Enda lama pengudah taun 1940, apai indai aku udah berengkah belajarka Bup Kudus enggau Saksi-Saksi Jehovah. Taja pan sida ngetu belajarka Bup Kudus, tang indai aku terus nerima salin majalah Menara Jaga enggau Peratika! ke dikeluarka. Ba taun 1950, bisi konvensyen entarabansa dipejalaika ba New York, lalu ruang bilik aku enggau konvensyen nya.

Enda lama pengudah nya, Menyadi Lawrence Jeffries berengkah ngelawa kami. Iya nguji nulung aku belajarka pemendar. Terubah iya, aku ngumbai Saksi-Saksi Jehovah patut enggau politik sereta nyadi soldadu, ari ke mengkang neutral. Aku madah ngagai iya, enti sema orang ba Amerika enggai beperang, bala munsuh ulih datai lalu nguasa menua kami. Enggau sabar, menyadi Jeffries nanya aku: “Ba runding nuan, nama deka digaga Petara Jehovah enti semua orang ba Amerika nyembah Iya lalu munsuh datai nyerang sida?” Utai ke dipadah iya pasal pekara tu enggau pekara bukai nulung aku nemu runding aku nya salah. Nya ngasuh aku deka agi belajarka Bup Kudus.

Aku ngena mayuh awak macha majalah Menara Jaga enggau Peratika! ti lama ke disimpan indai aku ba bilik baruh rumah. Nyau kelama, aku sedar aku benung belajar pasal pemendar. Nya alai, aku setuju belajarka Bup Kudus enggau Menyadi Jeffries. Aku mega berengkah datai gempuru enggau tetap. Aku rindu enggau utai ti benung dipelajarka aku, lalu aku pan nyadi siku ari penginjil Berita Manah. Juluk ati aku berubah lebuh aku nemu ‘Hari Jehovah nyau semak.’ (Sep. 1:14) Aku enggai agi ngagai universiti, tang aku deka nulung orang bukai belajarka pemendar ari Bup Kudus.

Aku abis sekula kena 13 Jun 1956, lalu tiga hari udah nya aku dibaptisa ba siti gempuru besai. Aku  enda nyangka diri deka nerima mayuh utai ti manah ari Jehovah ketegal aku milih ngena pengidup aku kena belajar sereta ngajar orang bukai pasal Jehovah.

Enam bulan pengudah aku dibaptisa, aku nyadi pengerintis biasa. Kereja Teokratik Kitai kena Disember 1956 bisi artikel ke betajuk “Ulih Nuan Gawa ba Endur ti Begunaka Mayuh Agi Bantu?” Aku ulih ngereja nya. Aku deka nulung ba endur ke nadai mayuh penginjil.—Mat. 24:14.

Aku pindah ngagai Edgefield, South Carolina. Raban gempuru dia semina bisi empat iku penginjil. Ketegal aku pindah kia, raban gempuru nya diatu bisi lima iku penginjil. Kami begempuru ba ruang tamu rumah siku menyadi lelaki. Ninting bulan, aku ngena 100 jam ba pengawa nginjil. Aku sibuk laban aku ngulu ba pengawa nginjil sereta meri cheramah ba raban gempuru. Tang utai ti ngalitka ati nya, mayuh agi pengawa ti dikereja aku ba raban gempuru, mayuh agi utai ti dipelajarka aku pasal Jehovah.

Aku belajarka Bup Kudus enggau siku indu balu ke bisi rumah orang mati ba Johnston, iya nya siti bandar ke enda jauh ari endur aku. Iya meri aku kereja part-time lalu ngemendarka kami begempuru ba siti bengunan ti mit ke diempu iya.

Menyadi Jolly Jeffries, anak lelaki menyadi ke kala belajarka Bup Kudus enggau aku, pindah ari Brooklyn, New York, lalu nyadi kaling ngerintis aku. Siku menyadi lelaki meri kami siti rumah treler ti mit nyadika alai kami diau.

