1. Baka ni ulah dunya ti berundingka diri empu ulih ngachau pemaruh ati kitai?

NAMA KEBUAH kitai tusah deka nitihka utai ti dipelajar ari Bup Kudus? Siti kebuah nya laban kitai patut baruh ati enti deka ngereja utai ti ngena. Ba “hari ti penudi,” endang tusah deka baruh ati laban mayuh orang ke begulai enggau kitai “rinduka diri empu aja, angkunka duit, bejaku begah, sumbung,” sereta “enda nemu nagang diri.” (2 Tim. 3:1-3, NW) Ketegal kitai nembiak Petara, kitai nemu ulah ke bansa tu enda manah, tang orang ke ngembuan ulah ke baka nya dipeda mujur sereta nyamai diau. (Mas. 37:1; 73:3) Kitai engka berunding: ‘Kati bisi penguntung enti aku ngenuluka utai ti diguna orang bukai ari enggi diri empu? Kati orang agi bebasaka aku enti aku ngereja siti-siti utai enggau baruh ati?’ (Luk. 9:48) Enti kitai nejuka ulah dunya ti berundingka diri empu tu nguingka kitai, tu ulih ngelemika kaul kitai enggau bala menyadi Kristian lalu ngasuh orang tusah deka nemu sekalika  kitai orang Kristian tauka ukai. Tang lebuh kitai belajar sereta neladan chunto nembiak Petara ke baruh ati, kitai deka bulih asil ti manah.

2. Nama ulih dipelajarka kitai ari nembiak Petara ke tetap ati kelia?

² Nama nulung nembiak Petara ke tetap ati kelia nyadi pangan Iya? Baka ni sida ngagaka ati Iya? Dini sida bulih pengering kena ngereja utai ti ngena? Lebuh macha pasal chunto sida ba Bup Kudus lalu belamatika utai ti dibacha kitai, pengarap kitai deka kering agi.

3, 4. (a) Baka ni Jehovah ngajar kitai? (b) Nama kebuah semina ngembuan penemu aja enda chukup enti deka pengarap kitai kering?

³ Jehovah nyediaka utai ti diguna kena ngeringka pengarap kitai. Kitai bulih jaku lalau enggau latih ti manah ari Bup Kudus, litaricha Kristian kitai, jw.org, Berita JW, sereta gempuru ninting minggu enggau gempuru besai kitai. Tang Jesus madahka kitai ukai semina begunaka penemu aja. Iya madahka: ‘Pemakai aku nya ngereja peneka Iya ke ngirumka aku, lalu nembuka pengawa Iya.’—Jhn. 4:34.

⁴ Ngereja peneka Petara nya baka pemakai ba Jesus. Tubuh kitai berasai nyamai sereta bepengerai lebuh makai pemakai ti manah. Pia mega, ngereja peneka Petara ngasuh kitai berasai nyamai lalu pengarap kitai kering. Ambika chunto, kala nuan berasai lelak lebuh enggau gempuru sebedau nginjil tang pengudah pulai nginjil nuan berasai nyamai sereta gaga ati?

5. Nama penguntung enti kitai bepenemu-dalam?

⁵ Enti kitai ngereja utai ti diasuh Jehovah, kitai nya orang ke bepenemu-dalam. (Jas. 3:13) Lalu mayuh utai manah nyadi ba sida ke ngembuan penemu-dalam. “Nadai utai ti dikinginka nuan ulih dibandingka enggau nya. . . . Orang ke bepegai erat ba penemu-dalam deka diau lantang senang. Penemu-dalam deka meri sida pengidup.” (J-lam. 3:13-18) Ku Jesus madah: “Enti kita nemu utai tu, kita bulih berekat enti kita ngereja sida.” (Jhn. 13:17) Murid Jesus deka gaga ati seagi-agi sida ngereja utai ti diasuh Jesus. Idup sejalai enggau ajar sereta teladan Jesus nya jalai pengidup sida.

6. Nama kebuah kitai patut majak nitihka utai ti dipelajarka kitai?

⁶ Kemayaharitu, kitai mega patut majak nitihka utai ti dipelajarka kitai. Pikirka seiku mekanik ke bisi kereban, perengka, sereta penemu. Semua utai tu ulih nulung iya nyadi mekanik ti landik enti iya ngena sida. Iya engka bisi peneleba bepuluh taun, tang iya patut terus ngena utai ti udah dipelajarka iya enti iya agi deka nyadi mekanik ti landik. Pia mega, lebuh keterubah iya belajarka pemendar, kitai gaga ati laban nitihka utai ti dibacha ari Bup Kudus. Tang kitai enda tau enda nitihka utai ti diajar Jehovah ninting hari ngambika meruan lantang.

7. Nama utai ti enda tau enda digaga kitai ngambika ulih belajar ari chunto ke bisi ba Bup Kudus?

⁷ Ba artikel tu, kitai deka berandauka beberapa iti pekara ke engka ngasuh kitai tusah deka mengkang baruh ati. Kitai deka nemu baka ni sida ke tetap ati kelia meruan baruh ati. Tang kitai ukai semina macha pasal sida aja. Kitai enda tau enda berundingka utai ti dibacha sereta ngena nya ba pengidup.

