1-2. Nitih ku Hagai, nama utai ke deka nyadi ba jeman kitai?

“DALAM beberapa minit aja, mayuh kedai sereta bengunan berengkah runtuh.” “Semua orang ba dia berasai takut . . . Mayuh orang madahka tanah berenyang tu nyadi semina dua minit aja. Tang ba aku, nya timpuh ti amat lama.” Nya meh sekeda utai ke dipadah beberapa iku orang ti selamat ari tanah berenyang ke nyadi ba Nepal kena taun 2015. Enti nuan kala ngasaika peneleba ti ngenakutka tu, nuan tentu deka ingatka utai ti nyadi nya.

² Lebuh tanah berenyang nyadi, utai balat begusak. Nya mega nyadi kemayaharitu, tang nengah chara bukai. Lalu, tu ukai nyadi ba siti bandar tauka menua aja. Jehovah udah ngusak semua bansa di dunya, lalu Iya udah ngereja tu pengelama betaun-taun. Nabi Hagai udah madahka pasal utai ke dipadah Jehovah: “Enda lama da agi, Aku deka ngusak langit enggau dunya, tanah enggau tasik.”—Hag. 2:6.

3. Nama bida entara utai ke disebut Hagai enggau tanah berenyang?

³ Lebuh nyebut pasal pengawa ngusak, Hagai ukai bejaku pasal tanah berenyang ti semina ulih mai pengerusak. Tang, utai ke disebut Hagai tu ulih ngasuh utai ti manah nyadi. Jehovah madah ngagai kitai: “Aku deka ngusak semua bansa; lalu semua pengaya sida deka dibai kitu magang.” (Hag. 2:7) Nama reti jaku ti benabi tu ba sida ke idup maya jeman Hagai? Lalu nama  reti iya ba kitai kemayaharitu? Kitai deka berandauka saut ngagai tanya tu, lalu belajar baka ni kitai ulih enggau pengawa ngusak semua bansa kemayaharitu.

4. Nama kebuah Jehovah nganjung nabi Hagai ngagai nembiak Iya?

⁴ Nabi Hagai nerima pengawa ti berat ari Jehovah. Peratika utai ke nyadi sebedau nya. Ba taun 537 S.M., seraban orang Judah pulai baru ngagai Jerusalem pengudah sida dilepaska ari Babilon. Maya nya, Hagai engka bisi enggau sida. Enda lama pengudah sida datai ba Jerusalem, sida ke nyembah Jehovah enggau tetap ati berengkah begagaka Rumah Sembiang. (Esr. 3:8, 10) Tang enda lama pengudah nya, sida berasai asa ati lalu badu ngaga Rumah Sembiang laban orang ke ngelingi sida ngelaban pengawa sida. (Esr. 4:4; Hag. 1:1, 2) Nya alai ba taun 520 S.M., Jehovah ngasuh Hagai nulung orang Judah ransing baru lalu nembuka pengawa begagaka Rumah Sembiang. *—Esr. 6:14, 15.

5. Nama kebuah pesan ke dibai Hagai udah meransang nembiak Petara?

⁵ Hagai madahka pesan iya kena ngeringka pengarap orang Judah ngagai Jehovah. Iya enggau berani madahka utai tu ngagai orang Judah ke berasai asa ati. Ku Hagai madahka pesan Jehovah ngagai orang Judah: “Kita enda tau lemi semengat. Kereja aja pengawa kita, laban Aku bisi enggau kita.” (Hag. 2:4) Jaku tu tentu meransang sida! Jehovah bisi mayuh bala melikat ti bekuasa ba baruh iring Iya. Nyadi, orang Judah patut bepanggai ba Jehovah ngambika sida ulih mujur.

6. Nama asil ari pengawa ngusak ke dipadah Hagai?

⁶ Jehovah nganjung Hagai madahka pesan ngagai orang Judah pasal Iya ke deka ngusak semua bansa. Tuju pesan nya kena meransang orang Judah ke berasai asa ati sereta badu begagaka Rumah Sembiang. Dalam pesan nya, Jehovah madahka Diri deka ngusak Persia, iya nya perintah ti pemadu bekuasa ba dunya maya nya. Lalu nama asil iya pengudah pengawa ngusak tu? Keterubah iya, nembiak Petara deka nembuka pengawa begagaka Rumah Sembiang Jehovah. Udah nya, sida deka nyembah Jehovah ba Rumah Sembiang ti baru nya. Indah, orang bansa bukai mega deka sama enggau sida nyembah Jehovah. Pesan nya tentu meransang nembiak Petara!—Sek. 8:9.

