ARTIKEL DIPELAJAR 38
“Datai Ngagai Aku, . . . Lalu Aku Deka Meri Kita Pengering Baru”
“Datai ngagai aku semua kita ke lelak ngema utai ti berat, lalu aku deka meri kita pengering baru.”—MAT. 11:28, NW.
LAGU 17 “Aku Deka”
DALAM ARTIKEL TU *
1. Nitihka Matthew 11:28-30, nama semaya ke digaga Jesus?
JESUS besemaya ngagai sida ke ningaka iya: “Datai ngagai aku, lalu aku deka meri kita pengering baru.” (Bacha Matthew 11:28, 29 *, 30.) Tu ukai jaku semaya ngapa. Perundingka chunto pasal utai ke digaga Jesus ngagai seiku indu ke merinsa ketegal penyakit ti balat.
2. Nama digaga Jesus ngagai indu ke sakit nya?
2 Indu nya amat begunaka bantu laban udah merinsa pengelama dua belas taun. Iya udah betemu enggau mayuh lutur tang nadai seiku pan ulih ngeraika iya. Nitihka Adat Moses, iya enda tuchi. (Lew. 15:25) Pengudah ninga pasal Jesus ke ulih nyumanka orang ti sakit, iya pan lalu ngiga Jesus. Lebuh iya tetemuka Jesus, iya negu puting baju Jesus, lalu tekala nya iya pan gerai! Jesus ukai semina ngeraika penyakit iya. Lebuh Jesus bejaku enggau iya lalu ngangau iya “anak,” iya ngasaika diri dikerindu sereta dipebasa. Tu tentu ngasuh indu nya berasai dikeringka!—Luk. 8:43-48.
3. Nama tanya ke deka disaut kitai?
3 Peratika, indu nya ke mansang ngagai Jesus. Pia mega kemayaharitu, kitai empu patut “datai ngagai” Jesus. Diatu, Jesus enda agi ngena kereja ajih ngeraika orang ti sakit ke “datai ngagai” iya. Tang, iya ngasuh kitai: “Datai ngagai aku, lalu aku deka meri kita pengering baru.” Ba artikel tu, kitai deka nyaut lima iti tanya: Nama patut digaga kitai ngambika ulih “datai ngagai” Jesus? Nama reti ku Jesus lebuh iya madahka: “Ambi lalu san tangkun aku”? Nama ulih dipelajarka kitai ari iya? Nama kebuah pengawa ke diberi Jesus ngeringka kitai? Lalu baka ni kitai ulih terus ngulihka pengering ari pengawa ke diberi iya?
“DATAI NGAGAI AKU”
4-5. Nama sekeda chara kitai ulih “datai ngagai” Jesus?
4 Siti chara kitai “datai ngagai” Jesus iya nya, enggau naka ulih belajar mayuh pasal utai ti disebut sereta digaga iya. (Luk. 1:1-4) Nadai orang ulih ngereja nya ke kitai. Kitai empu enda tau enda belajar pasal Jesus. Kitai mega “datai ngagai” Jesus lebuh kitai mutus deka dibaptisa sereta nyadi seiku ari murid iya.
5 Siti agi chara kitai “datai ngagai” Jesus iya nya, ngiga bala tuai gempuru lebuh kitai begunaka tulung. Sida nya pemeri ari Jehovah lalu Jesus ngena sida ngintu bedus Jehovah. (Eps. 4:7, 8, 11; Jhn. 21:16; 1 Pet. 5:1-3) Kitai patut dulu minta tulung ari sida. Kitai enda ngarapka sida nemu runding sereta utai ke diguna kitai. Peratika utai ke dipadah seiku menyadi Kristian lelaki ke benama Julian: “Aku badu gawa ba Betel ketegal sakit, lalu seiku ari bakih aku ngasuh aku minta bantu ari tuai gempuru. Keterubah iya, aku ngumbai nya enda ibuh. Tang pengudah dua iku tuai gempuru datai meransang aku, aku nyau nemu tu meh siti ari pemeri ti chukup badas ke kala diterima aku.” Baka seduai iya, tuai gempuru ke taluk nulung kitai nemu “runding Kristus,” iya nya, mereti sereta neladan runding enggau ulah Kristus. (1 Kor. 2:16; 1 Pet. 2:21) Pengawa sida ke datai meransang kitai nya endang siti ari pemeri ti pemadu badas ke diberi sida ngagai kitai.
