1-2. Nama kaul entara Pengajar 11:6 enggau pengawa nginjil?

BA SEKEDA menua, orang deka nemu mayuh agi pasal berita manah. Nya meh berita ke dianti sida! Ba menua bukai, orang enggai entu ninga pasal Petara tauka Bup Kudus. Kati orang ba kandang nginjil nuan deka nerima berita manah ke dibai nuan? Enda ngira orang ninga tauka enda, Jehovah deka kitai nginjil nyentukka Iya madah pengawa nya udah tembu.

² Jehovah udah netapka kemaya pengawa nginjil deka abis, lalu udah nya “baru pengujung datai.” (Mat. 24:14, 36) Sebedau maya nya, baka ni kitai ulih ngasika jaku “anang belelak”? *—Bacha Pengajar 11:6 ari nota kaki. *

3. Nama deka dikerandauka kitai ba artikel tu?

³ Artikel sebedau tu berandauka empat iti pekara ke patut digaga kitai ngambika ulih nyadi penginjil berita manah ke landik. (Mat. 4:19) Artikel tu deka berandauka tiga iti chara ke ulih meransang kitai terus nginjil taja pan kitai napi mayuh penanggul. Kitai deka nemu nama kebuah nya beguna (1) ngenuluka pengawa nginjil, (2) liat ati, sereta (3) mengkang negapka pengarap.

4. Nama kebuah kitai patut ngenuluka pengawa nginjil ti udah diberi Jehovah?

⁴ Jesus madah ngagai bala murid iya pasal gaya orang sereta utai ke deka nyadi ba hari ti penudi. Iya nemu utai tu ulih ngelimpangka sida ari ngenuluka pengawa nginjil. Nya alai, iya ngasuh sida “mengkang bejaga.” (Mat. 24:42) Ba jeman Noah, bisi mayuh utai ti ngelimpangka orang ari ninga jaku tangkan ke ditusui Noah. Kemayaharitu, kitai mega ulih dilimpangka utai ti sama. (Mat. 24:37-39; 2 Pet. 2:5) Nya kebuah kitai deka ngenuluka pengawa nginjil ti udah diberi Jehovah.

5. Baka ni Kereja Rasul 1:6-8 nerangka pemesai pengawa nginjil deka digaga?

⁵ Kemayaharitu, kitai endang patut ngenuluka pengawa nginjil. Jesus madahka bala murid iya deka terus nginjil pengudah pemati iya lalu deka ngereja pengawa nya ba mayuh agi menua. (Jhn. 14:12) Pengudah Jesus mati, sekeda murid iya pulai ngagai pengawa berikan. Pengudah Jesus diangkat idup baru, iya ngaga siti kereja ajih lalu nulung murid iya ngulihka mayuh ikan. Iya ngereja nya kena nulung sida nemu, pengawa nginjil enggau ngaga orang nyadi murid beguna agi ari pengawa bukai. (Jhn. 21:15-17) Sebedau Jesus niki ke serega, iya madah ngagai bala murid iya, pengawa nginjil deka ngelekai ngagai luar menua Israel. (Bacha Kereja Rasul 1:6-8.) Betaun-taun udah nya, Jesus meri siti genera ngagai rasul John kena nunjukka utai ti deka nyadi lebuh ‘Hari Tuan’ datai. * Ba siti genera ti dipeda John nya, seiku melikat bisi “mai Berita Manah ti meruan belama iya ti deka ditusui ngagai . . semua bansa, raban bansa, jaku enggau menua.” (Pem. 1:10; 14:6) Endang amat, Jehovah deka semua kitai enggau ba  pengawa nginjil ke digaga ba serata dunya nyentukka pengawa nya tembu.

