1-2. (a) Nama kebuah Armagedon nya berita manah ke mensia? (b) Nama tanya ke deka dikerandauka ba artikel tu?

KALA nuan ninga orang ngumbai “Armagedon” nya perang nuklear tauka pengerusak alam ti balat? Bup Kudus bisi nyebut pasal Armagedon. Perang nya bekaul enggau berita manah ke ulih ngagaka ati! (Pem. 1:3) Perang Armagedon ukai ngerusak mensia tang nyelamatka sida! Nama kebuah kitai munyi nya?

² Bup Kudus nunjukka mensia deka diselamatka nengah perang Armagedon. Perang nya deka muai perintah mensia sereta penyai. Perang nya mega deka nyelamatka orang ke lurus lebuh muai orang ke ngerusak dunya. (Pem. 11:18) Ngambika kitai ulih nemu enggau terang agi, aram kitai berandauka empat iti tanya: Nama reti Armagedon? Nama utai ke deka nyadi sebedau perang nya? Baka ni kitai ulih selamat maya perang nya nyadi? Baka ni kitai ulih mengkang tetap ati seraya Armagedon majak semak?

3. (a) Nama reti leka jaku “Armagedon”? (b) Nitihka Pemandang 16:14, 16, nama kebuah kitai nemu Armagedon nya ukai nama siti endur ba dunya tu?

³ Bacha Pemandang 16:14, 16. Leka jaku “Armagedon” semina ayan sekali aja ba Bup Kudus, lalu iya diambi ari leka jaku Hebrew ke mai reti “Munggu Megiddo.” (Pem. 16:16; nota kaki.) Megido nya sebuah nengeri ba jeman Israel kelia. (Jos. 17:11) Tang Armagedon ukai nunjukka siti-siti endur di dunya tu. Ke amat nya, Armagedon nunjukka utai ke nyadi alai “semua raja di dunya tu” digempuruka kena ngelaban Jehovah. (Pem. 16:14) Tang ba artikel tu, kitai mega ngena leka jaku “Armagedon” kena nunjukka perang ti deka nyadi pengudah semua raja di dunya tu digempuruka. Nama kebuah kitai nemu  Armagedon nya ukai nama siti endur ba dunya kemayaharitu? Kesatu, nadai munggu tauka bukit ke dikumbai Megido di dunya tu. Kedua, nengeri Megido jeman kelia kelalu mit alai ngempuruka semua raja tauka perintah di dunya tu sereta bala soldadu enggau senyata sida. Ketiga, baka ke deka dikerandauka kitai ba artikel tu, perang Armagedon deka berengkah lebuh “raja” di dunya nyerang nembiak Petara ke diau ngachir di serata dunya.

4. Nama kebuah Jehovah ngaitka perang besai ti penudi enggau nengeri Megido?

⁴ Nama kebuah Jehovah ngaitka perang besai ti penudi enggau nengeri Megido? Maya jeman Bup Kudus, mayuh perang nyadi ba Megido sereta semak Lebak Jesril. Kadang-kadang, Jehovah nulung nembiak Iya menang ba perang. Ambika chunto, “semak sungai Megido,” Petara nulung pengulu orang Israel ke benama Barak, ngalahka bala soldadu Kanaan ke diuluka Sisera. Barak enggau nabi Deborah beterima kasih ngagai Jehovah ketegal Iya ngena kereja ajih nulung sida menang ba perang. Ku seduai iya belagu: “Bintang nyerang ari langit. . . . ngelaban Sisera. Sida [bala munsuh] anyut ditabanka ai bah di Kison.”—P-ulu. 5:19-21.

5. Nama bida entara perang Armagedon enggau perang maya jeman Barak kelia?

⁵ Barak enggau Deborah ngujungka lagu seduai iya: ‘Awakka semua munsuh Nuan mati baka nya, O Jehovah, tang awakka bala pangan Nuan manchar baka mata hari ti benung niki!’ (P-ulu. 5:31) Maya perang Armagedon, munsuh Jehovah deka dirusak, lalu orang ke rinduka Iya deka selamat. Tang perang nya bebida ari perang maya jeman Barak kelia. Maya perang Armagedon ila, nembiak Petara enda ibuh belaban tauka mai senyata! Sida enda takut lalu bepanggai ba Jehovah enggau bala melikat Iya.—Isa. 30:15; Pem. 19:11-15.

