1. Nama asai ati orang lebuh seiku ari sida sebilik dibuai ari gerempung?

KATI bisi orang ke dikesayauka nuan udah dibuai ari gerempung? Nya tentu ngasuh nuan balat tusah ati! Seiku menyadi ke benama Hilda, madahka: “Lebuh laki aku nadai pengudah 41 taun kami jadi, aku ngumbai nya utai ti pemadu pedis ke kala diasaika aku. * Tang lebuh anak lelaki aku dibuai ari gerempung, lalu ninggalka bini iya sereta dua iku anak iya, nya ngasuh ati aku balat agi merinsa.”

2-3. Nitihka Masmur 78:40, 41, nama asai ati Jehovah lebuh nembiak Iya ninggalka Iya?

² Pikirka penusah ati Jehovah lebuh sekeda melikat ke nyadi sebagi ari ruang bilik Iya nulak Iya! (Jud. 6) Lalu perundingka asai ati Jehovah lebuh Iya meda orang Israel, ke amat dikesayauka Iya, suah ngelaban Iya. (Bacha Masmur 78:40, 41.) Andal meh, Jehovah mega tusah ati lebuh orang ke dikesayauka nuan ninggalka Iya. Iya nemu pemerinsa nuan, lalu Iya tentu deka meri peransang sereta sukung ke diguna nuan.

³ Dalam artikel tu, kitai deka berandauka baka ni kitai ulih nerima tulung Jehovah enti bisi orang ke dikesayau badu nyembah Iya. Kitai mega deka beratika baka ni kitai ulih nulung bala menyadi ba eklisia ke napi penusah tu. Tang sebedau nya, aram kitai beratika nama runding ti negatif ke patut diseliahka kitai.

4. Nama asai ati apai indai lebuh anak sida ninggalka Jehovah?

⁴ Lebuh seiku anak ninggalka Jehovah, apai indai suah berunding  sida engka patut ngereja mayuh agi utai kena nulung anak sida mengkang nyembah Jehovah. Ambika chunto, seiku menyadi ke benama Luke ti bisi anak lelaki ke udah dibuai ari gerempung madahka: “ Aku nyalahka diri empu. Aku suah berundingka nya. Kekadang aku nyabak lalu ati aku balat tusah.” Elizabeth, ke napi utai ti sama mega madahka: “Nama pengurang aku ngajar anak? Aku ngasaika diri enda bebendar ngajar anak lelaki aku rinduka Jehovah.”

5. Lebuh orang ninggalka Jehovah, sapa ke patut betanggungjawap?

⁵ Kingatka, Jehovah udah meri tiap iku kitai peluang bibas milih. Nya alai, semua kitai ulih milih deka ngasika Iya tauka enda. Pikirka tu, sekeda nembiak nadai apai indai ti ulih nyadi teladan ti manah ke sida. Tang sida udah ngaga pemutus deka nyembah Jehovah lalu mengkang tetap ati ngagai Iya. Taja pia, sekeda bisi apai indai ke bebendar ngajar anak rinduka Jehovah. Tang pengujung iya, anak sida ninggalka Jehovah. Ba pekara tu, semua kitai patut milih kediri empu sekalika deka nyembah Jehovah tauka enda. (Jos. 24:15) Nya alai, ngagai bala apai indai ke bisi anak ti udah badu nyembah Jehovah, kingatka, semua tu ukai salah kita!

6. Nama empas iya ngagai sida ke nembiak lebuh apai indai ninggalka Jehovah?

⁶ Bisi mega apai tauka indai badu nyembah Jehovah, lalu indah ninggalka diri sebilik. (Mas. 27:10) Tu ulih ngasuh bala anak berasai balat anchur ati, laban apai indai endang patut nyadi teladan ti manah ke sida. Esther, ke bisi apai ti udah dibuai ari gerempung madahka: “Aku suah nyabak ketegal aku nemu iya ukai semina udah limpang ari pemendar tang iya udah ngaga pemutus enggai agi nyembah Jehovah. Aku sayauka apai. Lalu lebuh iya dibuai ari gerempung, aku balat irauka iya. Ketegal nya, kekadang aku kena panic attack.”

