1. Baka ni penyembah Jehovah ngayanka diri rinduka pangan diri?

SEMUA penyembah Jehovah di serata dunya nya diri sebilik. Sida iya bala menyadi Kristian ke rinduka pangan diri. (1 Jhn. 4:16, 21) Kadang-kadang sida ngelengkaka sekeda utai ketegal bala menyadi Kristian. Tang kesuah nya, sida ngayanka pengerindu nengah mayuh utai mit ti dikereja ke bala menyadi Kristian. Ambika chunto, sida nyebut utai ti manah tauka siru enggau bala menyadi Kristian sida. Lebuh kitai ibuhka orang bukai, kitai neladan Apai kitai ti di serega.—Eps. 5:1.

2. Baka ni Jesus neladan pengerindu Apai iya?

² Jesus neladan Apai iya enggau badas. Jesus seruran siru enggau orang. Ku iya madahka: ‘Datai ngagai aku semua kita ke lelak ngema utai ti berat, lalu aku deka ngasuh kita belelak.’  (Mat. 11:28, 29) Lebuh kitai neladan Jesus sereta ngayanka diri “siru enggau orang ke seranta,” kitai ngagaka ati Jehovah, lalu kitai mega gaga ati. (Mas. 41:1) Ba artikel tu, kitai deka meda baka ni kitai ulih ngayanka diri ibuhka diri sebilik, bala menyadi Kristian kitai, sereta orang ke ditemu kitai lebuh nginjil.

3. Baka ni laki ulih ngayanka diri ibuhka bini iya? (Peda gambar ba pun artikel.)

³ Sida ke laki patut netapka teladan sereta ngayanka diri ibuhka diri sebilik. (Eps. 5:25; 6:4) Bup Kudus madahka, sida ke laki patut ibuhka bini sereta meretika sida. (1 Pet. 3:7) Laki ke ngembuan pemereti ati nemu, taja pan iya bebida ari bini iya ba mayuh pekara, ukai reti nya iya manah agi ari bini iya. (P-kal. 2:18) Iya ibuhka asai ati bini sereta ngintu iya enggau basa. Ku seiku bini ari menua Kanada madah pasal laki iya: “Iya seruran ibuhka asai ati aku tauka nadai kala nyebut, ‘Nuan enda patut berasai baka nya.’ Iya mega peninga ti manah. Lebuh iya nulung aku ngemetulka runding ba siti-siti pekara, iya ngereja nya enggau siru.”

4. Baka ni laki ngayanka diri ibuhka asai ati bini ari chara iya begulai enggau indu bukai?

⁴ Laki ke ibuhka asai ati bini enda betundi enggau indu bukai tauka bisi pengingin ti enda manah ngagai indu bukai, sekalika enggau indu nya empu, ba media sosial, tauka ba Internet. (Jop 31:1) Laki enda ngena media sosial betundi enggau indu bukai, tauka meda laman web ti enda menuku. Iya meruan taluk ngagai bini ketegal iya sayauka bini, rinduka Jehovah sereta begedika utai ti jai.—Bacha Masmur 19:14; 97:10.

5. Baka ni bini ulih ngayanka diri ibuhka laki?

⁵ Lebuh laki neladan kepala iya, Jesus Kristus, bini deka senang agi “masa” laki. (Eps. 5:24,25, 33) Lalu lebuh bini masa laki, bini deka nguji meretika asai ati laki sereta nelap enggau laki lebuh iya kisuk enggau pekara ba eklisia tauka lebuh iya patut mutarka penanggul. Ku seiku laki di Britain madahka: “Bini aku nemu aku bisi utai nanggul ari beratika ulah aku. Iya deka nitihka prinsip ba Jaku Dalam 20:5, taja pan tu reti nya iya patut nganti ba maya ti ngena “ngauk” runding aku enti aku ulih bekunsika utai nya enggau iya.”

