi, raja Ejip ke sumbung sereta beli, berengkah ngagai nuan enggau orang Israel. Udah nya Moses ngedarka jari iya baru ngagai tasik, lalu ai ba tisi sepiak-sepiak ngelamun tasik nya baru. Ai nya ngelemaska raja Ejip enggau bala soldadu iya. Semua sida mati magang!—P-sut. 15:8-10.

15. Nama ulih dipelajarka nuan ari cherita pasal Jehovah ke nyelamatka orang Israel?

¹⁵ Cherita tu mega ngajar kitai siti agi utai pasal Jehovah. Iya Petara ti teratur, lalu kualiti tu nulung kitai berasai likun sereta selamat. (1 Kor. 14:33) Baka pengibun bedus ke sayau lalu nyaga bedus iya, Jehovah ngintu nembiak Iya ngena chara ti patut. Iya nyaga pengelikun sida sereta  ngelindung sida ari munsuh. Tu ngasuh ati andal sereta merindang kitai seraya kitai majak semak enggau pengujung dunya.—J-lam. 1:33.

16. Baka ni kitai tau bulih penguntung ari mansik baru chara Jehovah nyelamatka orang Israel?

¹⁶ Kemayaharitu, Jehovah agi nyaga semua nembiak Iya. Iya nulung sida nyaga kaul enggau Iya lalu ngelindung sida ari munsuh. Iya mega deka terus ngereja nya lebuh penusah besai ti deka datai enda lama da agi. (Pem. 7:9, 10) Nya alai enda ngira nembiak Petara nya tuai tauka biak, bepengerai tauka bisi penimpang, sida enda irau tauka takut lebuh maya penusah ti besai. * (Peda nota kaki.) Sida deka berani! Sida deka ingatka jaku Jesus: “Bediri lalu angkatka pala kita, laban pengelepas kita nyau semak.” (Luk. 21:28) Indah lebuh sida diserang Gok, iya nya seraban mensia ke kering agi ari raja Ejip, nembiak Jehovah pechaya Iya deka ngelindung sida. (Esk. 38:2, 14-16) Nama kebuah? Laban Iya Petara ti enda berubah. Iya deka sekali da agi nunjukka Diri nya Penyelamat ti bisi pengerindu sereta ibuhka nembiak Iya.—Isa. 26:3, 20.

17. (a) Baka ni kitai tau bulih penguntung lebuh belajarka cherita ba Bup Kudus pasal chara Jehovah nyaga nembiak Iya? (b) Nama deka dikerandauka kitai ba artikel pengudah tu?

¹⁷ Ba artikel tu, kitai udah meda sekeda chunto pasal Jehovah ke ibuhka orang sereta siru lebuh Iya nyaga, ngiring, sereta nyelamatka nembiak Iya. Seraya nuan belematika sekeda cherita pasal chara Iya nyaga nembiak Iya, uji belajarka utai baru pasal Jehovah ari beratika utai ti bedau ditemu nuan sebedau tu. Seraya nuan belajar mayuh agi pasal kualiti Jehovah ti badas, pengerindu enggau pengarap nuan ke Iya deka kering agi. Ba artikel pengudah tu, kitai deka belajarka chara kitai ulih neladan Jehovah maya ngayanka diri ibuhka diri sebilik, bala menyadi Kristian ba eklisia, sereta orang ke ditemu kitai lebuh nginjil.