“AMBI LALU SAN TANGKUN AKU”
6. Nama reti ku Jesus lebuh iya madahka: “Ambi lalu san tangkun aku”?
6 Jesus madahka: “Ambi lalu san tangkun aku.” Tu engka mai reti: “Nunduk ngagai kuasa enggau iring aku,” tauka “aram sama ngesan tangkun aku, lalu kitai sama gawa ke Jehovah.” Enda ngira ni bagi rambai jaku ke dikena, utai ku Jesus pasal tangkun nunjukka kitai patut bekereja ke Tuan kitai.
7. Nitihka Matthew 28:18-20, nama pengawa ke udah diberi ngagai kitai? Nama ulih diandalka kitai?
7 Kitai nerima kangau Jesus lebuh kitai nyerahka pengidup diri ngagai Jehovah lalu dibaptisa. Kangau tu ke semua orang. Jesus enda nulak orang ke keran deka nyembah Petara. (Jhn. 6:37, 38) Jehovah meri Jesus pengawa nusui berita manah ngagai semua orang, lalu kitai bisi peluang sama ngereja pengawa nya. Semua murid Jesus diberi peluang ngereja pengawa ke diasuh Jehovah gaga Jesus. Kitai andalka Jesus seruran bisi nulung kitai ngereja pengawa nya.—Bacha Matthew 28:18-20.
“BELAJAR ARI AKU”
Ngeringka orang bukai baka ke digaga Jesus (Peda genteran 8-11) *
8-9. Nama kebuah orang ke baruh ati semak enggau Jesus? Nama tanya ke patut ditanya diri empu?
8 Orang ke baruh ati semak enggau Jesus. (Mat. 19:13, 14; Luk. 7:37, 38) Nama kebuah? Peratika bida entara ulah Jesus enggau ulah orang Parisi. Bala tuai pengarap ke dikumbai Parisi nadai pengerindu sereta enda baruh ati. (Mat. 12:9-14) Tang, Jesus ngembuan pengerindu sereta baruh ati. Orang Parisi rindu dikelala orang sereta temegah enggau penuduk sida. Jesus madahka ulah ke baka nya enda manah. Nya alai, iya ngasuh bala murid iya baruh ati sereta gawa ke orang bukai. (Mat. 23:2, 6-11) Orang Parisi ngemba sereta ngenakutka orang ngambika orang ngasika sida. (Jhn. 9:13, 22) Jesus ngeringka orang bukai nengah ulah iya ti manah sereta jaku iya ti siru.
9 Kati bisi nuan nitihka teladan Jesus? Tanya diri empu: ‘Kati orang bukai ngumbai aku nelap sereta baruh ati? Kati aku sanggup ngereja pengawa ti dikumbai mit? Kati aku siru enggau orang bukai?’
10. Baka ni chara Jesus ngelatih bala murid iya?
10 Lebuh Jesus ngelatih bala murid iya, iya deka sida berasai nyamai sereta lantang. (Luk. 10:1, 19-21) Iya nanya sida laban iya deka mendingka penemu ari sida. (Mat. 16:13-16) Bala murid Jesus baka utai tumbuh ke chukup ai. Sida ngaga pemansang. Sida nitihka utai ti diajar Jesus lalu bulih asil ari pengawa manah ti digaga sida.
Senang dibai berandau sereta nyamai enggau begulai
Aktif sereta ransing
Baruh ati sereta bagas *
11. Nama tanya ke patut ditanya diri empu?
11 Kati nuan bisi diberi kuasa atas orang bukai? Enti bisi, tanya diri empu: ‘Baka ni aku ngintu orang bukai ba endur gawa tauka ba rumah? Kati chara aku ngintu sida ngasuh sida berasai lantang sereta nyamai? Kati aku meransang orang bukai betanya pasal utai ke enda ditemu sida? Lalu, kati aku deka mendingka penemu ari sida?’ Kitai enggai sekali-kali baka orang Parisi. Sida ringat enti orang betanya pasal utai ke diajar sida lalu sida jai amat enggau orang ke enda sepenemu enggau sida.—Mrk. 3:1-6; Jhn. 9:29-34.
“KITA DEKA BULIH PENGERING BARU”
12-14. Nama kebuah ngereja pengawa ke diberi Jesus ngeringka kitai?
12 Nama kebuah ngereja pengawa ke diberi Jesus ngeringka kitai? Bisi mayuh kebuah, tang kitai semina deka berandauka beberapa iti aja.
13 Kitai bisi bala pengibun ti badas. Taja pan Jehovah nya Petara ti Pemadu Tinggi, Iya seruran beterima kasihka pengawa ti dikereja kitai ke Iya, lalu Iya enda jai enggau kitai. (Heb. 6:10) Iya meri kitai pengering ke diguna kena bejalaika tanggung pengawa ke udah diberi Iya. (2 Kor. 4:7; Gal. 6:5) Jesus, Raja kitai, nyadi teladan ti badas. (Jhn. 13:15) Bala tuai gempuru nguji neladan Jesus, “Pengibun ti Besai,” lebuh sida ngibun kitai. (Heb. 13:20; 1 Pet. 5:2) Sida bebendar deka siru, meransang orang bukai sereta mandangka pemerani lebuh ngajar, ngiring, sereta ngibun kitai.