6. Baka ni semua kitai ulih meransang anak siru sereta berundingka orang bukai, lalu nama penguntung ke diulih anak?

⁶ Lebuh apai indai siru enggau pangan diri, sida netapka teladan ti manah ke bala anak. Sida mega patut ngajar anak siru sereta berundingka orang bukai. Ambika chunto, apai indai patut ngerara anak ngambika enda belanda ba Palan Gempuru. Tauka lebuh begulai makai, sida patut ngasuh anak ngawakka orang ke tuai ngambi pemakai dulu. Amat, semua orang ba eklisia ulih nulung sida ke apai indai. Nya alai kitai patut muji anak lebuh iya ngereja utai ti manah, ambika chunto, lebuh iya muka pintu ke kitai. Tu  deka ngagaka ati anak sereta nulung iya nemu ‘gaga ati agi orang ke meri, ari orang ke nerima.’—SKR. 20:35.

7. Baka ni Jesus ngayanka diri ibuhka seiku lelaki ke bengal, lalu nama ulih dipelajarka kitai ari teladan Jesus?

⁷ Nyadi sekali, Jesus di menua Sepuluh buah Nengeri tauka Dekapolis lebuh orang ‘mai ngagai iya siku lelaki ke bengal sereta bisu.’ (Mrk. 7:31-35) Jesus ngeraika iya, tang ukai ba mua orang bukai. Nama kebuah? Laban lelaki nya bengal. Iya engka enda berasai nyamai enggau bala mayuh. Jesus meretika asai ati iya, lalu ‘mai iya ke tisi’ ngagai endur ke nadai orang lalu ngeraika iya dia. Kitai amat enda ulih ngereja kereja ajih, tang kitai patut berundingka utai ti diguna sereta asai ati bala menyadi Kristian kitai lalu ngayanka penyiru ngagai sida. Rasul Paul nulis: “Aram kitai berundingka chara kitai tau nyungkak pangan diri ngayanka pengerindu lalu ngereja pengawa ti badas.” (Heb. 10:24) Jesus meretika asai ati lelaki ke bengal nya lalu siru enggau iya. Endang teladan ti manah ke kitai!

8, 9. Baka ni kitai ulih ngayanka diri ibuhka sida ke tuai sereta ke bisi penimpang? (Beri sekeda chunto.)

⁸ Ibuhka bala menyadi Kristian ke tuai sereta ke bisi penimpang. Utai ti pemadu nyulut ba eklisia Kristian nya pengerindu, ukai pemayuh pengawa ke ulih dikereja. (Jhn. 13:34, 35) Pengerindu nyungkak kitai bebendar nulung bala menyadi Kristian ke tuai tauka bisi penimpang ngagai gempuru sereta nginjil. Kitai nulung sida taja pan enda senang ba kitai tauka sida enda ulih ngereja mayuh utai. (Mat. 13:23) Michael, ke ngena kerusi ruda, beterima kasih ke bantu ari diri sebillik sereta bala menyadi Kristian lelaki ba eklisia. Ku iya madahka: “Ketegal bantu ari sida, aku ulih datai begempuru sereta bejarit nginjil. Aku kelebih agi rindu nginjil ba mua orang mayuh.”

⁹ Ba Betel, bisi bala menyadi Kristian ke tetap ati ti udah tuai tauka bisi penimpang. Bala tuai ti ngemata ke ibuhka sida ngatur sida nginjil nengah surat sereta ngena telefon. Bill, ke beumur 86 taun, nulis surat ngagai orang ke diau jauh, madahka: “Kami ulih nulis surat. Kami beterima kasih ke peluang tu.” Nancy, ke nyauka beumur 90 taun, madahka: “Nulis surat ukai pengawa ke deka menuhka sarung surat aja. Nya bekaul enggau pengawa nginjil. Orang patut nemu pemendar!” Ethel, ke ada ba taun 1921, madahka: “Aku seruran pedis. Bisi maya nya aku tusah deka begari beberapa hari.” Taja pan baka nya, iya rindu nginjil ngena telefon lalu bisi sekeda orang ke patut diabas. Barbara, ke beumur 85 taun, nerangka: “Ketegal pengerai aku enda manah, aku tusah deka bejarit nginjil. Tang nginjil ngena telefon ngasuh aku ulih bejaku enggau orang. Terima kasih, Jehovah!” Kurang ari setaun, seraban bala menyadi Kristian ke tuai enggau sida empat nya ke ari Betel ti sama ngena 1,228 jam ba  pengawa nginjil, nulis 6,265 iti surat, betelefon lebih 2000 kali, lalu meri 6,315 iti litaricha! Kitai pechaya pengawa sida nya ngagaka ati Jehovah!—J-lam. 27:11.