6. Nama chara ke engka dikena Jehovah ngalahka munsuh Iya maya perang Armagedon?

⁶ Baka ni Jehovah deka ngalahka munsuh Iya maya perang Armagedon? Iya engka ngena mayuh chara. Ambika chunto, Iya engka ngena tanah berenyang, ujan batu, enggau kilat kena ngalahka munsuh Iya. (Jop 38:22, 23; Esk. 38:19-22) Iya engka ngasuh bala munsuh belaban enggau pangan diri. (2 Ban. 20:17, 22, 23) Lalu, Iya engka ngena bala melikat Iya munuh orang ke jai. (Isa. 37:36) Enda ngira nama chara ke dikena Jehovah, Iya tentu deka menang. Semua munsuh Iya deka dirusak. Lalu semua orang ke lurus deka diselamatka.—J-lam. 3:25, 26.

7-8. (a) Nitihka 1 Tesalonika 5:1-6, nama pesan ke deka disebut bala pemerintah? (b) Nama kebuah pesan nya deka balat ngenusahka?

⁷ Bala pemerintah deka nyebut “pemaik sereta likun” sebedau “Hari Tuhan.” (Bacha 1 Tesalonika 5:1-6.) Ba 1 Tesalonika 5:2, “Hari Tuhan” tauka Hari Jehovah nya ditujuka ngagai “penusah ti besai.” (Pem. 7:14) Baka ni kitai nemu kemaya penusah ti besai deka berengkah? Bup Kudus madahka, bala pemerintah di dunya deka nyebut “pemaik sereta likun,” lalu tu deka nyadi tanda ke nunjukka penusah ti besai deka berengkah.

⁸ Nama kebuah bala pemerintah nyebut pesan nya? Kitai enda tentu nemu kebuah iya. Kati bala tuai pengarap bisi enggau sida? Engka. Tang lebuh bala pemerintah nyebut pesan pasal “pemaik sereta likun,” kitai nemu tu semina jaku bula ke datai ari bala melikat ti jai. Tang pemula tu deka balat ngenusahka, laban nya ngasuh orang ngumbai diri likun, tang kebendar iya penusah ti besai deka berengkah. Amat, “pengerusak deka ngenyit ninggang sida, baka indu ke radai deka beranak.”  Baka ni enggau nembiak Jehovah ke taluk? Ketegal sida enda nemu kemaya penusah ti besai deka berengkah, sida engka tekenyit lebuh Hari nya datai. Taja pia, sida deka besedia napi Hari nya.

9. Kati Jehovah deka ngerusak abis utai ke bisi di dunya ke dipegai Sitan tu serentak? Terangka.

⁹ Jehovah enda terus ngerusak abis utai jai ke bisi di dunya tu serentak, baka ke digaga Iya maya jeman Noah. Keterubah, Jehovah deka ngerusak Babilon ti Besai, iya nya semua gerempung pengarap pelesu. Udah nya, maya perang Armagedon, Iya deka ngerusak utai bukai di dunya tu nyengkaum politik, bala soldadu, enggau sistem dagang. Aram kitai beratika dua iti pengawa ti besai tu enggau silik agi.

10. Nitihka Pemandang 17:1, 6, enggau 18:24, nama kebuah Jehovah deka ngerusak Babilon ti Besai?

¹⁰ “Indu sundal ti tebilang nya deka diukum.” (Bacha Pemandang 17:1, 6; 18:24.) Babilon ti Besai udah ngasuh orang enda bebasaka nama Petara. Ambika chunto, iya ngajar utai ti bula pasal Petara. Baka indu sundal, Babilon ti Besai udah enda tetap ati ngagai Jehovah ketegal iya nyukung bala pemerintah mensia. Babilon ti Besai udah merinsaka sereta makai duit orang ke nyadi raban iya. Lalu iya mega udah munuh mayuh orang nyengkaum nembiak Petara. (Pem. 19:2) Baka ni Jehovah deka ngerusak iya?

11. (a) “Jelu ti mirah-redam” nya ngambarka nama? (b) Nitihka peneka Petara, baka ni Petara ngena “jelu” nya ngelaban Babilon ti Besai?

