ARTIKEL DIPELAJAR 35
Jehovah Rinduka Nembiak Iya ti Baruh Ati
‘Petara . . . ngayanka pengasih ngagai orang ke baruh ati.’—1 PET. 5:5.
LAGU 48 Bejalai enggau Jehovah Ninting Hari
DALAM ARTIKEL TU *
1. Nama asai ati Jehovah pasal orang ke baruh ati? Terangka.
JEHOVAH rinduka orang ke baruh ati. Semina orang ke baruh ati ulih ngembuan kaul ti rapat enggau Iya. Tang, Iya begedika orang ke sumbung. (1 Pet. 5:5) Semua kitai deka ngelantangka ati Jehovah lalu deka Iya semak enggau kitai. Nya alai, kitai bisi kebuah deka belajar nyadi orang ke baruh ati.
2. Nama deka dipejuraika kitai ba artikel tu?
2 Ba artikel tu, kitai deka bejuraika tiga iti tanya: (1) Nama reti baruh ati? (2) Nama kebuah kitai patut ngemansangka ulah nya? (3) Kemaya kitai tusah deka baruh ati? Baka ke deka dikerandauka, enti kitai ngemansangka ulah ti baruh ati, kitai deka ngagaka ati Jehovah lalu mai penguntung ke kitai empu.—J-lam. 27:11; Isa. 48:17.
NAMA RETI BARUH ATI?
3. Nama reti baruh ati?
3 Orang ke baruh ati enda ngumbai diri pama agi ari orang bukai. Iya enda sumbung. Bup Kudus madahka orang ke baruh ati nemu Jehovah besai agi ari iya, lalu iya mega ngumbai orang bukai pama agi ari iya.—Plp. 2:3, 4.
4-5. Nama kebuah kitai enda ulih nentuka pemaruh ati seiku-seiku orang ari gamal?
4 Sekeda orang dipeda baka ke baruh ati. Ambika chunto, sida engka enda pejaku tauka malu. Tauka sida engka manah sereta bebasaka orang ketegal diajar apai indai ngereja nya. Tang kebendar nya, sida engka orang ti sumbung. Nyau kelama, ulah sida ke amat deka ditemu.—Luk. 6:45.
5 Tang, orang ke dipeda andalka diri empu sereta rindu mantaika penemu diri ukai reti nya sida sumbung. (Jhn. 1:46, 47) Pia mega, sida ke pejaku tauka rindu begulai enggau orang patut bejimat ngambika enda kelalu andal enggau pengelandik diri lalu enda nyadi sumbung. Enda ngira kitai pejaku tauka enda, semua kitai patut enggau naka ulih nyadi orang ke baruh ati.
Rasul Paul ngembuan runding ti baruh ati pasal diri empu (Peda genteran 6) *
6. Baka ke dipadah ba 1 Korint 15:10, nama ulih dipelajarka kitai ari chunto rasul Paul?
6 Peratika chunto rasul Paul. Jehovah ngena iya numbuhka eklisia ba endur siti ngagai endur siti. Paul indah udah nyapai mayuh agi pemujur ba pengawa nginjil enti dibandingka enggau bala rasul Jesus ke bukai. Taja pia, Paul enda ngumbai diri pama agi ari bala menyadi Kristian iya. Iya enggau baruh ati madahka: ‘Aku tu rasul ke pemadu mit ari semua bala rasul, lalu enda patut dikumbai rasul, laban aku udah merinsaka eklisia Petara.’ (1 Kor. 15:9) Udah nya, Paul enggau terang madahka diri ngembuan kaul ti manah enggau Jehovah ketegal Jehovah ngayanka pengasih. Nya ukai ketegal Paul landik tauka udah mujur ngereja mayuh utai. (Bacha 1 Korint 15:10.) Paul endang chunto ti manah bekaul enggau baruh ati. Lebuh iya nulis surat ngagai orang Kristian ba Korint, iya enda temegahka diri taja pan sekeda bala menyadi bisi runding ti enda manah ngagai iya.—2 Kor. 10:10.