10. Baka ni kitai ulih nulung bala menyadi Kristian bulih mayuh penguntung ari gempuru?

¹⁰ Ibuhka bala menyadi ba gempuru Kristian. Lebuh kitai ibuhka sida, kitai nulung sida bulih mayuh agi penguntung ari gempuru. Baka ni? Siti chara nya datai ba maya ti patut ngambika enda ngachau sida. Kadang-kadang, utai ke nyadi enggau enda dijangka engka ngasuh kitai laun datai. Tang enti kitai suah laun datai, kitai patut mikirka baka ni tu ulih ngachau sida sereta mikirka ubah ke patut digaga kena ngayanka diri ibuhka sida. Kingatka mega, Jehovah enggau Jesus ke mai kitai ngagai gempuru nya. (Mat. 18:20) Kitai ngayanka diri bebasaka sida enti datai ba maya ti udah ditetapka!

11. Nama kebuah menyadi Kristian lelaki ke bisi bagi ba gempuru patut nitihka iring ba 1 Korint 14:40?

¹¹ Enti kitai ibuhka bala menyadi Kristian, kitai nitihka iring ari Bup Kudus: “Semua utai patut dikereja enggau menyana sereta meruan atur magang.” (1 Kor. 14:40) Bala menyadi Kristian lelaki ke bisi bagi ba gempuru nitihka iring tu enti sida abis ba maya di udah ditetapka. Enggau tu, sida ngayanka diri ibuhka pecheramah ke nangkanka sida sereta mega semua orang ba eklisia. Uji pikirka baka ni tu ulih nyadi penanggul ngagai bala bukai enti gempuru laun tembu. Rumah sekeda bala menyadi Kristian nya  jauh. Bisi nya pulai ngena bas. Lalu sekeda nya bisi kaling pengidup ke ngarapka sida pulai ba maya ti patut.

12. Nama kebuah kitai patut bebasa sereta rinduka bala tuai gempuru? (Peda kutak “ Ibuhka Sida ti Ngiring.”)

¹² Sida tuai gempuru bebendar gawa ba eklisia enggau ba pengawa nginjil. Nya alai kitai patut bebasa sereta rinduka sida. (Bacha 1 Tesalonika 5:12, 13.) Nuan tentu beterima kasih ke semua utai ti udah digaga sida ke nuan. Nuan ulih ngayanka tu enggau ngasi sereta nyukung sida, laban ‘sida ngemataka semengat kitai, lalu sida enda tau enda madah ngagai Petara pasal semua pengawa ti udah dikereja sida.’—Heb. 13:7, 17.

13. Nama ulih dipelajarka kitai ari chara Jesus ngintu orang?

¹³ Ku Isaiah madah pasal Jesus: “Iya enggai matahka buluh ti melepi tauka madamka lampu ti kelap-kelap.” (Isa. 42:3) Pengerindu Jesus ke orang meransang iya ngembuan penyinu ati. Iya meretika asai ati orang ti asa sereta lemi baka “buluh ti melepi” tauka “lampu ti kelap-kelap.” Nya alai iya siru sereta sabar enggau sida. Indah bala anak mit pan deka begulai enggau Jesus. (Mrk. 10:14) Kitai amat enda ulih nyagam ati tauka ngajar orang baka Jesus! Tang kitai ulih ngayanka diri ibuhka orang ba kandang alai kitai nginjil ari chara kitai berandau enggau sida, ni maya berandau enggau sida, sereta ni pengelama kitai berandau.

