1. Ni maya kitai tusah deka nyembah Jehovah?

NI MAYA kitai tusah deka nyembah Jehovah? Lebuh napi penanggul, tauka ba maya pengidup kitai senang? Lebuh napi penanggul, kitai jampat bepanggai ba Jehovah. Tang nama digaga kitai lebuh nadai penanggul? Kati kitai senang dilimpangka nyentukka enda ngemeratka pengawa sembah ke Jehovah? Jehovah kala nangkan orang Israel pasal pekara tu.—U-dat. 6:10-12.

2. Nama teladan ke ditunjukka Raja Asa?

² Raja Asa nya teladan ti amat manah. Iya seruran bepanggai ba Jehovah. Raja Asa nyembah Jehovah ukai semina ba maya ti tusah, tang mega ba maya ti senang. Sepemanjai pengidup Asa, iya nyembah Jehovah enggau pengabis ati. (1 Raj. 15:14.) Siti chara iya nunjukka nya, lebuh iya muai sembah ti pelesu ari menua Judah. Bup Kudus madahka: “Iya muai semua alta orang kapir enggau endur alai orang bansa bukai besembah, mechahka tiang batu keramat, lalu nebang semua engkeramba petara indu Aserah.” (2 Ban. 14:3, 5) Indah Raja Asa muai ini iya, Maakah, ari pangkat iya ti nyadi indai raja. Nama kebuah? Laban Maakah ke ngulu orang nyembah engkeramba.—1 Raj. 15:11-13.

3. Nama deka dipejuraika kitai ba artikel tu?

³ Asa ukai semina ngerusakka engkeramba aja, tang mega nulung orang Judah pulai ngagai Jehovah. Jehovah merekatka Asa sereta orang Judah enggau pemaik. * Pengelama  sepuluh taun Asa merintah, “perang nadai kala nyadi.” (2 Ban. 14:1, 4, 6) Dalam artikel tu kitai deka bejuraika, utai ke digaga Asa ba maya ti bisi pemaik. Udah nya kitai deka berandauka teladan orang Kristian ba kurun keterubah. Pengujung iya, kitai deka nyaut tanya tu: Enti nuan diau ba menua ti enda nyekat pengawa Saksi-Saksi Jehovah, baka ni nuan ngena peluang nya?

4. Nitihka 2 Bansa Israel 14:2, 6, 7, baka ni Asa ngena peluang ba maya ti bisi pemaik?

⁴ Bacha 2 Bansa Israel 14:2, 6 *, 7. Asa madah ngagai orang Judah, Jehovah ke “ngasuh [sida] likun ari semua munsuh.” Asa enda ngumbai maya ti bisi pemaik nya kena iya ngelantangka diri empu. Tang iya berengkah nirika nengeri, dinding, kuta, enggau pintu. Ku iya madah ngagai orang Judah: “Kitai ulih megai menua tu.” Nama reti jaku Asa? Reti nya sida ulih bibas bejalai ba menua nya sereta nirika kuta laban nadai munsuh nyerang sida. Iya meransang sida ngereja nya maya agi bisi pemaik.

5. Nama kebuah Asa ngeringka raban soldadu iya?

⁵ Asa mega ngena peluang ba maya nya ngeringka raban soldadu. (2 Ban. 14:8) Kati nya nunjukka iya enda arapka Jehovah? Enda. Asa nemu iya bisi tanggung pengawa nyikap bala soldadu ngambika sida besedia napi penguji ti deka datai. Asa mega nemu, pemaik ke diasai Judah enda ulih tan belama iya, lalu nya endang amat nyadi.

6. Nama digaga orang Kristian ba kurun keterubah maya bisi pemaik?

⁶ Taja pan orang Kristian ba kurun keterubah suah diperinsa, tang bisi maya sida ngembuan timpuh pemaik. Nama digaga sida maya nya? Sida enggau ransing nginjil sereta ngemeratka pengawa sembah ke Jehovah. Ketegal nya, penyampau sida “majak nambah-menambah.” Tu nunjukka Jehovah merekatka pengawa sida ti ransing nginjil ba maya ti bisi pemaik.—SKR. 9:26-31.

7-8. Nama digaga Paul enggau orang Kristian ke bukai lebuh bisi peluang ngerembaika berita manah? Terangka.

⁷ Bala murid Jesus ba kurun keterubah ngena tiap iti peluang ngerembaika berita manah. Ambika chunto, lebuh rasul Paul nemu bisi peluang nusui berita manah ba nengeri Epesus, iya ngena peluang nya nginjil lalu ngaga orang nyadi murid.—1 Kor. 16:8, 9.

