1-2. (a) Nitihka Jaku Dalam 16:31, nama runding ke patut dikembuan kitai pasal bala menyadi ti udah tuai? (b) Nama tanya ke deka disaut dalam artikel tu?

BISI siti taman negara ba Amerika Serikat alai nuan ulih tetemuka mayuh belian. Taja pia, gaya belian tu bedau diubah nyadi barang kemas. Nya alai mayuh orang enda sedar bisi belian ba dia, lalu sida enda gagit lebuh meda nya.

² Baka belian tu, bala menyadi kitai ke udah tuai amat berega. Bup Kudus nyemakka uban sida baka makota. (Bacha Jaku Dalam 16:31; 20:29) Taja pia, kitai engka enda entu beratika sida ti udah tuai. Tang, orang ke biak ti ibuhka bala menyadi ti tuai tau bulih penguntung ti berega agi ari pengaya. Dalam artikel tu, kitai deka nyaut tiga iti tanya: (1) Nama kebuah Jehovah ngumbai bala menyadi ti tuai tu berega? (2) Nama kebuah bala menyadi ti udah tuai tu beguna dalam gerempung Jehovah? (3) Baka ni kitai ulih belajar ari teladan sida?

3. Nitihka Masmur 92:12-15, nama kebuah sida ke udah tuai tu amat berega ba Jehovah?

³ Sida ke udah tuai ti tetap ati amat berega ba Petara Jehovah. Iya meda sapa sida kebendar iya, lalu Iya mega nemu kualiti sida ti manah. Jehovah gaga ati meda sida ke tuai tu bekunsika penemu-dalam ke diulih sida sepemanjai nyembah Jehovah ngagai sida ke biak. (Jop 12:12; J-lam. 1:1-4) Jehovah amat beterima kasihka penetap ati bala menyadi ti udah  tuai. (Mal. 3:16) Sida bisi penanggul ba pengidup, tang sida mengkang arapka Jehovah. Enti dibandingka enggau maya sida berengkah belajarka pemendar, diatu pengadang sida pasal jemah ila majak terang-seterang. Lalu Jehovah rinduka sida laban sida tu terus madahka pasal nama Iya taja pan “sida nyau tuai.”—Bacha Masmur 92:12-15.

4. Nama jaku peransang ulih ngelantangka ati bala menyadi kitai ke udah tuai?

⁴ Andal meh, Jehovah ingatka pengawa ti udah digaga nuan taja pan nuan nyau mansang tuai. (Heb. 6:10) Nuan udah ransing nyukung pengawa nginjil, lalu tu ngelantangka ati Jehovah. Nuan udah betan napi mayuh penanggul indah penanggul ke ngasuh nuan balat tusah ati. Nuan mega ngasi sereta ngetanka standard pengelurus Bup Kudus, ngereja pengawa ti amat beguna ba gerempung Jehovah, lalu ngelatih orang bukai. Pia mega, nuan bebendar nelebaka diri enggau mayuh ubah ke udah digaga ba gerempung. Nuan mega nyukung sereta meransang sida ke gawa penuh jam ke Jehovah. Jehovah rinduka nuan laban nuan tetap ati ngagai Iya. Iya besemaya: “Iya enda ninggalka bala nembiak Iya ke tetap ati ngagai Iya”! (Mas. 37:28) Jehovah mega meri nuan semaya tu: “Aku deka ngibun kita datai ke . . . buk kita buban.” (Isa. 46:4) Nya alai, anang meh ngumbai ketegal nuan udah tuai, nuan enda agi berega dalam gerempung Jehovah. Pechaya meh, nuan amat berega!

5. Nama utai ke patut dikingatka bala menyadi ke udah tuai?

⁵ Bala menyadi ke udah tuai agi ulih dikena ba gerempung Jehovah. Taja pan sida engka enda kering baka suba, tang sida bisi mayuh peneleba gawa ke Jehovah pengelama betaun-taun. Jehovah agi ulih ngena sida ba mayuh macham chara. Aram kitai meda teladan nembiak Jehovah ari Bup Kudus sereta kemayaharitu.

6-7. Padahka sekeda teladan ari Bup Kudus pasal sida ke udah tuai ti nerima berekat ketegal taluk ke Jehovah.

⁶ Kitai ulih tetemuka mayuh teladan ari Bup Kudus pasal sida ke mengkang gawa ke Jehovah taja pan udah tuai. Ambika chunto, Moses engka beumur 80 taun lebuh iya  berengkah nyadi nabi sereta ketuai ke bansa Israel. Lebuh Daniel beumur lebih ari 90 taun, Jehovah agi ngena iya nyadi nabi. Pia mega, rasul John engka beumur lebih ari 90 taun lebuh iya nulis bup Pemandang.