6. Baka ni kitai ulih terus ngenuluka pengawa nginjil ba pengidup?

⁶ Kitai ulih mengkang kisuk ba pengawa nginjil enti belematika semua utai ke udah digaga Jehovah kena nulung kitai. Ambika chunto, Iya nyediaka utai ke diguna ba pengarap baka litaricha ke dichelak sereta ba perengka eletronik, audio enggau video ke dirikut, sereta Berita JW ba internet. Pikirka: Laman web kitai bisi penerang dalam lebih ari 1,000 iti bansa jaku! (Mat. 24:45-47) Orang ba dunya bepechah ketegal enda sama penemu ba politik, pengarap, sereta penatai pemisi. Tang lebih ari lapan juta iku nembiak Jehovah ulih beserakup. Peratika chunto tu. Kena Hari Lima, 19 April 2019, Saksi-Saksi Jehovah di serata dunya beserakup meda video ti berandauka ayat ninting hari. Ba lemai nya, bisi 20,919,041 iku orang enggau pengawa Ngingatka Pemati Jesus. Lebuh kitai belematika basa ke dikembuan kitai ulih meda sereta enggau ba pengawa ke besai reti tu, kitai berasai diperansang deka terus ransing ba pengawa nginjil.

7. Baka ni teladan Jesus nulung kitai terus ngenuluka pengawa nginjil?

⁷ Siti agi chara kitai ulih kisuk ba pengawa nginjil iya nya, nitihka teladan Jesus. Iya enda ngelakka sebarang utai ngelimpangka iya ari nginjil. (Jhn. 18:37) Lebuh iya diuji Sitan ke deka meri iya “semua perintah di dunya tu, enggau semua pengaya sida”; Jesus nulak nya. Pia mega, lebuh orang mejal iya nyadi raja, iya enda nitihka peneka sida. (Mat. 4:8, 9; Jhn. 6:15) Jesus mega enda angkunka pengaya sereta enda takut lebuh orang deka merinsaka iya. (Luk. 9:58; Jhn. 8:59) Lebuh pengarap kitai diuji, kitai ulih terus ngenuluka pengawa nginjil enti kitai nitihka jaku lalau ari rasul Paul. Iya meransang orang Kristian neladan Jesus ngambika sida “enda lelak tauka alah semengat”!—Heb. 12:3.

8. Nama reti liat ati, lalu nama kebuah nya beguna?

⁸ Pengeliat ati reti nya sabar nganti siti-siti gaya utai berubah. Enda ngira enti kitai ngarapka pengujung siti-siti penanggul, tauka lama nganti juluk ati diri dijapai, kitai begunaka pengeliat ati. Nabi Habakuk ngarapka penyai ba menua Judah nadai agi. (Hab. 1:2) Bala murid Jesus ngarapka Perintah Petara “deka pegari” tekala nya lalu ngelepaska sida ari dipegai perintah Rome. (Luk. 19:11) Kitai mega nganti maya Perintah Petara muai penyai lalu numbuhka dunya baru ti penuh enggau orang ke ngasika Petara. (2 Pet. 3:13) Taja pia, kitai patut liat ati sereta nganti Jehovah ngereja nya ba maya ti udah ditetapka Iya. Peratika sekeda chara Jehovah ngajar kitai liat ati.

9. Nama teladan ke nunjukka pengeliat ati Jehovah?

⁹ Jehovah netapka teladan pengeliat ati enggau sempurna. Iya meri chukup awak ngagai Noah kena ngaga bandung sereta “ngajar pasal pengelurus.” (2 Pet. 2:5; 1 Pet. 3:20) Jehovah ningaka Abraham ke mayuh kali nanya pasal pemutus Iya ke deka ngemunaska orang ke jai ba nengeri Sodom enggau Gomorah. (P-kal. 18:20-33) Betaun-taun, Jehovah liat ati enggau bansa Israel ke enda tetap ati. (Neh. 9:30, 31) Kemayaharitu, kitai ulih meda pengeliat ati Jehovah lebuh Iya meri chukup awak ngagai semua orang ke “nesal ati,” ngambika ulih nyadi pangan Iya. (2 Pet. 3:9; Jhn. 6:44; 1 Tim. 2:3, 4) Teladan Jehovah nunjukka kitai bisi  kebuah manah ngayanka pengeliat ati lebuh ba pengawa nginjil sereta ngajar. Iya mega ngajar kitai liat ati nengah siti sempama ba Bup Kudus.