Gaji amat mit ba begian Selatan menua kami. Gaji kereja sehari ke diulih kami semina dua tauka tiga dolar. Bisi sekali, aku baru aja abis ngena semua duit aku kena meli pemakai ba kedai. Lebuh aku pansut ari kedai nya, siku lelaki datai lalu nanya aku: “Kati nuan deka kereja? Aku deka mayar nuan satu dolar sejam.” Iya meri aku kereja pengelama tiga hari kena nuchi endur nirika bengunan. Aku ulih meda enggau terang Jehovah benung nulung aku ngambika aku ulih terus diau ba Edgefield. Tang aku mega bisi enggau konvensyen ke dipejalaika ba New York ba taun 1958.

Ba hari kedua konvensyen nya, bisi utai ti ngagaka ati nyadi. Aku betemu enggau Ruby Wadlington, ke nyadi pengerintis biasa ba Gallatin, Tennessee. Ketegal kami duai deka nyadi pengerintis seberai tasik, kami enggau aum Gilead ba konvensyen nya. Udah nya, kami berengkah betulis surat ngagai pangan diri. Aku dikangau ngagai Gallatin kena meri cheramah. Aku ngena peluang nya minta Ruby nyadika bini aku. Aku pindah ngagai raban gempuru Ruby, lalu kami duai jadi kena taun 1959.

Lebuh aku beumur 23 taun, aku dipilih nyadi congregation servant (diatu dikumbai tuai ti ngatur raban tuai gempuru) ba Gallatin. Menyadi Charles Thompson baru aja nyadi tuai ti ngabas lebuh iya ngelawa raban gempuru kami. Iya bisi mayuh pengalaman, tang iya nanya runding aku pasal utai ti diguna bala menyadi sereta baka ni tuai ti ngabas kebukai ngintu utai ti diguna raban gempuru. Ari  teladan iya, aku belajar manah agi nanya sereta nemu semua fakta iya sebedau ngaga pemutus.

Kena bulan Mei 1964, aku dikangau ngagai Sekula Bup Kudus ke Menyadi ti Dipilih ke dipejalaika pengelama sebulan ba South Lansing, New York. Bala menyadi lelaki ke ngajar ba sekula nya ngasuh aku keran deka belajarka mayuh agi pasal Jehovah sereta majak semak agi ngagai Iya.

Kena bulan Januari 1965, pampang opis minta aku nyadi tuai ti ngabas lalu ngabas raban gempuru enggau Ruby. Pengawa ngabas raban gempuru kami ti keterubah nyengkaum endur ti besai ari Knoxville, Tennessee, nyauka ngagai Richmond, Virginia. Tu mega nyengkaum raban gempuru ba North Carolina, Kentucky, enggau West Virginia. Aku semina ngelawa raban gempuru bala menyadi ke bekulit chelum laban undang-undang ba begian selatan Amerika Serikat enda ngemendarka orang bekulit chelum begulai begempuru enggau orang bekulit putih. Bala menyadi dia amat miskin, lalu kami belajar bekunsika utai ti dikemisi kami enggau sida ke amat begunaka nya. Siku menyadi lelaki ke udah lama nyadi tuai ti ngabas ngajar aku siti utai ti amat penting: “Jadi meh siku menyadi. Anang ngelawa siti raban gempuru lalu ngaga diri baka bos sida. Nuan semina ulih nulung sida enti sida ngasaika nuan nya menyadi sida.”