⁷ Tang bisi sekeda nembiak Jehovah ba Bup Kudus ke enda entu diperatika kitai lalu kitai enda nemu pasal sida. Taja pia, Jehovah nemu lalu merekatka penaluk sida. Ambika chunto, Simeon nya seiku lelaki ke ‘lurus sereta angkunka Petara.’ Cherita pasal iya enda mayuh dipadah ba Bup Kudus. Tang Jehovah nemu sapa iya kebendar, lalu meri iya basa ti besai ulih meda Jesus ti agi mit. Iya mega bisi peluang madahka jaku benabi pasal Jesus sereta indai iya. (Luk. 2:22, 25-35) Perundingka mega pasal Anna, seiku nabi indu ke udah balu. Iya beumur 84 taun tang “enda kala ninggalka Rumah Sembiang.” Jehovah merekatka iya laban iya seruran ngagai “Rumah Sembiang” lalu meri iya peluang ulih meda Jesus ti agi mit. Ari tu kitai nemu, Simeon enggau Anna berega ba Jehovah.—Luk. 2:36-38.

8-9. Nama pengawa ke ulih digaga sida ke udah nyadi balu dalam gerempung Jehovah?

⁸ Kemayaharitu, mayuh bala menyadi ke udah tuai ti tetap ati nyadi teladan ti manah ngagai sida ke biak. Peratika peneleba menyadi Lois Didur. Iya baru beumur 21 taun lebuh iya berengkah nyadi pengerintis spesial di Kanada. Pengudah nya, iya jadi enggau John. Seduai iya bejalaika pengawa ngabas dalam beberapa taun. Udah nya seduai iya gawa ba Betel Kanada lebih ari 20 taun. Lebuh Lois beumur 58 taun, seduai iya John dikangau gawa ba Ukraine. Kati seduai iya ngumbai diri kelalu tuai deka mindah ngagai menua bukai? Enda. Seduai iya nerima pengawa nya, lalu John dipilih nyadi seiku ari Komiti Pampang Opis ba Ukraine. Taja pan tujuh taun udah nya John nadai, tang Lois terus ngereja pengawa iya ba dia. Diatu, Lois beumur 81 taun lalu iya agi gawa ke Jehovah enggau tetap ati sereta begulai enggau bala menyadi ba Betel di Ukraine. Semua sida ba dia amat sayauka iya.

⁹ Sida ke udah balu baka Lois engka enda entu tampak dipeda enti dibandingka enggau maya laki sida agi idup. Tang sida agi berega ba Jehovah. Jehovah amat sayauka bala menyadi indu ke udah betaun-taun nyukung laki sida sereta mengkang nyembah Iya enggau tetap ati. (1 Tim. 5:3) Teladan sida mega meransang orang ke biak.

10. Nama teladan ti manah ke udah ditetapka Tony?

¹⁰ Bisi mega orang tuai ke tetap ati dijaga ba sepital tauka ba rumah orang tuai. Sida mega amat berega. Ambika chunto, seiku menyadi lelaki ke benama Tony diatu diau ba endur ke baka nya. Lebuh iya beumur 20 taun, iya dibaptisa ba Pennsylvania, Amerika Serikat kena Ogos 1942. Pengudah dibaptisa, iya diasuh enggau pengawa soldadu. Ketegal iya nulak pengawa nya, iya dijil pengelama  dua taun setengah. Iya enggau bini iya, Hilda, ngemesaika dua iku anak sida dalam pemendar. Dalam beberapa taun, Tony kala nyadi tuai ti nyaga eklisia (diatu dikumbai tuai ti ngatur raban tuai gempuru) ba tiga iti eklisia sereta megai pengawa nyadi tuai ti nyaga gempuru besai. Iya mega ngiring gempuru sereta ngajar Bup Kudus ba rumah jil. Taja pan diatu Tony beumur 98 taun, tang iya enda ngetu gawa ke Jehovah. Iya mengkang begulai enggau bala menyadi ba eklisia lalu bebendar nyembah Jehovah!

11. Baka ni kitai bebasaka bala menyadi ti udah tuai ke diau ba sepital tauka rumah orang tuai aja?

¹¹ Baka ni kitai ulih bebasaka bala menyadi ti udah tuai ke diau ba sepital tauka rumah orang tuai aja? Enti ulih bala tuai gempuru tau nulung sida baka, mai sida datai begempuru tauka ningaka program gempuru ti udah dirikut sereta mai sida enggau pengawa nginjil. Kitai mega ulih ngabas sida tauka mai sida berandau nengah video chat. Sekeda ari sida diau jauh ari eklisia. Nya alai kitai deka seruran ibuhka sida laban enti enda, kitai senang enda beratika sida ti udah tuai tu. Taja pia, sekeda ari sida engka berasai tusah deka bejaku pasal diri empu. Tang kitai deka bulih mayuh penguntung enti kitai enggau sabar nanya tanya ngagai sida, lalu mendingka peneleba ti ngagaka ati ti diulih sida sekumbang gawa ba gerempung Jehovah.