Karl F. Klein, seiku menyadi lelaki ti baruh ati ke kala nyadi seiku ari Raban ti Ngiring (Peda genteran 7)
7. Baka ni seiku menyadi Kristian lelaki nunjukka diri baruh ati?
7 Bisi seiku menyadi Kristian lelaki netapka teladan ti manah bekaul enggau baruh ati. Iya Menyadi Karl F. Klein, ke kala nyadi seiku ari Raban ti Ngiring. Iya nulis cherita pengidup ti meransang ati. Ba cherita pengidup nya, iya enggau baruh ati sereta enda belalai ngenang *
pasal pengurang diri sereta penanggul ke ditapi iya. Ambika chunto, ba taun 1922, iya ngasaika pengawa nginjil ari rumah ke rumah nya pedis dikereja. Nya alai, pengudah enggau nginjil sekali, iya nyau enggai agi ngereja nya pengelama dua taun. Udah nya lebuh ba Betel, iya lama pedis ati ngagai seiku menyadi lelaki ke meri iya jaku lalau. Iya mega bisi penyakit ketegal kelalu stres sereta irau, tang udah nya iya gerai. Taja pan napi penanggul ke baka nya, iya mega bisi mayuh pengawa ti besai sereta ngerinduka ati. Menyadi Klein amat baruh ati laban iya nyebut pasal pengurang diri. Nya alai, mayuh bala menyadi Kristian agi ingatka iya sereta cherita pengidup iya.NAMA KEBUAH KITAI PATUT NGEMANSANGKA ULAH TI BARUH ATI?
8. Baka ni 1 Peter 5:6 nulung kitai nemu ulah ti baruh ati ngagaka ati Jehovah?
8 Ulah ti baruh ati ngagaka ati Jehovah. Rasul Peter nunjukka tu amat. (Bacha 1 Peter 5:6.) Ba bup “Jadilah Pengikutku” dalam jaku Indonesia, bisi berandauka pasal utai ke disebut Peter: “Penyumbung baka rachun. Ulah nya tau ngenusahka. Taja pan orang ke sumbung ngembuan pengelandik, iya enda beguna ba Jehovah. Tang, enti iya baruh ati taja pan enda tentu landik, iya beguna ba Jehovah. Jehovah deka gaga ati merekatka nuan enti nuan baruh ati.” * Nya alai, utai ke pemadu manah ke ulih digaga kitai iya nya ngagaka ati Jehovah!—J-lam. 23:15.
9. Nama kebuah orang deka semak enggau kitai enti kitai baruh ati?
9 Kelimpah ari ngagaka ati Jehovah, kitai deka bulih mayuh penguntung enti ngemansangka ulah ti baruh ati. Enti kitai baruh ati, orang deka semak enggau kitai. Nama kebuah? Uji pikirka: Nuan deka begulai enggau orang ke baka ni? (Mat. 7:12) Kesuah agi, kitai enda rindu begulai enggau orang ke seruran ngansak orang bukai ngereja utai nitihka peneka iya sereta enggai mendingka penemu orang bukai. Tang kitai rindu agi begulai enggau bala menyadi lebuh sida “siruka pangan diri, rinduka pangan diri, nelap enggau pangan diri, sereta baruh ati.” (1 Pet. 3:8) Enti kitai semak enggau orang ke baka nya, sida mega deka semak enggau kitai seagi-agi kitai baruh ati.
10. Baka ni ulah ti baruh ati ngasuh pengidup kitai lantang?
10 Ulah ti baruh ati mega ngasuh pengidup kitai lantang. Kadang-kadang kitai meda tauka napi utai ke enda lurus. Raja Solomon P-jar. 10:7) Kadang-kadang orang ke bisi pengelandik enda bulih puji. Tang orang ke nadai tentu bisi pengelandik bulih mayuh puji. Taja pia Solomon nemu, kitai patut nerima utai ke nyadi ba kitai lalu anang kelalu irau ke utai nya. (P-jar. 6:9) Enti kitai baruh ati, kitai deka senang agi nerima utai ke nyadi ba pengidup taja pan kitai enda tentu rindu enggau utai nya.
ke bepenemu-dalam madahka: “Aku bisi udah tepedaka ulun nepan kuda, tang orang ke tinggi pangkat bejalai kaki baka ulun.” (KEMAYA KITAI TUSAH DEKA BARUH ATI?