Lebuh kami ngelawa siti raban gempuru ti mit, Ruby berengkah belajarka Bup Kudus enggau siku indu ti biak ke bisi siku anak indu ti beumur setaun. Tang nadai orang ba raban gempuru nya ulih belajarka Bup Kudus enggau indu nya. Nya alai, Ruby neruska pengawa belajar nya nengah surat. Lebuh kami datai ngabas raban gempuru nya baru, indu nya datai ngagai tiap iti gempuru. Lebuh dua iku menyadi indu ke nyadi pengerintis spesial pindah ngagai endur nya, seduai iya neruska pengawa belajarka Bup Kudus nya. Enda lama udah nya, indu nya pan dibaptisa. Ba taun 1995, kira-kira 30 taun udah nya, siku menyadi indu ti biak datai bejaku enggau Ruby ba Betel Patterson. Menyadi indu ti biak nya anak indu ke kala diajar Ruby. Menyadi indu nya enggau laki iya pemelajar ba kelas ke-100 Sekula Gilead.

Pengawa ngabas pelilih ti kedua kami nyengkaum begian tengah Florida. Kira-kira maya nya, kami begunaka siti kerita. Nya alai, kami meli siti enggau rega ti amat manah. Tang ba minggu ti keterubah, bisi utai jai ba kerita nya. Kami nadai agi duit kena ngaduka iya. Aku ngiga siku menyadi ke ditemu aku engka ulih nulung kami. Iya minta siku pekereja iya ngaduka kerita nya. Tang iya nadai minta bayar kena ngadu kerita nya. Lebuh aku ka mayar, iya madah: “Enda ibuh. Nadai ngawa.” Iya enggai nerima duit aku, indah iya empu ke meri kami duit! Nya meh chunto ti manah bekaul enggau chara Jehovah nyaga nembiak Iya. Nya ngingatka kami ngambika ngayanka pengerah jari ngagai orang bukai.

Tiap kali kami ngelawa raban gempuru, kami diau ba rumah bala menyadi. Ketegal nya, kami bisi mayuh bala bakih ti manah. Bisi sekali aku berengkah naip riput pasal raban gempuru lalu ninggalka nya ba mesin taip lebuh aku pansut. Lebuh aku pulai baru maya lemai hari, aku nyau nemu anak lelaki ruang bilik nya ke beumur tiga taun udah “nulung” aku nembuka riput nya. Betaun-taun aku nundi iya pasal pekara nya.

Kena taun 1971, aku nerima siti surat ke ngasuh aku gawa nyadi tuai ti ngemataka pengawa ba pelilih di New York. Kami amat tekenyit! Lebuh kami pindah kia, aku baru beumur 34 taun. Aku menyadi ke bekulit chelum ti keterubah ke nyadi tuai ti ngemataka pengawa ba pelilih nya. Bala menyadi dia nyambut penatai aku enggau amat manah.

Ketegal aku nyadi tuai ti ngemataka pengawa ba pelilih, aku bisi peluang ngajar orang pasal Jehovah ninting ujung minggu ba gempuru besai. Mayuh ari tuai ti ngabas nya bisi pengalaman ti lebih agi ari aku. Siku ari sida meri cheramah maya aku dibaptisa suba. Siku agi menyadi ke benama Theodore Jaracz, udah nya nyadi siku ari Raban ti Ngiring. Bisi mega mayuh bala menyadi ti bepeneleba ke gawa ba Betel Brooklyn. Aku amat beterima kasih laban bala tuai ti ngabas enggau ruang bilik Betel ngasuh aku berasai nyamai. Aku empu meda bala menyadi ti ngiring tu bepanggai ba jaku Petara sereta enggau tetap ati nyukung gerempung Jehovah. Pemaruh ati sida ngasuh aku senang agi gawa nyadi tuai ti ngemataka pengawa ba pelilih.

Ba taun 1974, Raban ti Ngiring nganjung siti agi raban tuai ti ngabas kena nyadi tuai ti ngemataka pengawa ba pelilih. Ketegal nya, aku diasuh nyadi tuai ti ngabas baru, tang kali tu ba South Carolina. Maya nya, raban gempuru bala menyadi bekulit chelum enggau raban gempuru bala menyadi bekulit putih ba begian selatan Amerika Serikat enda ibuh diseraraka agi. Bala menyadi amat gaga ati pasal tu.