12. Nama ulih ditemu kitai pasal bala menyadi ke udah tuai ba eklisia kitai empu?

¹² Kitai mega ulih tetemuka teladan ti manah ari bala menyadi ke udah tuai ba eklisia kitai. Ambika chunto, seiku menyadi indu ke benama Harriette udah bepuluh taun nyembah Jehovah enggau tetap ati ba eklisia di menua iya empu, iya nya di New Jersey, Amerika Serikat. Pengudah nya, iya patut pindah ngambika ulih diau enggau anak indu iya. Bala menyadi ba eklisia baru nguji deka ngelala menyadi Harriette enggau manah agi lalu sida nemu iya amat berega. Iya mega meransang sida ari cherita pasal pengawa nginjil lebuh iya berengkah belajarka pemendar ba taun 1925. Maya nya, iya seruran mai berus ngeli lebuh nginjil laban sebarang maya iya engka kena tangkap lalu dijil. Kebendar iya ba taun 1933, iya dua kali ditangkap. Lebuh iya ba jil, laki iya ke ukai Saksi nyukung iya sereta nyaga tiga iku anak seduai iya ke agi mit. Endang amat, bala menyadi ti udah tuai ke tetap ati baka Harriette layak dipebasa!

13. Nama ulih dipelajar kitai pasal ungkup bala menyadi ke udah tuai ba gerempung Jehovah?

¹³ Bala menyadi ke udah tuai bisi ungkup ti berega ba Jehovah sereta gerempung Iya. Sida udah ngasaika berekat Jehovah ba pengidup sereta meda chara Iya udah merekatka gerempung Iya. Sida mega udah belajarka mayuh utai ari penyalah sida suba. Nya alai belajar meh ari penemu sereta peneleba sida. (J-lam. 18:4) Enti nuan bebendar ngelala sida, pengarap nuan deka dikeringka lalu nuan ulih belajar mayuh utai ari sida!

14. Nitihka Ulang Adat 32:7, sida ke biak diperansang ngereja nama?

¹⁴ Giga meh peluang berandau enggau menyadi ke udah tuai. (Bacha Ulang Adat 32:7.) Endang amat, mata sida engka enda lansik agi, sida nyau lubah bejalai lalu nyawa sida mega engka enda entu ulih didinga. Tang, sida agi deka ngereja mayuh utai lalu udah “tampak nama” ba Jehovah. (P-jar. 7:1) Anang enda ingat, bala menyadi ke udah tuai berega ba Jehovah. Nya alai, terus meh bebasaka sida. Tunda meh teladan Elisa. Elisa mengkang deka begulai enggau Elijah nyentukka  hari ti penudi seduai iya begulai. Tiga kali Elisa nyebut: “Aku enggai ninggalka nuan.”—2 Raj. 2:2, 4, 6.

15. Nama sekeda tanya ke ulih ditanya kitai ngagai bala menyadi ke udah tuai?

¹⁵ Ayanka pengibuh ngagai sida ke tuai ngena tanya ti manah. (J-lam. 1:5; 20:5; 1 Tim. 5:1, 2) Nuan ulih nanya: “Lebuh nuan agi biak, nama ke ngasuh nuan andal udah tetemuka pemendar?” “Baka ni utai ke nyadi ba pengidup nuan ngasuh nuan semak agi ngagai Jehovah?” “Nama nulung nuan mengkang gaga ati ba pengawa nuan ke Jehovah?” (1 Tim. 6:6-8) Udah nya, mending meh enggau manah lebuh sida madahka peneleba sida.

16. Nama penguntung ke diulih lebuh menyadi ke tuai enggau ke biak begulai enggau pangan diri?

¹⁶ Lebuh menyadi ke tuai enggau ke biak begulai enggau pangan diri, sida deka sama bulih penguntung. (Rom. 1:12) Sida ke biak deka andal, Jehovah seruran nyaga nembiak Iya ke tetap ati, lalu sida ke tuai deka berasai dikesayau. Iya tentu gaga ati madahka nuan baka ni iya udah nerima mayuh berekat ari Jehovah.

17. Nama kebuah kitai ngumbai bala menyadi ke udah tuai majak berega?

¹⁷ Pemanah gamal ulih berubah ketegal umur. Tang ba mata Jehovah, sida ke taluk ngagai Iya majak berega taja pan sida mansang tuai-setuai. (1 Tes. 1:2, 3) Nama kebuah? Laban sepemanjai pengidup sida, sida udah ngelakka roh kudus Jehovah ngelatih sereta nulung sida ngemansangka kualiti ti manah. Enti kitai bebendar deka ngelala bala menyadi ti udah tuai enggau manah agi, kitai deka diperansang bebasa sereta belajar ari sida. Lalu kitai deka ngumbai sida berega agi!

18. Nama deka dikerandauka kitai ba artikel pengudah tu?

¹⁸ Lebuh sida ke biak ngumbai sida ke tuai berega lalu sida ke tuai beterima kasihka sida ke biak, eklisia deka majak tegap. Ba artikel pengudah tu, kitai deka berandauka baka ni bala menyadi ke tuai ulih ngayanka terima kasih ngagai sida ke biak ba eklisia.