14. Nama kebuah kitai patut mikirka chara kitai berandau enggau orang?

¹⁴ Baka ni kitai patut berandau enggau orang? Bejuta-juta iku orang kemayaharitu “irau ati sereta nadai daya” ketegal orang dagang, orang politik enggau bala tuai pengarap ti enda lurus sereta jai. (Mat. 9:36) Ketegal tu, mayuh orang enda arapka orang bukai sereta nadai pengadang. Nya kebuah leka jaku ke dikena enggau bunyi nyawa kitai patut nunjukka kitai siru sereta ibuhka sida! Mayuh orang deka mendingka pesan ti dibai kitai laban kitai ngena Bup Kudus, kitai rindu sereta bebasaka sida.

15. Nama sekeda chara kitai ulih ngayanka diri ibuhka orang ke ditemu kitai ba kandang alai kitai nginjil?

¹⁵ Bisi mayuh chara kitai ulih ngayanka diri ibuhka orang ke ditemu kitai ba kandang alai kitai nginjil. Kitai patut nanya sekeda tanya enggau chara ti bebasaka orang ke ninga. Mayuh orang ke diau ba endur tu malu, nya kebuah seiku pengerintis lelaki ke nginjil dia nyeliah ari nanya utai ti tau ngasuh orang malu enti sida enda nemu saut ke betul. Iya enda nanya, “Kati nuan nemu nama Petara?” tauka “Kati nuan nemu nama utai ti dikumbai Perintah Petara?” Tang, iya deka nyebut utai baka, “Aku belajar pasal nama Petara ari Bup Kudus. Ulih aku nunjukka sapa nama Iya?” Chara tu engka enda engkeman dikena ba endur bukai, laban orang enggau adat ba siti-siti  endur enda sama. Tang kitai patut seruran siru sereta bebasaka orang ke ditemu kitai ba kandang alai kitai nginjil. Ngambika ulih ngereja tu, kitai patut ngelala sida.

16, 17. Baka ni kitai ulih ngayanka penyiru lebuh mutuska (a) ni maya deka ngelawa orang? (b) pengelama deka berandau enggau sida?

¹⁶ Ni maya kitai patut ngelawa orang? Lebuh kitai nginjil ari pintu ke pintu, orang enda ngadang penatai kitai laban sida nadai ngangau kitai datai. Nya alai endang manah enti kitai datai ba maya sida bisi awak berandau enggau kitai. (Mat. 7:12) Ambika chunto, kati orang ba kandang alai nuan nginjil rindu tinduk lama maya ujung minggu? Nya alai engka nuan ulih berengkah nginjil ba jalai, ba endur orang mayuh, tauka datai ngabas orang ke ulih enggau berandau.

¹⁷ Ni pengelama kitai patut berandau enggau orang? Mayuh orang kisuk, nya alai anang lama berandau, kelebih agi lebuh kitai baru keterubah iya datai. Manah agi enti kitai berandau enda lama aja. (1 Kor. 9:20-23) Lebuh orang beratika kitai nemu pengisuk sida, sida engka deka berandau enggau kitai lebuh kitai datai baru. Enti kitai mandangka kualiti ke datai ari roh kudus Petara, kitai amat orang ke ‘sama bekereja enggau Petara.’ Jehovah indah ulih ngena kitai nulung orang belajarka pemendar!—1 Kor. 3:6, 7, 9.

18. Nama berekat ke deka diulih kitai lebuh kitai ibuhka orang bukai?

¹⁸ Nya alai aram meh kitai enggau naka ulih ngayanka diri ibuhka diri sebilik, bala menyadi Kristian kitai, sereta orang ke ditemu kitai lebuh nginjil. Enggau nya, kitai deka bulih mayuh berekat, diatu sereta dudi hari ila. Baka ke dipadah Masmur 41:1, 2: ‘Gaga ati meh orang ke nemu siru enggau orang ke seranta, laban Jehovah deka nulung sida lebuh sida dituntung penusah. Jehovah deka nyaga sida lalu ngidupka sida. Iya deka ngasuh sida diau lantang senang di menua.’