8, 9. Nama dipelajarka kitai pasal pemaruh ati Paul ari Kereja Rasul 14:8-15? (Peda gambar ba pun artikel.)

⁸ Petara deka semua orang “diselamatka, lalu nemu penemu pasal pemendar.” (1 Tim. 2:4) Nama runding nuan pasal semua orang ke bedau belajarka pemendar? Rasul Paul nginjil ngagai orang Judah ke udah nemu pasal Jehovah. Tang iya mega nginjil ngagai orang ke nyembah petara pelesu. Nginjil ngagai sida nguji pemaruh ati Paul. Nama kebuah?

⁹ Lebuh rasul Paul keterubah iya bejalaika pengawa nyadi pengerintis seberai tasik, seduai iya Barnabas mupuk ke Listra. Orang Likonia ke diau dia ngumbai Paul seduai Barnabas nya petara lalu ngangau seduai iya ngena nama petara pelesu sida, Seus enggau Hermis. Kati Paul seduai Barnabas gaga ati enggau jaku puji nya? Kati seduai iya ngumbai nya ubah ti manah ketegal udah diperinsa ba dua buah menua ti dilawa seduai iya sebedau tu? Kati seduai iya ngumbai semua utai nya deka nulung mayuh agi orang ningaka berita manah? Enda! Seduai iya tusah ati lalu enggau nyawa ti inggar madahka: “Nama kebuah kita ngereja utai tu? Kami duai tu mensia baka kita.”—SKR. 14:8-15.

10. Nama kebuah Paul seduai Barnabas enda ngasaika diri pama agi ari orang Likonia?

¹⁰ Lebuh Paul enggau Barnabas madahka seduai iya mega mensia, reti nya seduai iya ngumbai diri enda sempurna. Seduai iya ukai ngumbai chara seduai iya nyembah Jehovah nya sama enggau chara orang Likonia. Petara nganjung seduai iya nyadi pengerintis seberai tasik. (SKR. 13:2) Paul seduai Barnabas udah diiri ngena roh kudus lalu bisi pengadang ti badas. Tang nya ukai kebuah seduai iya ngasaika diri pama agi ari orang bukai. Seduai iya nemu, bala orang nya mega tau bulih pengadang ke serega enti sida nerima berita manah.

11. Baka ni kitai ulih baruh ati baka Paul lebuh kitai nginjil?

¹¹ Ditu bisi siti chara kitai mandangka diri baruh ati baka Paul. Kitai enda ngumbai pengawa nginjil tauka utai ke dijapai kitai ketegal saup ari Jehovah ngasuh kitai pama agi ari orang bukai. Kitai ulih nanya diri empu: ‘Baka ni asai ati aku pasal orang ba kandang endur nginjil? Kati aku bechiping enggau sekeda raban orang?’ Di serata dunya, gerempung Jehovah nguji ngiga orang ke deka ningaka berita manah. Sekeda Saksi indah bebendar belajarka bansa jaku tauka adat ti enda tentu dipebasa orang bukai. Tang bala Saksi enda ngasaika diri manah agi ari orang ke endur sida nginjil. Sida nguji deka meretika tiap iku orang ngambika ulih nulung mayuh orang nerima pesan Perintah Petara.

12. Baka ni Epapras mandangka diri ibuhka orang bukai?

¹² Chara bukai kitai mandangka diri baruh ati nya enggau besampika bala menyadi Kristian ke “udah nerima pengarap baka enggi [kitai].” (2 Pet. 1:1) Tu meh utai ti digaga Epapras. Bup Kudus semina nyebut pasal iya tiga kali aja. Lebuh Paul ditan ba rumah iya di Rome, iya nulis surat ngagai bala menyadi Kristian di Kolosi. Ku Paul madah pasal Epapras: “Iya seruran bebendar amat besampika kita.” (Kol. 4:12) Epapras amat ngelala bala menyadi Kristian nya, sereta balat ibuhka sida. Paul ngumbai Epapras nya orang “ke  sama ditan dalam rumah jil,” nya alai Epapras bisi penanggul iya empu. (Plm. 23) Taja pia Epapras agi ibuhka utai ti diguna orang bukai, lalu ngereja sekeda utai kena nulung sida. Iya besampika bala menyadi Kristian, lalu kitai pan ulih baka nya, indah nyebut nama sida dalam sampi. Sampi ke baka nya bisi asil ti manah.—2 Kor. 1:11; Jas. 5:16.

13. Baka ni nuan ulih neladan Epapras lebuh nuan besampi?

¹³ Uji pikirka nama orang ke tau disampika nuan. Nuan engka nemu bala pangan ba eklisia tauka diri sebilik ke benung napi penanggul. Sida engka tusah deka ngaga pemutus tauka ngelaban penguji. Nuan mega tau besampika bala menyadi Kristian ke bisi disebut nama ba jw.org enggau Berita JW. Nuan mega tau besampika sida ke udah mati orang ti dikesayau, sida ke selamat ari pengerusak alam tauka perang ke nyadi apin lama ti udah, sereta sida ke napi penanggul ba penatai pemisi. Bisi mayuh bala menyadi Kristian ke begunaka sampi ari kitai. Lebuh kitai besampika sida, kitai ukai semina nunjukka diri berundingka utai ti diguna diri empu aja tang mega utai ti diguna orang bukai. (Plp. 2:4) Jehovah ningaka sampi ke baka nya!