7. Nama asai ati Jehovah ngagai orang ke biak enti apai tauka indai sida dibuai ari gerempung?

⁷ Ngagai bala nembiak, kingatka, kami mega balat tusah ati enti apai tauka indai nuan udah dibuai ari gerempung. Nuan ulih andal, Jehovah nemu penusah ati nuan. Iya rinduka nuan sereta beterima kasihka penetap ati nuan. Kami mega enggau bala menyadi Kristian ba eklisia amat sayauka nuan, lalu gaga ati enggau penetap ati nuan. Kingatka meh, nuan enda betanggungjawap ke pemutus ti digaga apai tauka indai nuan nya. Baka ke dipadah ba pun tadi, Jehovah meri tiap iku orang peluang bibas milih sekalika deka terus nyembah Iya tauka enda. Lalu orang ke udah nyerahka diri sereta dibaptisa patut “mai ma diri empu.”—Gal. 6:5.

8. Nama ulih digaga diri sebilik ti tetap ati seraya nganti orang ke dikesayauka sida pulai baru ngagai Jehovah? (Peda mega kutak “ Pulai meh ngagai Jehovah.”)

⁸ Lebuh orang ke dikesayau ninggalka Jehovah, nuan tentu ngarapka iya deka pulai baru ngagai Jehovah. Tang nama patut digaga nuan seraya nganti iya pulai baru? Nuan patut bebendar negapka pengarap diri. Enti nuan ngereja nya, nuan deka nyadi teladan ti manah ngagai diri sebilik ke bukai lalu indah ngagai orang ke udah dibuai ari gerempung. Pia mega, nuan deka bulih pengering kena napi penusah ati nuan nya. Nya alai, aram kitai berandauka sekeda chara kena nulung nuan mengkang tegap ba pengarap.

9. Nama ulih digaga nuan ngambika ulih mengkang tegap ba pengarap? (Peda mega kutak “ Ayat Bup Kudus ke Ulih Ngelantangka Ati enti Bisi Orang ke Dikesayauka Nuan Ninggalka Jehovah.”)

⁹ Enggau naka ulih ngereja utai kena negapka pengarap nuan. Tu endang beguna kena ngeringka diri empu sereta diri sebilik ke bukai. Baka ni nuan ulih ngereja nya? Ngambika bulih pengering ari Jehovah, nuan ulih macha Bup Kudus enggau tetap, berundingka enggau dalam pasal utai ke dibacha nya, sereta mengkang datai begempuru. Joanna, ke bisi apai sereta menyadi indu ti udah dibuai ari gerempung madahka: “Lebuh aku macha teladan orang ba Bup Kudus baka Abigail, Ester, Jop, Josep sereta Jesus, tu nulung aku lantang ati. Teladan sida udah meransang sereta nulung aku bisi runding ti positif lebuh napi penanggul tu. Aku mega amat diperansang lebuh ningaka lagu asal kitai.”

10. Baka ni Masmur 32:6-8 ulih nulung kitai betan napi ati ti tusah?

¹⁰ Padahka semua pengirau nuan ngagai Jehovah. Lebuh nuan tusah ati, anang ngetu besampi ngagai Jehovah. Terus minta Iya nulung nuan berundingka pekara nya nitihka chara Iya berunding. Lalu minta Iya mega “nunjukka jalai ti patut ditengah nuan.” (Bacha Masmur 32:6-8.) Endang amat, nuan engka tusah deka mansutka asai ati nuan ti bendar ngagai Jehovah. Tang Jehovah meretika pemerinsa ba ati nuan. Iya amat sayauka nuan lalu ngasuh nuan madahka semua penusah nuan ngagai Iya.—P-sut. 34:6; Mas. 62:7, 8.

11. Nitihka Hebrew 12:11, nama kebuah kitai patut andalka atur Jehovah ti bepengerindu bekaul enggau disiplin? (Peda mega kutak “ Atur Dibuai Ari Gerempung Nya—Bukti Pengerindu Jehovah.”)

