LEBUH nuan deka nemu jam, nama digaga nuan? Nuan engka meda jam ba jari tauka jam ba dinding. Maya nya nuan meda, sejam 30 minit udah ngalih tengah hari. Nama deka dipadah nuan enti pangan nuan nanya: “Pukul berapa jam diatu?”

Tu bepanggai ba alai nuan diau. Ambika chunto, nuan engka madahka, “Pukul 1:30” tauka “Pukul 13:30.” Ba sekeda endur, nuan engka nyebut, “Setengah jam sebedau pukul dua,” reti nya 30 minit agi deka pukul dua.

Baka ni orang maya jeman Bup Kudus netapka jam? Sida mega bisi mayuh chara. Bup Kudus jaku Hebrew ngena leka jaku baka “pagi,” “tengah hari,” “siang hari,” sereta “lemai.” (Pemungkal 8:11; 19:27; 43:16; Ulang Adat 28:29; 1 Raja 18:26) Tang kadang-kadang Bup Kudus ngena leka jaku ke nyemetak agi.

Maya jeman orang Israel, seruran bisi bala jejaga maya malam hari. Sida magi malam hari ngagai tiga gintir jaga. Ba Pengulu 7:19, kitai macha pasal bala jejaga bejalaika pengawa “ba urung tengah malam.” Urung maya Jesus ada, orang Judah magi malam hari ngagai empat gintir jaga, baka ke digaga orang Gerika enggau orang Rome.

Bup Injil suah nyebut pasal jam maya malam hari. Ambika chunto, jam keempat nya “ba entara pukul tiga enggau pukul enam pagi,” Jesus bejalai ba atas ai mansang ngagai bala murid iya ke nepan perau. (Matthew 14:25) Lalu Jesus madahka sempama tu: “Enti orang ke bempu rumah nemu kemaya penchuri deka datai, iya tentu deka bejaga lalu enda nejuka rumah iya dirumpak.”—Matthew 24:43.

Jesus nyebut keempat-empat gintir jaga lebuh iya ngasuh bala murid iya bejaga laban sida “enda nemu kemaya tuan rumah nya deka datai, nemuka lebuh lemai hari, tauka ba urung tengah malam, tauka sebedau dini hari, tauka ba urung rerak tawas.” (Mark 13:35) Gintir jaga kesatu, maya “lemai hari,” nya berengkah ari mata panas padam ngagai urung jam semilan malam. Gintir jaga kedua, maya “urung tengah malam,” berengkah urung jam semilan malam ngagai tengah malam. Gintir jaga ketiga, “sebedau dini hari,” tauka “lebuh manuk mengkukuk,” berengkah ari tengah malam ngagai jam tiga pagi. Engka nya meh maya manuk ke mengkukuk, lebuh Jesus ditangkap. (Mark 14:72) Gintir jaga keempat, maya “urung rerak tawas,” berengkah urung jam tiga pagi nyentuk ngagai mata panas niki.

Nya alai, taja pan orang maya jeman Bup Kudus nadai perengka dikena netapka jam baka enggi kitai kemayaharitu, tang sida bisi chara kena netapka jam ke siang hari enggau malam hari.