10. Nitihka James 5:7, 8, nama ulih dipelajar kitai ari orang bumai?

¹⁰ Bacha James 5:7, 8. Chunto orang bumai ngajar baka ni kitai ulih liat ati. Amat, sekeda utai tanam tumbuh enggau jampat. Taja pia, nyauka semua utai tanam, kelebih agi ke bisi buah, begunaka awak ngambika mansau. Musin utai tanam tumbuh di Israel nya kira-kira enam bulan. Orang bumai nanam leka benih pengudah ujan ba pun musin ruruh lalu ngetau asil pengudah ujan musin bungai. (Mrk. 4:28) Kitai mega ulih neladan pengeliat ati orang bumai. Taja pia, nya engka enda senang.

11. Baka ni pengeliat ati nulung kitai ba pengawa nginjil?

¹¹ Mensia kesuah iya deka meda asil ari pengawa sida tekala nya. Tang, enti kitai deka utai tanam tumbuh lalu mansutka asil, kitai enda tau enda nyaga iya enggau manah baka nyangkul tanah, nanam, muai rumput, sereta manjah enggau ai. Sama mega, enti kitai deka bisi asil ba pengawa ngaga orang nyadi murid, kitai patut terus bebendar ngereja nya. Kitai endang begunaka awak kena nulung pemelajar Bup Kudus ngambika bisi pengerindu sereta enda bepilih mata. Pengeliat ati ulih nulung kitai enda asa ati lebuh orang enggai mendingka kitai. Lebuh orang sanggup deka ninga sereta belajar, kitai enda tau enda terus liat ati. Kitai enda ulih mejal pemelajar Bup Kudus jampat mansang ba pengarap. Indah bala murid Jesus pan lubah meretika utai ke diajar Jesus. (Jhn. 14:9) Kingatka, kitai nanam sereta manjah, tang Petara ke ngasuh utai tumbuh.—1 Kor. 3:6.

12. Baka ni kitai ulih liat ati lebuh nginjil ngagai diri sebilik kitai ke ukai Saksi?

¹² Kitai engka tusah deka liat ati lebuh  nginjil ngagai diri sebilik kitai ke ukai Saksi. Prinsip Bup Kudus ba bup Pengajar 3:1, 7 ulih nulung kitai. Prinsip nya madahka, bisi “maya enda bemunyi enggau maya bejaku.” Ulah kitai ti manah ulih meransang kaban belayan mendingka pesan kitai. Taja pia, kitai mega patut besedia bekunsi pasal Jehovah ngagai sida. (1 Pet. 3:1, 2) Kitai deka nginjil sereta ngajar semua orang enggau ransing, tang kitai patut liat ati lebuh ngereja nya, nyengkaum lebuh nginjil ngagai diri sebilik kitai ke ukai Saksi.

13-14. Nama sekeda chunto orang ke liat ati ti ulih dititihka kitai?

¹³ Kitai ulih belajar pasal pengeliat ati ari nembiak Jehovah ti tetap ati ba Bup Kudus, sereta ari nembiak Iya kemayaharitu. Habakuk keran meda penyai nadai agi, tang iya ngayanka diri liat ati lebuh madahka: “Aku deka niki menara ti alai aku jaga, lalu nganti.” (Hab. 2:1) Rasul Paul mega madahka diri amat deka “nembuka” pengawa nginjil. Taja pia, iya mengkang liat ati “besaksika Berita Manah.”—SKR. 20:24.

¹⁴ Perundingka chunto sepasang laki bini ke baru tembu Sekula Gilead. Seduai iya dianjung ngagai menua ke bisi mimit aja Saksi-Saksi Jehovah. Mayuh orang ba menua nya ukai Kristian, lalu mimit aja orang ke deka belajarka Bup Kudus. Tang, menyadi bukai ke sama sekula Gilead ti dianjung ngagai menua bukai seruran bekunsika pasal pemelajar Bup Kudus ke ngaga pemansang nyentuk nyadi Saksi-Saksi Jehovah. Taja pan mayuh orang enggai ninga ba endur nginjil seduai iya, seduai mengkang nginjil. Pengudah lapan taun, seduai amat gaga ati ulih meda seiku ari pemelajar Bup Kudus dibaptisa. Nama ulih dipelajarka kitai ari chunto nembiak Jehovah kelia menya sereta kemayaharitu? Sida ke tetap ati tu ransing nginjil, lalu Jehovah merekatka pengeliat ati sida. Nya alai, aram meh kitai ‘nunda teladan orang ke arap sereta liat ati.’—Heb. 6:10-12.