¹¹ Nyukung pemutus ke digaga bala tuai gempuru. Atur dibuai ari gerempung nya sebagi ari atur Jehovah. Atur tu bepelasarka pengerindu,  lalu meri penguntung ngagai bala menyadi ba eklisia indah ngagai orang ke dibuai ari gerempung. (Bacha Hebrew 12:11.) Taja pia, kekadang sekeda menyadi ba eklisia engka madahka tuai gempuru enda ngaga pemutus ti betul bekaul enggau muai orang ari gerempung. Tang kingatka, sida ke baka tu kesuah iya sengaja enggai madahka penyalah orang ti udah dibuai ari gerempung. Kitai enda nemu semua utai ke nyadi. Nya alai, pechaya meh ngagai bala tuai gempuru ke udah ngatur pekara tu nengah Komiti Pechara. Sida nitihka utai ke dipadah Bup Kudus enggau silik lalu ngakim ‘ngena kuasa Jehovah.’—2 Ban. 19:6.

12. Nama penguntung ke diulih sekeda menyadi lebuh sida ngasika atur Jehovah?

¹² Lebuh kitai nyukung pemutus bala tuai gempuru ti muai orang ke dikesayauka nuan ari gerempung, kitai kebendar iya nulung iya pulai baru ngagai Jehovah. Ku Elizabeth ke bisi disebut ba pun tadi madahka: “Aku amat tusah laban enda ulih begulai enggau anak lelaki aku. Tang pengudah iya pulai baru ngagai Jehovah, iya madahka atur dibuai ari gerempung nya pemutus ti betul ke iya. Nyau kelama, iya mega madahka diri beterima kasih ke utai ti udah dipelajarka iya ari peneleba. Aku belajar disiplin ari Jehovah nya seruran manah.” Pia mega laki iya, Mark madahka: “Enda lama udah nya, anak kami duai madah deka pulai baru ngagai Jehovah laban kami duai melaki-bini enda agi begulai enggau iya. Aku amat gaga ati laban Jehovah nulung kami duai melaki-bini ngasika Iya.”

13. Nama ulih nulung nuan napi penusah ba ati?

¹³ Bejaku enggau bakih ke ulih meretika asai ati nuan. Nuan ulih meri awak begulai enggau bala menyadi ke tegap ba pengarap. Sida ulih nulung nuan mengkang ngembuan runding ti positif. (J-lam. 12:25; 17:17) Joanna ke disebut ba pun tadi madah: “Aku berasai sunyi. Tang bejaku enggau bakih ti ulih dikearapka udah nulung aku betan agi.” Taja pia, nama ulih digaga nuan enti sema bisi menyadi nyebut utai ke ngasuh nuan balat agi tusah ati?

14. Nama kebuah kitai patut ‘sabar enggau pangan diri lalu ngampun pangan diri’?

¹⁴ Sabar meh enggau bala menyadi. Kingatka sida enda sempurna. Kekadang sida enda nemu utai ke patut disebut. (Jas. 3:2) Nya alai, anang tekenyit enti sekeda menyadi enda nemu utai ke deka dipadah tauka nyebut utai ti ngenusahka ati laban nya ukai utai ke disengaja sida. Rasul Paul kala meri lalau tu: “Sabar enggau pangan diri, lalu ampun pangan diri enti kita bisi enda nyamai ati ngagai pangan diri.” (Kol. 3:13) Seiku menyadi indu ke bisi seiku kaban belayan ti dibuai ari gerempung madah: “Bala menyadi nguji meransang aku taja pan chara sida bisi ngasuh ati aku pedis. Tang Jehovah udah nulung aku deka ngampunka sida.” Baka ni bala menyadi ba eklisia ulih nulung diri sebilik ke tetap ati?

15. Nama ulih digaga kitai kena nulung diri sebilik ke bisi bala udah dibuai ari gerempung?

¹⁵ Bala menyadi ba eklisia ulih ngelaluka diri sebilik ke tetap ati enggau manah. Seiku  menyadi indu ke benama Miriam irau deka datai begempuru pengudah menyadi lelaki iya dibuai ari gerempung. Ku iya madah, “Aku irau enggau utai ke deka disebut bala menyadi. Tang, mayuh bala menyadi berasai sinu enggau utai ti udah nyadi. Sida mega nadai nyebut utai ti enda manah pasal menyadi aku ti udah dibuai nya. Aku beterima kasih ke sida ketegal sida enda ngelakka aku kediri aja napi pemedis tu.” Seiku agi menyadi indu madah: “Pengudah anak lelaki aku dibuai ari gerempung, sekeda menyadi datai deka ngelantangka ati kami. Taja pan sida enda nemu utai ke deka disebut tang sida sama nyabak enggau aku, lalu nganjung surat ti meransang ngagai aku. Utai ke digaga sida amat nulung aku!”