7. Terangka baka ni kitai ulih enggau pengawa ngusak kemayaharitu?

⁷ Nama reti jaku benabi ke dipadah Hagai nya kemayaharitu? Sekali agi Jehovah ngusak semua bansa, lalu semua kitai enggau pengawa tu. Peratika tu: Kena taun 1914, Jehovah ngeletak Jesus Kristus nyadi Raja ba Perintah Petara di serega. (Mas. 2:6) Tu berita ti enda manah ba bala pemerintah di dunya. Reti nya “timpuh orang bansa bukai” udah abis. Ba timpuh nya, nadai pemerintah ke ngarika Jehovah. (Luk. 21:24) Ketegal nya, kelebih agi kenyau ari taun 1919, nembiak Jehovah udah madahka semina Perintah Petara ti ulih mai pengelepas ngagai mensia. Pengawa nginjil ‘Berita Manah pasal Perintah Petara’ udah ngusak serata dunya.—Mat. 24:14.

8. Nitihka Masmur 2:1-3, baka ni orang nyambut pesan ke dibai kitai?

⁸ Baka ni orang nyambut pesan ke dibai kitai? Mayuh ari sida nulak pesan nya. (Bacha Masmur 2:1-3.) Sida balat ringat lalu enggai nerima Raja ke dipilih Jehovah nyadika  pemerintah sida. Ba sida, pesan pasal Perintah Petara nya ukai “Berita Manah.” Indah sekeda perintah nagang pengawa nginjil! Taja pan mayuh pemerintah madahka diri nyembah Petara, tang sida enggai ninggalka penuduk sereta kuasa ti dikembuan sida. Baka bala pemerintah maya jeman Jesus, pemerintah kemayaharitu ngelaban Raja ti udah dipilih Jehovah sereta nyerang nembiak Jehovah ti taluk.—SKR. 4:25-28.

9. Nama asai ati Jehovah ngagai sida ke enggai nerima?

⁹ Nama asai ati Jehovah ngagai sida ke enggai nerima? Masmur 2:10-12 madahka: ‘Nya alai diatu, O kita ke raja, kita enda tau enda pintar; Bejaga kita, O kita ke pemerintah dunya. Betuai ka Jehovah enggau ati ti nangi; begetar lalu nundok ka diri ngagai Iya. [“Muliaka anak Iya,” NWT], enggai ka Iya ringat, lalu kita deka mati, laban pengeringat Iya jampat nyadi. Lantang samoa orang ti ngadap, minta intu Iya.’ (Bup Kudus Berita Manah Ka Rebak Diatu) Ketegal Jehovah bisi pengasih, Iya meri sida awak kena ngaga pemutus ti betul. Sida agi ulih berubah lalu ngaga pemutus deka nerima Perintah Jehovah. Taja pia, enda mayuh awak agi tinggal. Diatu kitai diau ba “hari ti penudi” di dunya ti jai tu. (2 Tim. 3:1; Isa. 61:2) Nya alai, semua orang patut nemu pemendar lalu milih deka nyembah Jehovah.

10. Nitihka Hagai 2:7-9, nama asil ti manah ketegal pengawa ngusak?

¹⁰ Pengawa ngusak ke disebut Hagai deka mai penguntung ngagai sekeda orang ti nerima. Hagai bisi madahka asil ti manah ari pengawa ngusak tu. “Semua pengaya,” iya nya orang ke baruh ati, deka dibai nyembah Jehovah. * (Bacha Hagai 2:7-9.) Nabi Isaiah sereta Mikah mega kala madahka pengawa ngusak tu deka nyadi “ba hari ti penudi.”—Isa. 2:2-4; Mik. 4:1, 2.

11. Nama digaga seiku menyadi lelaki pengudah iya ninga pesan pasal Perintah Petara?

¹¹ Peratika asil ti manah ari pengawa ngusak tu. Ambika chunto, Ken gawa ba Indu Opis. Iya agi ingat keterubah kali iya ninga pesan pasal  Perintah Petara kira-kira 40 taun ke udah. Ken madahka: “Lebuh keterubah kali aku ningaka pemendar ari Bup Kudus, aku amat gaga ati laban nemu kitai diatu idup ba hari ti penudi. Aku nemu, enti aku deka diterima Petara sereta bulih pengidup ti meruan belama iya, aku patut nentuka diri ukai sebagi ari dunya lalu milih nyukung Jehovah. Aku besampi ngagai Jehovah lalu enggau jampat ngaga ubah. Aku badu nyukung dunya tu lalu milih deka dijaga Perintah Petara ti meruan belama iya.”