¹¹ Jehovah deka ngerusak “indu sundal ti tebilang” nya ngena “jelu ti mirah-redam” enggau “sepuluh iti tanduk.” Jelu nya ngambarka Pertubuhan Bangsa-Bangsa Bersatu. Sepuluh iti tanduk ngambarka bala pemerintah ke nyukung Pertubuhan Bangsa-Bangsa Bersatu. Ba maya ti udah ditetapka Jehovah, bala pemerintah enggau Pertubuhan Bangsa-Bangsa Bersatu deka nyerang Babilon ti Besai. Sida deka ngerusak lalu “nelanjaika iya” enggau chara ngerampas semua utai ke dikemisi iya lalu mantaika semua penyai iya. (Pem. 17:3, 16) Pengerusak nya jampat amat nyadi. Iya baka ke nyadi dalam “sehari” aja. Nya alai, orang ke nyukung  Babilon ti Besai deka tekenyit, laban iya udah lama temegahka diri sereta madahka: “Aku duduk ditu nyadi kuin! Aku ukai indu ke balu. Aku enda tusah ati.”—Pem. 18:7, 8.

12. Nama utai ke enda ditejuka Jehovah nyadi ba nembiak Iya, lalu nama kebuah?

¹² Jehovah enda nejuka bala pemerintah enggau Pertubuhan Bangsa-Bangsa Bersatu ngerusak nembiak Iya. Nembiak Jehovah enggau ati ti temegah ngena nama Iya, lalu sida ngasika pesan Iya ti ngasuh sida pansut ari Babilon ti Besai. (SKR. 15:16, 17; Pem. 18:4) Sida mega udah bebendar nulung orang bukai pansut ari Babilon ti Besai. Nya alai, nembiak Jehovah deka dilindung lebuh Babilon ti Besai dirusak. Taja pia, sida agi patut negapka pengarap diri ngambika ulih napi penguji ti deka datai.

13. (a) Sapa Gok? (b) Nitihka Esekiel 38:2, 3, 8, 9, kemaya perang Armagedon berengkah?

¹³ Serang ari Gok. (Bacha Esekiel 38:2, 3, 8, 9.) Pengudah Jehovah ngerusak semua pengarap pelesu, semina siti aja pengarap enggau sida ke megai pengarap nya ke agi tinggal, iya nya nembiak Jehovah. Endang amat, Sitan tentu balat ringat. Iya deka mantaika pengeringat iya ngena penerang ti enda betul ke datai ari iya, ke ngasuh bemacham-macham bansa begempung nyerang nembiak Jehovah. (Pem. 16:13, 14) Sida tu dikumbai Gok ari menua Magok. Lebuh sida nyerang nembiak Jehovah, perang Armagedon pan berengkah.​—Pem. 16:16.

14. Pengujung iya, Gok nyau sedar pasal utai nama?

¹⁴ Gok deka bepanggai ba “kuasa mensia,” iya nya pengering bala soldadu iya. (2 Ban. 32:8) Tang, kitai deka bepanggai ba Jehovah. Taja pia, Gok ngumbai kitai beli. Nama kebuah? Laban Babilon ti Besai ke dikumbai kering pan enda ulih nyelamatka diri ari “jelu ti mirah-redam” enggau “sepuluh iti tanduk”! (Pem. 17:16) Nya alai, Gok ngumbai diri nadai penanggul ngalahka nembiak Jehovah. Iya deka nyadi baka remang ke ngelamun dunya lebuh nyerang nembiak Jehovah. (Esk. 38:16) Tang udah nya Gok deka nemu iya enda ulih nyelamatka diri.  Baka utai ke nyadi ba raja Ejip di Tasik Mirah, Gok nyau sedar kebendar nya, iya belaban enggau Jehovah.​—P-sut. 14:1-4; Esk. 38:3, 4, 18, 21-23.

15. Nama deka digaga Jesus maya perang Armagedon?

¹⁵ Kristus enggau raban soldadu serega deka ngelindung nembiak Petara, lalu ngerusak raban bansa ke begempung nya sereta bala soldadu sida abis lengis. (Pem. 19:11, 14, 15) Tang baka ni enggau Sitan, ke bula ngagai raban bansa ke begempung nya lalu nyungkak sida nyerang nembiak Jehovah ba perang Armagedon? Jesus deka muai Sitan enggau bala melikat ti jai ngagai lubang ti pemadu dalam. Sida deka dikurung dia pengelama seribu taun.—Pem. 20:1-3.