⁸ Paul enggau orang Kristian ke bukai mega ulih nginjil ngagai mayuh orang ba taun 49 Masihi, lebuh bala rasul enggau bala tuai gempuru ba Jerusalem ngaga pemutus bekaul enggau pengawa betutus. (SKR. 15:23-29) Pengudah pemutus nya dipadah ngagai eklisia, Paul enggau murid ke bukai bebendar nusui berita manah pasal ‘jaku Jehovah.’ (SKR. 15:30-35) Nama asil iya? Bup Kudus madahka “eklisia dikeringka dalam pengarap, lalu pemayuh tubuh sida nambah-menambah tiap hari.”—SKR. 16:4, 5.

9. Nama gaya ba mayuh menua kemayaharitu, lalu nama tanya ke ulih ditanya diri empu?

⁹ Ba mayuh menua kemayaharitu, pengawa nginjil kitai enda ditagang. Kati nuan diau ba siti ari menua nya? Enti pia, tanya diri empu, ‘Baka ni aku ulih ngena peluang tu?’ Ba hari ti penudi tu, gerempung Jehovah udah ngiring pengawa nginjil enggau ngajar ti pemadu besai diserata dunya dalam sejarah. (Mrk. 13:10) Bisi mayuh utai ke ulih digaga kita ba pengawa tu!

10. Nama patut digaga kitai nitihka 2 Timoti 4:2?

¹⁰ Baka ni nuan ulih ngena peluang maya bisi pemaik? (Bacha 2 Timoti 4:2.) Perundingka sekalika nuan tauka seiku ari diri sebilik ulih ngaga ubah ngambika ulih nginjil enggau mayuh agi, indah nyadi pengerintis? Diatu ukai maya ngulihka pengaya, laban utai ke baka nya enda ulih dibai maya penusah ti besai.—J-lam. 11:4; Mat. 6:31-33; 1 Jhn. 2:15-17.

11. Nama digaga sekeda penginjil ngambika ulih nginjil ngagai mayuh agi orang?

¹¹ Mayuh penginjil belajarka bansa jaku ti baru ngambika sida ulih nulung orang bukai ngelala Jehovah. Kena nyukung sida, gerempung Jehovah nyediaka mayuh perengka dalam mayuh bansa jaku. Ambika chunto, ba taun 2010, litaricha kitai bisi disalin kira-kira dalam 500 iti bansa jaku. Kemayaharitu, penyampau nya nambah ngagai lebih ari 1,000 iti bansa jaku!

12. Nama asai ati orang lebuh ninga pasal Jehovah dalam bansa jaku sida empu? Beri chunto.

¹² Nama asai ati orang lebuh ninga pasal Jehovah dalam bansa jaku sida empu? Peratika peneleba seiku menyadi indu ke enggau konvensyen pelilih menua di Amerika Serikat, dalam bansa jaku iya empu, iya nya Kinyarwanda. Bansa jaku tu suah dikena ba Rwanda, Congo (Kinshasa), enggau Uganda. Pengudah konvensyen nya, iya madahka: “Kenyau 17 taun udah pindah ngagai Amerika Serikat, tu terubah iya aku ulih meretika semua cheramah ba konvensyen.” Menyadi  indu tu ulih ninga cheramah konvensyen dalam jaku iya empu, lalu tu negu ati iya. Enti nadai utai nagang, ulih nuan belajar bansa jaku bukai kena nulung orang ba endur nuan nginjil? Enti nuan bejaku ngena bansa jaku sida empu, kati sida sedia agi deka nerima pesan ke dibai nuan? Pengawa nuan ti bebendar nya tentu mai pengaga ati.

13. Nama digaga bala menyadi kitai ba Rusia lebuh bisi pemaik?

¹³ Ukai semua menyadi ulih pansut nginjil. Ba sekeda menua, pengawa nginjil ditagang perintah menua. Peratika chunto menyadi kitai ba Rusia, ke diperinsa betaun-taun. Tang ba bulan Mac 1991, perintah menua nya ngemendarka sida nyembah Jehovah. Maya nya bisi 16,000 iku penginjil di Rusia. Dua puluh taun udah nya, penyampau penginjil nambah ngagai lebih ari 160,000 iku! Tu enggau terang nunjukka, sida ransing nginjil maya bisi pemaik. Taja pia, pemaik ke diasaika sida enda lama. Taja pan gaya utai udah berubah ba menua nya, sida agi ransing sereta enggau naka ulih nyembah Jehovah.

14-15. Baka ni Jehovah ngena kuasa Iya nulung Asa?