14. Nama kebuah Jehovah nya peninga ti pemadu badas?

¹⁴ Siti agi chara kitai mandangka diri baruh ati nya enggau nyadi peninga ti manah. James 1:19 ngasuh kitai “jampat mending.” Jehovah nya peninga ti pemadu badas. (P-kal. 18:32; Jos. 10:14) Ambika chunto, bacha randau ke bisi ba Pemansut 32:11-14. (Bacha.) Taja pan Jehovah enda begunaka penemu ari Moses, tang Iya ngawakka Moses madahka asai ati diri. Enti sema orang ke kala meri penemu ti salah mansutka runding iya, deka nuan ningaka utai ti disebut iya lalu  udah nya nitihka utai ku iya? Indah Jehovah ningaka sampi semua mensia ti disebut ngena pengarap.

15. Baka ni kitai ulih neladan Jehovah bebasaka orang bukai?

¹⁵ Tanya diri empu: ‘Enti Jehovah ulih enggau ati ti baruh mendingka Abraham, Rachel, Moses, Josua, Manoah, Elijah, enggau Hesekiah, endaka aku pan patut baka nya? Ulih aku bebasa agi ke semua bala menyadi Kristian aku enggau mending sereta nitihka penemu sida? Kati bisi bala menyadi Kristian bukai ba eklisia tauka ba ruang bilik aku ke patut ditulung aku? Nama patut digaga aku?’—P-kal. 30:6; P-ulu. 13:9; 1 Raj. 17:22; 2 Ban. 30:20.

16. Nama digaga Raja David lebuh Simei enda manah enggau iya?

¹⁶ Pemaruh ati mega nulung kitai mandangka ulah ti ulih nagang diri lebuh orang enda manah enggau kitai. (Eps. 4:2) Kitai meda chunto manah pasal utai tu ba 2 Samuel 16:5-13. (Bacha.) Simei, seiku ari kaban belayan Raja Saul, mechat sereta nyerang David enggau bala iya. David ulih ngetuka pengawa Simei nya, tang David natka diri dipechat Simei. Nama kebuah David ulih nagang diri? Kitai ulih nemu nya ari meresa bup Masmur ti ketiga.

17. Nama nulung David nagang diri, lalu baka ni kitai ulih neladan iya?

¹⁷ David nulis bup Masmur ti ketiga lebuh anak iya Absalom nguji deka munuh iya. Maya tu meh Simei nyerang David, tang David tetemuka chara ke nulung iya mengkang sabar. Nama chara nya? Ba Masmur 3:4, kitai macha jaku David: ‘Aku ngangauka Jehovah, lalu Iya nyaut aku ari bukit Iya ti kudus.’ Lebuh orang enda manah enggau kitai, kitai patut besampi baka David. Jehovah deka meri kitai roh kudus Iya ngambika kitai ulih betan. Ulih nuan bebendar agi nagang diri tauka deka agi ngampun lebuh orang enda manah enggau nuan? Kati nuan pechaya Jehovah ibuhka pemerinsa ti ditapi nuan lalu deka nulung sereta merekatka nuan?

18. Nama penguntung ke deka diulih enti kitai nitihka iring ari Jehovah?

¹⁸ Lebuh kitai ngereja utai ti ditemu kitai ngena, kitai deka nyadi orang ti bepenemu-dalam lalu Jehovah deka merekatka kitai. Ba Jaku Dalam 4:7, Bup Kudus madahka: “Penemu-dalam nya utai ti pemadu beguna.” Taja pan penemu-dalam bepelasarka penemu, tang penemu-dalam ukai semina bisi kaul enggau ulih meretika fakta. Penemu-dalam bisi kaul enggau pemutus ke digaga kitai. Indah semut ngayanka diri bepenemu lebuh sida nyimpan bekal nyadika penabat musin chelap. (J-lam. 30:24, 25) Kristus, ke dikumbai ‘penemu-dalam Petara,’ seruran ngereja utai ti ngagaka ati Apai iya. (1 Kor. 1:24; Jhn. 8:29) Petara deka meri kitai upah enti kitai mega mandangka penemu-dalam lebuh milih ngereja utai ti ditemu kitai ngena sereta meruan baruh ati. (Bacha Matthew 7:21-23.) Nya alai bebendar meh nyadika eklisia endur alai semua orang ulih nyembah Jehovah enggau ati ti baruh. Endang begunaka jam sereta ati ti liat deka nitihka utai ti ditemu kitai ngena. Tang ngereja nya mandangka pemaruh ati, lalu pemaruh ati deka nulung kitai gaga ati, diatu sereta belama iya.