Nama kebuah tusah deka baruh ati enti utai ke baka tu nyadi? (Peda genteran 11-12) *
11. Nama patut digaga kitai lebuh diberi jaku lalau?
11 Ninting hari kitai bisi mayuh peluang ngayanka ulah ti baruh ati. Peratika beberapa iti chunto. Lebuh kitai diberi jaku lalau. Kitai patut ingat, enti orang bisi meri jaku lalau, reti nya kitai udah ngereja penyalah tang kitai enda sedarka nya. Lebuh iya meri jaku lalau, kitai engka enda beguai nerima jaku lalau nya. Kitai engka enda rinduka iya tauka enda rindu enggau chara iya meri lalau. Tang enti kitai baruh ati, kitai deka nguji ngayanka ulah ti patut.
12. Nitihka Jaku Dalam 27:5, 6, nama kebuah kitai patut beterima kasih ngagai orang ke meri kitai jaku lalau? Beri siti chunto.
12 Orang ke baruh ati beterima kasihka jaku lalau ke diberi. Ambika chunto: Gambarka nuan ba palan gempuru. Sepengudah berandau enggau beberapa iku menyadi, seiku ari sida narit nuan ke tisi lalu belalai madahka bisi pemakai lekat ba ngeli nuan. Nuan tentu berasai malu lebuh iya munyi nya. Taja pia, nuan beterima kasih ngagai iya. Indah, nuan ngarapka iya tumu agi madah ngagai nuan! Pia mega, kitai patut baruh ati lalu beterima kasih lebuh menyadi Kristian meri kitai jaku lalau. Kitai ngumbai iya bakih kitai, ukai munsuh.—Bacha Jaku Dalam 27:5, 6; Gal. 4:16.
Nama kebuah ulah ti baruh ati beguna lebuh orang bukai nerima tanggung pengawa ba eklisia? (Peda genteran 13-14) *
13. Baka ni kitai ulih ngayanka ulah ti baruh ati lebuh orang bukai diberi tanggung pengawa ba eklisia?
13 Lebuh orang bukai diberi tanggung pengawa ba eklisia. Ku seiku tuai gempuru benama Jason: “Lebuh aku meda orang bukai diberi tanggung pengawa, kadang-kadang aku berunding nama kebuah aku enda dipilih.” Kati nuan kala ngasaika nya? Endang manah enti kitai deka ngereja mayuh agi pengawa ke Jehovah. (1 Tim. 3:1) Taja pia, kitai enda tau enda nyaga runding kitai. Enti kitai enda bejimat, kitai engka ngelakka penyumbung tumbuh ba ati kitai. Ambika chunto, seiku menyadi Kristian lelaki berengkah ngumbai semina iya aja ke layak megai siti-siti tanggung pengawa ba eklisia. Tauka bini seiku menyadi Kristian engka ngumbai laki iya layak agi bejalaika tanggung pengawa ba eklisia enti dibandingka enggau menyadi lelaki ke bukai. Tang, enti kitai baruh ati, kitai enda berunding baka nya.
14. Nama ulih dipelajarka ari teladan Moses lebuh orang bukai diberi tanggung pengawa?
14 Kitai ulih belajar ari teladan Moses lebuh orang bukai diberi tanggung pengawa. Iya gaga ati megai tanggung pengawa nguluka bansa Israel. Tang lebuh Jehovah meri orang bukai pengelandik ngereja pengawa baka ke digaga Moses, kati asai ati iya? Moses enda kepapas. (P-pau. 11:24-29) Iya baruh ati, lalu ngemendarka sida nulung iya bejalaika pengawa ngatur pechara ke bansa Israel. (P-sut. 18:13-24) Enggau tu orang Israel bisi mayuh agi orang ke ulih nulung ba pekara nya, lalu sida enda ibuh lama nganti pekara sida dipechara. Tu nunjukka Moses ibuh agi ke utai ti diguna orang ari ke ngulihka mayuh tanggung pengawa. Nya endang teladan ti manah ke kitai! Nya alai anang enda ingat, enti kitai deka dikena Jehovah, kitai patut ngembuan ulah ti baruh ati. Nya beguna agi ari ngembuan pengelandik.—1 Pet. 5:5.