14 Kitai bisi bakih ti badas. Bakih kitai penuh enggau pengerindu sereta ngereja pengawa ti besai reti baka ke dikembuan kitai. Uji pikirka: Bala menyadi kitai ngembuan ulah ti badas, tang sida enda ngumbai diri manah agi ari orang bukai. Sida bisi mayuh pengelandik, tang sida enda temegahka nya. Sida ukai semina ngumbai kitai sama bekereja enggau sida, tang mega ngumbai kitai bakih sida. Lalu sida sanggup berambunka nyawa diri ketegal pengerindu sida ti dalam ke kitai.
15. Nama runding kitai pasal pengawa ke digaga kitai?
15 Kitai bisi pengawa ti badas. Kitai ngajar orang pemendar pasal Jehovah sereta mantaika pemula ke dipadah Sitan. (Jhn. 8:44) Sitan ngena pemula ngasuh orang ngumbai diri nadai guna. Ambika chunto, Sitan deka kitai ngumbai Jehovah enggai ngampunka kitai lalu nadai orang sayauka kitai. Tu pemula ti chukup jai, lalu ngasuh orang berasai lemi! Lebuh kitai “datai ngagai” Kristus, dosa kitai diampun. Lalu ke amat nya, Jehovah sayauka semua kitai. (Rom. 8:32, 38, 39) Endang ngagaka ati ulih nulung orang belajar bepanggai ba Jehovah lalu meda pengidup sida beinsur manah!
TERUS NGULIHKA PENGERING ARI PENGAWA KE DIBERI JESUS
16. Nama kebuah pengawa ke diasuh Jesus kereja kitai bebida ari pengawa bukai ke patut digaga kitai?
16 Pengawa ke diasuh Jesus kereja kitai bebida ari pengawa bukai ke patut digaga kitai. Ambika chunto, pengudah pulai gawa, mayuh ari kitai berasai lelak sereta tusah ati. Tang gawa ke Jehovah enggau Kristus, ngasuh kitai berasai puas sereta gaga. Taja pan kitai engka lelak pengudah pulai gawa, kitai tetap mupuk ngagai gempuru lemai nya. Tang pengudah pulai ari gempuru, kitai suah berasai dikeringka sereta diperansang. Sama mega lebuh kitai bebendar nginjil enggau belajarka Bup Kudus kediri empu. Lebuh kitai enggau naka ulih ngereja nya kitai berasai dikeringka sereta diperansang.
17. Nama patut ditemu kitai pasal tiap iku kitai? Nama patut diperunding kitai enggau dalam?
17 Kitai patut nemu, tiap iku kitai bisi tatak ba pengering. Nya alai, kitai patut berunding enggau dalam pasal utai ke deka digaga kitai. Ambika chunto, kitai engka ngena pengering ngulihka reta. Peratika utai ke ditanya seiku lelaki ke kaya ngagai Jesus: “Nama utai ti enda tau enda dikereja aku ngambika aku bulih pengidup ti meruan belama iya?” Lelaki nya endang udah lama nitihka Adat Moses. Iya tentu lelaki ke manah laban bup Injil ke ditulis Mark enggau terang madahka Jesus “rinduka iya.” Ketegal nya, Jesus ngasuh lelaki nya: ‘Mupuk nuan lalu jual semua utai ti dikemisi nuan. Udah nya titihka aku.’ Lelaki nya deka nitihka Jesus, tang iya enda ulih ninggalka pengaya iya. (Mrk. 10:17-22) Ketegal nya, iya nulak tangkun Jesus lalu terus nyadi ulun ke pengaya. (Mat. 6:24) Nama pilih ke deka digaga nuan?
18. Kadang-kadang, nama patut diperundingka kitai, lalu nama kebuah?
18 Kadang-kadang, endang manah kitai berundingka pasal utai ke patut dikenuluka ba pengidup. Nama kebuah? Ngambika kitai ulih nentuka diri ngena pengering enggau manah. Peratika utai ke dipadah seiku lelaki ke benama Mark: “Betaun-taun aku ngumbai diri idup enggau pengumbas iya. Aku nyadi pengerintis, tang aku ngena mayuh jam enggau pengering nguji ngulihka mayuh duit ngambika pengidup aku nyamai agi. Bendar aku berunding, ‘Nama kebuah ati aku bedau agi puas enggau utai ti dikemisi diri?’ Udah nya aku nyau sedar, aku kelalu beberatka utai ke diguna ba diri empu lalu ngena laluh awak enggau pengering ke Jehovah.” Mark ngubah runding diri sereta gaya pengidup iya ngambika ulih ngereja mayuh agi pengawa ke Jehovah. Ku Mark agi: “Kadang-kadang aku agi irau pasal duit. Tang saup ari Jehovah enggau Jesus nulung aku mutarka penanggul aku.”