Ba ujung taun 1976, aku dianjung ngagai pelilih Georgia entara Atlanta enggau Columbus. Aku agi ulih ingat lebuh aku meri cheramah pemati ke lima iku anak mit ke bekulit chelum ti udah mati ketegal rumah sida ditunu orang. Indai sida tama sepital ketegal bakal. Mayuh bala menyadi ke bekulit putih enggau ke bekulit chelum datai ngagai sepital kena ngelantangka ati seduai iya. Aku ulih meda pemesai pengerindu ti diayanka bala menyadi. Lebuh nembiak Petara ngayanka pengerindu sereta penyinu ke baka tu ngagai pangan diri, sida ulih tan indah lebuh napi penusah ti balat.

Kena taun 1977, kami diasuh datai ngagai Betel Brooklyn pengelama beberapa bulan kena nulung ba siti projek. Lebuh projek nya nyauka tembu, dua iku menyadi ari Raban ti Ngiring betemu enggau aku lalu nanya sekalika Ruby enggau aku deka terus gawa ba Betel. Kami duai pan setuju.

Aku gawa ba Opis Penginjil pengelama 24 taun. Lalu ba opis nya, bala menyadi suah mutarka tanya ti sensitif sereta tusah. Pengelama betaun-taun, Raban ti Ngiring udah meri iring ti sejalai enggau prinsip Bup Kudus. Tu nulung Opis Penginjil nyaut tanya, lalu iring nya mega dikena ngelatih bala tuai ti ngabas, bala tuai gempuru, enggau bala pengerintis. Utai ke dikena ngelatih tu udah nulung mayuh orang nyadi orang Kristian ti tegap agi ba pengarap. Ketegal nya, gerempung Jehovah udah dikeringka agi.

Kena taun 1995 ngagai 2018, aku nyadi pengari pampang opis (suba dikumbai tuai ti ngemataka pengawa ba zon) lalu ngelawa mayuh pampang opis. Aku betemu enggau Komiti Pampang Opis, ruang bilik Betel, sereta pengerintis seberai tasik kena meransang sida enggau nulung sida enti sida bisi napi sebarang penanggul. Lalu kami berasai diperansang lebuh bala menyadi bekunsika pengalaman sida ngagai kami duai Ruby. Ambika chunto, ba taun 2000, kami ngelawa Rwanda. Ati kami balat ditegu lebuh kami ninga pasal chara bala menyadi dia sereta ruang bilik Betel udah selamat lebuh genocide (pengawa bebunuhka sesiti bansa) nyadi ba taun 1994. Mayuh orang ti dikesayauka sida udah mati. Taja pia, bala menyadi tu ngayanka pengarap, pengaga ati, sereta bepegai rat ba harapan sida.

Kami duai diatu udah beumur lebih ari 80 taun. Pengelama 20 taun ti udah, aku udah gawa nyadi siku ari Komiti Pampang Opis Amerika Serikat. Aku nadai kala belajar ba universiti, tang aku udah bulih pelajar ti pemadu tinggi ari Jehovah enggau gerempung Iya. Tu udah nyikap aku kena ngajar orang bukai pasal pemendar ari Bup Kudus ke ulih mai penguntung ngagai sida belama iya. (2 Kor. 3:5; 2 Tim. 2:2) Aku udah meda chara pesan ari Bup Kudus nulung orang bukai ngemansangka agi pengidup sida lalu ngembuan kaul ti rapat enggau Penempa sida. (Jas. 4:8) Lebuh kami duai ulih, Ruby enggau aku terus meransang orang bukai beterima kasihka peluang sida ke ulih belajar pasal Jehovah sereta ngajar pasal pemendar ari Bup Kudus ngagai orang bukai. Nya meh peluang ti pemadu manah ke ulih dikembuan siku nembiak Jehovah!