16. (a) Baka ni kitai ngayanka diri ‘ngelala Petara’? (b) Enti kitai ngelala Petara, nama deka nyadi ngagai kitai maya perang Armagedon?

¹⁶ Sekalika kitai udah lama dalam pemendar tauka enda, kitai enda tau enda ngayanka diri ‘ngelala Petara,’ lalu ‘ngasika Berita Manah Jesus Kristus Tuan kitai,’ ngambika ulih selamat maya Armagedon. (2 Tes. 1:7-9) Kitai ‘ngelala Petara’ enti kitai nemu utai ke dikerindu, dipegedi, sereta standard Iya. Kitai mega ngayanka diri ngelala Iya enti kitai rindu sereta ngasika Iya lalu nyembah Iya seiku aja. (1 Jhn. 2:3-5; 5:3) Enti kitai ngereja tu, kitai mega deka ‘dikelala Petara,’ lalu kitai deka diterima Iya. (1 Kor. 8:3) Enggau tu, kitai deka selamat maya perang Armagedon nyadi!

17. Nama reti ‘ngasika Berita Manah Jesus Kristus Tuan kitai’?

¹⁷ ‘Berita Manah Jesus Kristus Tuan kitai’ nya nyengkaum semua pemendar ti diajar Jesus ke ulih ditemu ba Bup Kudus. Kitai ngasika berita manah enti kitai ngena nya dalam pengidup kitai. Ulah ti ngasi nyengkaum ngenuluka Perintah Petara, idup sejalai enggau standard Iya ti lurus, sereta nusui pasal Perintah Petara. (Mat. 6:33; 24:14) Nya mega nyengkaum nyukung bala menyadi  Kristian ke dipilih ngagai serega lebuh sida bejalaika pengawa nginjil enggau ngaga orang nyadi murid.​—Mat. 25:31-40.

18. Baka ni chara nembiak Kristus ke dipilih niki ke serega deka malas pemanah raban “bedus ti bukai” ke udah nulung sida?

¹⁸ Enda lama agi, nembiak Petara ti dipilih niki ke serega deka malas pemanah raban “bedus ti bukai” ke udah nulung sida. (Jhn. 10:16) Baka ni sida deka malas pemanah raban “bedus ti bukai”? Sebedau perang Armagedon berengkah, semua 144,000 iku sida deka dibai ke serega lalu ngembuan tubuh roh ti enda nemu mati. Udah nya, semua 144,000 iku nya enggau bala melikat deka ngerusak Gok lalu ngelindung nembiak Jehovah. (Pem. 2:26, 27; 7:9, 10) Amat, raban “bedus ti bukai” deka gaga ati ketegal ulih nyukung nembiak Jehovah ti dipilih ngagai serega!

19-20. Taja pan kitai napi pemerinsa, baka ni kitai ulih nentuka pengarap kitai mengkang tegap seraya Armagedon majak semak?

¹⁹ Ba hari ti penudi tu, mayuh nembiak Jehovah napi pemerinsa. Taja pia, kitai ulih tan natka pemerinsa enggau ati ti gaga. (Jas. 1:2-4) Siti utai ke ulih nulung kitai iya nya majak besampi. (Luk. 21:36) Kitai mega patut macha Bup Kudus ninting hari lalu belematika nya. Tu nyengkaum belematika jaku Petara pasal utai ke deka nyadi enda lama agi. (Mas. 77:12) Enti kitai ngereja tu lalu enggau bebendar nginjil, pengarap enggau pengadang kitai deka mengkang tegap!

²⁰ Uji gambarka pengagit ati nuan lebuh Babilon ti Besai enggau perang Armagedon nyau nadai agi! Kelebih agi, lebuh semua orang bebasaka nama Petara sereta hak Iya merintah! (Esk. 38:23) Nya alai, Armagedon endang berita manah ke sida ti ngelala Petara Jehovah, ke ngasika Anak Iya, sereta ke betan nyentuk ngagai ujung.​—Mat. 24:13.