16. Baka ni bala menyadi ba eklisia ulih nulung sida ke bisi diri sebilik ti udah dibuai ari gerempung?

¹⁶ Terus meh nyukung diri sebilik ti tetap ati. Kelebih agi diatu, sida begunaka pengerindu sereta peransang ari kitai. (Heb. 10:24, 25) Kekadang, diri sebilik ke bisi bala udah dibuai ari gerempung berasai enda dikeibuhka bala menyadi Kristian. Anang nejuka utai nya nyadi! Bala nembiak ke bisi apai tauka indai ti udah ninggalka pemendar kelebih agi begunaka jaku puji sereta peransang. Menyadi Maria ke bisi laki ti udah dibuai ari gerempung lalu ninggalka sida sebilik madahka: “Beberapa iku menyadi Kristian datai ke rumah lalu manduk pemakai ke kami. Sida nulung aku belajarka Bup Kudus enggau anak aku. Sida meretika penusah ati aku lalu sama nyabak enggau aku. Sida mega bejaku ngarika aku lebuh orang nyebut utai ti enda manah pasal aku. Sida amat meransang aku!”—Rom. 12:13, 15.

17. Baka ni bala tuai gempuru ulih ngelantangka sida ti benung balat tusah ati?

¹⁷ Ngagai kita ke tuai gempuru, bebendar meh ngiga peluang kena ngeringka diri sebilik ke tetap ati. Kita bisi tanggung pengawa ngelantangka ati diri sebilik ke bisi bala ti udah ninggalka Jehovah. (1 Tes. 5:14) Berandau meh enggau sida sebedau tauka pengudah gempuru Kristian ngambika ulih meransang sida. Abas meh sida lalu besampi enggau sida. Kita mega ulih begulai nginjil tauka mai sida datai belajarka Bup Kudus enggau diri sebilik. Ba pekara tu, tuai gempuru bisi tanggung pengawa ngintu bedus  Jehovah ke napi penusah ati. Nya alai ayanka meh penyiru, pengerindu, sereta ibuhka utai ti diguna sida.—1 Tes. 2:7, 8.

18. Nitihka 2 Peter 3:9, nama dikedekaka Petara ngagai sida ke udah badu nyembah Iya?

¹⁸ Jehovah “enggai nejuka indah siku kita dirusak, tang semua nesal ati.” (Bacha 2 Peter 3:9.) Taja pan seseiku orang engka ngereja penyalah ti besai, pengidup iya agi berega ba Jehovah. Perundingka, Jehovah mayar rega ti besai kena nebus tiap iku kitai. Iya nebus kitai ngena nyawa Anak ti dikerinduka Iya. Ketegal pengerindu, Jehovah deka nulung orang ti udah ninggalka Iya sereta ngarapka sida ulih pulai baru. Tu baka sempama Jesus ke udah dipelajarka kitai pasal anak ke tesat. (Luk. 15:11-32) Mayuh sida ti udah ninggalka pemendar udah pulai baru ngagai Jehovah. Lalu bala menyadi ba eklisia gaga ati ngelaluka sida pulai baru. Elizabeth ke disebut tadi gaga ati meda anak lelaki iya pulai baru ngagai Jehovah. Ku iya ngenang baru: “Aku amat beterima kasih ke bala menyadi ti meransang kami enda putus pengarap.”

19. Nama kebuah kitai ulih terus arapka Jehovah?

¹⁹ Kitai endang ulih arapka Jehovah. Iya nadai meri iring ti ulih ngemediska kitai. Jehovah gerah jari sereta siru. Iya amat sayauka orang ti rinduka Iya sereta nyembah Iya. Andal meh Jehovah enda kala ninggalka nuan lebuh nuan napi penusah. (Heb. 13:5, 6) Menyadi Mark madahka, “Jehovah enda kala ninggalka kami. Iya enda jauh ari kami lebuh kami napi penusah.” Jehovah deka terus meri nuan “kuasa ti besai” kena betan. (2 Kor. 4:7) Nya alai, nuan ulih mengkang tetap ati lalu enda putus pengarap taja pan orang ti dikesayauka nuan ninggalka Jehovah.