15. Baka ni pengarap negapka pengeran kitai deka terus nginjil?

¹⁵ Kitai andalka pesan ke ditusui kitai. Nya alai kitai keran deka bekunsi enggau mayuh orang. Kitai arapka semaya ke bisi dalam Bup Kudus. (Mas. 119:42; Isa. 40:8) Kitai meda mayuh utai ke ditulis dalam Bup Kudus dikeamatka kemayaharitu. Pia mega kitai meda baka ni pengidup orang nyadi manah agi pengudah sida nitihka jaku lalau ari Bup Kudus. Tu ngasuh kitai andal agi ke berita manah pasal Perintah Petara nya patut didinga semua orang.

16. Nitihka Masmur 46:1-3, baka ni pengarap ba Jehovah sereta Jesus ngasuh kitai keran agi nginjil?

¹⁶ Kitai mega arapka Jehovah, Petara ke ngempu pesan ke ditusui kitai sereta Jesus, ke udah dipilih Iya nyadi Raja ba Perintah Petara. (Jhn. 14:1) Enda ngira nama penanggul ke ditapi kitai, Jehovah seruran nyadi pengelindung enggau pengering kitai. (Bacha Masmur 46:1-3.) Nambahka nya, kitai pechaya Jesus ngiring pengawa nginjil ari serega, ngena kuasa sereta hak ke udah diberi Jehovah ngagai iya.—Mat. 28:18-20.

17. Padahka siti chunto kebuah kitai patut terus nginjil.

¹⁷ Pengarap ngasuh kitai andal agi, Jehovah tentu merekatka pengawa kitai ti bebendar nginjil. Kekadang Iya ngereja nya enggau chara ti enda disadang kitai. (P-jar. 11:6) Ambika chunto, ninting hari beribu iku orang meda pengawa kitai nginjil ngena kart tauka mija litaricha. Kati tu chara nginjil ti mujur? Au! Kereja  Teokratik Kitai kena bulan November 2014 madahka, seiku nembiak indu ke belajar ba universiti deka nulis pasal Saksi-Saksi Jehovah. Iya enda tetemuka Palan Gempuru, tang bisi meda litaricha kitai ti dipandangka ba mija litaricha di universiti iya. Iya mega bulih penerang ngambika ulih nulis pasal Saksi-Saksi Jehovah. Pengudah nya, iya nyadi seiku ari Saksi-Saksi Jehovah lalu diatu nyadi pengerintis biasa. Peneleba ke baka tu meransang kitai terus nginjil laban tu nunjukka agi bisi orang ke patut nemu sereta ningaka pesan pasal Perintah Petara.

18. Nama kebuah kitai nemu pengawa nginjil deka tembu ba maya ti dikedekaka Jehovah?

¹⁸ Kitai pechaya, pengawa nginjil deka tembu ba maya ti udah ditetapka. Perundingka utai ke nyadi ba jeman Noah. Jehovah nunjukka, Iya endang Petara ti seruran ngereja utai ba maya ti pemadu ngena. Kira-kira 120 taun sebedau Bah Besai, Jehovah udah netapka kemaya Bah Besai nyadi. Betaun-taun udah nya, Jehovah ngasuh Noah ngaga bandung. Engka 40 tauka 50 taun sebedau Bah besai nyadi, Noah terus bebendar gawa. Taja pan orang enggai mendingka jaku tangkan iya, Noah tetap nginjil nyentukka Jehovah ngasuh iya mai jelu tama bandung. Udah nya, ba maya ti ngena, ‘Jehovah lalu nikupka pintu.’—P-kal. 6:3; 7:1, 2, 16.

19. Enti kitai deka terus nginjil, nama patut digaga kitai?

¹⁹ Enda lama agi, Jehovah deka madahka kitai pengawa nginjil udah tembu. Iya deka “nikupka pintu” ba dunya ti jai tu, lalu mai dunya baru ti penuh enggau orang ti ngasika Petara. Sebedau maya nya, aram kitai neladan Noah, Habakuk, sereta orang bukai terus nginjil. Lalu aram meh kitai ngenuluka pengawa nginjil, liat ati, sereta mengkang negapka pengarap ba Jehovah sereta semaya Iya.