12. Baka ni nama Jehovah dimuliaka ba hari ti penudi tu?

¹² Endang amat, Jehovah udah merekatka nembiak Iya. Ba hari ti penudi tu, penyampau orang ke nyembah Jehovah majak nambah. Ba taun 1914, semina beribu iku orang aja ke nyembah Jehovah. Tang diatu, bisi lebih ari lapan juta iku orang ke nyembah Jehovah, lalu bisi bejuta iku orang ke enggau kitai Ngingatka Pemati Jesus ninting taun. Nya alai, ‘pengaya semua bansa’ iya nya orang ke baruh ati udah dibai nyembah Jehovah. Tu nunjukka atur Jehovah ke sembah ti bendar udah mujur. Nama Jehovah dimuliaka lebuh orang ngasika pesan Iya lalu berengkah ngaga ubah ba pengidup.—Eps. 4:22-24.

13. Padahka chunto jaku ti benabi ti udah dikeamatka bekaul enggau pemansang orang ke deka nyembah Jehovah? (Peda gambar ba mua majalah.)

¹³ Pia mega, bisi pemansang ke bukai ti ngalitka ati ke udah nyadi. Jaku ti benabi ke bukai bisi madahka utai tu. Ambika chunto, Isaiah 60:22 madahka: ‘Indah suku raban bansa ti pemadu mit, ti pemadu baruh pendiau deh deka besai kuasa, baka bansa ti besai kuasa. Lebuh maya ti ngena datai, Aku deka ngasuh utai tu lengkas nyadi. Aku tu Jehovah!’ Ketegal mayuh orang berengkah nyembah Jehovah, bisi asil ti manah ke nyadi. Sida tu ngembuan mayuh penau sereta pengelandik. Pia mega, sida keran deka nginjil ‘Berita Manah pasal Perintah Petara.’ Nya alai, Isaiah nyemaka tu enggau “indai ke nusuka anak diri,” laban nembiak Jehovah ngena pengelandik diri kena ngemansangka sembah ti bendar. (Isa. 60:5, 16) Enggau tulung ari bala menyadi Kristian, pengawa nginjil udah dipejalaika ba 240 menua lalu litaricha Kristian udah dikeluarka ba lebih ari 1,000 iti bansa jaku.

14. Nama pemutus ke patut digaga semua orang diatu?

¹⁴ Kemayaharitu, pengawa ngusak semua bansa deka ngansak semua orang ngaga pemutus. Kati sida deka nyukung Perintah Petara, tauka andalka perintah ba dunya? Tu pemutus ti berat ke patut digaga semua orang. Taja pan nembiak Jehovah ngasika atur perintah ba menua sida empu, tang sida nentuka diri nadai sangkut paut enggau politik. (Rom. 13:1-7) Sida nemu semina Perintah Petara aja ke ulih mutarka penanggul mensia. Lalu Perintah Petara nya ukai sebagi ari dunya.—Jhn. 18:36, 37.

15. Baka ni bup Pemandang nunjukka penetap ati nembiak Petara deka diuji?

¹⁵ Bup Pemandang nunjukka penetap ati nembiak Petara deka diuji ba hari ti penudi. Penguji tu deka nekan kitai enggau amat balat. Perintah dunya deka kitai nyembah sida lalu deka merinsaka orang ke enggai nyukung sida. (Pem. 13:12, 15) Sida deka “mejalka semua orang ke mit, ke besai, ke kaya enggau ke seranta, ti ulun enggau ti ukai ulun dikelai ngena siti tanda ba jari kanan tauka ba kening sida.” (Pem. 13:16) Kelia menya, ulun dikelai kena nunjukka sapa orang ke ngempu sida. Sama mega kemayaharitu, orang ke ngelingi kitai ngarapka semua orang nunjukka diri nyukung politik. Sida deka semua orang nunjukka nya nengah runding sereta ulah.