19. Nama kebuah ngembuan runding ti betul nya beguna?
19 Kitai deka terus ngulihka pengering di baruh tangkun Jesus enti kitai ngereja tiga iti pekara tu. Kesatu, ngembuan runding ti betul. Kitai ngereja pengawa ke Jehovah. Nya alai, pengawa ke diberi Iya patut dikereja nitihka chara Iya. Kitai bekereja ke Jehovah, lalu Iya, Tuan kitai. (Luk. 17:10) Enti kitai ngereja pengawa ke diberi Iya nitihka chara diri empu, kitai deka ngenusahka diri empu. Ambika chunto, indah sapi engka pedis sereta lelak enti iya ngelaban tuan iya lalu nguji ngagai jalai ke deka dituju iya. Pia mega, enti kitai nitihka iring ari Jehovah kitai ulih ngereja pengawa ke dikumbai kitai tusah digaga lalu mutarka sebarang penanggul. Kingatka meh, nadai orang ulih nagang peneka Jehovah ari dikeamatka!—Rom. 8:31; 1 Jhn. 4:4.
20. Nama tuju ke patut dikembuan kitai bekaul enggau pengawa ke diberi Jesus ngagai kitai?
20 Kedua, gawa enggau tuju ti betul. Tuju kitai iya nya deka ngemuliaka Apai kitai, Jehovah. Maya jeman Jesus, orang ke amu tauka berunding deka ngulihka siti-siti utai ke diri empu jampat lenyau pengaga ati. Lalu tu ngujungka sida ninggalka pengawa ke diberi Jesus. (Jhn. 6:25-27, 51, 60, 66; Plp. 3:18, 19) Tang sida ke bisi pengadang merintah enggau Jesus ba serega gaga ati ngereja pengawa ke diberi Jesus lebuh sida agi ba dunya. Tu ketegal sida bisi pengerindu ngagai Petara sereta orang bukai. Baka sida, kitai deka mengkang gaga ati enti kitai ngereja pengawa ke diberi Jesus enggau tuju ti betul.
21. Nitihka Matthew 6:31-33, nama ulih dikearapka kitai ari Jehovah?
21 Ketiga, arapka Jehovah bisi enggau nuan. Kitai bebendar gawa sereta udah milih ngelengkaka sekeda utai ketegal deka ngereja pengawa ke Jehovah. Jesus madahka kitai deka diperinsa. Tang kitai arapka Jehovah deka meri kitai pengering kena napi sebarang penanggul. Bendar agi kitai betan, tegap agi pengarap kitai. (Jas. 1:2-4) Kitai mega ulih arapka Jehovah deka nyediaka utai ke diguna kitai, arapka Jesus deka ngiring kitai, lalu arapka bala menyadi Kristian deka meransang kitai. (Bacha Matthew 6:31-33; Jhn. 10:14; 1 Tes. 5:11) Nama agi utai ke diguna kitai?
22. Nama ulih ngasuh kitai beterima kasih?
22 Indu ke digeraika Jesus berasai dikeringka ba hari iya disumanka. Tang iya ulih terus dikeringka enti iya nyadi murid Kristus ti taluk. Ba runding nuan, nama digaga iya? Enti iya milih ngereja pengawa ke diberi Jesus, iya tentu bulih berekat merintah enggau Jesus di serega! Iya tentu enda lebu ngelengkaka sebarang utai ketegal deka nitihka Kristus. Enda ngira pengadang kitai idup belama iya di serega tauka ba dunya, kitai tentu gaga ati nerima kangau Jesus ke ngasuh: “Datai ngagai aku!”
LAGU 13 Kristus, Teladan Kitai
^ per. 5 Jesus mai kitai ngagai iya. Nama patut digaga kitai ngambika ulih nerima kangau ari iya? Artikel tu deka nyaut tanya nya sereta ngingatka kitai chara tau bulih pengering lebuh gawa enggau Kristus.
^ per. 1 Matthew 11:28, 29, NW: “Datai ngagai aku semua kita ke lelak ngema utai ti berat, lalu aku deka meri kita pengering baru. Ambi lalu san tangkun aku, lalu belajar ari aku, laban aku nelap sereta baruh ati, lalu kita deka bulih pengering baru.”