15. Nama ubah ke ditapi bala menyadi Kristian?
15 Lebuh napi ubah. Empai lama ti udah, mayuh menyadi Kristian ke udah betaun-taun gawa ke Jehovah diberi tanggung pengawa bukai. Ambika chunto, ba taun 2014, bala tuai ti ngemataka pengawa ba pelilih enggau bini sida diberi pengawa penuh jam ke bukai. Ba taun nya mega, bala tuai ti ngabas eklisia enda ulih bejalaika pengawa sida agi lebuh umur sida udah manggai 70 taun. Lalu bala menyadi lelaki ke beumur 80 taun tauka lebih, enda ulih agi megai tanggung pengawa nyadi tuai ti ngatur bala tuai gempuru ba eklisia. Pia mega, beberapa taun ti udah, mayuh bala menyadi ke gawa ba Betel dianjung nyadi pengerintis.
Bisi sekeda nya enda ulih agi neruska pengawa sida ketegal sakit, diri sebilik begunaka bantu, tauka kebuah ke bukai.16. Baka ni bala menyadi Kristian ngayanka ulah ti baruh ati lebuh sida nelebaka diri enggau ubah ke ditapi?
16 Mayuh ari bala menyadi Kristian kitai ngasaika diri tusah deka ngaga ubah nya. Sida ke diberi pengawa ti baru agi rinduka pengawa lama ke kala digaga sida suba. Kadang-kadang sekeda sida berasai balat tusah ati laban enda ulih agi ngereja pengawa ti dikerinduka sida. Tang nyau kelama, sida ulih nelebaka diri enggau ubah nya. Nama kebuah? Utai ke nulung sida nya laban sida rinduka Jehovah. Sida nemu sida udah nyerahka diri ngagai Petara, ukai ngagai kereja tauka pangkat. (Kol. 3:23) Sida gaga ati ulih terus gawa ke Jehovah enggau baruh ati dalam semua pengawa. Sida ‘nyerahka semua pengirau [sida] ngagai Iya,’ laban sida nemu Iya ibuhka sida.—1 Pet. 5:6, 7.
17. Nama kebuah kitai beterima kasihka Bup Kudus ke meransang kitai ngemansangka ulah ti baruh ati?
17 Kitai amat beterima kasih laban Bup Kudus meransang kitai ngemansangka ulah ti baruh ati. Enti kitai baruh ati, orang bukai deka rindu begulai enggau kitai, lalu tu meri penguntung ngagai kitai sereta orang bukai. Kitai mega ulih napi penanggul ba pengidup. Kelebih agi, kitai deka semak agi enggau Apai kitai ti di serega. Nya alai kitai gaga ati laban nemu Jehovah rinduka nembiak Iya ti baruh ati, taja pan Iya Petara “ti tinggi, ti kudus”!—Isa. 57:15.
LAGU 45 Peragam Atiku
^ per. 5 Endang beguna bendar kitai ngembuan ulah ti baruh ati. Nama reti baruh ati? Nama kebuah kitai patut ngemansangka ulah nya? Lalu nama kebuah tusah deka mengkang baruh ati lebuh kitai bisi napi ubah ba pengidup? Artikel tu deka bejuraika semua tanya nya.
^ per. 7 Peda artikel “Jehovah Telah Berbuat Baik Kepadaku” kena 1 Oktober 1984, ba Menara Pengawal, dalam jaku Indonesia.
^ per. 8 Peda pelajar 3, gent. 23.
^ per. 53 PENERANG PASAL GAMBAR: Lebuh ba rumah seiku menyadi Kristian lelaki, rasul Paul enggau baruh ati rindu begulai enggau orang bukai, nyengkaum enggau sida ke nembiak.
^ per. 57 PENERANG PASAL GAMBAR: Seiku menyadi Kristian lelaki nerima jaku lalau ari Bup Kudus ke diberi seiku menyadi Kristian lelaki ke biak.
^ per. 59 PENERANG PASAL GAMBAR: Menyadi Kristian lelaki ke tuai enda papas ke menyadi Kristian lelaki ke biak ti megai tanggung pengawa ba eklisia.