16. Nama kebuah nya beguna kitai negapka penetap ati kitai ngagai Jehovah diatu?

¹⁶ Kati kitai deka nerima tanda nya lalu nyukung perintah dunya? Sida ke enggai nerima tanda tu deka napi mayuh penusah. Bup Pemandang madahka: “Nadai orang ulih bebeli tauka bejualka utai enti sida nadai kelai nya.” (Pem. 13:17) Taja pia, nembiak Petara nemu utai ke deka digaga Petara ngagai sida ti nerima tanda baka ke dipadah ba Pemandang 14:9, 10. Enti sida enggai nerima tanda nya, tu baka sida nulis ba jari sida, ‘Aku endang enggi Jehovah.’ (Isa. 44:5) Nya alai, diatu meh maya iya kitai nentuka penetap ati kitai ngagai Jehovah nya chukup tegap. Enti pia, Jehovah gaga ati madah kitai tu endang enggi Iya!

17. Nama patut dikingatka kitai pasal pengeliat ati Jehovah?

¹⁷ Ba hari ti penudi tu, Jehovah udah ngayanka pengeliat ati laban Iya enggaika semua orang dirusakka. (2 Pet. 3:9) Iya udah meri semua orang peluang ngambika nesal ati lalu milih deka nyembah Iya. Taja pia, pengeliat ati Jehovah bisi tatak. Sida ke enggai nyukung Perintah Petara deka ngasaika utai ti sama baka raja Ejip ba jeman Moses. Jehovah madah ngagai raja Ejip: “Enti sema Aku udah ngangkatka jari Aku lalu ngasuh nuan enggau orang Ejip kena laban penyakit, semua kita tetap udah abis mati. Tang tu kebuah aku nejuka nuan idup, kena Aku ngayanka kuasa Aku ngagai nuan, ngambika nama Aku dikenang di serata dunya.” (P-sut. 9:15, 16) Pengujung iya semua bansa patut nemu, Jehovah meh Petara ti bendar! (Esk. 38:23) Baka ni tu deka nyadi?

18. (a) Nama pengawa ngusak ke bukai ti disebut ba Hagai 2:6, 20-22? (b) Baka ni kitai nemu jaku Hagai nya deka dikeamatka jemah ila?

¹⁸ Betaun-taun pengudah jeman nabi Hagai, rasul Paul nulis ngagai orang Kristian ke bansa Hebrew pasal jaku di Hagai 2:6, 20-22 ti deka dikeamatka jemah ila. (Bacha.) Paul nulis: “Diatu Iya udah besemaya, ‘Aku deka sekali agi, ukai semina ngusak dunya, tang langit mega.’ Leka jaku ‘sekali agi’ terang nunjukka utai ti ulih digusak deka dibuai, iya nya utai ti udah digaga, ngambika semina utai ti enda ulih digusak aja tinggal.” (Heb. 12:26, 27) Pengawa ngusak ke ditulis Paul tu bebida ari pengawa  ngusak ke disebut ba Hagai 2:7. Nya nunjukka sida ke baka raja Ejip ti enggai nerima hak Jehovah merintah deka digusak, tauka dirusak belama iya.

19. Nama utai ke enda digusak lalu baka ni kitai ulih nemu nya?

¹⁹ Nama utai ke enda digusak, tauka dibuai? Paul madahka: ‘Laban kitai nerima Perintah ti enda ulih digusak, aram kitai meri terima kasih kena kita nyembah Petara, sembah ti dikerinduka Iya, ngena ati ti nangi sereta enggau basa.’ (Heb. 12:28) Endang amat, pengudah pengawa ngusak ti penudi nya tembu, semina Perintah Petara aja ke agi tinggal. Lalu, Perintah nya deka meruan belama iya!—Mas. 110:5, 6; Dan. 2:44.

20. Nama pemutus ke patut digaga orang, lalu baka ni kitai ulih nulung sida?

²⁰ Diatu, awak semina tinggal mimit aja! Nya alai, semua orang patut milih: Enti sida deka terus nyukung dunya tu, sida deka dirusak. Tang enti sida milih deka nyembah Jehovah lalu ngaga ubah ba pengidup nitihka peneka Iya, sida deka bulih pengidup ti meruan belama iya. (Heb. 12:25) Nengah pengawa nginjil, kitai nulung orang ngaga pemutus ti besai tu. Aram meh kitai nulung mayuh agi orang nyukung Perintah Petara. Lalu kingatka jaku Tuan kitai, Jesus: ‘Berita Manah pasal Perintah Petara deka ditusui di serata dunya, nyadika saksi ngagai semua bansa. Udah nya baru pengujung datai.’—Mat. 24:14.