¹⁴ Ba jeman Asa, pemaik ti diasaika menua Judah nemu abis lebuh sejuta iku soldadu menua Etiopia datai. Tuai soldadu menua Etiopia, iya nya Serah, andal raban soldadu iya ulih ngalahka menua Judah. Tang, Raja Asa arapka Jehovah. Ku Asa besampi: ‘Tulung kami diatu, O Jehovah Petara kami, laban kami manggaika diri ba Nuan, lalu kami udah datai dalam nama Nuan, deka ngelaban bala soldadu ti mayuh tu.’—2 Ban. 14:11.

 ¹⁵ Taja pan penyampau soldadu Etiopia dua kali lipat mayuh agi ari soldadu Asa, tang Asa nemu Jehovah bekuasa agi sereta ulih nulung bala nembiak Iya. Jehovah endang bisi nulung. Ketegal nya, bala soldadu Etiopia dialahka.—2 Ban. 14:8-13.

16. Baka ni kitai nemu timpuh pemaik deka abis?

¹⁶ Taja pan kitai enda nemu enggau silik utai ke deka nyadi ngagai kitai seiku-seiku jemah ila, tang kitai nemu pemaik ke diasaika nembiak Petara deka abis. Kingatka, Jesus bisi madah ba hari ti penudi, “semua bansa deka begedika” bala murid iya. (Mat. 24:9) Pia mega, rasul Paul madahka “semua orang ke keran deka diau kudus dalam Jesus Kristus, deka kena perinsaka magang.” (2 Tim. 3:12) Sitan “balat pedis ati,” lalu kitai enda ulih nyeliah ari empas pengeringat iya.—Pem. 12:12.

17. Baka ni pengarap kitai engka diuji?

¹⁷ Enda lama da agi, pengarap kitai deka diuji. Dunya deka napi “penusah ti besai . . . , baka ti nadai udah kala nyadi kenyau ari penumbuh dunya nyentuk ngagai sehari tu.” (Mat. 24:21) Maya nya, diri sebilik engka ngelaban kitai, lalu pengawa kitai deka ditagang. (Mat. 10:35, 36) Kati tiap iku kitai ulih baka Asa, arapka Jehovah deka nulung sereta nyaga kitai?

18. Nitihka Hebrew 10:38, 39, nama ulih nulung kitai nyikap diri sebedau timpuh pemaik abis?

¹⁸ Jehovah benung nyikap kitai ngambika bisi pengarap ti tegap. Iya ngena “ulun ke tetap ati sereta bepenemu-dalam” nyediaka “pemakai ba maya ti patut,” ngambika kitai bisi semua utai ke diguna kena negapka pengarap kitai. (Mat. 24:45) Tang, tiap iku kitai patut bebendar ngemansangka pengarap ngagai Jehovah.—Bacha Hebrew 10:38, 39.

19-20. Pengudah macha 1 Bansa Israel 28:9, nama tanya ke patut ditanya diri empu, lalu nama kebuah?

¹⁹ Baka Raja Asa, kitai patut “ngiga” Jehovah. (2 Ban. 15:1, 2; 14:4) Kitai  berengkah ngiga Jehovah lebuh belajar pasal Iya sereta dibaptisa. Kitai patut enggau naka ulih ngeringka pengerindu ngagai Jehovah. Kena ngereja tu, kitai ulih nanya diri empu: ‘Kati aku seruran datai ngagai gempuru?’ Lebuh kitai enggau pengawa begempuru, kitai bulih pengering kena terus nyembah Jehovah lalu bulih peransang ari bala menyadi Kristian. (Mat. 11:28) Kitai mega ulih nanya diri empu: ‘Kati aku belajarka Bup Kudus enggau tetap?’ Enti nuan diau enggau diri sebilik, kati nuan nyediaka awak belajarka Bup Kudus begulai ninting minggu? Tauka enti nuan diau kediri, kati nuan bisi nyediaka awak belajarka Bup Kudus kediri empu? Pia mega, kati nuan enggau naka ulih nginjil sereta ngajar orang Bup Kudus?

²⁰ Nama kebuah semua tanya tu beguna? Bup Kudus madahka, Jehovah meresa runding sereta ati kitai. Nya alai kitai mega patut ngereja utai ti sama ngambika runding enggau ati kitai ngelantangka Jehovah. (Bacha 1 Bansa Israel 28:9) Enti kitai ngasaika diri patut ngubah juluk ati, ulah, tauka runding, pinta meh Jehovah nulung kitai ngaga ubah nya. Diatu meh maya kitai nyikap diri ke penguji ti deka datai. Anang ngelakka nama-nama utai nagang nuan ari ngena peluang enggau manah ba maya ti bisi pemaik tu.